1 Onwanɔ 3 - WE NU GALE 1995

Salɔmɔ ba be zɔnga be 'da nwa ngɔ nù Ezipeto

¹ Nwa Salɔmɔ ba zi be zɔnga be 'da nwa ngɔ nù Ezipeto do kɛnɛ a. Nɛ do wala bá koe ni, nɛ Salɔmɔ dɛa na do a. A ba wuke ni, nɛ a fi a kɔ Gba Ngbo nwa 'da Davidi tɛ Yeruzalɛmɛ, we 'bɔ do 'da kɛ na, wa dɛ to tɔa nwa 'da a, hã ma e ni. Wa dɛ zi to tɔa ni fala nɛ kpo do to tɔa Tɛmpɛloe 'da NWA Gale, do to ngbo nu le Yeruzalɛmɛ.

² 'Da fala ni, owinɔ wa 'bana zi tɛ hã dɔnggamɛnɔ 'da wa hã Gale, tɛ falanɔ kpi do kpi, kɛ wa 'dafa zi we dɔnggɔ do a ni. We kɛ wa tɛ dɛ̃ zi tɔa Tɛmpɛloe hã NWA gɔ.

³ Salɔmɔ kɔ̃a zi zu li nwa, nɛ a dɛ olo nu baa a Davidi. Nɛ nde a 'bana zi tɛ gbɛ sa'denɔ, do hã gele dɔnggamɛnɔ hã Gale, tɛ falanɔ kpi do kpi, kɛ wa 'dafa zi we dɔnggɔ do a ni.

Gale hã dia hã zã dɛa to nwa hã Salɔmɔ

⁴ Mbe ngba soe kpo, nɛ nwa Salɔmɔ nɛa tɛ Gabaoni, we gbɛ sa'de we dɔnggɔ do Gale. Tua kɛ Gabaoni zi a gã fala dɔnggɔ do Gale, kɛ li ma dɔ̃lɔ̃ zi nɛa ngɔ tala ofalanɔ vɛ̃. Nɛ nde zi dati, nɛ Salɔmɔ gbɛa zi 'bɔ gba gili osa'de dɛ di ni, we dɔnggɔ do Gale.

⁵ 'Da fala Salɔmɔ hɔa Gabaoni, nɛ do tũi ni, nɛ a ɔ nù, nɛ NWA Gale hɔa li a li yalɛ, nɛ a aka a na: “Mɛ mɔ kɔ̃a na, mi hã hã mɔ ni a ge nde?”

⁶ Nɛ Salɔmɔ gese na: “Aa NWA, mɔ kɔ̃ zi gɛnɛ baa mi Davidi, wi toe 'da mɔ wena. We kɛ a dɛa zi mɔ tɛ̃ a wia do kɛ na, mɔ e sila mɔ ngɔ a. A zi a wi bɔlɔ zu, do wi dɛ mbula 'da mɔ. Nɛ mɔ 'bana be na, mɔ kɔ̃a gɛnɛ a, tua kɛ mɔ saka bulu be 'da a sɔɛ gɛ, we dungu nwa olo a.

⁷ NWA Gale 'da nu, do gbãlã we, mɔ a mɔ saka mi we dungu nwa olo baa mi Davidi. Nɛ nde mi a be iko, mi ĩ̀ ti tɛlɛ tɛ kɛ mi wia we dɛ do to nwa ni gɔ.

⁸ Kɔ mɔ zɔ̃, di ngangga ni wa ia mi do nwa ngɔ owinɔ kɛ mɔ saka wa ni. Nɛ owinɔ ni wa dɛlɛ la li ngele. Wa tɔlɔ wa zãa.

⁹ Kɔ NWA, fala kɛ mɔ kɔ̃, nɛ mɔ hã hã zã hã mi, takɔ mi ĩ ti zɔ mɔ tɛ owinɔ 'da mɔ do bɔlɔ zu, nɛ mi ĩ ti mɛ kɛ ma wia we gala wa, do kɛ ma wè we gala wa gɔ ni. Tua kɛ fo hã zã wele bina, nɛ nde a wé sɛ we fɔmɔ winɔ 'da mɔ, kɛ wa dɛlɛ nɛ ge nde gɛ gɔ.”

¹⁰ Salɔmɔ gisa na mɛ ni, nɛ we 'da a dia tɛ NWA Gale.

¹¹ Nɛ NWA gese hã a na: “Mɔ àkà mɔ kpo we duzu mɔ wele nɛ gɔ. Mɔ àkà we 'bana nza fai gɔ, tabi we hɔ wi kpamɔ gɔ, tabi na owi sɛnɛ mɔ wa fe gɔ. Nɛ nde mɔ aka tati a we kpa hã zã zɔ mɔ tɛ owinɔ 'da mɔ do bɔlɔ zu.

¹² Gulu nɛ hã mi nɛ dɛ kɛ mɔ aka ni. Mi hã sɛ hã zã, do gbãlã zã hã mɔ ɔ nɛ kɛ mɔ gɔa ni, nɛ ma gã sɛ nɛ ngɔ kɛ 'da wanɔ zi dati mɔ, do wanɔ wa sɛ 'do mɔ gɛ ni.

¹³ Dɛ ngɔ nɛ, mi hã sɛ mɔ kɛ mɔ àkà gɔɛ ni hã mɔ. Mɔ sɛ a wi kpamɔ, nɛ kɔ dungi 'da mɔ vɛ̃, mɔ kpa sɛ dɔ̃lɔ̃ li wena. Nɛ nwa kpo wé sɛ kɔ̃ do mɔ gɔ.

