1 Onwanɔ 6 - WE NU GALE 1995

Salɔmɔ dɛa tɔa Tɛmpɛloe

¹ 'Do kɛ obe Israɛlɛ wa hɔa zɛ́ nza ngɔ nù Ezipeto, ma la sabɛlɛ kama nalɛ do 'bu nɛ ngbɛ'dɛ'dɛ, nɛ nwa Salɔmɔ ndo nyanga dɛ tɔa Tɛmpɛloe 'da NWA Gale. A ndua zi ma do kɔ zɛkɛ 'da bɔa tabi zɛkɛ Zivɛ. 'Da fala ni, nɛ nde Salɔmɔ dungu nwa ngɔ obe Israɛlɛ la sabɛlɛ nalɛ ia.

² 'Da du tɔa Tɛmpɛloe Salɔmɔ dɛa zi hã NWA ni, mɛ a 'bu mɛtrɛ talɛ, nɛ 'da dɔ nɛ mɛtrɛ 'bu, nɛ 'da ngala nɛ dɛ ngɔ mɛtrɛ 'bu ngɔ nɛ mɔlɔ.

³ Wa dɛa zi 'bili tɔa tɛ nu tɔa Tɛmpɛloe. Nɛ 'da dɔ 'bili tɔa ni, mɛ zi a mɛtrɛ 'bu, ɔ nɛ kɛ 'da Tɛmpɛloe ni. Nɛ wa zã kɔ nɛ 'du dɛ nù we mɛtrɛ mɔlɔ.

⁴ Nɛ tɛ 'bolo zã tɔa Tɛmpɛloe, wa 'dɔlɔ zi oli holo, nɛ wa fende ote li nɛ.

⁵ Wa dɛa zi gele tɔa do etazɛ talɛ, nɛ ma lɛ tɛ̃ ɛ do 'bolo zã gã 'bili kɔ tɔa, do kɛ 'da 'bili kɔ kɛ kɔlɔ'du i ni.

⁶ Nɛ nde 'da dɔ 'bili kɔ tɔa kɛ nù nga ni, mɛ zi a mɛtrɛ bɔa do dɔ nɛ, nɛ 'da dɔ etazɛ kɛ gbogbo, mɛ a mɛtrɛ talɛ, nɛ kɛ 'da etazɛ kɛ ngɔ i, mɛ a mɛtrɛ talɛ do dɔ nɛ. Mba gɔ, 'da gã li dɛlɛ tɔa Tɛmpɛloe kɛ nza nga ni, ma wè zi kɔ̃ vɛ̃ gɔ. Gã li nɛ ma la zi ngbɛ ɛ, yolo tɛ 'bili tɔa kɛ nù nga we danga dɛ tɛ kɛnɔ ngɔ i. Gulu nɛ a wa yùlù zi ma'baya ba do zu nɛ dɛ tɛ zã tɔa yulu gɔ.

⁷ Wa sɛ zi mbɔkɔ tanɔ we dɛ do tɔa Tɛmpɛloe ni dɛ tɛ nu kɔ̃ nɛ ngɔ kala i. Gulu nɛ hã tɛ fala tɔa nga, wa wè zi we zele giti marto, tabi dɔnɔ, tabi gele 'dɛnɛ mɔ bolo gɔ.

⁸ Wa dɛa zi nu tɔa kpo tɛ si ba gɔtɔ, we le nɛ dɛ kɔ 'bili tɔa kɛ nù nga. Nɛ yolo di ni, wa kũ zi dɛ kɔ etazɛ kɛ gbogbo do ngalangala, sɛ nɛ wa danga 'bɔ do ma dɛ kɔ etazɛ kɛ ngɔ i de.

⁹ Tɛlɛ tɛ kɛ nwa Salɔmɔ dɛa zi do to tɔa Tɛmpɛloe gɛ a ni. A sɛa zi gã ma'baya sɛdrɛ, nɛ a dɛ ma do plafɔ̃.

¹⁰ Kɛ 'da gele tɔa kɛ wa dɛa zi dɛ kɛ zã tɔa Tɛmpɛloe ni, 'da ngala nɛ zi a mɛtrɛ bɔa do dɔ nɛ we etazɛ kpo kpo. Nɛ wa lɛ zi oma'baya sɛdrɛnɔ ni dɛ ngɔ 'bolo zã tɔa Tɛmpɛloe.

¹¹ Nɛ nwa wila we hã Salɔmɔ na:

¹² “Fala kɛ mɔ dɛ mbulanɔ 'da mi do olo nu mi vɛ̃, nɛ mi dɛ sɛ mbuli kɛ mi kpua zi hã baa mɔ Davidi we duzu mɔ ni.

