1 SAMUƐLƐ 19 - WE NU GALE 1995

Yonatanɛ kpasa Davidi

¹ Saulo tɔ̃a 'da we kɛ a fa we gbɛ Davidi ni hã be 'da a Yonatanɛ, do ogã wi ngɔ sodanɔ 'da a. Nɛ nde Yonatanɛ kɔ̃a gɛnɛ Davidi wena,

² ma kɛ a mbisa a do we nɛ na: “Baa mi Saulo fa we gbɛ mɔ. Kɔ bindɛ do titole, nɛ mɔ ɔ do sɔ̃a li, nɛ mɔ fa mbe usu fala kpo, nɛ mɔ usu tɛ mɔ di ni.

³ Lɛ nɛ sɛ do baa mi, nɛ lɛ hɔ sɛ tɛ li fɔ kɛ mɔ usu do tɛ mɔ, nɛ lɛ yolo nù dɛ di ni. Nɛ mi tɔ̃ sɛ we 'da mɔ hã a, kɔ mi ĩ ti linggamɛ 'da a dɛ ngɔ mɔ do'do, nɛ mi be sɛ gulu nɛ hã mɔ.”

⁴ Yonatanɛ dɛa na mɛ ni, nɛ a tɔ̃ we 'da Davidi hã baa a Saulo. A na: “Aa nwa, mɔ tɛ dɛ̃ 'dã mɔ do wi toe 'da mɔ Davidi gɔ. A dɛ̃ mbe 'dã mɔ kpo do mɔ gɔ. Mɔ ĩ na, mɛnɔ vɛ̃ a dɛ ni, ma gala mɔ wena.

⁵ A hɔa zi fɛna fio 'da fala a gbɛa Goliatɛ ni, nɛ NWA hã ngawi hã lɛ winɔ 'da a, nɛ lɛ nɛa ngɔ owi sɛnɛ lɛ. Mɔ zɔa ni, nɛ mɔ dɛ zi yangga wena. Kɔ gulu kɛ mɔ kɔ̃a we a tɔkɔ tɛ wi kɛ a dɛ̀ 'dã mɔ gɔ ni nù we ge nde? Gulu kɛ mɔ kɔ̃a we gbɛ Davidi ni boe nde?”

⁶ Saulo kɔ̃a gɛnɛ we 'da Yonatanɛ, nɛ a kana tɛ̃ a na: “Mi kana tɛ mi do zu li NWA na, mi gbɛ́ sɛ Davidi gɔ.”

⁷ 'Do nɛ, nɛ Yonatanɛ sa mɔ hã Davidi, nɛ a tɔ̃a 'da we ni vɛ̃ hã a. Nɛ a kã a dɛ 'da Saulo i, nɛ Davidi ndua toe 'da a ti nwa nɛ́ kɛ zi dati ni.

⁸ Mbé bolo tia sanga obe Israɛlɛ do Ofilisti, nɛ Davidi nɛa bole ni, nɛ a nɛ ngɔ Ofilisti wena, nɛ wa yu.

Mikalɛ kpasa Davidi

⁹ Mbe ngba soe kpo, nɛ 'dã hi wi kɛ NWA tombo a ni lia kɔ Saulo. A dungu nù dɛ kɔ tɔa 'da a ni, do sɛlɛ 'da a dɛ kɔ̃ a. Nɛ Davidi tɛ 'bɔ tɛ zɛ be kundi 'da a.

¹⁰ Nɛ Saulo fa na, ɛ to Davidi do sɛlɛ kɔ̃ ɛ, kɔ ɛ nda'da a do tɛ dɛlɛ tɔa. Davidi gulu sɛlɛ ni, nɛ a yu do lɔa tɛ̃ a, nɛ a usu. Nɛ sɛlɛ le zã dɛlɛ tɔa, nɛ ma 'bana dɛ di ni.

¹¹ Do kpo tũi ni, nɛ Saulo tombo Owele na, wa nɛ, kɔ wa ngɛ'dɛ Davidi kɔ tɔa 'da a i na, fala sa titole, nɛ wa gbɛ a. Nɛ nde Mikalɛ, wuke 'da Davidi zila we nɛ, nɛ a tɔ̃ hã a na: “Mɔ yù tũi gɛ gɔ, nɛ bindɛ do titole, nɛ mɔ fe sɛ.”

¹² Nɛ Mikalɛ zumu Davidi do li holo tɔa, nɛ Davidi yu, nɛ a kpasa.

