1 Onwanɔ 5 - WE NU GALE 1995

To nwa 'da Salɔmɔ zi a to gbia

¹ Salɔmɔ dungu zi nwa ngɔ nùnɔ vɛ̃, yolo tɛ nu gba lì Efratɛ, we la ngɔ nù Filisti, gbaa we hɔ tɛ ngbala nɛ do nù Ezipeto. Onwa ngɔ nùnɔ ni vɛ̃, wa zi do ti nwa Salɔmɔ, nɛ kɔ dungu nza 'da a vɛ̃, wa futa zi tako hã a.

² Tũ kpo kpo, ma wia zi na, wa tɛ do nyɔngɔmɛnɔ gɛ hã nwa, do Owi tonɔ 'da a vɛ̃. Mɛ zi a: fila li fũ kɔ saki kama do 'bu nɛ talɛ ngɔ nɛ mɔlɔ, do fɛ̃a li fũ kɔ saki kama bɔa do 'bu nɛ sambo,

³ ongɔmbɔ 'bu, kɛ wa dala wa kɔ ba'de, nɛ wa dɛ nɔ wena, do ogele ngɔmbɔ 'bu nɛ bɔa, kɛ wa dala wa tɛ li zɔ̃, do odua bata kama kpo. Kɛ 'da ogele sa'denɔ ɔ nɛ ozugbãgua, do odɛngbɛ, do odua zamɔ, do ogbanu, wa wè we tɔlɔ wa gɔ.

⁴ Salɔmɔ dungu zi nwa ngɔ nùnɔ vɛ̃ tɛ kulu lì Efratɛ, yolo tɛ le Tifsa gbaa we hɔ tɛ gã le Gaza. Nɛ a dungu ngɔ Onwanɔ tɛ ngɔ nùnɔ ni vɛ̃, nɛ wa zele zi nu a. Nɛ a dɛa zi 'bɔ na do ogele nùnɔ kɛ zã a ni vɛ̃.

⁵ Do 'da fala dɛa to nwa 'da a, obe Yuda, do obe Israɛlɛ wa kpa zi dungu fio. Nɛ yolo tɛ mbee nùi we hɔ tɛ ndɔti nɛ, wele do wele ba zi tɛ̃ ɛ tati nɛ we dɛ to fɔɛ 'da a iko, mbé bolo zi 'bɔ bina.

⁶ Nɛ Salɔmɔ zi 'bɔ do ombalata koto 'bu ngɔ nɛ bɔa, do otɔa koto 'bu nɛ nalɛ we ombalatanɔ kɛ wa gbɔtɔ ongilingilinɔ 'da a ni.

⁷ Nɛ owi fɔmɔ lenɔ 'bu ngɔ wa bɔa, kɛ nwa saka zi wa ni, wa tɛ do nyɔngɔmɛnɔ vɛ̃, kɛ ma wia we gala nwa, do owinɔ kɛ wa nyɔngɔ mɔ kɔ ngboe 'da a ni. Nɛ wele do wele hã zi nyɔngɔmɛ ni 'do zɛkɛ kpo kɔ sabɛlɛ kpo, nɛ a dɛ zĩ na, da dɛ kɔ mɔ kpo zɔ́lɔ́ gɔ.

⁸ Nɛ owi fɔmɔ lenɔ ni, wa hã zi 'bɔ kpalɛ li nɛ a ɔrzɛ ni, do wɔkɔsɔnɔ hã ombalatanɔ, do ongɔmbɛnɔ, kɛ wa gala kɔ to fɔnɔ ni. Nɛ wa tɛ zi do nyɔngɔmɛnɔ tɛ fala kɛ nwa do ma ni, ɔ nɛ kɛ nwa aka kɔ̃ wa ni.

Salɔmɔ nɛa ngɔ winɔ vɛ̃ do hã zã

⁹ Gale hã zi gbãlã zã, do hã zã gã wena hã Salɔmɔ. Nɛ mɛnɔ vɛ̃ kɛ a ĩ zi ti ma ni, ma dɛlɛ ɔ nɛ gbãlã kɛnzɛ nu gba lì ni.

