1 Onwanɔ 4 - WE NU GALE 1995

Salɔmɔ saka ogã wi ngɔ tonɔ 'da a

¹ Salɔmɔ zi a nwa ngɔ obe Israɛlɛ vɛ̃.

² Nɛ zélé li ogã wi ti nu a, kɛ a saka zi wa ni: Azaria, be 'da Sadɔkɛ, a zi a nganga.

³ Elihorɛfɛ do Ahia, benɔ 'da Sisa, wa zi a Owi kɔmɔ mbɛtinɔ 'da nwa. Yosafatɛ, be 'da Ahiludɛ zi a wi gba olo nu nwa.

⁴ Bɛnaya, be 'da Yoyada zi a gã wi ngɔ osodanɔ, Sadɔkɛ do Abiatarɛ, wa zi a onganga.

⁵ Azaria, be 'da Natanɛ zi a gã wi ngɔ owi fɔmɔ lenɔ. Zabudɛ, be 'da Natanɛ zi a nganga, nɛ a 'bɔ a yali ngba nwa, wi poe a.

⁶ Ahikarɛ zi a gã wi ngɔ wi tonɔ kɔ ngboe 'da nwa. Adoniramɛ, be 'da Abda zi a wi ngɔ owi dɛ to kolofenɔ.

⁷ Nwa Salɔmɔ saka zi 'bɔ owi fɔmɔ le 'bu ngɔ wa bɔa. Nɛ a kɛ̃ wa dɛ ngɔ 'bili tɛ nu Israɛlɛ vɛ̃. Nɛ toe 'da wa zi a fa nyɔngɔmɔ hã nwa, do owi tonɔ kɔ ngboe 'da a ni vɛ̃. Nɛ ma gɔa zi na, wele kpo kpo sanga wa dɛ to hã nyɔngɔmɛ ni hã nwa 'do zɛkɛ kpo kɔ sabɛlɛ kpo.

⁸ Owi fɔmɔ lenɔ ni wi zi a: Be 'da Hurɛ zi a wi fɔmɔ 'bili tɛ nù kɛ tɛ ngɔ kala Efraimɛ.

⁹ Be 'da Dekɛrɛ zi a wi fɔmɔ 'bili tɛ nù Makasɛ, Salbimɛ, Bɛtɛ-Semɛsi, do Eloni-Bɛtɛ-Hananɛ.

¹⁰ Be 'da Hɛsɛdɛ zi a wi fɔmɔ le Arubɔtɛ, do 'bili tɛ nù Soko, do nù Hefɛrɛ vɛ̃.

¹¹ Be 'da Abinadabɛ zi a wi fɔmɔ 'bili tɛ nùi ngɔ kala Dɔrɛ. (A ba zi Tafatɛ, be zɔnga be 'da Salɔmɔ do kɛnɛ a.)

¹² Baana, be 'da Ahiludɛ zi a wi fɔmɔ 'bili tɛ nù Tanakɛ, do Megido, do 'bili tɛ nù Bɛtɛ-Seanɛ vɛ̃. (Nɛ 'bili tɛ nù Bɛtɛ-Seanɛ ma lɛa zi ngbɛ ɛ do gã le Sartanɛ, tɛ 'do gã le Yizreɛlɛ, do si ba gɔtɔ. Nɛ ma nɛa gbaa, nɛ ma la le Abɛlɛ-Mɛhola do Yokneamɛ.)

¹³ Be 'da Gebɛrɛ, kɛ wa ia zi a kɔ le Ramɔtɛ, tɛ ngɔ nù Galadɛ, a zi a wi fɔmɔ lenɔ 'da nu fɛlɛ Yairɛ, be 'da Manase, tɛ ngɔ nù Galadɛ, do 'bili tɛ nù Argɔbɛ, tɛ ngɔ kala Basanɛ. 'Bili tɛ nùi ni, ma zi do ogã le 'bu nɛ gazɛlɛ, nɛ gba ngbo zĩ ma takpa. Nɛ wa kã zi nu nɛ do tũ mɔ bolo.

¹⁴ Ahinadabɛ, be 'da Ido zi a wi fɔmɔ 'bili tɛ nù Mahanaimɛ.

¹⁵ Ahimasi zi a wi fɔmɔ 'bili tɛ nù Nɛftali. (A tɛ mɛ 'bɔ, a ba zi Basmatɛ, mbe be zɔnga be 'da Salɔmɔ do kɛnɛ a.)

¹⁶ Baana, be 'da Husai zi a wi fɔmɔ 'bili tɛ nù Asɛrɛ, do Bealɔtɛ.

¹⁷ Yosafatɛ, be 'da Parua zi a wi fɔmɔ 'bili tɛ nù Isakarɛ.

¹⁸ Simei, be 'da Ela zi a wi fɔmɔ 'bili tɛ nù Bɛnzamɛ.

¹⁹ Gebɛrɛ, be 'da Uri zi a wi fɔmɔ nù Galadɛ, kɛ mɛ zi a nùi 'da Sihoni, nwa ngɔ Oamori, do Ɔgɛ, nwa ngɔ Obasanɛ. Nɛ dɛ ngɔ Owi fɔmɔ lenɔ 'bu ngɔ wa bɔa ni, nwa Salɔmɔ saka zi 'bɔ wi fɔmɔ le kpo, nɛ a e a tɛ ngɔ nù Yuda vɛ̃.

²⁰ Owi ngɔ nù Yuda, do wanɔ ngɔ nù Israɛlɛ wa dɛlɛ zi wena. Wa dɛlɛ zi ɔ nɛ gbãlã kɛnzɛ nu gba lì, kɛ wa wè tɛ tɔlɔ nɛ, nɛ ma e gɔ ni. Gɛnɛ kɔ na mɛ ni, nɛ nde wa zɔ̀lɔ̀ zi nyɔngɔmɔ, do nɔa mɔ gɔ, nɛ wa dungu zi do yangga.