1 Onwanɔ 21 - WE NU GALE 1995

Lɛnggɛ ngɔ Nabɔtɛ do fɔ vinɔ 'da a

¹ Dɛ 'do ki ni, nɛ mbé mɛ ma la zi 'bɔ ni, ma kɛ: Mbe wele kpo zi tɛ kɔ le Yizreɛlɛ, li a a Nabɔtɛ, a zi do fɔ vinɔ. Nɛ nde fɔɛ ni ma zi dɛ kɛ zã tɔa 'da Akabɛ, nwa ngɔ nù Samaria.

² Nɛ mbe ngba soe kpo, nɛ Akabɛ tɔ̃ hã a na: “Mɔ lá fɔɛ 'da mɔ hã mi, kɔ mi dɛ ma do fɔ Sanggo, tua kɛ ma kɔlɔ do tɔa 'da mi dɔ̃ɔ. Nɛ mi hã sɛ gele fɔ vinɔ de nɛ ngɔ kɛ gɛ hã mɔ. Tabi fala kɛ mɔ kɔ̃, nɛ mi futa sɛ olo nɛ hã mɔ.”

³ Nɛ Nabɔtɛ gese hã a na: “Do zu li NWA, mi wè tɛ la fɔ vinɔ, kɛ mi kpa ma olo oyaa mi ni hã mɔ gɔ!”

⁴ Akabɛ zila gisa we 'da Nabɔtɛ, nɛ a si do linggamɔ, do nɔ̃lɔ̃ zã. A hɔa nu tɔa 'da a i, nɛ a ɔ nù, nɛ a siki li a dɛ tɛ 'bolo zã tɔa, nɛ a bɛ̃ nyɔngɔmɔ.

⁵ Nɛ kɛnɛ a Yezabɛlɛ tɛa, nɛ a kpa a, nɛ a aka a na: “Gulu kɛ zã mɔ nɔ̃lɔ̃, nɛ mɔ bɛ̃ nyɔngɔmɔ ni we ge nde?”

⁶ Nɛ Akabɛ gese na: “Mi aka sɔ Nabɔtɛ, wi kɔ le Yizreɛlɛ na, a la fɔ vinɔ 'da a hã mi, nɛ mi futa sɛ olo nɛ hã a. Tabi fala kɛ a kɔ̃, nɛ mi hã sɛ gele fɔ vinɔ hã a. Nɛ a bɛ̃a, a kɔ̃̀ we la ma hã mi gɔ.”

⁷ Nɛ Yezabɛlɛ tɔ̃ hã a na: “See! Mɔ gɛ a nwa ngɔ nù Israɛlɛ gɔ nde? Mɔ kúlú ngɔ, kɔ mɔ nyɔngɔ mɔ, nɛ mɔ dɛ yangga, we duzu kɛ mi a mi nɛ hã fɔ vinɔ 'da Nabɔtɛ hã mɔ.”

⁸ A tɔ̃a ni do'do, nɛ a kɔmɔ ombɛti do zu li nwa Akabɛ, nɛ a to kasɛ 'da nwa ti nɛ, nɛ a tombo ma hã okumunɔ, do ogã winɔ tɛ kɔ le 'da Nabɔtɛ ni.

⁹ A kɔma zi dɛ kɔ mbɛtinɔ ni na: “Nɛ sá mɔ hã owinɔ vɛ̃, nɛ nɛ mbese wa na, wa bɛ̃ nyɔngɔmɔ 'do tũ kpo, nɛ wa mba li ngba wa we sambala. Nɛ 'da fala mba li ngba wi ni, nɛ nɛ hã dia fala dungu hã Nabɔtɛ.

¹⁰ Nɛ nɛ e oyɔndɔ wi bɔa dɛ dati a. Nɛ wa kũ we dɛ tɛ̃ a na, a dã zu li Gale, nɛ a dã 'bɔ zu li nwa Akabɛ. Dɛ 'do nɛ, nɛ nɛ ba a, nɛ nɛ la do a dɛ 'do le i, nɛ nɛ lo a do ta, nɛ nɛ gbɛ a.”

¹¹ Okumunɔ, do ogã winɔ kɔ le 'da Nabɔtɛ, wa dɛa mɛ kɛ Yezabɛlɛ ba do nu ɛ hã wa kɔ mbɛtinɔ 'da a ni.

¹² Nɛ wa sa mɔ hã owinɔ vɛ̃, nɛ wa mbese wa na, wa bɛ̃ nyɔngɔmɔ 'do tũ kpo, nɛ wa mba li ngba wa we sambala. Nɛ 'da fala mba li ngba wi ni, nɛ wa hã dia fala dungu hã Nabɔtɛ.

¹³ Nɛ oyɔnda winɔ bɔa ni wa tɛa, nɛ wa yolo dɛ dati Nabɔtɛ, nɛ wa ma ngɔ kũ we dɛ tɛ̃ a dɛ gbali winɔ vɛ̃ na: “Nabɔtɛ dã zu li Gale, nɛ a dã 'bɔ zu li nwa Akabɛ!” Kɔ winɔ wa nɛa we zele ni, nɛ wa ba Nabɔtɛ do ti, nɛ wa kã a dɛ 'do le i, nɛ wa lo a do ta, nɛ wa gbɛ a.

¹⁴ Nɛ ogã wi kɔ lenɔ wa tombo wi to kpo we mbese Yezabɛlɛ na, lo lua Nabɔtɛ do ta, hã lo gbɛa a ia.

