1 Onwanɔ 2 - WE NU GALE 1995

Davidi tɔ̃a tala mbula hã Salɔmɔ

¹ 'Da fala kɛ Davidi zɔa na, ɛ kɔla do fio ni, nɛ a tɔ̃a tala mbulanɔ gɛ hã be 'da a Salɔmɔ na:

² “Mi kɔla do fio ia. Kɔ mɔ ɔ̃ do kpã sila, nɛ mɔ dɛ́ mɔ kɛ ma be na, mɔ hɔa kpasa wi ni.

³ Mɔ dɛ́ olo nu NWA Gale 'da mɔ. 'Da fala fai, mɔ yɛ́nggɛ́ do li wala 'da a, nɛ mɔ dɛ́ mbulanɔ 'da a, do mɛnɔ vɛ̃ kɛ Mɔizɛ kɔma kɔ 'buku mbula 'da a ni. Mɔ dɛ ní, nɛ mɔ kpa sɛ dia mɔ olo mɛnɔ vɛ̃, kɛ mɔ lengge we dɛ nɛ ni.

⁴ Nɛ NWA a dɛ sɛ mbuli, kɛ a kpua zi hã mi nɛ̀ Mba gɔ, a tɔ̃a zi na, fala kɛ obe zã mi wa dɛ olo nu ɛ ɔ nɛ kɛ ɛ kɔ̃a ni, kɔ wa dɛ to hã ɛ do sila wa vɛ̃, nɛ wele kpo kɔ wa, a dungu sɛ nwa ngɔ obe Israɛlɛ 'da fala fai.”

⁵ Nɛ Davidi tɔ̃ 'bɔ na: “Ta zu mɔ tɛ èlè ngɔ 'dã mɛ zi Yoabɛ, be 'da Sɛruya, dɛa do mi ni gɔ. Wi a a hã a gbɛa zi Abnɛrɛ, be 'da Nɛrɛ, do Amasa, be 'da Yetɛrɛ, kɛ wa zi bɔa nɛ a ogã wi ngɔ osoda Israɛlɛ ni. A gbɛa zi wa we bili nu gbã mɛ kɛ wa dɛa zi 'da fala bole ni. Nɛ nde a dɛa 'dã mɔ gã wena, tua kɛ a gbɛ wa do 'da fala bolo gɔ. Kɔ ma wia na, a kpa si olo 'dã mɛ 'da a.

⁶ We duzu ma, ma gɔa na, mɔ ɔ do gbãlã zã we 'bili we 'da a, nɛ mɔ tɛ là a na, a fe fio gbɛlɛ iko gɔ.

⁷ Nɛ ma wia na, ta zu mɔ 'bana ngɔ obulu benɔ 'da Barzilai, tɛ ngɔ nù Galadɛ. Tua kɛ wa gala zi mi, 'da fala mi yu zi nya mɔ Absalɔmɛ ni. We duzu ma, mɔ dɛ sɛ wa de wena fai, nɛ tũnɔ vɛ̃, wa nyɔngɔ sɛ mɔ kɔ̃ mɔ.

⁸ Nɛ ta zu mɔ tɛ èlè 'bɔ ngɔ Simei gɔ. A a be 'da Gera kɛ a ɔ tɛ kɔ le Bahurimɛ, ngɔ nù Bɛnzamɛ. Tua kɛ a fɔmbɔ zi mi 'danga wena, 'da fala zi mi tɛ yu dɛ tɛ Mahanaimɛ i ni. Kɔ ngba soe mi ma ngɔ si ma, nɛ a tɛa tɛ nu lì Yɔrdanɛ, we gɔnɔ dati mi, nɛ a dɛa gbɛla mi. Nɛ mi kana zi tɛ mi hã a dɛ gbali NWA na, mi gbɛ́ sɛ a gɔ.

⁹ Nɛ nde ngangga gɛ, mɔ, kɛ mɔ a wi hã zã ni, ma wia na, mɔ ba sɛ a nɛ́ 'dã wi. Mɔ ĩ ti mɛ mɔ nɛ dɛ do a ni. Kɔ gɛnɛ kɔ a dɛ gbɛlɛ wena, nɛ nde ma wia na mɔ gbɛ a.”

Davidi fia, nɛ Salɔmɔ dungu nwa olo a

¹⁰ Davidi fia, nɛ wa mi a tɛ kɔ ngboe 'da a tɛ Yeruzalɛmɛ. Lì ngboe ni a: Gba Ngbo nwa 'da Davidi.

