1 Onwanɔ 9 - WE NU GALE 1995

NWA bia 'bɔ tɛ a mbé nɛ hã Salɔmɔ

¹ Nwa Salɔmɔ dɛa to tɔa Tɛmpɛloe 'da NWA Gale, do tɔa nwa 'da a, do tɔanɔ vɛ̃ kɛ a kɔ̃a zi we dɛ ma ni, kɔ ma ia do'do,

² nɛ NWA bia 'bɔ tɛ̃ ɛ hã a kpasaa ɔ nɛ kɛ zi tɛ Gabaoni i ni.

³ Nɛ NWA tɔ̃ hã a na: “Mi zila sambala ala nui 'da mɔ, nɛ mi wila nu mi tɛ tɔa Tɛmpɛloe mɔ dɛa gɛ. Ma ɔ sɛ do tɔa dɔnggɔ do mi fai. Mi zɔ sɛ mɔ tɛ ma, nɛ mi sɛ do dia sila dɛ 'da nɛ fai.

⁴ We duzu mɔ, ma wia na, mɔ dɛ mɔ tɛ mɔ do bɔlɔ nɛ, ɔ nɛ kɛ baa mɔ Davidi dɛa zi ni, nɛ mɔ dɛ olo nu mi, do mbulanɔ mi ia hã mɔ ni vɛ̃.

⁵ Mɔ dɛ ni, nɛ mi dɛ sɛ mbuli mi kpua zi hã baa mɔ Davidi na, 'da fala fai, nɛ mbe kpo kɔ obe zã a, a dungu sɛ nwa ngɔ obe Israɛlɛ ni. “

⁶ Nɛ nde fala kɛ mɔ, tabi obe zã mɔ, nɛ la fala dɔnggɔ mi, kɔ nɛ bɛ̃ we nu mi, do ombulanɔ mi ia hã nɛ ni, hã nɛ ma ngɔ dɔnggɔ ogele galenɔ,

⁷ nɛ mi fo sɛ nɛ obe Israɛlɛ, winɔ 'da mi, tɛ ngɔ nùi mi ba hã nɛ gɛ do'do. Nɛ tɔa Tɛmpɛloe, kɛ mi wila nu mi tɛ nɛ na, ma ɔ we dɔ̃lɔ̃ li 'da mi gɛ, mi da sɛ 'bɔ kɔ̃ mi tɛ nɛ do'do. Nɛ ogele winɔ vɛ̃ wa mɔmɔ sɛ nɛ obe Israɛlɛ, nɛ wa zɔ sɛ nɛ li wa yala iko.

⁸ Nɛ gã tɔa Tɛmpɛloe gɛ, ma hɔ sɛ aũ tɔa, nɛ owi la walanɔ wa zɔ sɛ ma, nɛ wa ɔngbɔ sɛ, nɛ ma ba sɛ we nu wa. Nɛ wa aka sɛ na: ‘Gulu kɛ NWA Gale dɛa do nùi gɛ, do Tɛmpɛloe gɛ ní ni we ge nde?’

⁹ Nɛ wa gese sɛ hã owinɔ ni na: ‘NWA Gale 'da obe Israɛlɛ dɛa ni, we duzu kɛ wa la fala dɔnggɔ a, kɛ a fua zi oyaa wa ngɔ nù Ezipeto dɛ nza ni do'do. Kɔ wa ia sila wa ngɔ ogele galenɔ we dɔnggɔ wa. Gulu nɛ hã a hã ngamɛnɔ gɛ vɛ̃ hã wa ni.’ ”

Salɔmɔ do Hiramɛ

¹⁰ Salɔmɔ dɛa zi to tɔa Tɛmpɛloe, do tɔa nwa 'da a 'do sabɛlɛ 'bu nɛ bɔa, nɛ ma e.

¹¹ Do 'da fala ni, Hiramɛ, nwa ngɔ nù Tirɛ, a tumba zi oma'baya sɛdrɛ, do oma'baya pinɛ, do omɔ mbalinɔ vɛ̃, kɛ nwa Salɔmɔ gɔa zi we dɛ do tɔanɔ ni. Dɛa to tɔanɔ ni nɛa we e nɛ, nɛ nwa Salɔmɔ saka gã le 'bu nɛ bɔa ngɔ 'bili tɛ nù Galile, nɛ a hã ma hã Hiramɛ.

¹² Nɛ Hiramɛ yula Tirɛ, nɛ a tɛ, nɛ a zɔ lenɔ ni, nɛ nde ma dè tɛ̃ a gɔ.

¹³ Nɛ a tɔ̃ hã Salɔmɔ na: “Ee nyae, lenɔ mɔ hã hã mi gɛ, mɛ a kɛnɔ sa li nɛ bina ge nde?” Gulu nɛ hã gbaa tia do sɔɛ gɛ, wa 'bana sa li 'bili tɛ nùi ni na Kabulɛ.