¹⁵ Kɔ Yezabɛlɛ nɛa we zele ni, nɛ a nɛ, nɛ a tɔ̃ hã Akabɛ na: “Nabɔtɛ fia ia, kɔ mɔ nɛ́, hã mɔ ba fɔ vinɔ olo a ni do mɔ mɔ.”

¹⁶ Akabɛ nɛa we zele ni, nɛ a nɛ tɛ kɔ le Yizreɛlɛ, nɛ a ba fɔ vinɔ olo Nabɔtɛ ni do mɔ a.

Gale bɛ̃a gɛnɛ dɛa mɔ tɛ Akabɛ do kɛnɛ a Yezabɛlɛ

¹⁷ Nɛ NWA Gale tɔ̃ hã wi gba olo nu a Elia, wi kɔ le Tisbe na:

¹⁸ “Mɔ nɛ́ 'da nwa Akabɛ tɛ Samaria i. Mɔ kpa sɛ a tɛ kɔ fɔ vinɔ olo Nabɔtɛ, kɛ a nɛa we ba ma do mɔ́ a ni.

¹⁹ Mɔ hɔ i mɔ, nɛ mɔ tɔ̃ hã a na, mi NWA, mi tɔ̃a na, a gbɛa wele do'do, nɛ a dolo 'bɔ zu mɔ olo a nde? Nɛ nde a ĩ na, otolo wa la'da sɛ tɛ mɛ 'bɔ tɔkɔ tɛ̃ a dɛ kpo fala wa la'da do kɛ 'da Nabɔtɛ ni.”

²⁰ Nɛ Elia nɛa we tɔ̃ toe ni hã Akabɛ. Akabɛ nɛa we zɔ a, nɛ a tɔ̃ hã a na: “Mɔ, kɛ mɔ sɛnɛ mi nɛ gɛ nde gɛ, mɔ kpa 'bɔ mi kpaa nde!” Nɛ Elia gese hã a na: “Ĩi, mi kpa mɔ. Kɔ mɔ ĩ na, ɔ nɛ kɛ mɔ do yangga we dɛ mɔ kɛ ma dè tɛ nwa gɔ ni,

²¹ ma kɛ a tɔ̃a na, ɛ tombo sɛ ngamɔ dɛ ngɔ mɔ. Ɛ gbɛ sɛ mɔ, nɛ ɛ kumu sɛ Owi wilinɔ kɔ nu fɛlɛ mɔ vɛ̃. Gɛnɛ kɔ mɛ a obe, tabi okpasa wi, nɛ ɛ gbɛ sɛ wa.

²² Ɛ dɛ sɛ do nu fɛlɛ mɔ, ɔ nɛ kɛ ɛ dɛa zi do nu fɛlɛ Yeroboamɛ, be 'da Nɛbatɛ, do kɛ 'da Basa, be 'da Ahia ni. We duzu kɛ mɔ nɔ̃lɔ̃ zã ɛ nganda wena, nɛ mɔ tumba obe Israɛlɛ we dɛ 'dã mɔ.”

²³ Nɛ Elia tɔ̃ 'bɔ na: “nwa tɔ̃a 'bɔ 'dã we si ngɔ kɛnɛ mɔ Yezabɛlɛ na, otolo wa nyɔngɔ sɛ wɔlɔ a dɛ kɔ le Yizreɛlɛ gɛ.

²⁴ Dɛ ngɔ nɛ, wele vɛ̃ kɔ nu fɛlɛ mɔ Akabɛ, kɛ a fe sɛ 'da le ni, nɛ otolo wa nyɔngɔ sɛ wɔlɔ a, nɛ wele kɛ a fe zamɔ, nɛ oganakele wa gɔmɔ sɛ wɔlɔ a.”

²⁵ Ĩ na, fala kpo wa zɔ̀ zɛ́ mbe kuti wi kpa yangga dɛ mɔ kɛ ma 'danga tɛ NWA Gale, ɔ nɛ kɛ 'da nwa Akabɛ ni gɔ. Nɛ nde wi ɔlɔ zi a we dɛ 'dã mɛ ni, wi a kɛnɛ a Yezabɛlɛ.

²⁶ A dɛa 'bɔ mɔ kɛ ma 'danga la li ngele ni, we kɛ a dɔnggɔ okpikimanɔ. A dɛa kpasaa ɔ nɛ Oamori, kɛ NWA ndaka zi wa we ba nùi 'da wa hã obe Israɛlɛ ni.

²⁷ Nwa Akabɛ nɛa we zele olo nu NWA Gale, nɛ a ɛ̃ tulu tɛ̃ a, nɛ a he'de saki. Gɛnɛ kɔ 'da fala ɔ nù, nɛ a ɔ do saki ni dɛ tɛ̃ a. A bɛ̃a 'bɔ nyɔngɔmɔ, nɛ a fó 'bɔ tɛ̃ a gɔ.

²⁸ NWA zɔa ni, nɛ a tɔ̃ hã Elia, wi Tisbe na:

²⁹ “Mɔ zɔa tɛlɛ tɛ kɛ Akabɛ ba tɛ̃ ɛ dɛ nù dati mi ni gɔ nde? Kɔ we duzu ma, mi tómbó sɛ ngamɔ dɛ ngɔ nu fɛlɛ kuza 'da a do 'da fala a 'bana nza ni gɔ. Nɛ nde mi dɛ sɛ ma do 'da fala kɛ be 'da a a dungu sɛ nwa olo a ni.”