1 SAMUƐLƐ 2 - WE NU GALE 1995

Ana hã iɔ̃nae hã NWA Gale

¹ Nɛ Ana sambala na: “Kɔ sila mi dunu do yangga we duzu mɛ nwa dɛa hã mi ni. We duzu NWA, ma kɛ mi nɛa ngɔ owi sɛnɛ mi, nɛ mi wia we mɔmɔ wa. Mi dɛ yangga we kɛ Gale a gbaka mi.

² “Fo santo kpo ngɔ nù gɛ ɔ nɛ nwa ni bina. Gele gale kɛ a wia we kele zu lɛ ni bina, tati a mɔ Gale kɛ lɛ dɔnggɔ mɔ ni, mɔ a mɔ wia we kele zu lɛ.

³ “Owi sɛnɛ mi, nɛ tɛ dɔnggɔ tɛ nɛ fai gɔ, nɛ tɛ tɔ̃̀ we do gɔna li gɔ, we kɛ NWA Gale kɛ a ĩ ti mɛnɔ vɛ̃, nɛ a ĩ 'bɔ ti mɛnɔ kɛ winɔ wa dɛ ni, nɛ a 'bili wenɔ 'da wa.

⁴ Nzabele 'da onga wi bolonɔ, ma gbini do'do, nɛ winɔ kɛ fo gbãlã tɛ wa bina ni wa kpa ngawi.

⁵ Owinɔ kɛ wa nyɔngɔ zi ɔ dia ni, wa tɛ fa to takɔ wa kpa nyɔngɔmɔ. Nɛ owinɔ kɛ wa fe zi wɔ ni, wa kpa mɛnɔ vɛ̃ kɛ ma wia do wa ni. Wuko ndɔlɔ a kua be sambo, nɛ naa odɔa be a sɛ 'bɔ do be bina.

⁶ Wi a nwa hã a dɛ na, wele fe, tabi wele kpasa. A dɛ na, wele le kɔ le 'da fionɔ, tabi a hɔ nza kɔ nɛ.

⁷ NWA dɛ na, wele hɔ wi sã, tabi wi kpamɔ. A fi wi nù, nɛ a ba 'bɔ wi dɛ ngɔ.

⁸ Wi kɛ a ɔ dɛ bulu nù, nɛ nwa ba a dɛ ngɔ, a fo wi sã ngɔ zubu do'do, nɛ a hã fala hã a sanga ogã winɔ, nɛ a e 'bɔ a ngɔ kpongbo nwa. We kɛ wele nùi gɛ vɛ̃ a mɔ́ NWA, wi a a hã a zĩ nyanga nɛ nganda wena.

⁹ “Gale zɔ mɔ tɛ owinɔ kɛ wa dɛ olo nu a ni. Nɛ nde owanɔ kɛ wa kɔ̃̀ we dɛ olo nu a gɔ ni, wa le sɛ tɛ tũ fala, nɛ wa fe. We kɛ ngawi dɛ mɔ mɔ́ wele ma yóló kɔ a wele nɛ gɔ.

¹⁰ NWA dɛ na, kolo o dã tɛ li nza 'di, nɛ a gbɛ owi sɛnɛ a. A gɔnɔ wenɔ gbaa tɛ ndɔti nùi vɛ̃. A hã nganda hã nwa kɛ a saka a ni. Nɛ a hã ngawi hã dɛa to nwa 'da a.”

¹¹ 'Do sambala ni, nɛ Ɛlkana si dɛ tɛ Rama 'di. Nɛ Samuɛlɛ 'bana do zu ɛ dɛ tɛ Silo, we dɛ to 'da NWA dɛ ti Heli.

Obenɔ 'da Heli

¹² Obenɔ 'da Heli, wa zi a yia wi iko, wa lénggé zi do NWA gɔ.

¹³ Gɛnɛ kɔ kɛ wa zi a onganga ni, nɛ nde wa 'danga zi mbula ngɔ mɛnɔ kɛ wa wia zi tɛ kpa kɔ̃ owinɔ ni. Fala kɛ wele kpo tɛ do sa'de we gbɛ a do dɔnggamɔ nde, nɛ wi dɛa to 'da nganga ni, 'be kanya kɛ gogo nɛ talɛ ni dɛ kɔ̃ a, nɛ a kɔlɔ do sa'de wa gi ni.

¹⁴ Nɛ a fi kanya ni kɔ kpananɔ, nɛ mulu sa'de vɛ̃ kɛ ma le nu kanya ni, nɛ a nɛ do ma hã nganga. Tɛlɛ tɛ mɛnɔ kɛ obenɔ 'da Heli wa dɛ zi sanga obe Israɛlɛ vɛ̃, kɛ wa tɛ we hã sa'de do dɔnggamɔ tɛ Silo 'di gɛ a ni.

