1 SAMUƐLƐ 1 - WE NU GALE 1995

Ana gɔa be kɔ̃ Gale

¹ Mbe wi wili kpo, a ɔ zɛ́ kɔ le Rama, tɛ ngɔ nù Efraimɛ, nù kɛ ma do okalanɔ wena ni. Li wi wili ni a Ɛlkana. A a be 'da Yɛroamɛ, nɛ a a be yaa Tohu. Nɛ a a nu fɛlɛ kula 'da Sufɛ.

² Ɛlkana kala owuko bɔa. Li wukonɔ ni a Ana do Pɛnina. Pɛnina kua obe, nɛ nde Ana kò be gɔ.

³ Sabɛlɛ kpo kpo, nɛ Ɛlkana yolo kɔ le Rama, nɛ a nɛ tɛ kɔ tɔa Gale tɛ le Silo, we sambala nwa ngɔ mɔ nyanga nza vɛ̃, do hã dɔnggamɔ hã a. Nɛ nde Heli, do obenɔ 'da a Hofni do Pinasi, wa zi a onganganɔ 'da nwa tɛ kɔ le Silo.

⁴ 'Da fala fai, Ɛlkana hã zi mbee dɔnggamɛ ni hã kɛnɛ a Pɛnina, do obenɔ 'da a. Nɛ a hã 'bɔ hã kɛnɛ a Ana,

⁵ nɛ nde mɛ zi a dia fala muli ngboo. Gɛnɛ kɔ Ana zi a ndɔlɔ, nɛ nde wili a kɔ̃a zi gɛnɛ a nɛa ngɔ gula a.

⁶ Pɛnina, gula Ana, hã zi sape hã Ana fai, we duzu kɛ a a ndɔlɔ ni.

⁷ Ma dɛ zi tɛ̃ ɛ ni sabɛlɛ kpo kpo, fala kɛ Ana nɛ tɛ Silo i ni. Ma hɔa ngba soe kpo kɔ mbe sabɛlɛ kpo, nɛ Ana ndua he kɔ̃a, nɛ a kɔ̃̀ we nyɔngɔ mɔ gɔ.

⁸ Nɛ wili a Ɛlkana aka a na: “Ana, mɔ he kɔ̃a ge nde? Mɔ bɛ̃ nyɔngɔmɔ we ge nde? Nɛ mɔ dɛ 'bako ni we ge nde? Mi dè tɛ mɔ nɛ ngɔ obulu be 'bu, kɛ na mɔ ko sɔ wa ni gɔ nde?”

⁹ 'Do nyɔngɔmɛ, nɛ Ana kulu ngɔ, nɛ a le kɔ tɔa Gale tɛ le Silo. Do 'da fala ni, nɛ nde nganga Heli dungu nù tɛ fala 'da a dɔ̃ɔ do nu tɔa Gale ni.

¹⁰ Sila Ana zɛlɛ zi wena, nɛ a sambala NWA do hia kɔ̃a na:

¹¹ “Aa NWA Gale 'da lɛ obe Israɛlɛ, mɔ zɔ̀ 'bakoe 'da mi wi toe 'da mɔ, nɛ mɔ tɛ èlè mi gɔ. Mɔ ĩ́ bako hã mi, kɔ mɔ hã be hã mi. Mi kpo mbulu hã mɔ na, fala kɛ mɔ hã a hã mi, nɛ mi ba sɛ a hã mɔ na, a dɛ toe 'da mɔ fai. Nɛ we be na, a dɛ sɛ toe 'da mɔ fai ni, wa kɛ́lɛ́ sɛ zu a gɔ.”

¹² Ana sambala, nɛ 'do a nyɛlɛ wena, nɛ nde Heli a soko a ni,

¹³ a zɔ kɛ ndala nu a yaka ni, nɛ nde a zélé lɛnggɛ gɔ, we kɛ Ana sambala do kɔ sila ɛ i. Ɔ nɛ kɛ Heli zèlè lɛnggɛ gɔ ni, nɛ a lingga na, dɔ̃ ba a ba.

¹⁴ Nɛ a tɔ̃ hã a na: “Mɔ nɛ dungu do bá dɔ̃ɛ 'da mɔ dɛ dɛ fai nde? Mɔ lá do bá dɔ̃ɛ 'da mɔ dɛ gele fala!”