¹³ Mi tɛ sɛ we ɔ fala nɛ kpo do owinɔ 'da mi, obe Israɛlɛ, tɛ kɔ Tɛmpɛloe kɛ mɔ tɛ dɛ ma gɛ, nɛ mi lá sɛ wa fala kpo gɔ.”

¹⁴ Tɛlɛ tɛ kɛ Salɔmɔ dɛa zi do to tɔa Tɛmpɛloe gɛ a ni.

Salɔmɔ 'dafa kɔ tɔa Tɛmpɛlo

¹⁵ Dɛa to tɔa Tɛmpɛloe nɛa we e nɛ, nɛ wa ma ngɔ kele o'bolo zã tɔa kɛ kɔ nɛ i ni do oma'baya sɛdrɛ, yolo ngɔ we to nù. Nɛ wa bɛ̃lɛ̃ kpangbata go'do tɔa etazɛ do ma'baya te pinɛ.

¹⁶ Nɛ wa kele 'bɔ odɛlɛ tɔa kɛ kɔlɔ'du i ni, yolo ngɔ we to nù do oma'baya sɛdrɛ, kɛ 'da du nɛ a mɛtrɛ 'bu. Dɛ 'do nɛ, nɛ wa 'dafa 'bɔ 'bili kɔ tɔa ni we e do Sanduku Gba Tɔkɛ, nɛ wa sa li nɛ na, fala kɛ ma santo wena.

¹⁷ Nɛ 'da du 'bili kɔ tɔa kɛ zi dɛ tɛ dati tɔa Sanduku Gba Tɔkɛ ni, mɛ zi a mɛtrɛ 'bu nɛ bɔa.

¹⁸ Wa gɛzɛ zi mɔ ɔ nɛ daka do fulɛlɛ kɛ ma bulu zala ɛ ni, tɛ ngɔ oma'bayanɔ kɛ wa kila do 'bolo zã tɔa Tɛmpɛloe ni. Wa kele zi 'bolo zã tɔanɔ vɛ̃ do ma'baya sɛdrɛ, do tɛlɛ tɛ kɛ na, wa wè we zɔ otanɔ kɛ wa dɛa do tɔa ni gɔ.

¹⁹ Nɛ wa 'dafa zi kɔ 'bili kɔ tɔa kɛ kɔlɔ'du i ni, we e do Sanduku Gba Tɔkɛ 'da NWA.

^20-21 'Da du 'bili kɔ tɔa ni, mɛ zi a mɛtrɛ 'bu, 'da dɔ nɛ mɛtrɛ 'bu, nɛ 'da ngala nɛ 'bɔ mɛtrɛ 'bu. Nɛ wa nãlã zi tɛ 'bili kɔ tɔa ni, do tɛ 'bolo zã tɔa Tɛmpɛloe vɛ̃ do dia mɔ mbali kɛ 'dɔlɔ nɛ zã nɛ bina ni. Wa kpua zi dɔkpɔ mɔ mbali dati nu tɔa ni. Nɛ wa nãlã mɔ mbali tɛ gbagala dɔ do fũ yɔmbɔ hã Gale, kɛ wa dɛa ma do ma'baya sɛdrɛ ni.

²² Na mɛ ni, wa nãlã zi mɔ mbali kɔ tɔa Tɛmpɛloe vɛ̃, mba do gbagala dɔ do fũ yɔmbɔ hã Gale, kɛ wa ia zi dɛ tɛ kɛ zã nu tɔa Sanduku Gba Tɔkɛ ni.

^23-26 Nɛ wa kala zi ma'baya te olivɛ zamɔ, nɛ wa sɛ ma do ohi mɔ bɔa, kɛ ma ɔ nɛ wele ni, nɛ ma do sala 'baka nɛ boe, nɛ wa e ma kɔ 'bili kɔ tɔa Sanduku Gba Tɔkɛ. 'Da ngala hi mɔ kpo kpo, mɛ zi a mɛtrɛ mɔlɔ. 'Da du 'baka hi mɛ kɛ dati, mɛ zi a mɛtrɛ bɔa do dɔ nɛ, nɛ yolo tɛ nu 'baka hi mɔ kpo we hɔ tɛ nu mbee nɛ, ma mba zi vɛ̃ mɛtrɛ mɔlɔ. Nɛ 'da ngala hi mɔ kɛ bɔa, mɛ zi 'bɔ a mɛtrɛ mɔlɔ. Nɛ a wia zi kɔ̃ do wele kɛ dati ni, do 'da kili tɛ̃ a vɛ̃.