¹¹ A dungu nwa ngɔ obe Israɛlɛ 'bu sabɛlɛ nalɛ. A ɔa tɛ Hebroni sabɛlɛ sambo, nɛ a ɔ tɛ Yeruzalɛmɛ, sabɛlɛ 'bu nɛ talɛ ngɔ nɛ talɛ.

¹² Kɔ a fia, nɛ be 'da a Salɔmɔ dungu nwa olo a, nɛ to nwa 'da Salɔmɔ nganda zi wena.

Salɔmɔ gbɛa Adonia

¹³ Mbe tũ kpo, nɛ Adonia, be kɛ Davidi kua a do Hagitɛ ni, a nɛa we wele we do Baseba, naa Salɔmɔ. A hɔa, nɛ Baseba aka a na: “Mɔ tɛa we zɔ mi do dia sila nde?” Nɛ a gese na: “Ĩi, mi tɛa do dia nɛ.”

¹⁴ Nɛ a tɔ̃ 'bɔ na: “Mi tɛa we wele we do mɔ.” Nɛ Baseba gese hã a na: “Mɔ tɔ̃́!”

¹⁵ Nɛ a na: “Mɔ ĩ na, ma sɔ na, wi hɔ nwa, wi a mi. Nɛ obe Israɛlɛ vɛ̃ wa kɔ̃a zi na, mi hɔ nwa. Nɛ nde mɛnɔ ma kpula ngbɛ ɛ do'do. Nɛ nya mi Salɔmɔ hɔa nwa, tua kɛ NWA Gale a kɔ̃a zi ni.

¹⁶ Nɛ nde mi kɔ̃a sɔ we aka mɔ do mɔ kpo. Kɔ mɔ tɛ bɛ gɔ.” Nɛ Baseba tɔ̃ hã a na: “Mɔ tɔ̃́ iko.”

¹⁷ Nɛ Adonia na: “Mi gɔ kɔ̃ mɔ na, mɔ aka nwa Salɔmɔ na, a la Abisagɛ, boko Sunɛmɛ hã mi, kɔ mi ba a do kɛnɛ mi. Mi ĩ na, a bɛ sɛ we nu mɔ gɔ.”

¹⁸ Nɛ Baseba kɔ̃a, nɛ a na: “Mi nɛ sɛ we tɔ̃ we nɛ hã nwa.”

¹⁹ Nɛ a kulu ngɔ, nɛ a nɛ 'da nwa Salɔmɔ we wele we do a ngɔ aka we 'da Adonia. Nwa nɛa we zɔ a, nɛ a kulu ngɔ ngɔ kpongbo nwa 'da a, nɛ a gɔnɔ dati a, nɛ a bili zu a nu dati naa a. 'Do nɛ, nɛ a kpolo tɛ̃ a, nɛ a dungu nù, nɛ a fi gele kpongbo nwa hã naa a tɛ ngɔ ngawili kɔ̃ a, nɛ naa a dungu tɛ mɛ 'bɔ nù.

²⁰ Nɛ Baseba tɔ̃ hã a na: “Mi kɔ̃a we aka mɔ do bi we sĩ. Kɔ mɔ tɛ bɛ gɔ.” Nɛ nwa gese hã a na: “Naa mi, mɔ áká we mɛ kɛ zã mɔ kɔ̃a ni, mi bɛ̃ sɛ gɔ.”

²¹ Nɛ naa a na: “Mɔ kɔ̃, nɛ mɔ la Abisagɛ, boko Sunɛmɛ, kɔ nya mɔ Adonia ba a do kɛnɛ a.”

²² Nɛ Salɔmɔ gese hã naa a na: “Gbãlã we nde? Mɔ wia we aka mi na, mi la Abisagɛ, boko Sunɛmɛ, hã Adonia ba a do kɛnɛ a kpaa nde? Ma 'bana sɔ na mɔ aka mi na, a dungu nwa olo mi iko gɔ nde? Tua kɛ a a kpasa wi ti mi. Ma dia fɛ̃ na, mɔ aka 'bɔ mi, hã mi la kpongbo nwa hã a do owinɔ da a, nganga Abiatarɛ, do Yoabɛ, gã wi ngɔ osodanɔ.”

²³ Nɛ Salɔmɔ zonggo tɛ̃ ɛ do zu li NWA na: “Do tɛlɛ tɛ aka we kɛ Adonia aka gɛ, fala kɛ mi gbɛ̀ a gɔ, nɛ Gale gbɛ́ mi!

²⁴ Mi zonggo tɛ mi na, sɔɛ gɛ, Adonia a fe sɛ. Mi zonggo tɛ mi ní, do zu li nwa, wele kpasi, kɛ a ia mi ngɔ kpongbo nwa olo baa mi Davidi, nɛ a kpua mbulu we ba ma hã obe olo mi ni.”

