1 SAMUƐLƐ 15 - WE NU GALE 1995

Saulo bi bolo do Oamalɛkɛ

¹ Samuɛlɛ tɔ̃a hã Saulo na: “Mi a wi kɛ nwa tumba zi a we a nɔ zu mɔ, takɔ mɔ hɔ nwa ngɔ owinɔ 'da a. Kɔ mɔ zélé we NWA Gale kɛ a do nganda vɛ̃ tɔ̃a gɛ.

² A na, ɛ nɛ hã etumbu hã Oamalɛkɛ, we kɛ oyaa wa, wa bi zi obe Israɛlɛ do 'da fala wa hɔa zi nza ngɔ nù Ezipeto ni. Wa kɔ̃̀ zi na, wa la do kɔ le 'da lo gɔ.

³ Ma wia na, mɔ Saulo, mɔ nɛ kɔ mɔ bi Oamalɛkɛ, nɛ mɔ 'danga mɛnɔ 'da wa vɛ̃. Mɔ tɛ là mɔ kpo gɔ. Mɔ gbɛ́ owi wili, do owuko, do obe, do obe nzɔ be. Nɛ mɔ kúmú 'bɔ osa'denɔ 'da wa vɛ̃: ongɔmbɔ, obata, do osamo, do opunda. Mɔ tɛ èlè mɔ kpo gɔ.”

⁴ Saulo nɛa we zele ni, nɛ a ngɛmɛ li osodanɔ 'da a vɛ̃, nɛ a la do wa. Kɔ wa hɔa kɔ le Telɛmɛ, nɛ a ba do ngu'du wa we tɔlɔ ngɔ gili wa. Wa zi osoda koto kama bɔa, kɛ wa yula ngɔ nù Israɛlɛ, mba 'bɔ do osoda koto 'bu, kɛ wa yula ngɔ nù Yuda.

⁵ Nɛ Saulo la do wa. Kɔ wa nɛa we kɔlɔ do le 'da Oamalɛkɛ, nɛ wa usu tɛ mbe olo wakala lì di ni, we gbanga Oamalɛkɛ.

⁶ 'Do nɛ, nɛ a tombo to hã Okeni, owinɔ kɛ yaa wa dɛa zi dia mɔ do oyaa obe Israɛlɛ do 'da fala wa hɔa zi nza ngɔ nù Ezipeto ni, nɛ a tɔ̃ hã wa na: “Nɛ fó tɛ nɛ kɔ Oamalɛkɛ do'do, da dɛ kɔ mi gbɛ́ nɛ fala nɛ kpo do wa gɔ.” Okeni wa nɛa we zele ni, nɛ wa yu.

⁷ Nɛ Saulo do osodanɔ 'da a wa bi Oamalɛkɛ, nɛ wa nɛa ngɔ wa. Wa bi wa yolo tɛ le Havila gbaa we hɔ tɛ le Surɛ, kɛ ma ka mɔ dɛ tɛ Ezipeto ni.

⁸ Nɛ wa ba Agagɛ, nwa ngɔ Oamalɛkɛ do tunu ti a, nɛ wa gbɛ owinɔ 'da a vɛ̃.

⁹ Nɛ nde Saulo do osodanɔ 'da a, wa gbɛ̀ Agagɛ gɔ, nɛ wa gbɛ̀ 'bɔ odia sa'denɔ kɔ onadalamɛnɔ 'da a gɔ. Wa la odia batanɔ, do ongɔmbɔnɔ, do osa'de kɛ wa a gã, nɛ wa do nɔ wena ni, do obe batanɔ 'da a do tunu li wa. Nɛ wa 'dàngà 'bɔ ogele mɛnɔ vɛ̃ kɛ ma a dia ni gɔ. Wa 'danga tati a mɔ kɛ ma do gulu nɛ bina ni.

Gale bɛ̃a gɛnɛ Saulo

¹⁰ NWA tɔ̃a hã Samuɛlɛ na:

¹¹ “Mi sa tɛ mi tɛ kɛ mi ia zi Saulo do nwa ni, we kɛ a la wala 'da mi do'do, nɛ a bɛ̃a we dɛ olo nu mi.” Samuɛlɛ nɛa we zele ni, nɛ zã a nɔ̃lɔ̃ wena. Nɛ do tũi ni vɛ̃, a ala nu a hã NWA.