¹⁴ Dɛ 'do ki ni, fala kɛ mɔ dɛ mɛ mi kɔ̃a ni, hã mɔ dɛ 'bɔ mbula 'da mi, ɔ nɛ kɛ baa mɔ Davidi dɛa zi ni, nɛ mi gbala sɛ kɔ̃ tũ dungu nza 'da mɔ.”

¹⁵ Kɔ Salɔmɔ nɛa we tunu nɛ, nɛ a ĩ na, Gale wila we hã ɛ li yalɛ. A kpula tɛ̃ a dɛ Yeruzalɛmɛ i, nɛ a nɛ, nɛ a hɔ dati Sanduki Gba Tɔkɛ 'da NWA. Nɛ a dɔ sa'de we dɔnggɔ do Gale, nɛ a gbɛ ombe we be dɛa na. Dɛ 'do nɛ, nɛ a dɛ gbalimɔ hã owi olo li a vɛ̃.

Salɔmɔ gɔnɔ ngbangga do hã zã

¹⁶ Mbe tũ kpo, nɛ owuko ndumba bɔa wa tɛa we da we hã nwa Salɔmɔ.

¹⁷ Wuko kɛ dati tɔ̃a hã a na: “Aa nwa, mɔ kɔ̃, nɛ mɔ zele mi sɛ! Mi do ngba mi wuke gɛ, lɛ ɔ kɔ tɔa kpo. Mi kua zi bulu be dɛ kɔ tɔa 'da lɛ ni, nɛ nde a boe.

¹⁸ Kɔ ma la 'do nɛ tũ bɔa, nɛ a ko tɛ mɛ 'bɔ bulu be. Tati a lɛ hã lɛ ɔ kɔ tɔa ni iko, gele wele bina.

¹⁹ Nɛ nde mbe tũ kpo, nɛ wuke gɛ nɛa we siki tɛ̃ a li yala, nɛ a ɔ ngɔ be 'da a, nɛ be fe.

²⁰ Kɔ a nɛa we zɔ ni, nɛ a kulu ngɔ do sanga zɛ, nɛ nde mi 'bana tɛ ɔ yala, nɛ a ba bulu be 'da mi kɛ zã mi yɔɛɛ, nɛ a fi a ngɔ mɔ ɔi 'da a. Nɛ a ba fia be 'da a, nɛ a e a kɛ zã mi.

²¹ Kɔ titole gɛ, mi nɛa we kulu ngɔ we e bele nu be 'da mi, nɛ mi zɔ na a fia do'do. Nɛ mi nɛ soko a do sɔ̃a li, nɛ mi kpa na, wi a be 'da mi gɔ.”

²² Kuti wuke ni tɛ è lɛnggɛ 'da a gɔ, nɛ wuko wele kɛ bɔa ba we nu a, nɛ a na: “Mɛ a bɛlɛ iko! Wi 'bana do tunu li a, wi a be 'da mi, wele kɛ 'da mɔ a fia!” Nɛ kuti wuke gese na: “Gɔ! Wi fia wi a wele kɛ 'da mɔ, nɛ wele kɛ 'da mi a 'bana do tunu li a!” Tɛlɛ tɛ kɛ wa mɔ̃lɔ̃ zi nɛ dati nwa gɛ a ni.

²³ Nɛ nwa gɔnɔ nu wa, nɛ a na: “Wele kɛ gɛ tɔ̃ na, be a 'bana do tunu li a ni, a wele kɛ 'da ɛ, nɛ wele kɛ fia ni, a be 'da mɔ. Nɛ ngba a tɔ̃ ta 'bɔ na, gɔ! Wi fia wi a be 'da mɔ, nɛ wele kɛ 'da mi a 'bana do tunu li a!

²⁴ Nɛ zɔ̃ kɛ mi nɛ dɛ nɛ ni. Wa fá du kɔya hã mi.” Wa nɛa we tɛ do ma hã a,

²⁵ nɛ nwa tɔ̃ hã owinɔ 'da a na: “Nɛ bá tunu li be gɛ, kɔ nɛ 'bílí sanga a dɛ gbogbo bɔa, nɛ nɛ hã 'bili be kpo hã wele kɛ, nɛ nɛ hã 'bili nɛ kpo hã ngba a!”

²⁶ Kɔ naa be ngboo ni nɛa we zele ni, nɛ sila a zɛlɛ we be 'da a wena, nɛ a he mɔ na: “Aa nwa, mɔ tɛ gbɛ a gɔ, mɔ kɔ̃, nɛ mɔ bá a hã wuke gɛ!” Nɛ ngba a ni tɔ̃ na: “Mɔ 'bílí sanga be dɛ gbogbo bɔa, sɛ a lɛ do bɔa zu lɛ, lɛ zɔla de!”

²⁷ Ma kɛ nwa tɔ̃a na: “Nɛ tɛ gbɛ̀ be gɔ, nɛ gésé a hã kuti wuke gɛ, tua kɛ a a ngbongbo naa be ngboo!”

²⁸ Obe Israɛlɛ vɛ̃, wa zila tɛlɛ tɛ 'bili we nwa Salɔmɔ 'bili do bɔlɔ nɛ tɛ 'da fala ni, nɛ wa dɔnggɔ zi a wena. Tua kɛ wa ĩ zi na, Gale do tɛ̃ a, a hã hã zã gɔnɔ ngbangga do bɔlɔ nɛ hã a.