1 Onwanɔ 19 - WE NU GALE 1995

Dɛa mɔ tɛ winɔ ma a tili li Elia

¹ Nwa Akabɛ tɔ̃a we mɛnɔ vɛ̃ kɛ Elia dɛa ni, hã kɛnɛ a Yezabɛlɛ. Nɛ a tɔ̃ 'bɔ tɛlɛ tɛ kɛ Elia gbɛa do Owi gba olo nu Bala ni hã a.

² Kɔ Yezabɛlɛ nɛa we zele ni, nɛ a tombo wele we mbese Elia na: “Mi kana tɛ mi na, fala kɛ bindɛ do sa gɛ, hã mi gbɛ mɔ, ɔ nɛ kɛ mɔ gbɛa do Owi gba olo nu galenɔ 'da mi ni gɔ, nɛ ogalenɔ wa gbɛ mi.”

³ Elia nɛa we zele ni, nɛ a dɛ kili, nɛ a kulu ngɔ do wi dɛa toe 'da a, nɛ a yu dɛ tɛ Bɛrseba, tɛ ngɔ nù Yuda. Wa hɔa i mɔ, nɛ a la wi dɛa toe 'da a dɛ di ni.

⁴ Nɛ a la dɛ li gba zɔ i, gbaa nɛ wese gɛ̃ a. Nɛ a dungu nù ti gɔ̃lɔ̃ be te kpo, nɛ a sambala na e fe. A na: “Aa NWA, mbé wɔ tɛ dungu nza tɛ mi 'bɔ bina! Mɔ kɔ, nɛ mɔ gbɛ́ mi iko, we kɛ mi dè nɛ ngɔ oyaa mi gɔ.”

⁵ Nɛ a ɔ nù dɛ ti te ni, nɛ a ɔ yala. Nɛ anzɛ kpo tɛ, nɛ a tunu a, nɛ a tɔ̃ hã a na: “Mɔ kúlú ngɔ, kɔ mɔ nyɔ́ngɔ́ mɔ.”

⁶ Nɛ Elia ka mɔ kɛ zã ɛ, nɛ a zɔ bila lì, do mbala mapa, kɛ wa dɔa ma ngɔ ba we ta ni. Nɛ a nyɔngɔ, nɛ a nɔ lì ngɔ nɛ, nɛ a ɔ 'bɔ nù.

⁷ Nɛ anzɛ 'da nwa tɛ 'bɔ, nɛ a tunu a, nɛ a tɔ̃ hã a na: “Mɔ kúlú ngɔ, kɔ mɔ nyɔ́ngɔ́ mɔ, tua kɛ mɔ nɛ nɛ gɛnɛ nyɛlɛ wena.”

⁸ Nɛ Elia kulu ngɔ, nɛ a nyɔngɔ mɔ, nɛ a nɔ lì, nɛ a kpa ngawi, nɛ a ma ngɔ la nɛ. A nɛa ni gbaa 'do 'bu tũ nalɛ, nɛ a hɔ ngɔ kala Horɛbɛ, kɛ mɛ a kala 'da Gale ni.

Gale hã mbé kpã sila hã Elia

⁹ Elia hɔa ngɔ kala Horɛbɛ, nɛ a le dɛ kɔ mbe ta kpo, nɛ a ɔ dɛ di ni. Nɛ nwa sa mɔ hã a, nɛ a aka a na: “Mɔ tɛa i nga we dɛ ge nde?”

¹⁰ Nɛ Elia gese hã a na: “Aa NWA Gale ngɔ nyanga nza vɛ̃, mi kɔ mɔ wena, ma kɛ mi wè 'bɔ we kunu sila mi ngɔ 'dã mɛnɔ 'da obe Israɛlɛ gɔ. We kɛ wa 'danga gba tɔkɛ 'da mɔ, wa gbini ogbagala dɔnggɔ do mɔ, nɛ wa gbɛa owi gba olo nu mɔ. Kɔ mɔ zɔ́, mi bana tati a mi zu mi kpo iko, hã wa fa 'bɔ we gbɛ mi gɛ.”