¹⁵ Mbe nɛ dati kɛ na, wa dɔ kɛndɔ sa'de hã Gale ni, nɛ wi dɛa to 'da nganga tɛ, nɛ a tɔ̃ hã wi dɔ kɛndɔɛ na: “Mɔ hã sa'de nyɔ nyɔnga kɛ 'da nganga do tɔlɔ nɛ. A kɔ̃̀ sa'de kɛ mɔ gi ia ni gɔ. A kɔ̃a tati a tɔlɔ sa'de.”

¹⁶ Kɔ fala kɛ wi ni tɔ̃ hã wi dɛa toe ni na: “Wa dɔ kɛndɔɛ dati sɛ, nɛ 'do nɛ, nɛ mɔ ba kɛ zã mɔ kɔ̃a ni de,” nɛ wi toe gese hã a na: “Gɔ, mɔ hã ma hã mi di ngangga ni. Ní gɔ, nɛ mi ba sɛ do nga nɛ.”

¹⁷ Do dɛ na mɛ ni, nɛ obenɔ 'da Heli wa dɛa zi gã 'dã mɔ gbali NWA, we kɛ wa dɛ́ kili mɛnɔ kɛ wa dɔnggɔ do a ni gɔ.

Owi ko Samuɛlɛ wa nɛa tɛ Silo

¹⁸ Nɛ nde do 'da falanɔ ni, Samuɛlɛ tɛ dɛ toe 'da a fai dati NWA. Nɛ a he'de zi tulu linɛ we dɛ do toe ni.

¹⁹ Sabɛlɛ kpo kpo, nɛ Ana, naa Samuɛlɛ, fala nɛ kpo do wili a Ɛlkana, wa nɛ zi tɛ Silo i we hã dɔnggamɔ kɛ wa hã ma kɔ sabɛlɛ kpo kpo ni hã Gale. Nɛ 'da fala nɛ mɔ wa ni, nɛ Ana fulu tulu, nɛ a nɛ do ma hã be 'da a Samuɛlɛ.

²⁰ 'Da fala fai kɛ wa hɔ Silo 'di ni, nɛ Heli wele nu a tɛ wa, nɛ a tɔ̃ hã Ɛlkana na: “E kɔ NWA hã mbé obe hã mɔ do wala 'da wuke gɛ. Nɛ wa bá fala olo wele kɛ nɛ hã a hã NWA ni.” 'Do kɛ wa hã dɔnggamɛ 'da wa hã NWA ni, nɛ wa si dɛ 'da wa 'di.

²¹ NWA wila nu a tɛ Ana, nɛ a kua 'bɔ obulu be talɛ, do oboko be bɔa. Nɛ nde kɛ 'da Samuɛlɛ, a zi dɛ kɔ tɔa 'da NWA, nɛ a tɛ gã nɛ.

Heli dãlã do obenɔ 'da a

²² Heli dɛ zi gbɛlɛ wena. Nɛ a zila we 'dã mɛnɔ vɛ̃, kɛ benɔ 'da a wa dɛ ma dɛ 'da obe Israɛlɛ ni. Nɛ a zila 'bɔ we kɛ wa ɔ do owukonɔ, kɛ wa dɛ toe tɛ nu tɔa we le dɛ kɔ tɔa Tande 'da Gale ni,

²³ nɛ a tɔ̃ hã wa na: “Mi zila we 'dã dɛa to tɛ nɛ, kɛ winɔ vɛ̃ wa tɛ tɔ̃ nɛ ni. Gulu kɛ nɛ dɛ ni we ge nde?

²⁴ Benɔ 'daa, nɛ lá fala nɛ. We kɛ wenɔ vɛ̃ winɔ 'da nwa wa tɔ̃ dɛ ngɔ nɛ ni, ma dè gɔ.

²⁵ Fala kɛ wele dɛ 'dã mɔ do ngba a, nɛ Gale gɔnɔ we sanga tɛ ngba wa. Hã fala kɛ wele dɛ 'dã mɔ dɛ 'da NWA, nɛ wi nɛ gɔnɔ we nɛ a wio nde?” Gɛnɛ kɔ kɛ Heli dãlã do obenɔ 'da a ni, nɛ nde wa zèlè zi a gɔ. Gulu nɛ hã NWA ba zi nu a na, wa fe sɛ nga fio.

²⁶ Nɛ nde kɛ 'da Samuɛlɛ, a zi tɛ gã nɛ fai, nɛ dɛa to tɛ̃ a dɛa yangga tɛ NWA do tɛ owinɔ wena.

