1 SAMUƐLƐ 11 - WE NU GALE 1995

Saulo bi bolo do Oamoni

¹ Olo nɛ la zɛkɛ kpo, nɛ Nahasi, nwa ngɔ Oamoni nɛa do osodanɔ 'da a, nɛ wa linggi le Yabɛsi tɛ ngɔ 'bili tɛ nù Galadɛ. Owi Yabɛsi wa nɛa we zɔ ni, nɛ wa tɔ̃ hã nwa Nahasi na: “Mɔ kɔ̃, nɛ mɔ dɛ na do lɛ, nɛ lɛ kɔ̃ sɛ gɛnɛ mɔ na, mɔ ɔ nwa ngɔ lɛ.”

² Nɛ Nahasi gese hã wa na: “Mi dɛ sɛ na do nɛ. Nɛ nde mi kɔ̃a na, mi 'dɔ gbali nɛ kɛ si ngawili kɔ̃, takɔ ma ya fala tɛ obe Israɛlɛ vɛ̃, sɛ nɛ mi dɛ na do nɛ de.”

³ Okumu le ni wa nɛa we zele ní, nɛ wa tɔ̃ hã Nahasi na: “Mɔ hã tũ sambo hã lɛ, kɔ lɛ tombo Owele ngɔ nù Israɛlɛ vɛ̃. Kɔ fala kɛ wele kpo kɔ̃̀ we gala lɛ gɔ, sɛ nɛ lɛ kɔ̃ sɛ de.”

⁴ Owi nɛ tonɔ ni wa nɛa, nɛ wa hɔ kɔ le Gibea, le 'da Saulo. Nɛ wa tɔ̃ we mɛ ma la do wa ni, hã owinɔ kɔ le ni. Owinɔ wa nɛa we zele we ni, nɛ wa he wena.

⁵ Do 'da fala ni, nɛ nde Saulo yolo 'do ongɔmbɛnɔ 'da a kɔ ofɔnɔ i, nɛ a hɔ dɛ ngɔ hia kɔ̃a ni. Nɛ a aka we ĩ gulu kɛ winɔ vɛ̃ wa he ni. A nɛa we aka ni, nɛ wa tɔ́a toe 'da Owi Yabɛsi hã a.

⁶ Saulo zila toe ni, nɛ Hi Wi 'da Gale lia kɔ a, nɛ dã ba a nganda wena.

⁷ Nɛ a kala ongɔmbɔ bɔa, nɛ a 'bili sanga wa sikili sikili, nɛ a hã o'bili ngɔmbɛnɔ ni hã owi nɛ tonɔ na, wa yɛnggɛ nɛ ngɔ nù Israɛlɛ vɛ̃, nɛ wa tɔ̃ hã owinɔ na, wele kɛ a nɛ 'dɔkɔlɔ Saulo do Samuɛlɛ we bi bole gɔ, nɛ wa 'bili sɛ sanga ongɔmbɔnɔ 'da a na mɛ ni. Obe Israɛlɛ wa nɛa we zele toe ni, nɛ kili ba wa nganda wena, nɛ wa mba li ngba wa vɛ̃ kpo.

⁸ Nɛ Saulo kpa ngba a do wa tɛ kɔ le Bezɛkɛ. Wa zi vɛ̃ wi wili koto kama talɛ, tɛ ngɔ nù Israɛlɛ, nɛ wi wili 'bu koto talɛ tɛ ngɔ nù Yuda.

⁹ Wa mba ngba wa do'do, nɛ wa tombo owi tonɔ wa yula Yabɛsi i ni na, wa si, kɔ wa tɔ̃ hã owinɔ kɔ le ni vɛ̃ na: “Bindɛ, dati kɛ na wese hɔ gbogbo zu wi ni, nɛ nde nɛ kpasa ia.” Owi tonɔ wa si, nɛ wa tɔ̃ toe ni hã owinɔ kɔ le Yabɛsi. Wa nɛa we zele toe ni, nɛ wa dɛ yangga wena.

¹⁰ Nɛ wa tumba to mbana hã nwa Nahasi na: “Bindɛ, nɛ lɛ vɛ̃ lɛ nɛ sɛ, takɔ lɛ ɔ ti nwa 'da mɔ. Nɛ mɔ dɛ sɛ do lɛ, ɔ nɛ kɛ mɔ kɔ̃a ni.”

¹¹ Do tũi ni, nɛ Saulo gɔnɔ sanga owinɔ 'da a ngɔ gili wa talɛ. Nɛ do sanga titole belee, nɛ wa lia fala ɔi 'da Oamoni, wi sɛnɛ wa. Nɛ wa gbɛa wa gbaa we hɔ midi. Nɛ owanɔ wa kpasa li bole ni, wa pɛsɛ, nɛ wa yu, wele do wele ba li wala 'da a.

¹² Obe Israɛlɛ wa nɛa we zɔ ni, nɛ wa tɔ̃ hã Samuɛlɛ na: “Owinɔ wa bɛ̃a na, Saulo tɛ ɔ̃ nwa ngɔ lo gɔɛ ni, wa a do nde? Wa kálá wa dɛ nza, kɔ lɛ gbɛ wa do'do.”

¹³ Nɛ Saulo tɔ̃ na: “Wa wè tɛ gbɛ wele kpo do ngba soe gɛ gɔ. We kɛ mɛ a ngba soe kɛ NWA kpasa obe Israɛlɛ kɔ ngamɔ.”

¹⁴ 'Do nɛ, nɛ Samuɛlɛ tɔ̃ hã wa na: “Nɛ tɛ́, kɔ lɛ nɛ tɛ Gilgalɛ i, takɔ lɛ gbangba 'bɔ 'da dɛa to nwa 'da Saulo.”

¹⁵ Wa vɛ̃ wa kulu ngɔ, nɛ wa nɛ tɛ Gilgalɛ i. Wa hɔa tɛ fala dɔnggɔ Gale tɛ di ni, nɛ wa tɔ̃ 'bɔ mbé nɛ na, Saulo a nwa ngɔ lo. 'Do nɛ, nɛ wa gbɛa osa'de hã NWA Gale, we be dɛa na. Nɛ Saulo, do obe Israɛlɛ vɛ̃ wa dɛa zi gã ɛngga we be yangga 'da wa.