1 SAMUƐLƐ 21 - WE NU GALE 1995

¹ Davidi la, nɛ Yonatanɛ kpolo tɛ̃ a dɛ kɔ le i.

Davidi yu dɛ 'da nganga Ahimelɛkɛ tɛ kɔ le Nɔbɛ

² Davidi la, nɛ a hɔ tɛ 'da nganga Ahimelɛkɛ tɛ kɔ le Nɔbɛ. Ahimelɛkɛ nɛa we zɔ a, nɛ kili ba a, nɛ a gɔnɔ dati a, nɛ a aka a na: “Gulu kɛ mɔ hɔa zu mɔ kpo iko, nɛ wele do mɔ bina ni we ge nde?”

³ Nɛ Davidi gese hã a na: “Nwa Saulo ba nu a hã mi na, da dɛ kɔ wele kpo ĩ́ fala toe ɛ nɛ tombo do mi gɛ gɔ. Ma a mi tɔ́a hã winɔ 'da mi na, wa kpa mi tɛ mbe fala kpo nɛ́.

⁴ Kɔ we bina, fala kɛ mɔ do nyɔngɔmɔ kɔ mɔ boe, nɛ mɔ hã mbe mapa mɔlɔ, tabi gele nyɔngɔmɔ hã mi.”

⁵ Nɛ nganga ni tɔ̃ hã a na: “Mi do gele mapa bina, tati a mapa kɛ wa hã ma do dɔnggamɛ hã Gale ni iko. Nɛ nde mi wia we hã ma hã mɔ, fala kɛ owinɔ 'da mɔ, wa ɔ̃ do wuko kɔ̃ tũnɔ gɛ gɔ ni.”

⁶ Nɛ Davidi gese na: “Ɔ̃ ɔ̃, wa ɔ̃ do wuko gɔ. We kɛ wa ga lɛ na, lɛ tɛ ɔ̃ do wuko do 'da fala nɛ bolo gɔ. Dɛ ngɔ nɛ, omɔ bi bolonɔ 'da owinɔ 'da mi vɛ̃, lɛ la ma hã Gale. Nɛ gɛnɛ kɔ lɛ tɛa gele gɛnɛ iko ni, nɛ nde sɔɛ gɛ, gɛnɛ 'da lɛ ma hɔa santo, we kɛ lɛ hã omɔ bi bolonɔ 'da lɛ hã Gale.”

⁷ Nɛ nganga ni kala omapanɔ kɛ wa dɔngga do Gale ni, nɛ a hã ma hã Davidi. We kɛ mbé gele nyɔngɔmɔ zi bina, tati a omapanɔ wa hã do dɔnggamɛ hã Gale ni iko. Wa kala zi ma ngɔ mɛsa tɛ fala wa dɔnggɔ do nwa ni do'do, takɔ wa a mbé gele nɛ olo nɛ.

⁸ Do ngba soe ni, nɛ nde mbe wi toe 'da Saulo zi di ni boe, li a a Dɔɛgɛ. A a wi ngɔ nù Edɔmɛ, nɛ gbãlã tɛ̃ a sɔ̃ wena. A a nwa ngɔ owi fɔmɔ batanɔ 'da Saulo. A tɛa dɛ di ni we dɛ mbe mɔ kɛ ma zɔa Gale ni.

⁹ Nɛ Davidi aka 'bɔ Ahimelɛkɛ na: “Mɔ wè we kpa sɛlɛ, tabi du kɔya dɛ gɔ nde? Nwa Saulo tumba mi do gbɛngɛ tɛ wena, nɛ mi kpà fala we ba du kɔya 'da mi, tabi mbé gele tɔ̃a nu mɔ gɔ.”

¹⁰ Nɛ Ahimelɛkɛ gese na: “Mɛ dɛ a du kɔya olo Goliatɛ, be Filisti zi mɔ gbɛa a tɛ kɔ gbangɔlɔ̃ Ela i ni. Wa ia ma 'do otulu nganganɔ ni, wa lɔmbɔ 'do nɛ do gã tulu ngɔ. Mɔ kɔ̃ we ba ma, nɛ mɔ ba. 'Bali tɔ̃a nu mɛ lɛ do ma dɛ gɛ a ni.” Nɛ Davidi tɔ̃ na: “Mɔ bá ma hã mi, mi kpá sɛ dia kɔya nɛ ngɔ nɛ gɔ.”

Davidi hɔa 'da Ofilisti tɛ Gatɛ

¹¹ Do kpo soe ni, nɛ Davidi yu 'bɔ Saulo dɛ dati, nɛ a hɔa 'da Akisi, nwa ngɔ nù Gatɛ.

¹² Owi olo li nwa wa tɔ̃a hã Akisi na: “Wi gɛ a Davidi, nwa ngɔ nù Israɛlɛ gɔ nde? A a wi kɛ owukonɔ wa yɔ zi yɔla, nɛ wa ga zuma do zu li a na: ‘Saulo gbɛa Owi sɛnɛ lɛ koto kpo, nɛ Davidi gbɛa wa koto 'bu.’ ”

¹³ Davidi nɛa we zele ni, nɛ a ĩ na, ngamɔ sɛ do ɛ boe, nɛ kili nwa Akisi ba a wena.

¹⁴ Nɛ a dɛa mɔ ɔ nɛ kɛ a a wi bɔ ni we ɔkɔlɔ Ofilisti. A ma ngɔ dɛ nde nde do kɔ wa ni, nɛ a ma ngɔ yɔlɔ tɛ gbangga nu tɔanɔ. Nɛ sã nu a dɛa zurr, nɛ ma hulu dɛ tɛ nzɛlɛ a.

¹⁵ Nɛ Akisi tɔ̃ hã Owi olo li a na: “Nɛ ĩ́ vɛ̃ na, gbãlã zã wi gɛ bi do'do. Kɔ gulu kɛ nɛ tɛa do a hã mi we ge nde?

¹⁶ Nɛ lengge na, mi zɔlɔ Owi bɔ, ma kɛ nɛ tɛa do wele kɛ gɛ hã mi na, a ngba mi do yɔnda dɛa mɛnɔ 'da a ni nde? A lé sɛ kɔ tɔa 'da mi gɛ gɔ.”