Gale hã etumbu hã nu fɛlɛ Heli

²⁷ Mbe wi gba olo nu Gale kpo nɛa 'da Heli we tɔ̃ olo nu NWA hã a na: “'Da fala oyaa mɔ wa zi a ti ngbá 'da nwa ngɔ nù Ezipeto ni, nɛ mi bia zi tɛ mi hã baa nɛ Aroni.

²⁸ Wi kɛ mi saka zi a kɔ nu kpala obe Israɛlɛ vɛ̃, we dɛ to nganga, wi a yaa mɔ Aroni. A zi a wi dɔ sa'de we dɔnggɔ do mi, nɛ a zi 'bɔ a wi dɔ nɔ yɔmbɛ hã mi. A he'de zi 'bɔ tuli li nɛ a efɔdɛ ni, we aka mi do we. Nɛ dɔnggamɛnɔ kɛ obe Israɛlɛ wa hã ma hã mi ni, mi hã mbee nɛ hã a do onu fɛlɛ a.

²⁹ Kɔ gulu kɛ dɔnggamɛnɔ mi ba nu mi na, wa tɛ nɛ tɛ fala dɔnggɔ do mi ni, nɛ zɔ ma yala we ge nde? Nɛ gulu kɛ nɛ kala dia nɔ sa'denɔ kɛ owinɔ 'da mi, obe Israɛlɛ, wa tɛ nɛ hã mi ni, nɛ nɛ nyɔngɔ ma takɔ nɛ gã nɛ ni we ge nde? Ma dè gɔ. Nɛ mɔ Heli, gulu kɛ mɔ dɔnggɔ benɔ 'da mɔ nɛa ngɔ mi ni we ge nde?

³⁰ Kɔ ɔ nɛ kɛ mɔ dɛa ni ni, mɔ zélé we mi NWA Gale 'da nɛ obe Israɛlɛ, mi tɔ̃ hã mɔ gɛ: Mi tɔ̃a zi hã nu fɛlɛ kula 'da mɔ na, wa sɛ fai a onganganɔ 'da mi. Kɔ da dɔ̃ ni, mi tɔ̃ na, ma sɛ 'bɔ ni gɔ. Tua kɛ mi dɔnggɔ owanɔ kɛ wa dɔnggɔ mi ni, nɛ owanɔ wa zɔ mi yala ni, mi zɔ tɛ mɛ 'bɔ wa yala.

³¹ “Mɔ zélé, mi nɛ gbɛ obe zagbãlãnɔ kɔ nu fɛlɛ kula 'da mɔ vɛ̃. Nɛ wele kpo kɔ nu fɛlɛ kula 'da mɔ dɛ́ sɛ kpasa wi gɔ.

³² Mɔ zɔ sɛ gele wele kpo tɛ dɛ toe fala dɔnggɔ do mi Gale. Nɛ mi wele sɛ nu mi tɛ ogele nu kpala obe Israɛlɛ. Nɛ nde fo sɛ kpasa wi kɔ nu fɛlɛ kula 'da mɔ bina.

³³ Gɛnɛ kɔ na mɛ ni, mi la sɛ mbe wele kɔ nu fɛlɛ mɔ do tunu li a, nɛ a sɛ a nganga 'da mi. Nɛ nde li mɔ ma lɔ sɛ, nɛ linggamɛ 'da mɔ ma mbɔkɔ sɛ do'do. Nɛ tala onu fɛlɛ mɔ, wa fe sɛ nga fio.

³⁴ “'Da fala kɛ mɔ zɔ sɛ na, benɔ 'da mɔ Hofni do Pinasi, wa fia bɔa nɛ do kpo soe kpo ni, nɛ mɔ kpa sɛ fia we mi tɔ̃ gɛ.

³⁵ 'Do kɛ wa fe sɛ ni, nɛ mi saka sɛ nganga kɛ a dɛ olo nu mi, nɛ a dɛ mɛ zã mi kɔ̃a ni. Mi hã sɛ obe kɔ nu fɛlɛ a, nɛ wa sɛ a onganganɔ 'da mi. Nɛ wa dɛ sɛ toe 'da wa fala nɛ kpo do nwa mi nɛ saka sɛ a ni fai.

³⁶ Nɛ wele kɛ a 'bana sɛ do tunu li a, kɔ nu fɛlɛ mɔ ni, a nɛ sɛ 'da nganga ni, nɛ a gu sɛ gba zugolo dati a, nɛ a gɔ 'bulu mbili do 'bulu nyɔngɔmɔ kɔ̃ a. A tɔ̃ sɛ hã nganga ni na, ɛ ala nu ɛ hã a na, a hã be to sĩ hã ɛ dɛ kɛ zã onganganɔ gɛ, sɛ a ɛ kpa 'bulu nyɔngɔmɔ we nyɔngɔ nɛ de.”