1 SAMUƐLƐ 10 - WE NU GALE 1995

¹ Samuɛlɛ ba daka nɔɛ kɛ a tɛa do nɛ ni, nɛ a a ma dɛ zu Saulo. Nɛ a 'be a dɛ tɛ̃ a, nɛ a na: “Wi a NWA hã a saka mɔ na, mɔ ɔ nwa ngɔ obe Israɛlɛ. Mɔ dungu sɛ nwa ngɔ wa, nɛ mɔ kpasa sɛ wa ti kɔ̃ owi sɛnɛ wa vɛ̃. Mɔ zɔ́ mɛ kɛ ma be sɛ hã mɔ na, wi a NWA hã a saka mɔ do wi ngɔ owinɔ 'da a ni ma kɛ.

² Mɔ la sɛ mi di ni, nɛ mɔ hɔ sɛ kɔ le Sɛlasa tɛ ngɔ nù Bɛnzamɛ, nɛ mɔ kpa sɛ Owele bɔa, dɔ̃ɔ do zunu 'da Rasɛlɛ, nɛ wa tɔ̃ sɛ hã mɔ na: ‘Onaa pundanɔ mɔ fa wa ni, wa kpa wa ia. Nɛ baa mɔ a lénggé 'bɔ do wa gɔ. Kɔ sila a ɔ ngɔ we duzu mɔ, nɛ a bi tɛ̃ a na, mɛ ɛ nɛ dɛ nɛ we kpa do be 'da ɛ ni a ge nde?’

³ Mɔ la sɛ ni gbaa, nɛ mɔ hɔ sɛ ti te tɛ Tabɔrɛ, fala wa dɔnggɔ do Gale ni. Nɛ mɔ kpa sɛ Owele talɛ, wa nɛ tɛ fala dɔnggɔ do Gale tɛ kɔ le Betɛlɛ. Mbé kpo a tɛ gbɔtɔ obe dua talɛ, nɛ mbé nɛ do mapa talɛ dɛ kɔ a, nɛ wele kɛ talɛ a do daka dɔ́.

⁴ Nɛ wa fana sɛ mɔ, nɛ wa hã sɛ mapa bɔa hã mɔ, nɛ mɔ kɔ̃́

⁵ 'Do nɛ, nɛ mɔ nɛ sɛ tɛ ngɔ kala 'da Gale tɛ kɔ le Gibea, tɛ fala osoda Filisti wa ɔ nɛ ni. Kɔ mɔ kɔlɔ sɛ do le ni, nɛ mɔ kpa sɛ ogili Owi gba olo nu Gale, wa yula tɛ fala dɔnggɔ do Gale ngɔ kala i, hã wa zĩ zĩlĩ. Mɔ kpa sɛ wa tɛ yɔ yɔla, do he mɔ tɛ gba olo nu Gale. Nɛ Owi zɛ kundu, do Owi zɛ biã, do Owi dama gaga, do Owi zɛ be kundu, wa do dati wa.

⁶ Nɛ 'do nɛ, nɛ Hi Wi 'da NWA ma ba sɛ mɔ, nɛ mɔ mba sɛ do wa, tɛ yɔ yɔla do he mɔ, tɛ gba olo nu Gale. Nɛ linggamɔ zu mɔ ma kpolo sɛ do'do.

⁷ Hã fala kɛ mɛnɔ ni ma dɛ tɛ̃ ɛ, nɛ mɔ dɛ́ mɛ vɛ̃ kɛ mɔ wia tɛ dɛ nɛ ni, we kɛ Gale ngboo do mɔ boe.

⁸ Mɔ gɔnɔ sɛ dati mi dɛ tɛ Gilgalɛ, nɛ mi kpa sɛ mɔ 'di mɔ. Nɛ mi gbɛ sɛ osa'de, nɛ mi dɔ wa hã Gale, nɛ mi hã sɛ 'bɔ dɔnggamɔ kɛ ma be dɛa na ni. Mɔ 'bɔ sɛ 'da mi dɛ di ni gbaa 'do tũ sambo na, mi tɛ, hã mi tɔ̃ we mɛ ma wia na mɔ dɛ ni hã mɔ.”

⁹ Saulo zila ni, kɔ a nɛ siki tɛ̃ a we la Samuɛlɛ ni, nɛ Gale kpula linggamɔ zu Saulo vɛ̃. Nɛ kɛnɔ vɛ̃ Samuɛlɛ tɔ̃a hã a ni, ma dɛa tɛ̃ ɛ do kpo soe ni.

¹⁰ Saulo wa nɛa do wi toe 'da a, nɛ wa hɔ tɛ kɔ le Gibea i, nɛ wa kpa ngba wa do ngɔ gili Owi gba olo nu Gale. A nɛa we zɔ wa ni, nɛ Hi Wi 'da Gale ba a, nɛ a mba do wa, nɛ wa yɔ yɔla, nɛ wa he mɔ tɛ gba olo nu Gale.

¹¹ Owinɔ kɛ wa ĩ zi ti a dati ni, wa nɛa we zɔ a kɔ Owi gba olo nu Gale ni, nɛ wa aka ngba wa na: “Mɛ ma dɛ Saulo, be 'da Kisi gɛ a ge nde? A tɛ mɛ 'bɔ a wi gba olo nu Gale nde?”

¹² Nɛ mbe kɔ owinɔ ni kpo aka 'bɔ na: “Nɛ owinɔ wa gba olo nu Gale gɛ, baa wa a wio nde?” Yolo dɛ di ni, wa tɔ̃ do gba we na: “Saulo hɔa tɛ mɛ 'bɔ wi gba olo nu Gale nde?”