²⁵ Ma kɛ Salɔmɔ tumba Bɛnaya, be 'da Yoyada we gbɛ Adonia. Gulu fie 'da Adonia a ni.

Salɔmɔ ndaka Abiatarɛ kɔ Yeruzalɛmɛ do'do

²⁶ Dɛ 'do nɛ, nɛ nwa Salɔmɔ tɔ̃ hã nganga Abiatarɛ na: “Mɔ sí dɛ kɔ ngboe 'da mɔ tɛ Anatɔtɛ, nɛ mɔ 'bana dɛ di ni. Tua kɛ ma sɔ na mɔ fe, nɛ nde mi kɔ̃̀ we gbɛ mɔ di dɔ̃ gɛ gɔ. We kɛ zi dati, do 'da fala kɛ baa mi Davidi 'bana zi ni, mɔ zi a wi zɔ mɔ tɛ Sanduku Gba Tɔkɛ 'da NWA Gale, nɛ mɔ zi 'bɔ fala nɛ kpo do baa mi kɔ ngamɛnɔ 'da a vɛ̃.”

²⁷ Ma kɛ Salɔmɔ bɛ̃a na, Abiatarɛ tɛ dɛ̃ 'bɔ to nganga 'da NWA gɔ. Na mɛ ni, wila we kɛ NWA tɔ̃a zi tɛ kɔ tɔa wa dɔnggɔ do a tɛ Silo, dɛ ngɔ owi nu fɛlɛ gã nganga Heli ni, ma dɛa tɛ̃ ɛ.

Salɔmɔ gbɛa Yoabɛ

²⁸ Yoabɛ nɛa we zele we mɛ kɛ ma dɛa Adonia, do Abiatarɛ ni, nɛ a yu. Nɛ a usu tɛ̃ a tɛ fala wa dɔ do sa'de we dɔnggɔ do Gale ni, nɛ a 'be tɛ konggolo nu gbagala. A yù mba gɔ, tua kɛ zi dati, a sì 'do Absalɔmɛ dɛ tɛ Davidi gɔ, nɛ nde di ngangga ni, a si 'do Adonia dɛ tɛ Salɔmɔ.

²⁹ Kɔ nwa Salɔmɔ nɛa we zele na, Yoabɛ usu tɛ̃ ɛ tɛ fala wa dɔ do sa'de we dɔnggɔ do Gale ni, nɛ a tombo wele we aka Yoabɛ we gulu usi kɛ a usu do tɛ̃ a i mɔ ni. Nɛ Yoabɛ gese na, ɛ usu tɛ̃ ɛ ti kɔ̃ NWA Gale, tua kɛ ɛ dɛ kili Salɔmɔ. Nwa Salɔmɔ nɛa we zele ní, nɛ a tombo Bɛnaya we gbɛ Yoabɛ.

³⁰ Bɛnaya nɛa kɔ tɔa Gale i, nɛ a tɔ̃ hã Yoabɛ na: “Nwa ba nu ɛ na, mɔ hɔ nza.” Nɛ Yoabɛ gese na: “Ɔ̃ ɔ̃, mi kɔ̃a we fe dɛ dɛ.” Bɛnaya kpula tɛ̃ ɛ 'da Salɔmɔ i, nɛ a gba nu gisa we 'da Yoabɛ hã a.

³¹ Nɛ Salɔmɔ gese na: “Ma ɔ ní, nɛ mɔ dɛ ɔ nɛ kɛ a tɔ̃a ni: Mɔ gbɛ́ a, nɛ mɔ mi a, sɛ a mɔ fua sape li mi, do li onya mi, Owi nu fɛlɛ Davidi, we kɛ owinɔ bɔa kɛ Yoabɛ gbɛa zi wa ni, wa dɛ̀ zi 'dã mɔ gɔ.

³² E kɔ nwa si olo ku'da 'dã mɛ 'da a hã a wele nɛ. Mba gɔ, a gbɛa zi owinɔ ni, nɛ nde baa mi Davidi ĩ̀ zi mɔ kpo gɔ. Yoabɛ gbɛa zi owinɔ kɛ wa nɛa ngɔ a do bɔlɔ zu. Wi zi a Abnɛrɛ, gã wi ngɔ osoda Israɛlɛ, do Amasa, gã wi ngɔ osoda Yuda.

³³ E kɔ Yoabɛ do onu fɛlɛ a, wa kpa ngamɔ fai, olo fio winɔ a gbɛa zi wa ni! Nɛ e kɔ NWA hã dia dungu hã Owi nu fɛlɛ Davidi, kɛ wa dungu sɛ ngɔ kpongbo nwa olo a ni fai!”

