1 SAMUƐLƐ 13 - WE NU GALE 1995

Saulo bi bolo do Ofilisti

^1-2 Saulo saka osoda koto talɛ kɔ obe Israɛlɛ. Nɛ sanga osodanɔ kote talɛ ni, a saka osoda koto bɔa na, wa 'bana do a dɛ kɔ le Mikmasi ni. Nɛ tala wanɔ kote kpo ni, wa la do be 'da a Yonatanɛ, nɛ wa ɔ kɔ le Gibea, tɛ ngɔ nù Bɛnzamɛ. 'Do nɛ, nɛ a gese tala obe Israɛlɛ na, wa si dɛ nu tɔanɔ 'da wa.

³ Mbe ngba soe kpo, nɛ Yonatanɛ gbɛa gã wi ngɔ osoda Filisti tɛ kɔ le Geba. Nɛ Ofilisti vɛ̃ wa zila we nɛ. Saulo nɛa we zɔ ni, nɛ a tombo Owi dama mɔtũlũ na, wa nɛ́, kɔ wa dama mɔtũlĩ do ngɔ nù Israɛlɛ vɛ̃, we mbese obe Hebre na bolo boe.

⁴ Obe Israɛlɛ wa nɛa we zele na, Saulo gbɛa gã wi ngɔ osoda Filisti, kɔ zã Ofilisti nɔ̃lɔ̃ dɛ tɛ wa ni, nɛ wa mba ngba wa vɛ̃ dɛ 'da a tɛ kɔ le Gilgalɛ.

⁵ Nɛ osoda Filisti wa mba tɛ mɛ 'bɔ ngba wa we bi bolo do obe Israɛlɛ. Wa do ongilingili bolo 'bu koto talɛ, owi kũ mbalata koto gazɛlɛ. Nɛ osodanɔ wa dɛlɛ zi nɛ kɛnzɛ nu lì ni. Wa nɛa, nɛ wa hɔ tɛ Mikmasi, le kɛ mɔ yolo Bɛtɛ-Avɛnɛ, nɛ nde ma si 'biti gba wese. Nɛ wa 'dafa fala ɔi 'da wa dɛ di ni.

⁶ Wa 'dafa do'do, nɛ wa bi obe Israɛlɛ nganda wena. Ombe be Israɛlɛ wa nɛa we zɔ ni, nɛ wa yu, nɛ wa usu tɛ wa kɔ ota, do kɔ kɔ̃, do sanga ogã ta, do kɔ kɔ̃ lì.

⁷ Ombe wa kũ lì Yɔrdanɛ dɛ ngɔ nù Gadɛ do Galadɛ, nɛ wa usu tɛ wa di ni. Do 'da fala ni, nɛ nde Saulo 'bana dɛ Gilgalɛ ni. Nɛ osodanɔ kɛ a do wa ni, wa tana kili.

Saulo dɛa 'dã mɔ

⁸ A 'bɔa 'do tũ sambo ɔ nɛ kɛ Samuɛlɛ tɔ̃a hã a ni. Tũi ni wia, nɛ nde Samuɛlɛ hɔ Gilgalɛ i gɔ. Osodanɔ 'da Saulo wa nɛa we zɔ ni, nɛ wa ma ngɔ pɛsɛ ma, nɛ wa la Saulo.

⁹ Nɛ Saulo ba nu ɛ na, wa tɛ́ do osa'de we gbɛ we dɔnggɔ do Gale, nɛ wa tɛ 'bɔ do odɔnggamɔ kɛ ma be dɛa na. Wa tɛa do dɔnggamɛnɔ ni, nɛ a gbɛ sa'denɔ we dɔnggɔ do Gale.

¹⁰ A hã odɔnggamɛnɔ ni, kɔ ma nɛa we e nɛ, nɛ Samuɛlɛ hɔ. Saulo nɛa we zɔ a, nɛ a gɔnɔ dati a we fana a.

¹¹ Nɛ Samuɛlɛ tɔ̃ hã a na: “Mɛ mɔ dɛa ni a ge nde?” Nɛ Saulo gese na: “Mi zɔa na, mɔ hɔ do kɔ̃ tũi mɔ wia zi ni gɔ, kɔ osodanɔ wa pɛ pɛsa iko. Dɛ ngɔ nɛ, mi ĩ 'bɔ na, osoda Filisti wa mba ngba wa tɛ Mikmasi.