¹³ 'Da fala zu Saulo gbisa ni, nɛ a kũ dɛ fala dɔnggɔ do Gale ngɔ kala i.

¹⁴ Wa kpa ngba wa do nya baa a, nɛ nya baa a aka wa na: “Mɔ do wi toe 'da mɔ, nɛ nɛa zi i do?” Nɛ Saulo gese na: “Lɛ nɛa zi we fa onaa pundanɔ, nɛ nde lɛ kpà wa gɔ. Ma kɛ lɛ nɛa 'bɔ we zɔ Samuɛlɛ.”

¹⁵ Nya baa a aka a na: “Mɔ tɔ̃ mbe we kɛ Samuɛlɛ wila hã nɛ ni hã mi.”

¹⁶ Nɛ Saulo gese na: “A tɔ̃̀ gele we gɔ. A tɔ̃a tati nɛ na, wa kpa onaa pundanɔ ia.” Nɛ nde Saulo tɔ̃̀ we kɛ Samuɛlɛ tɔ̃a hã a na, a hɔ sɛ nwa ni hã nya baa a gɔ.

Gale saka Saulo do nwa

¹⁷ Samuɛlɛ sa mɔ hã obe Israɛlɛ na, wa mba ngba wa tɛ fala dɔnggɔ do Gale tɛ kɔ le Mispa.

¹⁸ Wa hɔa i mɔ, nɛ a tɔ̃ hã wa na: “NWA Gale 'da nɛ obe Israɛlɛ tɔ̃a na: ‘Mi a mi fua zi nɛ obe Israɛlɛ ngɔ nù Ezipeto dɛ nza. Nɛ mi fua zi 'bɔ nɛ ti nwa ngɔ nù Ezipeto, do ti onwa ngɔ ogele nùnɔ, kɛ wa hã zi ngamɔ hã nɛ ni.

¹⁹ Wi a mi, Gale 'da nɛ, kɛ mi fua zi ongamɛnɔ, do 'bakonɔ 'da nɛ vɛ. Nɛ nde sɔɛ gɛ, nɛ bɛ̃a gɛnɛ mi, nɛ nɛ aka mi na, mi hã nwa hã nɛ. Ma a dia, kɔ nɛ mbá ngba nɛ, nu kpala nɛ do nu fɛlɛ kpo do kpo, nɛ nɛ hɔ dati mi NWA Gale.’ ”

²⁰ 'Do we ni, nɛ Samuɛlɛ tɔ̃a, nɛ nu kpala Israɛlɛ kpo kpo tili dɛ dati a. Samuɛlɛ dɛa mba'di, nɛ nwa bia kɔ̃ a tɛ nu kpala Bɛnzamɛ.

²¹ Nɛ Samuɛlɛ tɔ̃a, nɛ nu fɛlɛ kula kpo kpo kɔ nu kpala Bɛnzamɛ tili dɛ dati a, nɛ NWA bia kɔ̃ a tɛ nu fɛlɛ Matri. Owi wilinɔ kɔ nu fɛlɛ Matri, wa tili dɛ dati a, nɛ NWA be kɔ̃ ɛ tɛ Saulo, be 'da Kisi. Wa fa a, nɛ nde wa kpà a gɔ.

²² Nɛ wa aka nwa na: “A tɛa i nga tɛa nde?” Nɛ NWA gese hã wa na: “Nɛ nɛ́, nɛ kpa sɛ a sanga otolenɔ. A usu tɛ a dɛ kɔ nɛ ni.”

²³ Wa nɛa we zele ni, nɛ wa wɛlɛ tɛ wa, kɔ wa nɛ hɔ tɛ fala wa a do tolenɔ ni, nɛ wa ba Saulo dɛ nza, nɛ wa tɛ do a hã owinɔ. Wa zɔa a, nɛ nde zu a nɛa ngɔ owinɔ vɛ̃ a yula sanga wa ni.

²⁴ Nɛ Samuɛlɛ tɔ̃ hã owinɔ na; “Nɛ zɔ́, wi kɛ NWA saka a ni a kɛ. Fo wi we do a sanga lɛ gɛ bina.” Owinɔ vɛ̃ wa nɛa we zele ni, nɛ wa hia mɔ na: “E kɔ nwa 'da lɛ bana fai!”

²⁵ 'Do nɛ, nɛ Samuɛlɛ tɔlɔ mbulanɔ vɛ̃ kɛ ma zɔa dɛa to 'da nwa ni. A tɔ̃a kɛ nwa wia tɛ dɛ hã owinɔ, do kɛnɔ winɔ wa wia tɛ dɛ hã nwa ni. A tɔ̃a ni do'do, nɛ a kɔma wenɔ ni vɛ̃ dɛ kɔ 'buku, nɛ a e ma kɔ tɔa Tande 'da Gale. Nɛ a mbese obe Israɛlɛ na, wa si dɛ nu tɔanɔ 'da wa.

²⁶ Nɛ Saulo si tɛ mɛ 'bɔ dɛ 'da a tɛ kɔ le Gibea i. A nɛa we si nɛ, nɛ ombe sɔ̃a wi wili kɛ Gale wila we kɔ sila wa ni, wa si fala nɛ kpo do a.

²⁷ Nɛ nde mbe winɔ gbãlã zã wa bi bi ni, wa tɔ́a na: “Nga wele ɔ nɛ a gɛ, nɛ a nɛ kpasa lɛ nɛ nde?” Nɛ wa zɔa a yala iko, nɛ wa tɛ̃ do dia mɔ we hã hã a gɔ. Gɛnɛ kɔ na mɛ ni, nɛ nde Saulo lènggè do ma gɔ.