¹⁵ Nɛ Ana gese hã a na: “Baa mi, dɔ̃ tɛ mi bina. Mi a wuko 'bako iko, mi nɔ̀ dɔ̃ gɔ. Mi tɛa dɛ we tɔ̃ zɛlɛ we li sila mi vɛ̃ hã NWA.

¹⁶ Mɔ tɛ bà mi ɔ nɛ vĩ zu wuko gɔ. Mi sambala 'do mi nyɛla, we duzu kɛ 'bako ba mi, nɛ sila mi zɛlɛ wena.”

¹⁷ Nɛ Heli tɔ̃ hã a na: “Mɔ sí do dia nɛ. E kɔ Gale 'da lɛ obe Israɛlɛ, a hã mɛ kɛ mɔ gɔa kɔ̃ a ni hã mɔ.”

¹⁸ Nɛ Ana gese hã Heli na: “Ma a dia, kɔ mɔ lénggé mi ɔ dia fai.” Ana si, nɛ 'bakoe 'da a ia, nɛ bula li a dia dɛ olo nɛ, nɛ a ma ngɔ nyɔngɔ mɔ.

¹⁹ Fala sa, do titole belee, nɛ Ɛlkana do nu fɛlɛ a, wa nɛ we dɔnggɔ NWA. Wa dɔnggɔ nwa do'do, nɛ wa si dɛ 'da wa tɛ Rama i. NWA zila sambala 'da Ana, nɛ a mba ngɔ te do wili a Ɛlkana,

Ana kua Samuɛlɛ

²⁰ nɛ a ba zã, nɛ a ko bulu be, nɛ a na: “Li be gɛ a Samuɛlɛ, we kɛ mi gɔa a kɔ̃ Gale.”

²¹ 'Do nɛ, nɛ Ɛlkana kulu ngɔ do nu fɛlɛ a, nɛ wa nɛ 'bɔ tɛ Silo i, we hã dɔnggamɔ hã NWA, ɔ nɛ kɛ wa dɛ kɔ sabɛlɛ kpo kpo ni, nɛ a 'dafa 'bɔ mbe gele dɔnggamɔ, we si olo mbulu hã NWA.

²² Nɛ do 'da fala ni, Ana nɛ̀ do wa gɔ. A tɔ̃a hã wili a na: “Mi kɔ̃a na mi 'bɔ, kɔ be gɔnɔ bele do'do, sɛ nɛ mi nɛ do a tɛ Silo i, nɛ mi hã a hã NWA de. Nɛ a 'bana sɛ dɛ 'di mɔ we dɛ to hã NWA.”

²³ Ɛlkana zila ni, nɛ a gese hã a na: “Ma a dia, ɔ nɛ kɛ mɔ lingga ni, kɔ mɔ 'bana dɛ dɛ do be gbaa na, a gɔnɔ bele sɛ. E kɔ NWA dɛ mbuli 'da a.” Nɛ Ana 'bana dɛ kɔ le Rama ni, we ɔmɔ be 'da a gbaa na a gɔnɔ bele.

²⁴ 'Da fala kɛ be gɔnɔ bele do'do, nɛ gɛnɛ kɔ sabɛlɛ 'da a dɔ̀ gɔ, nɛ nde Ana ba a, nɛ a nɛ do a tɛ kɔ tɔa 'da NWA tɛ Silo 'di. Wa do wili a, wa ba wili ngɔmbɔ kɛ a dɛa sabɛlɛ talɛ ni, do sani fũ kpo, do gã daka dɔ̃ kpo dɛ kɔ̃ wa.

²⁵ 'Do kɛ wa hã wili ngɔmbɛ do dɔnggamɛ hã Gale do'do ni, nɛ wa nɛa do be hã Heli.

²⁶ Nɛ Ana aka Heli na: “Baa mi, ta zu mɔ 'bana ngɔ mi nde? Mi a wuke kɛ, mbe ngba soe kpo, nɛ mi yula zi do mɔ we sambala nwa ni. Mi tɔ̃ hã mɔ do gbãlã we na, wi zi a mi.

²⁷ Mɔ zɔ́ be kɛ mi gɔa zi a kɔ Gale kɔ sambala 'da mi ni, a kɛ. NWA hã a hã mi.

²⁸ Ma kɛ mi kɔ̃a tɛ mɛ 'bɔ we hã a hã NWA. Nɛ li dungi 'da a vɛ̃, wele a sɛ a mɔ́ a.” 'Do nɛ, nɛ wa vɛ̃ wa gu gba zugolo, nɛ wa dɔnggɔ NWA.