1 SAMUƐLƐ 16 - WE NU GALE 1995

Gale saka Davidi do nwa ngɔ nù Israɛlɛ

¹ NWA tɔ̃a hã Samuɛlɛ na: “Mɔ nɛ he kɔ̃a Saulo hia fai nde? Mi bɛ̃a gɛnɛ a ia, a 'bɔ mbé nɛ a nwa ngɔ nù Israɛlɛ gɔ. Na mɛ ni, mɔ kúlú ngɔ, kɔ mɔ bá daka nɔɛ 'da mɔ, kɔ mɔ nɛ́ 'da mbe wi wili kpo tɛ kɔ le Bɛtleɛmɛ, li a a Yɛse. We kɛ mi saka nwa kɛ mi kɔ̃a a ni sanga obenɔ 'da a.”

² Nɛ Samuɛlɛ aka na: “Mi nɛ dɛ nɛ nɛ nde? Saulo zele we nɛ, nɛ a gbɛ sɛ mi.” Nɛ nwa gese hã a na: “Mɔ bá be wili ngɔmbɔ nɛ do a, nɛ mɔ tɔ̃ na, ɛ tɛa we gbɛ sa'de we dɔnggɔ do mi.

³ Nɛ mɔ sa mɔ hã Yɛse na, a tɛ we dɔnggamɛ ni. Nɛ mi be sɛ mɛ mɔ wia tɛ dɛ nɛ ni hã mɔ. Mɔ a sɛ nɔ zu wi kɛ mi be sɛ kɔ̃ mi tɛ̃ a na, a hɔ nwa ni.”

⁴ Samuɛlɛ dɛa nɛ́ kɛ nwa tɔ̃a hã a ni. Nɛ a nɛa Bɛtleɛmɛ i. Okumu le ni wa zɔa a, nɛ wa tɛ we kpa a, nɛ nde sila wa dɛ ngɔ wena. Nɛ wa aka a na: “Aa wi zɔ mɔ, mɔ tɛa do dia kɔ sila nde?”

⁵ Nɛ Samuɛlɛ kɔ̃a, nɛ a tɔ̃ na: “Mi tɛa we hã dɔnggamɔ hã NWA. Kɔ nɛ fɔ́lɔ́ tɛ nɛ we hɔ sa wi li Gale, takɔ nɛ tɛ we mba do mi tɛ dɔnggamɛ gɛ.” Nɛ Samuɛlɛ sa tɛ mɛ 'bɔ mɔ hã Yɛse do obenɔ 'da a na, wa fɔlɔ tɛ wa we hɔ sa wi li Gale, takɔ wa tɛ tɛ fala dɔnggamɛ.

⁶ Yɛse do obenɔ 'da a, wa nɛa we hɔ nɛ, nɛ Samuɛlɛ zɔ Eliabɛ, be 'da Yɛse, nɛ a ma ngɔ lengge do kɔ sila a na: “Kafi bina, wi nwa saka a we hɔ nwa gɛ a ni.”

⁷ Nɛ nwa tɔ̃ hã a na: “Mɔ tɛ zɔ̀ ngala a do dia kili tɛ̃ a, kɔ ma ɔlɔ mɔ gɔ, we kɛ mi bɛ̃a gɛnɛ a. Mi NWA, mi zɔ́ mɔ ɔ nɛ kɛ Owele wa zɔ ni gɔ. Wele zɔ a mɔ kɛ ma be tɛ̃ ɛ dɛ nza ni, nɛ nde mi, mi zɔ kɔ sila wele.”

⁸ 'Do nɛ, nɛ Yɛse sa mɔ hã be 'da a Abinadabɛ na, a hɔ dati Samuɛlɛ. A hɔa, nɛ Samuɛlɛ na: “NWA a sàkà 'bɔ wele kɛ gɛ gɔ.”

⁹ Yɛse tili Sama, nɛ Samuɛlɛ na: “NWA sàkà 'bɔ wele kɛ gɛ gɔ.”

¹⁰ Na mɛ ni, nɛ Yɛse bia obulu be sambo kɔ obenɔ 'da a tɛ dati Samuɛlɛ. Nɛ Samuɛlɛ tɔ̃ hã a na: “NWA sàkà wele kpo kɔ wa gɔ.”