¹² Ma hɔa do titole belee, nɛ a nɛ we kpa Saulo. Kɔ a hɔa di ni, nɛ wa tɔ̃ hã a na, Saulo nɛa tɛ ko le Karmɛlɛ, we dɛ kpikima we dɔnggɔ do tɛ̃ ɛ wele nɛ. Nɛ a yula 'bɔ Karmɛlɛ ni, nɛ a la dɛ kɔ le Gilgalɛ.

¹³ Nɛ Samuɛlɛ nɛa 'bɔ 'do a tɛ Gilgalɛ i. Saulo nɛa we zɔ a, nɛ a na: “Samuɛlɛ, e kɔ nwa wele nu a tɛ mɔ! Mi dɛa olo nu NWA.”

¹⁴ Nɛ Samuɛlɛ aka na: “Hiamɔ gɛlɛ obatanɔ do ongɔmbɔnɔ mi zele gɛ, ma yolo do nde?”

¹⁵ Nɛ Saulo gese na: “Osodanɔ 'da mi hã wa kala osa'denɔ ni kɔ̃ Oamalɛkɛ. Wa usu odia batanɔ do odia ngɔmbɔnɔ, we gbɛ we dɔnggɔ do NWA Gale 'da mɔ. Nɛ tala mɛnɔ, lɛ kumu ma vɛ̃ ia.”

¹⁶ Nɛ Samuɛlɛ tɔ̃ hã a na: “Mɔ kpé nu mɔ! Mi nɛ tɔ̃ we kɛ NWA tɔ̃a zɛ tũi gɛ hã mi ni na, mɔ zele.” Nɛ Saulo na: “Mɔ tɔ̃́!”

¹⁷ Nɛ Samuɛlɛ na: “Gɛnɛ kɔ mɔ zɔ zi tɛ mɔ na, mɔ a wele yala iko ni, nɛ nde mɔ a nwa ngɔ onu kpala Israɛlɛ. Wi a NWA, a a nɔ zu mɔ na, mɔ hɔ nwa ngɔ obe Israɛlɛ.

¹⁸ Nɛ nde NWA a tumba mɔ li bole gɛ. Nɛ a ba nu a hã mɔ na, mɔ kumu o'dã wi Amalɛkɛ. A tɔ̃a hã mɔ na, mɔ kumu wa vɛ̃.

¹⁹ Kɔ gulu kɛ mɔ dɛ̃ olo nu a gɔ we ge nde? Gulu kɛ mɔ kala odia mɛnɔ 'da wa, nɛ mɔ dɛ mɔ kɛ ma dɛ̀ yangga tɛ Gale gɔ ni we ge nde?”

²⁰ Saulo gisa hã Samuɛlɛ na: “Mi dɛa we nu NWA. Mi nɛa bole a tumba mi we nɛ ni. Mi gbɛa Oamalɛkɛ vɛ̃, nɛ mi ba Agagɛ, nwa 'da wa, nɛ mi si do a.

²¹ Nɛ osodanɔ 'da mi, wa saka kɔ onadalamɛnɔ 'da wa, nɛ wa kala odia batanɔ do ongɔmbɔnɔ we si do wa dɛ Gilgalɛ nga, takɔ wa hã do dɔnggamɔ hã NWA Gale 'da mɔ.”

²² Nɛ Samuɛlɛ tɔ̃ 'bɔ na: “Mɔ lengge na, NWA kɔ̃a gɛnɛ dɔnggamɔ do gbɛ sa'de hã a nɛa ngɔ dɛ olo nu a nde? Ma a ni gɔ. Dɛ olo nu NWA ma dia tɛ̃ a nɛa ngɔ dɔnggɔ a do dia bata.

²³ Ĩ na, bɛ̃ we nu NWA wia kɔ̃ do 'dã mɔ dɛ sɔ̃. Nɛ 'dã mɔ wali wia kɔ̃ do 'dã mɔ sambala sɛa te. Kɔ ɔ nɛ kɛ mɔ bɛ̃a we nu NWA ni, a bɛ̃a tɛ mɛ 'bɔ gɛnɛ mɔ ia. Mɔ sɛ 'bɔ mbé nɛ a nwa ngɔ owinɔ 'da a gɔ.”