¹⁰ Salɔmɔ nɛa zi ngɔ owi hã zãnɔ tɛ Arabi, do tɛ Ezipeto vɛ̃.

¹¹ Gɛnɛ kɔ wio nde, nɛ nde Salɔmɔ nɛa ngɔ a. Gɛnɛ kɔ Etanɛ, wi Ezra, tabi Hemanɛ, do Kalkɔlɛ, do Darda, benɔ 'da Mahɔlɛ, nɛ nde Salɔmɔ nɛa ngɔ wa. Hã zã 'da a gã zi la li ngele, gulu nɛ a li a dɔlɔ zi kɔ lenɔ 'da owinɔ kɛ zã a ni vɛ̃.

¹² A kɔma zi gba we koto talɛ, nɛ a 'dafa ozuma dɛlɛ nɛa ngɔ koto kpo.

¹³ A ĩ zi ti ote zamɔ kpi do kpi, do Okpalɛnɔ vɛ̃, yolo tɛ gba gbɛlɛ te sɛdrɛ, kɛ ma hɔ ngɔ nù Libanɛ, we hɔ tɛ be te nyama, kɛ ma hɔ tɛ nyanga tɔanɔ ni. A ĩ zi 'bɔ ti onga nyanga sa'denɔ, do onɔɛnɔ, do osa'de kɛ wa hala do ngu'du wa, do okɔyɔnɔ.

¹⁴ Onwanɔ ngɔ gele nùnɔ vɛ̃, wa zila zi we hã zã 'da a, ma kɛ wa tombo zi owinɔ 'da wa we zele wila wenɔ 'da a.

Salɔmɔ ngɛmɛ li mɔ dɛ do tɔa Tɛmpɛlo

¹⁵ Hiramɛ, nwa ngɔ nù Tirɛ zi a 'bia Davidi. Kɔ a nɛa we zele na, wa ia Salɔmɔ do nwa dɛ olo baa a Davidi ni, nɛ a tombo ombe wi tonɔ 'da a, tɛ 'da Salɔmɔ we dɔnggɔ a.

¹⁶ Wa hɔa i mɔ, nɛ Salɔmɔ tombo tɛ mɛ 'bɔ owi to we tɔ̃ hã Hiramɛ na:

¹⁷ “Mɔ ĩ na, baa mi Davidi kpà zi wala we dɛ tɔa Tɛmpɛlo hã NWA Gale 'da a gɔ, tua kɛ owi sɛnɛ a tɛ ngɔ nùnɔ kɛ ma linggi a ni, wa bi zi a 'do ngbɛ ɛ do 'do ngbɛ ɛ. Nɛ nde do ndɔti nɛ, nɛ NWA dɛa zi vɛ̃ na, a nɛ ngɔ wa.

¹⁸ Kɔ dɛ ngangga gɛ, NWA Gale 'da mi hã dungu fio ngɔ nùi 'da mi vɛ. Nɛ mi 'bɔ do wi sɛnɛ mi bina, nɛ mbé gele mɔ si do tɛ̃ ɛ bina.

¹⁹ NWA kpua zi mbulu hã baa mi Davidi na, be 'da a kɛ a dungu sɛ nwa olo a ni, a dɛ sɛ tɔa Tɛmpɛlo hã ɛ. We duzu ma, mi kɔ̃a we dɛ tɔa Tɛmpɛloe hã NWA Gale 'da mi.

²⁰ Ma kɛ mi aka mɔ na, fala kɛ mɔ kɔ, nɛ mɔ tombo owi tonɔ 'da mɔ, kɔ wa nɛ tɛ ngɔ kala Libanɛ, we gɔmɔ te sɛdrɛ hã mi. Tua kɛ mɔ ĩ na, owinɔ 'da mɔ wa ĩ ti gɔmɔ te nɛa ngɔ owanɔ 'da mi. Nɛ owi tonɔ 'da mi wa gala sɛ owanɔ 'da mɔ. Nɛ mi futa sɛ olo toe 'da winɔ 'da mɔ ɔ nɛ kɛ mɔ kɔ̃a ni.”