²⁷ Wa kala hi mɛnɔ bɔa ni, nɛ wa e ma tɛ gbogbo tɔa Sanduku Gba Tɔkɛ. Wa tata zi 'baka wa do tɛlɛ tɛ kɛ na, 'baka hi mɛ kɛ dati ma nɛa, nɛ ma to dɛlɛ tɔa, nɛ 'baka wele kɛ bɔa ma to tɛ mɛ 'bɔ mbee dɛlɛ tɔa. Nɛ otala 'baka wa ni, ma tusa ngbɛ ɛ dɛ gbogbo tɔa.

²⁸ Nɛ wa nãlã mɔ mbali tɛ ohi mɛnɔ ni bɔa nɛ.

²⁹ Wa sɛa zi 'bɔ ohi mɔ, kɛ ma ɔ nɛ wele ni, nɛ ma do 'baka nɛ boe, do onwá 'bete, do ofulɛlɛ kɛ ma bulu zala ɛ, dɛ ngɔ o'bolo zã tɔa Tɛmpɛloe vɛ̃.

³⁰ Nɛ wa nãlã 'bɔ mɔ mbali tɛ ma'baya kpangbata go'do tɔa Tɛmpɛloe, do tɛ kɔ 'bili tɔanɔ ni do bɔa nɛ.

³¹ We kpe nu tɔa Sanduku Gba Tɔkɛ, wa bɛ̃lɛ̃ zi mɔ nu tɔa do gbangga nɛ bɔa. Wa dɛa mɔ nu tɔa ni do ma'baya te olivɛ zamɔ. Wa 'dungga zi li holo mɔlɔ tɛ te gbangga kɛ ngɔ, do kɛnɔ 'bolo zã nɛ, nɛ wa 'bɛ̃lɛ̃ zu nɛ 'bɛ̃lã.

³² Wa sɛa ohi mɔ, do onwá 'bete, do ofulɛlɛ kɛ ma bulu zala ɛ, dɛ ngɔ gbangganɔ bɔa ni, nɛ wa nãlã ma vɛ̃ do mɔ mbali. Nɛ wa bɛ̃lɛ̃ mɔ mbali ni dɛ tɛ ohi mɛnɔ, do nwá 'betenɔ ni.

³³ Wa bɛ̃lɛ̃ 'bɔ tɛlɛ tɛ mɔ nu tɔa ni we kpe do nu gã 'bili kɔ tɔa. Nɛ nde wa bɛ̃lɛ̃ ma do ma'baya te olivɛ zamɔ, nɛ ma do li holo nalɛ.

³⁴ Wa dɛa zi gbangga nɛ bɔa nɛ, do ma'baya te pinɛ, nɛ wa bɛ̃lɛ̃ zi gbangga kpo kpo do tɛlɛ tɛ kɛ na ma wia we siki nɛ.

³⁵ Dɛ ngɔ gbangganɔ ni, wa sɛa zi 'bɔ ohi mɛnɔ, do onwá 'bete, do ofulɛlɛ kɛ ma bulu zala ɛ. Nɛ wa nãlã mɔ mbali tɛ 'bili tɛ kɛnɔ ma hɔa dɛ nza ni.

³⁶ Dɛ 'do nɛ, wa zĩ ngbo dɛ tɛ li fanda kɛ gbogbo ni. Wa zĩ zi ngboe ni do ngɔ gili lɔnggɔ fɛlɛ ogã ta talɛ, kɛ wa ndɛngɛlɛ dɛ ngɔ ngbɛ ɛ. Nɛ wa zĩ 'bɔ lɔnggɔ fɛlɛ ma'baya sɛdrɛ kpo dɛ ngɔ nɛ.

³⁷ Wa ndua zi nyanga dɛ tɔa Tɛmpɛloe 'da NWA, do zɛkɛ 'da bɔa tabi zɛkɛ Zivɛ, kɔ nalɛ sabɛlɛ dɛa to nwa 'da Salɔmɔ.

³⁸ Nɛ wa dɛa obe si'bili mɔ tɛ nɛ, ɔ nɛ kɛ wa 'dafa zi ni, nɛ ma ia zi vɛ̃ do zɛkɛ 'da ngbɛ'dɛ'dɛ tabi zɛkɛ Bulɛ, kɔ 'bu ngɔ nɛ kpo sabɛlɛ dɛa to nwa 'da Salɔmɔ. Takɔ dɛa to tɔa Tɛmpɛloe e vɛ̃, ma gɔa zi sabɛlɛ sambo.