1 Onwanɔ 8 - WE NU GALE 1995

Wa ia Sanduku Gba Tɔkɛ kɔ tɔa Tɛmpɛloe

¹ Nɛ nwa Salɔmɔ sa mɔ hã okumu Israɛlɛ vɛ̃, owanɔ ngɔ nu kpalanɔ, do owanɔ ngɔ nu fɛlɛ kulanɔ vɛ̃. A sa mɔ hã wa na, wa mba li ngba wa dɛ 'da a tɛ Yeruzalɛmɛ, takɔ wa ba Sanduku Gba Tɔkɛ 'da NWA tɛ kɔ Gba Ngbo nwa 'da Davidi, kɛ wa sa 'bɔ li ma na Sioni ni, kɔ wa e ma tɛ kɔ tɔa Tɛmpɛloe i.

² Na mɛ ni, nɛ obe Israɛlɛ vɛ̃ wa mba li ngba wa do ngba soe ɛngga Ɔ ti Da, do zɛkɛ 'da sambo, kɛ wa sa li ma na zɛkɛ Etanimɛ.

³ Nɛ okumu Israɛlɛ vɛ̃, wa ngɛmɛ li ngba wa, we kã onganganɔ kɛ wa ba Sanduku Gba Tɔkɛ ni.

⁴ Nɛ onganganɔ do olevitɛnɔ wa ba ma, nɛ wa la do ma dɛ kɔ tɔa Tɛmpɛloe i. Nɛ wa ba 'bɔ tɔa Tande kpa ngba wi do Gale, mba do mɛnɔ vɛ̃ kɛ wa dɔnggɔ do a ni, nɛ wa la do ma dɛ kɔ tɔa Tɛmpɛlo i.

⁵ Nɛ nwa Salɔmɔ do obe Israɛlɛ vɛ̃, wa ngɛmɛ ngba wa dɛ dati Sanduku Gba Tɔkɛ, nɛ wa gbɛ obata do ongɔmbɔ dɛla nɛ mba mɔ ni, we dɔnggɔ do Gale.

⁶ 'Do nɛ, nɛ onganganɔ wa ba Sanduku Gba Tɔkɛ, nɛ wa nɛ do ma, nɛ wa e ma kɔ 'bili tɔa kɛ wa 'dafa we nɛ, nɛ wa sa li ma na “Fala kɛ ma santo wena” ni. Nɛ wa ia ma ngboo dɛ ti 'baka ohi mɛnɔ kɛ ma ɔ nɛ wele ni.

⁷ Ohi mɛnɔ ni wa tata zi 'baka wa, nɛ ma kele Sanduku Gba Tɔkɛ fala nɛ kpo do te ngbangboe, kɛ wa ba nɛ ni.

⁸ Ote ngbangbonɔ ni ma dulu zi wena, do tɛlɛ tɛ kɛ na, wele yolo tɛ nu 'bili tɔa ni, nɛ a zɔ ma de wena. Kɔ a yolo do nza i, nɛ a wè we zɔ ma gɔ. Otenɔ ni vɛ̃ ma 'bana dɛ di ni tia do sɔɛ gɛ.

⁹ Gele mɔ zi kɔ Sanduki ni bina, tati a tanɔ bɔa, kɛ Mɔizɛ ia zi dɛ kɔ nɛ tɛ ngɔ kala Sinai i ni. Mɛ zi a ota gba tɔkɛ kɛ NWA gba zi do obe Israɛlɛ, 'do kɛ a fua wa ngɔ nù Ezipeto dɛ nza ni.

¹⁰ Fala kɛ onganganɔ wa nɛa we hɔ nza kɔ 'bili tɔa dɔnggɔ do Gale, nɛ gba kutu kpia kɔ tɔa Tɛmpɛloe 'da NWA kpã kpã.

¹¹ We duzu gba kuti ni, onganganɔ wa wè zi 'bɔ we dɛ toe 'da wa gɔ, we kɛ NWA, kɛ a do dɔ̃lɔ̃ li vɛ̃ ni, a lia zi kɔ Tɛmpɛloe 'da a.

¹² 'Do nɛ, nɛ Salɔmɔ sambala na: “Aa NWA, mɔ tɔ̃a zi na, ɛ kɔ̃a we ɔ kɔ gba tũ.