²¹ Nwa Hiramɛ nɛa we zele toe 'da Salɔmɔ, nɛ a he mɔ do yangga, nɛ a na: “Sɔɛ gɛ, mi hã iɔ̃nae hã NWA, tua kɛ a hã bulu be hã Davidi, nɛ nde bulu be ni dunu do hã zã we dungu nwa ngɔ gba gili obe Israɛlɛ!”

²² Dɛ 'do nɛ, nɛ a gese hã Salɔmɔ na: “Mi zila toe mɔ tumba ni, nɛ mi kɔ̃a na, mi dɛ sɛ ɔ nɛ kɛ mɔ aka ni. Mi tombo sɛ winɔ 'da mi we gɔmɔ te sɛdrɛ, do te pinɛ ɔ nɛ kɛ mɔ kɔ̃a ni.

²³ Owi tonɔ 'da mi wa yɔnggɔ sɛ 'bili tenɔ tɛ ngɔ kala Libanɛ i, nɛ wa a sɛ ma tɛ nu kolo gba lì. Nɛ wa ɛnzɛ sɛ ma dɛ tɛ ngbɛ ɛ, nɛ wa fi ngɔ lì, takɔ wa la nɛ we hɔ tɛ fala kɛ mɔ kɔ̃a ni. Kɔ wa hɔ i mɔ, nɛ wa yala sɛ ma, nɛ Owi tonɔ 'da mɔ wa tɛ sɛ we kala o'bili tenɔ ni. Nɛ nde kɛ 'da mɔ, mi aka mɔ na, mɔ hã sɛ hã mi a onyɔngɔmɛnɔ kɛ ma wia we gala owinɔ kɔ ngboe 'da mi ni vɛ̃.”

²⁴ Nɛ Hiramɛ tumba ote sɛdrɛ, do ote pinɛ kɛ Salɔmɔ kɔ̃a zi ni vɛ̃ hã a.

²⁵ Nɛ sabɛlɛ kpo kpo, Salɔmɔ zi tɛ mɛ 'bɔ tɛ tombo tɔnɛ farini koto gazɛlɛ, do litrɛ nɔ olivɛ koto ngbɛ'dɛ'dɛ, nɔ olivɛ ni mɛ a nga li nɛ ngboo. A tombo zi mɛnɔ ni we gala winɔ kɔ ngboe 'da nwa Hiramɛ.

²⁶ NWA dɛa olo mbuli kɛ a kpua zi ni, nɛ a hã hã zã hã Salɔmɔ. Nɛ Salɔmɔ dɛa na do Hiramɛ, nɛ wa gba tɔkɔ sanga tɛ ngba wa.

Salɔmɔ ia mbula to kolofe

²⁷ Nwa Salɔmɔ kala owi to 'bu koto talɛ, tɛ kɔ lenɔ ngɔ nù Israɛlɛ vɛ̃ we dɛ to kolofe,

²⁸ nɛ a ia Adoniramɛ do gã wi ngɔ wa. A gɔnɔ sanga wa ngɔ gili wa talɛ. Nɛ ngɔ gili wa kpo do Owele koto 'bu. Ngɔ gili winɔ ni kpo kpo, wa nɛ zi tɛ Libanɛ i we dɛ to 'do zɛkɛ kpo, nɛ wa si, nɛ wa ɔ olo wa nga zɛkɛ bɔa, nɛ wa kpolo tɛ wa ní do ní.

²⁹ Nɛ ngɔ kala i, Salɔmɔ zi 'bɔ do owi gba ta 'bu koto ngbɛ'dɛ'dɛ, do wi kala ma 'bu koto sambo,

³⁰ nɛ a a zi 'bɔ Owele koto talɛ do kama talɛ we zɔ mɔ tɛ toe 'da wi gba tanɔ ni.

³¹ Nɛ a ba nu a na, wa gba ogã dia tanɔ, nɛ wa sɛ ma we a do nyanga tɔa Tɛmpɛloe.

³² Owi sɛ tenɔ kɔ le Biblɔsɛ, wa gala zi owi tonɔ 'da Salɔmɔ do Hiramɛ, nɛ wa sɛa tenɔ do tanɔ we dɛ do tɔa Tɛmpɛloe.