²⁴ Saulo nɛa we zele ni, nɛ a he mɔ na: “Mi dɛa 'dã mɔ! Mi bɛ̃a we nu NWA, nɛ mi bɛ̃a 'bɔ we nu mɔ. Mi dɛa kili osodanɔ 'da mi, nɛ mi dɛa linggamɛ 'da wa.

²⁵ Mi ala nu mi hã mɔ na, mɔ ele 'dã mɛ 'da mi ni, kɔ lɛ kpolo tɛ lɛ do mɔ tɛ Gilgalɛ i, takɔ mi nɛ we dɔnggɔ NWA.”

²⁶ Nɛ Samuɛlɛ gese na: “Mi bɛ̃a! Mi nɛ́ sɛ do mɔ gɔ. Kɔ ɔ nɛ kɛ mɔ bɛ̃a we nu NWA ni, a bɛ̃a tɛ mɛ 'bɔ gɛnɛ mɔ ia. Mɔ sɛ 'bɔ a nwa ngɔ obe Israɛlɛ gɔ.”

²⁷ 'Do we ni, nɛ Samuɛlɛ siki tɛ̃ ɛ we la nɛ, nɛ Saulo 'be nu gã tulu gɛ̃ɛ tɛ Samuɛlɛ ni, nɛ ma ɛ̃ dɛ kɔ̃ a.

²⁸ Nɛ Samuɛlɛ tɔ̃ hã a na: “Ɔ nɛ kɛ mɔ ɛ̃a tulu tɛ mi, nɛ ma fua ni, NWA fua tɛ mɛ 'bɔ to nwa kɔ̃ mɔ sɔɛ gɛ ia. A ba ma hã mbé wele kɛ dɛa to tɛ̃ a dia la mɔ ni.

²⁹ NWA kɛ lɛ obe Israɛlɛ lɛ gbini zã lɛ do a ni, a 'bílí bɛlɛ gɔ, nɛ a 'bɔ a wele nɛ lɛ gɛ na, a kpolo linggamɔ mɔ́ a gɔ.”

³⁰ Saulo dala nu ɛ na: “Mi dɛa 'dã mɔ! Nɛ nde mi ala nu mi hã mɔ na, mɔ é dĩ zu mi dati okumunɔ do obe Israɛlɛ. Nɛ lɛ kpóló tɛ lɛ do mɔ, takɔ mi nɛ we dɔnggɔ NWA Gale 'da mɔ.”

³¹ Samuɛlɛ nɛa we zele ni, nɛ a kpolo tɛ̃ a do a, nɛ Saulo dɔngga NWA.

³² 'Do nɛ, nɛ Samuɛlɛ ba nu ɛ na, wa tɛ do Agagɛ, nwa ngɔ Oamalɛkɛ. Agagɛ tɛa, nɛ nde sila a gɛ̃a, we kɛ a lingga na, ngamɔ fio ma fua tɛ̃ ɛ ngɔ ɛ ia.

³³ Nɛ nde Samuɛlɛ tɔ̃a hã a na: “Ɔ nɛ kɛ du kɔya bole 'da mɔ ma dɛa na, onaa be wa dungu sã olo benɔ 'da wa ni, naa mɔ a dungu sɛ tɛ mɛ 'bɔ sã olo mɔ.” Samuɛlɛ tɔ́a hã Agagɛ ni do'do, nɛ a 'bili gɛlɛ a dɛ dati Tɔa Tande 'da Gale tɛ kɔ le Gilgalɛ ni.

³⁴ 'Do nɛ, nɛ Samuɛlɛ si dɛ 'dɛ ɛ tɛ kɔ le Rama i. Nɛ Saulo si tɛ mɛ 'bɔ dɛ 'dɛ ɛ tɛ Gibea i.

³⁵ Nɛ kɔ tala dungi 'da Samuɛlɛ vɛ̃, a zɔ̀ 'bɔ mbé tɛ Saulo dati kɛ na a fe ni gɔ. A zi do 'bako wena we duzu Saulo. Nɛ NWA Gale sa tɛ̃ ɛ tɛ mɛ 'bɔ we duzu kɛ a saka zi Saulo do nwa ngɔ obe Israɛlɛ ni.