¹³ Nɛ nde mi dɛa gã tɔa Tɛmpɛlo hã mɔ, nɛ mɛ a tɔa kɛ mɔ ɔ sɛ dɛ kɔ nɛ fai!”

Salɔmɔ tɔ̃a lɛnggɛ hã obe Israɛlɛ

¹⁴ Ɔ nɛ kɛ obe Israɛlɛ vɛ̃ wa ngɛmɛ zi li ngba wa dɛ di ni ni, nɛ Salɔmɔ siki li ɛ dɛ 'da wa, nɛ a na: “E kɔ Gale wele nu a tɛ nɛ.

¹⁵ Mi hã iɔ̃nae hã NWA Gale 'da lɛ obe Israɛlɛ! A do tɛ̃ a, a dɛa olo mbuli a kpua zi hã baa mi Davidi, 'da fala kɛ a tɔ̃a zi na,

¹⁶ yolo tɛ kɔ̃ tũi ɛ fua nɛ, obe Israɛlɛ, winɔ 'dɛ ɛ ngɔ nù Ezipeto dɛ nza ni, ɛ sàkà zi gã le kpo kɔ gã lenɔ vɛ̃ ngɔ nù Israɛlɛ na, wa dɛ tɔa Tɛmpɛlo hɛ̃ ɛ dɛ di ni, kɔ ɛ ɔ dɛ kɔ nɛ gɔ. Nɛ nde ɛ saka zi mɔ Davidi we dungu nwa ngɔ owinɔ 'dɛ ɛ, obe Israɛlɛ!”

¹⁷ Salɔmɔ tɔ̃a 'bɔ na: “ĩ na, baa mi Davidi zi do linggamɔ dɛ tɔa Tɛmpɛlo hã NWA Gale 'da lɛ obe Israɛlɛ boe.

¹⁸ Nɛ nde NWA tɔ̃a zi hã a na: ‘Linggamɛ mɔ kpa we dɛ tɔa Tɛmpɛloe hã mi ni, ma de wena.

¹⁹ Nɛ nde wi nɛ dɛ sɛ ma wi a mɔ gɔ, wi sɛ a bulu be 'da mɔ. Do gbãlã we, bulu be 'da mɔ ngboo, hã a dɛ sɛ tɔa Tɛmpɛloe ni hã mi!’ ”

²⁰ Nɛ Salɔmɔ tɔ̃ 'bɔ na: “Nɛ zɔ́ di ngangga ni, NWA dɛa mbuli a kpua zi ni. Mi dungu nwa ngɔ Israɛlɛ dɛ olo baa mi, ɔ nɛ kɛ NWA tɔ́a zi ni. Nɛ mi dɛa tɔa Tɛmpɛlo hã NWA Gale 'da lɛ obe Israɛlɛ.

²¹ Nɛ dɛ kɔ Tɛmpɛloe ni, mi 'dafa 'bɔ fala we e do Sanduku Gba Tɔkɛ, do mɛnɔ kɔ nɛ ni vɛ̃. Mɛ a gba tɔkɛ zi NWA gba do oyaa lɛ, 'da fala a fua wa ngɔ nù Ezipeto dɛ nza ni.”

Sambala 'da Salɔmɔ

²² Dɛ 'do nɛ, nɛ Salɔmɔ nɛa, nɛ a yolo dati gbagala dɔ do sa'de hã NWA, nɛ a kala kɔ a dɛ ngɔ dɛ gbali owinɔ vɛ̃.

²³ Nɛ a sambala na: “Aa NWA Gale 'da lɛ obe Israɛlɛ, fo gele gale tɛ li nza ngɔ i, do tɛ ngɔ nù gɛ ɔ nɛ mɔ ni bina! Mɔ tɛ èlè gba tɔkɛ mɔ gba zi do owinɔ 'da mɔ ni gɔ. Kɔ fala kɛ wa wele nɛ, wa dɛ mbulanɔ 'da mɔ vɛ̃, nɛ sila mɔ 'bana sɛ ngɔ wa fai.

²⁴ Mɔ dɛa mbuli kɛ mɔ kpua zi hã baa mi Davidi, wi toe 'da mɔ ni. Gbãlã we, lɛnggɛnɔ vɛ̃ kɛ mɔ tɔ̃a zi hã a ni, mɔ do tɛ mɔ, mɔ dɛa ma sɔɛ gɛ.

