1 SAMUƐLƐ 18 - WE NU GALE 1995

Davidi do Yonatanɛ

¹ Davidi wila we do Saulo, kɔ ma nɛa we e nɛ, nɛ Yonatanɛ, be 'da Saulo dɛa yangga do Davidi wena. Nɛ a ma ngɔ kɔ̃ gɛnɛ a ɔ nɛ kili tɛ̃ a wele nɛ ni.

² Do kpo soe ni, Saulo hã̀ zi wala hã Davidi na, a si 'da baa a i gɔ. Nɛ a 'bana dɛ 'da Saulo ni.

³ Yonatanɛ kɔ̃a zi gɛnɛ Davidi la li ngele, nɛ wa ba 'bia do a.

⁴ A hɔla tulu gɛ̃ɛ 'da a, nɛ a hã ma hã Davidi. Nɛ a hã 'bɔ otulu bolonɔ 'da a, do kɔya, do nzabele, do 'dɛ̃ ngɔ tulu bole hã Davidi.

⁵ 'Da falanɔ vɛ̃ kɛ Saulo tombo Davidi we bi bolo ni, nɛ nde a nɛ ngɔ owi sɛnɛ wa nɛa fai. Ma a Saulo ia a do gã wi ngɔ mbe osoda bolonɔ 'da a. Ma de zi tɛ owinɔ kɔ ngbo 'da nwa, do obe Israɛlɛ vɛ̃ wena.

Saulo fa we gbɛ Davidi

⁶ Do 'da fala Davidi yula tɛ gbɛ Goliatɛ, be Filisti, kɔ wa tɛ si do osodanɔ ni, nɛ owukonɔ kɔ lenɔ ngɔ nù Israɛlɛ vɛ̃ wa gɔnɔ dati nwa Saulo do zuma yangga, do yɔla, do zɛ biã, do zɛ be kundu.

⁷ Nɛ wa ga zuma na: “Saulo gbɛa owi sɛnɛ lɛ koto kpo, nɛ Davidi gbɛa wa koto 'bu.”

⁸ Saulo nɛa we zele zuma ni, nɛ ma dè tɛ̃ a gɔ. Zã a nɔ̃lɔ̃ wena, nɛ a tɔ̃ na: “Wa he mɛ na, Davidi gbɛa wa koto 'bu, nɛ nde wa na, mi gbɛa wa koto kpo iko. Wa 'bɔ di ni na, 'do gɛ, nɛ wa hã to nwa hã Davidi iko.”

⁹ Nɛ yolo dɛ di ni, nɛ Davidi 'danga li Saulo do'do.

¹⁰ Fala sa 'do nɛ, nɛ 'dã hi wi kɛ Gale tombo a ni tana Saulo, nɛ mɔ yaka zu a, nɛ a ma ngɔ dɛ mɔ kɔ tɔa 'da i ɔ nɛ wi bɔ ni. Nɛ Davidi zɛa be kundi hã a, ɔ nɛ kɛ a zɛ dɛ fai ni. 'Da fala ni nɛ nde Saulo zi do sɛlɛ 'da a dɛ kɔ̃ a.

¹¹ Nɛ a tɔ̃ do kɔ sila a na, ɛ nɛ to a, hã ɛ nda'da a do tɛ dɛlɛ tɔa. Nɛ a da sɛlɛ fala bɔa, nɛ Davidi gulu ma vɛ̃.

¹² Saulo nɛa we zɔ ni, nɛ a dɛa kili Davidi, we kɛ a ĩ wá na, NWA bɛ̃a gɛnɛ ɛ we si 'do Davidi.

¹³ Gulu nɛ a Saulo ndaka a nyɛlɛ do a do'do, nɛ a e a do gã wi ngɔ Owi bolo koto kpo na, a kpe ti wa.

¹⁴ Kɔ bolonɔ vɛ̃ Davidi bi ni, ma gànà a fala kpo gɔ, we kɛ NWA do a boe.

¹⁵ Saulo zɔa gba mɛnɔ vɛ̃ kɛ Davidi dɛ ni, nɛ kili a ba a dɛ dati fai.

¹⁶ Nɛ owinɔ ngɔ nù Israɛlɛ do Yuda vɛ, wa kɔ̃a gɛnɛ Davidi, we kɛ a hã a kpe ti wa li bolonɔ.

Davidi ba Mikalɛ be zɔnga be 'da Saulo do kɛnɛ a.

¹⁷ 'Do nɛ, nɛ Saulo lingga na, ɛ wè tɛ gbɛ Davidi do tɛ̃ ɛ gɔ, nɛ nde ɛ nɛ la a dɛ kɔ̃ Ofilisti, hã wa gbɛ a. Nɛ a tɔ̃ hã Davidi na: “Be 'da mi Merabɛ a kɛ. Kɔ fala kɛ mɔ bi bolonɔ hã NWA do nɔa sila nɛ nga soda ngboo ni, nɛ mi ba sɛ a hã mɔ do wuke 'da mɔ.”