¹¹ Nɛ Samuɛlɛ aka 'bɔ na: “Obulu benɔ 'da mɔ vɛ̃ hã wa hɔa dati mi ia ni nde?” Nɛ Yɛse gese na: “Tala bulu be nɛ 'bana kpo, nɛ nde a zɔ mɔ tɛ obatanɔ.” Nɛ Samuɛlɛ na: “Mɔ tómbó 'do a, kɔ a tɛ. A hɔ́ gɔ, nɛ nde lɛ hã́ sɛ dɔnggamɛ gɔ.”

¹² Nɛ Yɛse tombo 'do a, nɛ a tɛa. A de zi zagbãlã wena. Bula li a de wena, nɛ li a sɔ wena. Nɛ NWA tɔ̃ hã Samuɛlɛ na: “Mi saka a, mɔ á nɔɛ zu a na, a hɔ nwa.”

¹³ Samuɛlɛ ba daka nɔɛ, nɛ a a ma dɛ zu Davidi dɛ gbali onya a ni. A nɛa we a nɔɛ zu a, nɛ Hi Wi 'da nwa lia kɔ Davidi, nɛ yolo dɛ di ni, NWA zi do a fala nɛ kpo. Nɛ 'do nɛ, nɛ Samuɛlɛ kpula tɛ̃ ɛ dɛ Rama i.

Davidi lia to kɔ̃ nwa Saulo

¹⁴ Do 'da fala ni, nɛ nde Hi Wi 'da nwa fua zi tɛ̃ ɛ kɔ Saulo do'do. Nɛ nwa tumba 'dã hi wi na, a yɛkɛ Saulo.

¹⁵ Owi tonɔ 'da a wa nɛa we zɔ ni, nɛ wa tɔ̃ hã a na: “Lɛ ĩ na, Gale tumba 'dã hi wi na, a yɛkɛ mɔ.

¹⁶ Kɔ ma wia na, mɔ ba nu mɔ hã lɛ wi tonɔ 'da mɔ, nɛ lɛ fa sɛ wi zɛ be kundu hã mɔ. Kɔ fala kɛ 'dã hi wi ni ma ngɔ yɛkɛ mɔ, nɛ wi zɛ be kundi a zɛ sɛ ma, nɛ sila mɔ ma gɛ̃ sɛ.”

¹⁷ Saulo nɛa we zele we ni, nɛ a kɔ̃a, nɛ a ba nu a hã wa na, wa fá wele kɛ a ĩ ti zɛ kundu wena ni, hã wa tɛ do a hã ɛ.

¹⁸ Nɛ mbe wi toe 'da a kpo tɔ̃ na: “Yɛse kɛ a ɔ tɛ Bɛtleɛmɛ i ni, a do zagbãlã be 'da a, kɛ a zɛ kundu wena. A de zagbãlã wena, nɛ a sɔ̃ wena. A 'bɔ a dia soda, nɛ a do gbãlã zã lɛnggɛ zã a boe. NWA fala nɛ kpo do a boe.”

¹⁹ Nɛ Saulo tumba Owi to na, wa nɛ, hã wa tɔ̃ hã Yɛse na, a tombo be 'da a Davidi, kɛ a zɔ mɔ tɛ obatanɔ ni hã ɛ.

²⁰ Yɛse kpa toe ni, nɛ a ba punda, nɛ a kala mapa, do gã daka dɔ̃, do be wili dua, nɛ a a mɛnɔ ni dɛ ngɔ punda na, Davidi nɛ do ma hã Saulo.

²¹ Davidi nɛa we hɔ kɔ ngboe 'da Saulo i, nɛ a le to 'da a. Saulo kɔ̃ zi gɛnɛ a wena, nɛ a saka a na, a ɔ wi 'be mɔ bolonɔ 'dɛ ɛ.

²² Nɛ Saulo tombo to hã Yɛse na, ɛ kɔ̃a na, Davidi 'bana tɛ dɛ toe 'da ɛ fai, we kɛ ɛ kɔ̃a a wena.

²³ Yolo dɛ di ni, fala kɛ 'dã hi wi kɛ Gale tumba a ni yɛkɛ Saulo nde, nɛ Davidi ba be kundi 'dɛ ɛ, nɛ a ma ngɔ zɛ ma. Kɔ a ma ngɔ zɛ nɛ, nɛ 'dã hi wi ni la Saulo, nɛ sila a gɛ̃, nɛ a kpa dungu fio dɛ olo nɛ.