²⁵ Kɔ di ngangga ni, NWA Gale 'da lɛ obe Israɛlɛ, mɔ dɛ́ tɛ mɛ 'bɔ olo mbuli mɔ kpua zi hã baa mi Davidi, wi toe 'da mɔ ni. Mɔ kpua zi mbulu hã a na: ‘Fala kɛ obe zã mɔ wa dɛ mbulanɔ 'da mi, ɔ nɛ kɛ mɔ dɛa zi ni, nɛ 'da fala fai mbe kpo kɔ wa a dungu sɛ nwa ngɔ lɛ obe Israɛlɛ dɛ olo mɔ.’

²⁶ Ma kɛ mi ala nu mi hã mɔ, Gale 'da lɛ obe Israɛlɛ na, mɔ dɛ mbuli mɔ kpua zi hã baa mi Davidi, wi toe 'da mɔ ni!

²⁷ “Nɛ nde mɔ Gale, mɔ wia we ɔ sanga winɔ ngɔ nù gɛ kpaa nde? Kɛ mɔ gã nɛa ngɔ li nza nɛ ge nde gɛ, tɔlɔ do tɔa kɛ mi dɛa gɛ nde?

²⁸ Kɔ we bina, NWA Gale 'da mi, mɔ síkí li mɔ dɛ 'da mi, kɔ mɔ zélé ala nui mi ala hã mɔ kɔ sambala 'da mi sɔɛ gɛ.

²⁹ Nɛ tũ do gba wese, mɔ zɔ́ mɔ tɛ tɔa Tɛmpɛloe gɛ do dia li, tua kɛ mɛ a tɔa kɛ mɔ tɔ̃a zi na, wa dɔnggɔ sɛ mɔ dɛ kɔ nɛ. Mɔ zélé sambala mi sambala hã mɔ dɛ kɔ nɛ gɛ.

³⁰ Mɔ zélé sambala 'da mi, do kɛ 'da obe Israɛlɛ, winɔ 'da mɔ. 'Da fala kɛ wa siki li wa dɛ fala gɛ we sambala mɔ, nɛ mɔ zélé sambala 'da wa. Nɛ mɔ NWA kɛ mɔ dungu li nza i ni, mɔ zélé lɛ, nɛ mɔ fó ku'da 'dã mɛnɔ zu lɛ.

³¹ “Fala kɛ wa da wele na, a dɛa 'dã mɔ do ngba a, hã wa ngbɔkɔ a na, a tɛ dati gbagala kɔ tɔa Tɛmpɛloe 'da mɔ we kana tɛ̃ a do fio. Hã a kana tɛ̃ a na, ɛ dɛ̃ ma gɔ,

³² nɛ ma wia na mɔ nwa, kɛ mɔ dungu li nza i ni, mɔ zele ma, nɛ mɔ gɔnɔ ngbangga 'da owi tonɔ 'da mɔ. Sɛ a wi dɛ 'dã mɔ a kpa etumbu, nɛ wa ĩ ti wi bɔlɔ zu na, a do 'dã mɔ bina de.

³³ “Mbe gɔ, nɛ obe Israɛlɛ wa bɛ̃ we nu mɔ, nɛ mɔ dɛ na Owi sɛnɛ wa, wa nɛ ngɔ wa li bolo. Kɔ wa zɔ ni, hã wa gbala 'dã mɛ 'da wa, tabi wa dɔnggɔ mɔ, tabi wa sambala mɔ, kɔ wa ala nu wa hã mɔ tɛ kɔ tɔa Tɛmpɛloe gɛ,

³⁴ nɛ ma wia na mɔ nwa, kɛ mɔ dungu li nza i ni, mɔ zele wa. Nɛ mɔ fo ku'da 'dã mɛ ni zu wa, nɛ mɔ gese nùnɔ kɛ mɔ hã zi hã oyaa wa ni hã wa, tua kɛ wa a owinɔ 'da mɔ.