¹⁴ Gɛnɛ kɔ na mɛ ni, nɛ nde Hiramɛ tumba zi 'bɔ mɔ mbali tɔnɛ talɛ do dɔ nɛ hã Salɔmɔ.

Salɔmɔ dɛa to kpi do kpi

¹⁵ Nwa Salɔmɔ kala zi Owi dɛ kolofe, nɛ wa dɛ tɔa Tɛmpɛloe, do tɔa nwa 'da a. Nɛ wa kpe gbangɔlɛ̃, nɛ ma hɔ li fanda, nɛ wa sa li nɛ na Milo. Nɛ wa zĩ 'bɔ ongbo nu le Yeruzalɛmɛ dɛ olo nɛ. Nɛ wa 'dafa ole Hasɔrɛ, Megido do Gezɛrɛ.

¹⁶ Mba gɔ, nwa ngɔ nu Ezipeto a bi zi le Gezɛrɛ, nɛ a ba ma, nɛ a dɔ ma, nɛ a gbɛ Okanana kɔ nɛ ni vɛ̃. Dɛ 'do nɛ, nɛ a hã ma hã be zɔnga be 'da a, 'da fala a ba zi nwa Salɔmɔ ni.

¹⁷ Gulu kɛ Salɔmɔ 'dafa zi le Gezɛrɛ gɛ a ni. Nɛ a 'dafa 'bɔ le Bɛtɛ-Horoni kɛ si ba gɔtɔ,

¹⁸ do Balatɛ, do Tamarɛ. Lenɔ ni vɛ̃ ma zi tɛ li gba zɔ̃ɛ ngɔ nù Yuda.

¹⁹ Salɔmɔ dɛa 'bɔ ole we usu do nyɔngɔmɔ, do we a do ongilingili bolonɔ do ombalatanɔ 'da a. Nɛ a dɛa otɔanɔ vɛ̃ kɛ a kɔ̃a zi we dɛ ma, kɔ le Yeruzalɛmɛ ngboo, do ngɔ kala Libanɛ, do ngɔ nùnɔ 'da a vɛ̃ ni.

^20-21 Winɔ zi Salɔmɔ ia wa do Owi dɛ kolofenɔ, wi a Okanana, kɛ obe Israɛlɛ wa bi zi le 'da wa, nɛ wa ba ma, nɛ wa kala wa, nɛ nde wa gbɛ wa gɔɛ ni. Nɛ ombe wi dɛ kolofenɔ ni 'bɔ a Oamori, Ohiti, Opɛrizi, Ohivi, do Oyebuzi, kɛ wa a obe Israɛlɛ gɔ ni. Nɛ owinɔ ni wa 'bana dɛ ma tia do sɔɛ gɛ.

²² Nwa Salɔmɔ è zi obe Israɛlɛ do wi dɛ kolofe gɔ, nɛ nde wa dɛ zi a to soda, tabi wa zi a owi ngɔ sodanɔ, owi ba ngilingili, do owi kũ mbalata.

²³ Owi fɔmɔ lenɔ wa saka zi ogã wi ngɔ owi dɛ kolofenɔ kama mɔlɔ do 'bu wa mɔlɔ, nɛ wa zɔ zi mɔ tɛ dɛa tonɔ 'da nwa Salɔmɔ vɛ̃.

²⁴ 'Do kɛ be zɔnga be 'da nwa ngɔ nù Ezipeto yula kɔ Gba Ngbo Nwa 'da Davidi, nɛ a kulu dɛ kɔ tɔa nwa wa dɛa hã a ni, nɛ nwa Salɔmɔ kpia gbangɔlɛ̃, nɛ a dɛ do li fanda Milo.

²⁵ Nwa Salɔmɔ ba zi nu a na, kɔ sabɛlɛ kpo, nɛ wa dɔ osa'de fala talɛ we dɔnggɔ do Gale, nɛ wa gbɛ ombe we be dɛa na. Wa dɔ zi sa'denɔ ni hã NWA tɛ ngɔ gbagala wa dɛa hã a ni. Tɛlɛ tɛ kɛ a dɛa zi do to tɔa Tɛmpɛloe gɛ a ni.

²⁶ Nwa Salɔmɔ dɛa zi omasua tɛ le Esioni-Gebɛrɛ, kɛ ma kɔlɔ dɔ̃ɔ do Elatɛ, tɛ nu kolo gba lì Sala Tɔ̃, tɛ ngɔ nù Edɔmɛ.

²⁷ Nɛ nwa Hiramɛ saka sanga owi to kɔ masuanɔ 'da a, kɛ wa dɛa toe 'do nɛ nyɛla ni, nɛ a tombo wa hã nwa Salɔmɔ na, wa gala owinɔ 'da a kɔ toe.

²⁸ Nɛ owi to kɔ masuanɔ ni vɛ̃, wa nɛa zi tɛ ngɔ nù Ofirɛ, nɛ wa kala mɔ mbali nɛa ngɔ tɔnɛ 'bu ngɔ nɛ bɔa, nɛ wa si do ma hã nwa Salɔmɔ.