¹⁸ Nɛ Davidi gese hã a na: “Nwa, mi a wio nde? Nu fɛlɛ kula 'da baa mi ma yala iko tɛ kɔ Israɛlɛ. Mi wè tɛ hɔ wili kɛfɛ mɔ nwa gɔ.”

¹⁹ Kɔ do fala ma wia zi na, Saulo ba Merabɛ hã Davidi do kɛnɛ a ni, nɛ a ba a hã mbe wi wili tɛ kɔ le Abɛlɛ-Mɛhola, li a a Adriɛlɛ, nɛ nde a bà a hã Davidi gɔ.

²⁰ Do fala nɛ ni, nɛ nde mbe be zɔnga be 'da Saulo, li a a Mikalɛ, a kɔ̃a gɛnɛ Davidi wena. Nɛ 'da fala Saulo zila we nɛ ni, nɛ ma de tɛ̃ a wena,

²¹ nɛ a tɔ̃a do kɔ sila a na, ɛ hã sɛ Mikalɛ hã Davidi do kɛnɛ a. Ɛ nɛ ndɔ a do bili hã Davidi na, osoda Filisti wa gbɛ a. Ki ni, mɛ a fala bɔa kɛ na Saulo kɔ̃ gɛnɛ Davidi na, a hɔ wili kɛfɛ 'da a.

²² Saulo ba nu ɛ hã owi olo li a na, wa nɛ, hã wa tɔ̃ hã Davidi do usu nɛ na: “Nwa kɔ̃ gɛnɛ mɔ wena, nɛ lɛ owi olo li a, lɛ kɔ̃ 'bɔ mɔ wena. Kɔ mɔ kɔ̃, nɛ mɔ ba be zɔnga be 'da a, hã mɔ hɔ wili kɛfɛ 'da a. Mɔ tɛ bɛ̃̀ gɔ.”

²³ Nɛ owi olo li Saulo wa tɔ̃a we ni hã Davidi, nɛ Davidi gese na: “Nɛ ĩ̀ mɛ na, we hɔ wili kɛfɛ 'da nwa mɛ a gã dɔ̃lɔ̃ li gɔ nde? Ma wè do wele ɔ nɛ mi gɛ gɔ. Mi a gbãlã wele gɔ, mi a wi sã iko.”

²⁴ Owi olo li nwa wa kpolo tɛ wa, nɛ wa tɔ̃ olo nu Davidi hã a.

²⁵ Nɛ Saulo tombo 'bɔ wa na, wa nɛ, hã wa tɔ̃ hã Davidi na: “Nwa gɔ̃ gele mɔ gɔ. A kɔ̃a na, mɔ tɛ do do'bolo nu ga wɔlɔ Ofilisti kama kpo hã ɛ 'dɔkɔlɔ wuke 'da mɔ. We kɛ Ofilisti wa a owi sɛnɛ a, nɛ a kɔ̃a we bili nu gbã nɛ hã wa.” Nɛ nde Saulo lengge zi na, ɛ dɛ ni, nɛ Ofilisti wa gbɛ sɛ Davidi iko.

²⁶ Owi olo li nwa Saulo wa tɔ̃a wenɔ ni hã Davidi, nɛ a kɔ̃a gɛnɛ kɛnɔ vɛ̃ Saulo tɔ̃a na, a dɛ, takɔ a hɔ wili kɛfɛ 'da a ni. Dati kɛ na kɔ̃ tũ ba ngba wi ma we ni,

²⁷ nɛ Davidi do osodanɔ 'da a wa nɛa bolo, nɛ wa gbɛ Ofilisti kama bɔa. Nɛ a 'bili do'bolo nu ga wa, nɛ a tɛ do ma, nɛ a tɔlɔ ma vɛ̃ dɛ dati Saulo ni. Saulo zɔa ni, nɛ a ba be zɔnga be 'da a hã Davidi do kɛnɛ a.

²⁸ Yolo do di ni, nɛ Saulo ĩ wá na, nwa do Davidi fala nɛ kpo. Nɛ a ĩ 'bɔ na, be 'da a Mikalɛ kɔ̃ Davidi wena.

²⁹ Nɛ kili Davidi ba a wena, nɛ nde a 'bana tɛ sɛnɛ a fai.

³⁰ Do 'da fala ni, osoda Filisti wa bi zi osoda Israɛlɛ wena. Nɛ nde kɔ bolonɔ ni kpo kpo, ngawi 'da Davidi nɛa zi ngɔ tala ogã wi ngɔ sodanɔ 'da Saulo vɛ̃. Nɛ a kpa zi gã dɔ̃lɔ̃ li wena we duzu ma.