³⁵ “Tabi mbe gɔ, nɛ obe Israɛlɛ wa bɛ̃ we nu mɔ, nɛ mɔ kpe li nza, nɛ kolo tɛ́ 'bɔ gɔ. Kɔ wa zɔ ni, hã wa siki li wa dɛ tɛ Tɛmpɛloe gɛ we sambala mɔ, tabi wa dɔnggɔ mɔ, tabi wa ba tɛ wa dɛ nù, hã wa la fala bɛ̃ we nu mɔ nde,

³⁶ nɛ ma wia na mɔ NWA, kɛ mɔ dungu li nza i ni, mɔ zele wa. Nɛ mɔ fo ku'da 'dã mɛ ni zu wa, tua kɛ wa a owinɔ 'da mɔ. Nɛ ma wia 'bɔ na, mɔ be dia dɛa to tɛ wi hã wa. Nɛ mɔ tómbó kolo ngɔ nùi 'da mɔ, kɛ mɔ hã zi hã wa do má wa ni.

³⁷ “Mbe gɔ, nɛ gba wɔ te ngɔ nùi gɛ, tabi 'dã zɛlɛ, tabi Okpalɛnɔ ma kolo, tabi ma mbulu dɛ ngɔ, tabi odɔla do osisiwele wa te ngɔ nùi. Tabi owi sɛnɛ obe Israɛlɛ wa le gbaa dɛ kɔ lenɔ 'da wa, kɛ gba ngbo zĩ ma takpa ni, nɛ wa zɛlɛ tɛ wa. Tabi gele fɛna do gele zɛlɛ ma te 'bɔ ngɔ wa.

³⁸ Kɔ owinɔ 'da mɔ, obe Israɛlɛ, wa zɔ ni, hã wa ma ngɔ ala nu wa hã mɔ do 'bako, tabi wa siki li wa dɛ tɛ Tɛmpɛloe gɛ, kɔ wa kala kɔ̃ wa dɛ ngɔ we sambala mɔ,

³⁹ nɛ ma wia na mɔ nwa, kɛ mɔ dungu li nza i ni, mɔ zele wa, nɛ mɔ fo ku'da 'dã mɛ ni zu wa. Nɛ mɔ gala wele do wele do tɛlɛ tɛ dɛa to tɛ̃ a, do 'da kɛ mɔ ĩ ti kɔ sila a ni. Mba gɔ, mɔ zu mɔ kpo, mɔ ĩ ti kɔ sila winɔ vɛ̃.

⁴⁰ Mɔ dɛ́ na mɛ ni, takɔ lɛ obe Israɛlɛ, lɛ dɛ kili mɔ fai, tɛ 'da fala dungu nza 'da lɛ vɛ̃, kɛ lɛ dungu sɛ ngɔ nùi mɔ hã zi hã oyaa lɛ ni.

^41-42 “Mbe gɔ, nɛ gele wi kpo kɛ a a be Israɛlɛ gɔ, nɛ a ɔ nyɛlɛ wena ni, a zele we dɔ̃lɔ̃ li 'da mɔ, do we gã mɛnɔ kɛ mɔ dɛ we owinɔ 'da mɔ ni, nɛ a tɛ we dɔnggɔ mɔ, do sambala mɔ tɛ kɔ tɔa Tɛmpɛloe gɛ.

⁴³ Nɛ ma wia na mɔ NWA, kɛ mɔ dungu li nza i ni, mɔ zele a, nɛ mɔ hã mɛnɔ vɛ̃ kɛ a gɔ kɔ̃ mɔ ni hã a. Mɔ dɛ ní, nɛ owinɔ ngɔ nùi gɛ vɛ̃, wa ĩ sɛ ti mɔ, nɛ wa dɛ sɛ kili mɔ, ɔ nɛ kɛ obe Israɛlɛ, winɔ 'da mɔ, wa dɛ do kili mɔ ni. Nɛ owinɔ vɛ̃ wa ĩ sɛ na, Tɛmpɛloe mi dɛa gɛ, mɛ a mɔ́ mɔ kpaa.

⁴⁴ “Mbe gɔ, nɛ mɔ ba nu mɔ hã obe Israɛlɛ na, wa nɛ, kɔ wa bi owi sɛnɛ wa. Kɔ wa siki li wa dɛ tɛ le mɔ saka zi ma, do tɔa Tɛmpɛloe mi dɛa hã mɔ gɛ, hã wa sambala mɔ,

⁴⁵ nɛ ma wia na mɔ nwa, kɛ mɔ dungu li nza i ni, mɔ zele sambala ala nui 'da wa, nɛ mɔ gala wa li bole ni.