³⁴ Bɛnaya zila ni, nɛ a kpolo tɛ̃ a kɔ tɔa Gale i, nɛ a gbɛ Yoabɛ, nɛ a mi a tɛ kɔ ngboe 'da a tɛ li zɔ̃ i.

³⁵ Nɛ nwa Salɔmɔ ia Bɛnaya do gã wi ngɔ osodanɔ dɛ olo Yoabɛ. Nɛ a e Sadɔkɛ do nganga kɛ a dɛ to tɛ fala wa dɔnggɔ do Gale ni dɛ olo Abiatarɛ.

Salɔmɔ gbɛa Simei

³⁶ Nwa Salɔmɔ sa mɔ hã Simei, nɛ a tɔ̃ hã a na: “Mi kɔ̃a na, mɔ dɛ́ tɔa mɔ mɔ dɛ Yeruzalɛmɛ gɛ. Nɛ mɔ ɔ́ dɛ dɛ, nɛ mɔ tɛ hɔ̀ nza kɔ le gɛ gɔ.

³⁷ Mi mbese mɔ na, kpo soe kɛ mɔ hɔ nza kɔ le gɛ, kɔ mɔ kũ lì Sedroni, nɛ mɔ fe sɛ. Ki ni, nɛ nde mɔ wele nɛ, mɔ a mɔ fa fie 'da mɔ.”

³⁸ Nɛ Simei gese na: “Nwa, mi kɔ̃a, mi dɛ sɛ ɔ nɛ kɛ mɔ tɔ̃a ni.” Nɛ Simei ɔ zi Yeruzalɛmɛ wena.

³⁹ Kɔ olo nɛ la sabɛlɛ talɛ, nɛ ombe ngbánɔ 'da a bɔa wa yu zi dɛ 'da Akisi, be 'da Maaka. Akisi zi a nwa kɔ le Gatɛ. Kɔ Simei nɛa we zele na, ongbánɔ 'da a, wa a tɛ 'da Akisi i,

⁴⁰ nɛ a 'dafa punda 'da a, nɛ a kũ ngɔ a, nɛ a nɛ tɛ Gatɛ i we fa ongbánɔ 'da a tɛ 'da Akisi i. A nɛa, nɛ a kpa wa, nɛ a kpolo tɛ̃ a do wa dɛ Yeruzalɛmɛ nga.

⁴¹ Nɛ Owele wa mbese Salɔmɔ na, Simei kulu zi ngɔ Yeruzalɛmɛ, nɛ a nɛa tɛ Gatɛ, kɔ a si.

⁴² Ma kɛ nwa sa mɔ hã Simei, nɛ a tɔ̃ hã a na: “Mi ba zi nu mi hã mɔ na, mɔ zonggo tɛ mɔ dɛ gbali NWA Gale na, mɔ hɔ́ sɛ nza kɔ le gɛ gɔ. Nɛ mi mbisa zi mɔ na, fala kɛ mɔ hɔ nza, kɔ mɔ nɛ tabi i do nde, nɛ mɔ fe sɛ. Nɛ mɔ kɔ̃a zi na, mɔ de sɛ olo nu mi.

⁴³ Kɔ gulu kɛ mɔ yala mbuli mɔ kpua zi dɛ gbali NWA Gale ni we ge nde? Gulu kɛ mɔ bɛ̃a we zele nu mi we ge nde?”

⁴⁴ Nɛ Salɔmɔ tɔ̃ 'bɔ na: “Mi ĩ na, ta zu mɔ tɛ èlè ngɔ 'dã mɛnɔ vɛ̃ kɛ mɔ dɛa zi do baa mi Davidi ni gɔ. Ta zu mɔ 'bana ngɔ nɛ de wena. Ma kɛ NWA Gale do tɛ̃ a, a dɛ sɛ na, mɔ kpa si olo 'dã mɛ 'da mɔ.

⁴⁵ Nɛ nde kɛ 'da mi, NWA Gale a wele sɛ nu a tɛ mi, nɛ to nwa ma 'bana sɛ dɛ kɔ nu fɛlɛ Davidi, nɛ ma nganda sɛ dɛ dati fai.”

⁴⁶ Nwa Salɔmɔ nɛa we Sɔkpɔ lɛnggɛ 'da ɛ, nɛ a ba nu a hã Bɛnaya, be 'da Yoyada na, a ba Simei, kɔ a gbɛ a. Yolo dɛ di ni, nɛ to nwa 'da Salɔmɔ ma nganda dɛ dati, nɛ owinɔ vɛ̃ wa kɔ̃a gɛnɛ to nwa 'da a.