¹³ 'Do nɛ, nɛ Mikalɛ ba kpikima 'da nu fɛlɛ kula 'da wa, nɛ a fi ma nù dɛ ngɔ mɔ ɔi 'da Davidi ni. A ba ndala dua, nɛ a 'dafa ma do mɔ e zu wi ngɔ nɛ, nɛ a e zu kpikima ni dɛ ngɔ nɛ. A ba 'bɔ tulu, nɛ a gu dɛ ngɔ ma.

¹⁴ Nɛ 'da fala kɛ winɔ 'da Saulo wa tɛa we ba Davidi ni, nɛ Mikalɛ tɔ̃a hã wa na, a do zɛlɛ.

¹⁵ Nɛ winɔ ni wa si, nɛ wa tɔ̃ nu nɛ hã Saulo, nɛ a gese 'bɔ mbé wa fala bɔa na, wa nɛ kɔ wa zɔ Davidi. A ba nu a hã wa na: “Nɛ bá a ngɔ mbɛto zɛlɛ 'da a tɛ do a hã mi, kɔ mi gbɛ a.”

¹⁶ Wa nɛa, nɛ wa le kɔ tɔa 'da Davidi, nɛ wa kpa kpikima ni dɛ ngɔ mɔ ɔi olo a ni, nɛ nde wa ia zu ma dɛ ngɔ ndala dua.

¹⁷ Nɛ Saulo aka Mikalɛ na: “Gulu kɛ mɔ ɔlɔ mi, nɛ mɔ e wi sɛnɛ mi, nɛ a yu ni we ge nde?” Nɛ Mikalɛ gese na: “A tɔ̃a hã mi na, mi è ɛ kɔ ɛ la gɔ, nɛ ɛ gbɛ sɛ mi.”

Davidi do Saulo wa hɔa kɔ le Nayɔtɛ

¹⁸ Davidi yu, nɛ a hɔ kɔ le Rama, nɛ a kpa Samuɛlɛ, nɛ a tɔ̃ gulu mɛnɔ vɛ̃ kɛ Saulo dɛa do a ni hã a. Nɛ Samuɛlɛ do Davidi wa kulu ngɔ tɛ Rama, nɛ wa la dɛ kɔ le Nayɔtɛ, nɛ wa ɔ dɛ di ni.

¹⁹ Ombe wele wa tɔa hã Saulo na, Davidi a tɛ kɔ le Nayɔtɛ dɔ̃ɔ do Rama,

²⁰ nɛ Saulo tumba 'bɔ ombé wele we ba a. Wa nɛa we hɔ i mɔ, nɛ wa zɔ ngɔ gili owi gba olo nu Gale, wa tɛ yɔ yɔla do he mɔ tɛ gba olo nu Gale. Nɛ Samuɛlɛ gã wi ngo wa, a tɛ mɛ 'bɔ tɛ yɔ yɔla do he mɔ fala nɛ kpo do wa. Owinɔ 'da Saulo wa nɛa we zɔ ngɔ gili Owi gba olo nu Gale ni, nɛ Hi Wi 'da Gale lia kɔ wa, nɛ wa ma tɛ mɛ 'bɔ ngɔ yɔ yɔla, do he mɔ tɛ gba olo nu Gale.

²¹ 'Da fala Saulo zila we ni, nɛ a tombo 'bɔ ombe gele wele. Wa hɔa i mɔ, nɛ Hi Wi 'da Gale lia 'bɔ kɔ wa. Nɛ Saulo tombo 'bɔ Owele fala talɛ, nɛ kpo mɛ ni ma dɛa 'bɔ tɛ̃ ɛ do wanɔ ni.

²² Nɛ Saulo kulu ngɔ, nɛ a nɛ do tɛ̃ a tɛ Rama i. A nɛa we hɔ tɛ nu kɔ̃ lì tɛ kɔ le Seku, nɛ a aka na: “Davidi do Samuɛlɛ wa a do nde?” Nɛ wa gese hã a na: “Wa tɛ Nayɔtɛ dɔ̃ɔ do Rama.”

²³ Nɛ a nɛa 'dɔkɔlɔ wa. A 'bana dɛ li wala i, nɛ Hi Wi 'da Gale le tɛ mɛ 'bɔ kɔ a. Nɛ a ma ngɔ yɔ yɔla do he mɔ tɛ gba olo nu Gale do li wala ni gbaa we hɔ Nayɔtɛ i.

²⁴ A nɛa we hɔ i mɔ, nɛ a hɔlɔ otulu tɛ̃ a vɛ̃, nɛ a yɔ yɔla, nɛ a he mɔ tɛ gba olo nu Gale dɛ li Samuɛlɛ ni. A 'bana do wila go'do a wese do tũi ni vɛ̃. Ma a wa tɔ̃a do gba we na: “Saulo hɔa tɛ mɛ 'bɔ wi gba olo nu Gale nde?”