⁴⁶ “Aa NWA, mɔ ĩ na, fo wi zɔlɔ bɛ̃ we nu mɔ mba mba fala kpo iko ni, a bina! Ma kɛ 'da fala kpo, nɛ obe Israɛlɛ wa bɛ̃ sɛ we nu mɔ, nɛ mbe gɔ, nɛ zã mɔ ma nɔ̃lɔ̃ sɛ dɛ tɛ wa. Nɛ mɔ 'dɔlɔ sɛ wa hã owi sɛnɛ wa, nɛ mɔ dɛ na, owinɔ ni, wa kala wa do ngbá, nɛ wa si do wa ndũu dɛ kɔ lenɔ 'da wa.

⁴⁷ Nɛ nde mbe gɔ, nɛ kɔ le ngbá i mɔ ni, nɛ obe Israɛlɛ wa kpa linggamɔ, nɛ wa ma ngɔ ala nu wa hã mɔ. Nɛ wa tɔ̃ na, lo bɛ̃a we nu mɔ, lo dɛa 'dã mɔ, lo káfá gɔ!

⁴⁸ Nɛ wa gbala 'dã mɛ 'da wa do sila wa vɛ̃ tɛ le 'duli i. Kɔ 'do nɛ, hã wa siki li wa dɛ tɛ nùi kɛ mɔ hã zi hã oyaa wa ni, do tɛ le kɛ mɔ saka zi, do tɛ tɔa Tɛmpɛloe mi dɛa hã mɔ gɛ, hã wa sambala mɔ do 'da fala ni,

⁴⁹ nɛ ma wia na, mɔ nwa, kɛ mɔ dungu li nza i ni, mɔ zele sambala ala nui 'da wa, nɛ mɔ gala wa.

⁵⁰ Nɛ mɔ fo ku'da 'dã mɛ zu wa, nɛ mɔ tɛ lènggè do kɛ wa bɛ̃a we nu mɔ ni gɔ. Nɛ mɔ dɛ na, Owi sɛnɛ wa, wa dɛ mbe 'bako hã wa.

⁵¹ We duzu kɛ wa a owinɔ 'da mɔ, nɛ mɔ a wele wa, yolo tɛ ngba soe mɔ fua zi wa kɔ ngamɛ tɛ ngɔ nù Ezipeto dɛ nza ni.

⁵² “Aa NWA Gale, mɔ zélé sambala 'da mi, do kɛ 'da owinɔ 'da mɔ, 'da fala fai kɛ lɛ sɛ tɛ ala nu lɛ hã mɔ ni.

⁵³ Tua kɛ mɔ a mɔ saka lɛ kɔ owinɔ ngɔ nù gɛ vɛ̃ na, lɛ dungu owinɔ 'da mɔ, ɔ nɛ kɛ mɔ do tɛ mɔ, mɔ tɔ̃a zi do wala 'da wi toe 'da mɔ Mɔizɛ, 'da fala kɛ mɔ fua zi oyaa lɛ ngɔ nù Ezipeto dɛ nza ni.”

Salɔmɔ aka Gale na a wele nu a tɛ winɔ

⁵⁴ 'Da fala kɛ Salɔmɔ zi tɛ sambala nwa, do ala nu a hã a ni, nɛ nde a gu zi gba zugolo dɛ dati gbagala dɔ do sa'de hã Gale, nɛ a kala kɔ̃ a dɛ ngɔ. A sambala ia do'do, nɛ a kulu ngɔ,

⁵⁵ nɛ a yolo do nyanga a, nɛ a aka Gale na, a wele nu a tɛ obe Israɛlɛ vɛ̃, kɛ wa mba zi li ngba wa dɛ di ni ni. Nɛ a na:

⁵⁶ “Mi hã iɔ̃nae hã NWA kɛ a hã dungu fio hã obe Israɛlɛ, winɔ 'da a, ɔ nɛ kɛ a kpua zi mbulu nɛ hã wa ni. Tua kɛ a dɛa mbuli ni do olo tɛ nɛ vɛ̃, a èlè mɔ kpo gɔ, ɔ nɛ kɛ a kpua zi ma do wala 'da wi toe 'da a Mɔizɛ ni.