¹² Ma a mi lingga na, wa tɛ sɛ we bi lɛ dɛ Gilgalɛ nga, nɛ nde lɛ tɛ ĩ̀ na, nwa kɔ̃a gɛnɛ bole lɛ bi gɛ kɔ̃a ni gɔ. Gulu kɛ mi gbɛa osa'denɔ we dɔnggɔ do Gale do tɛ mi gɛ a ni.”

¹³ Samuɛlɛ nɛa we zele ni, nɛ a tɔ̃ na: “Kɛ mɔ dɛa ni a dɛa mɔ mɔ bi gbãlã zã wele. Mɔ lènggè we dɛ mbula kɛ NWA Gale 'da mɔ hã ma hã mɔ ni gɔ. Mɔ dɛ sɔ mbula ni, nɛ NWA a dɛ sɔ na, nu fɛlɛ mɔ dungu nwa ngɔ Israɛlɛ fai.

¹⁴ Nɛ nde mɔ 'danga ma ia. 'Do to nwa 'da mɔ nyɛ́lɛ́ sɛ 'bɔ gɔ. NWA Gale a kpa mbé wele kɛ zã a kɔ̃a a ni ia. A e sɛ a do nwa ngɔ owinɔ 'da a, we kɛ mɔ bɛ̃a dɛ mbula nu a.”

¹⁵ Samuɛlɛ tɔ̃a ni do'do, nɛ a kulu ngɔ tɛ Gilgalɛ ni, nɛ a la dɛ gele fala. Nɛ Saulo yolo tɛ mɛ 'bɔ Gilgalɛ do otala winɔ wa 'bana do a ni, nɛ wa la dɛ tɛ Gibea, tɛ ngɔ nù Bɛnzamɛ, we kpa osodanɔ i mɔ ni. Saulo hɔa i mɔ, nɛ a tɔlɔ osodanɔ a 'bana do wa ni. Wa zi vɛ̃ osoda kama gazɛlɛ.

¹⁶ Saulo do be 'da a Yonatanɛ, do osodanɔ 'da wa, wa 'dafa fala ɔi 'da wa tɛ Geba, tɛ ngɔ nù Bɛnzamɛ. Nɛ osoda Filisti wa ɔa tɛ mɛ 'bɔ kɛ 'da wa tɛ Mikmasi.

¹⁷ Mbe ngba soe kpo, nɛ onga soda bolonɔ 'da Ofilisti wa gɔnɔ sanga tɛ ngba wa do ngɔ gili wa talɛ. Ngɔ gili wanɔ kɛ dati ni, wa ba li wala Ofra, tɛ ngɔ nù Sualɛ.

¹⁸ Ngɔ gili wanɔ kɛ bɔa, wa ba li wala Bɛtɛ-Horoni. Nɛ tala ngo gili wa, wa ba do li ngbala le, do wala kɛ ma ka mɔ ngɔ gbangɔlɔ̃ 'da o'banggonɔ si 'biti li gba zɔ̃.

¹⁹ Do 'da falanɔ ni, nɛ nde ngɔ nù Israɛlɛ vɛ̃, fo zi wi dɛ dula kpo bina. We kɛ Ofilisti wa kɔ̃̀ zi na, obe Israɛlɛ wa ĩ ti dolo du kɔya, do gbali sɛlɛ gɔ.

²⁰ Ma wia zi na, obe Israɛlɛ wa nɛ 'da mbe wi Filisti kɛ a dɛ dula dɛa ni, sɛ nɛ a bɛngɛ nu kongo, do kpɛnɛmɔ, do wala, tabi dugbu 'da wa de.

²¹ Nɛ we bɛngɛ nu mɔ dɛa tonɔ ni, wi dɛ dulanɔ wa we zi gole nɛ gbãlã mbili kpo, fala kɛ ma ɔ do be nɛ ni. Kɔ ma ɔ do gã nɛ, nɛ wa we gole nɛ gbãlã mbili bɔa.

²² Na mɛ ni, do 'da fala bole, nɛ nde kɔ osoda Israɛlɛ vɛ̃, wi zi do du kɔya, tabi sɛlɛ tati a Saulo do be 'da a Yonatanɛ iko.

²³ Ofilisti wa tumba ngɔ gili osoda na, wa nɛ, hã wa yolo tɛ nyanga kala Mikmasi, we kpe li wala ma la do di ni ni.