⁵⁷ Kɔ ngangga ni, mi aka NWA Gale 'da lɛ na, a ɔ do lɛ, ɔ nɛ kɛ a zi do oyaa lɛ ni. Mi aka 'bɔ a na, da dɛ kɔ a dá kɔ̃ a tɛ lɛ gɔ, nɛ da dɛ kɔ a lá fala gbaka lɛ gɔ.

⁵⁸ “Mi aka 'bɔ NWA na, a dɛ na sila lɛ 'bana ngɔ a fai, sɛ a lɛ dɛa to tɛ lɛ ɔ nɛ kɛ a kɔ̃a ni de. A dɛ 'bɔ ni, sɛ a lɛ dɛa olo nu a, do mbulanɔ a ba zi hã oyaa lɛ ni de.

⁵⁹ E kɔ ta zu NWA Gale 'da lɛ 'bana ngɔ sambala ala nui, kɛ mi sambala hã a gɛ 'da fala fai. E kɔ NWA gala obe Israɛlɛ, nɛ a gala 'bɔ nwa 'da wa fai, we kɛ wa a owinɔ 'da a.

⁶⁰ Ní, nɛ owinɔ ngɔ nù gɛ vɛ̃ wa ĩ sɛ na, tati a mɔ nwa zu mɔ kpo, mɔ a Gale, nɛ fo gele gale bina.

⁶¹ Ma wia na, nɛ ba tɛ nɛ hã NWA Gale 'da lɛ fai. Nɛ nɛ dɛ olo nu a, do mbulanɔ 'da a, ɔ nɛ kɛ nɛ dɛa sɔɛ gɛ.”

Salɔmɔ ia tɔa Tɛmpɛloe hã NWA

⁶² Nɛ nwa Salɔmɔ do obe Israɛlɛ vɛ̃, kɛ wa mba li ngba wa dɛ di ni ni, wa tɛa do odɔnggamɔ we dɔnggɔ do NWA.

⁶³ Wa gbɛa zi ongɔmbɔ koto 'bu nɛ bɔa ngɔ nɛ bɔa, do obata, do odua koto kama kpo do 'bu nɛ bɔa, we be dɛa na. Wa dɛa ni we e tɔa Tɛmpɛloe hã NWA.

⁶⁴ Do 'da fala ni, nɛ nwa Salɔmɔ ia zi gbogbo fanda vɛ̃ kɛ dati tɔa Tɛmpɛloe ni hã NWA. Nɛ a kala osa'denɔ, do odɔnggamɔ kpalɛnɔ, do Okɛndɔ sa'denɔ kɛ wa gbɛa wa we be dɛa na ni, nɛ a dɔ mɛnɔ ni vɛ̃ dɛ gbogbo fanda ni hã Gale. A dɛa ni, we kɛ gbagala tũ mɔ bole kɛ wa dɔ do sa'denɔ hã Gale ni, ma gà gɔ, nɛ ma wè zi na, wa dɔ odɔnggamɛnɔ ni vɛ̃ ngɔ nɛ gɔ.

⁶⁵ Do 'da fala nɛ ni, nɛ nwa Salɔmɔ do gba gili obe Israɛlɛ kɛ wa mba zi ngba wa ni, wa dungu ɛngga Ɔ ti Da dɛ kɔ tɔa Tɛmpɛloe 'do tũ sambo. Mɛ zi a gba gili Owele wa yula nyɛlɛ wena. Wa yula zi tɛ Lɛbo-Hamatɛ si gbãlã ngɔ, gbaa we hɔ tɛ nu lì Ezipeto si ba gɔtɔ.

⁶⁶ Ma nɛa we hɔ tɛ ngbɛ'dɛ'dɛ tũi, nɛ nwa Salɔmɔ gese obe Israɛlɛ na, wa si. Nɛ nde dati si mɔ́ wa, nɛ wa nɛa we fana nwa we hã iɔ̃nae hã a. Nɛ wa si do yangga wena, we kɛ nwa wila zi nu a tɛ wi toe 'da a Davidi do obe Israɛlɛ, winɔ 'da a.