¹¹ Nɛ nwa tɔ̃ hã a na: “Mɔ hɔ́ nza, kɔ mɔ yolo dɛ dati mi tɛ ngɔ kala gɛ, we kɛ mi nɛ la wala do di ni.” Nɛ gba bũ kamba dɛa nganda wena, nɛ ma gba sanga kalanɔ, nɛ ma o 'bɔ sanga tanɔ dati NWA. Nɛ nde NWA là do gba bũ kamba ni gɔ. 'Do nɛ, nɛ nùi tana, nɛ nde NWA tɛ hɔ̀ gɔ.

¹² 'Do ki ni, nɛ we nyɛa, nɛ nde NWA kɔ nyɛa we ni bina. 'Do nyɛa we ni, nɛ be bũ fi gɛɔ.

¹³ Kɔ Elia nɛa we zele giti bũi ni, nɛ a ba tulu gɛ̃ɛ 'da a, nɛ a gu ma dɛ li a. A hɔa nza, nɛ a yolo dɛ dati ta a ɔa kɔ nɛ ni, nɛ a zele 'bɔ mbé gɛlɛ wele tɛ aka a na: “Mɔ tɛa i nga we dɛ ge nde?”

¹⁴ Nɛ Elia gese na: “Aa NWA Gale ngɔ nyanga nza vɛ̃, mi kɔ̃ mɔ wena, ma kɛ mi wè 'bɔ we kunu sila mi ngɔ 'dã mɛnɔ 'da obe Israɛlɛ gɔ. We kɛ wa 'danga gba tɔkɛ 'da mɔ, wa gbini ogbagala dɔnggɔ do mɔ, nɛ wa gbɛa owi gba olo nu mɔ. Kɔ mɔ zɔ́, mi 'bana tati a mi zu mi kpo iko, hã wa fa 'bɔ we gbɛ mi gɛ.”

¹⁵ Nɛ nwa tɔ̃ hã a na: “Mɔ kpóló tɛ mɔ do kpo kpo wala li gba zɔ̃ɛ gɛ, kɔ mɔ nɛ́ tɛ Damasi. Mɔ hɔ i mɔ, nɛ mɔ a nɔ zu Hazaɛlɛ, nɛ mɔ e a do nwa ngɔ nù Siri do zu li mi.

¹⁶ 'Do nɛ, nɛ mɔ nɛ, nɛ mɔ a nɔ zu Yehu, be 'da Nimsi, nɛ mɔ e a do nwa ngɔ nù Israɛlɛ. Nɛ mɔ a nɔ zu Elize, be 'da Safatɛ tɛ kɔ le Abɛlɛ-Mɛhola, nɛ mɔ e a do wi gba olo nu mi dɛ olo mɔ.

¹⁷ Mɔ dɛ ni, nɛ owinɔ wa kpasa sɛ li fio ti kɔ̃ Hazaɛlɛ ni, nɛ Yehu gbɛ wa. Nɛ owanɔ wa kpasa sɛ ti kɔ̃ Yehu ni, nɛ Elize gbɛ wa.

¹⁸ Nɛ nde mi la sɛ Owi wili koto sambo kɔ obe Israɛlɛ do tunu li wa. Wi sɛ a owanɔ kɛ wa gù gba zugolo dati gale Bala gɔ, nɛ wa nzɔ̀'bɔ̀ nu kpikimanɔ 'da a gɔɛ ni.”

Elia saka Elize we dungu olo a

¹⁹ Elia kulu ngɔ di ni, nɛ a nɛ, nɛ a kpa Elize, be 'da Safatɛ fala nɛ kpo do mbe owinɔ 'da a. A kpa wa nɛ nde wa do ongɔmbɔnɔ kɛ wa gbɔtɔ mɔ gɔmɔ nùi ni, kɔ wa gɔmɔ nù dɛ ngɔ we mi do kpalɛ. Mɛ zi a ongɔmbɔ 'bu nɛ bɔa ngɔ nɛ nalɛ, kɛ wa mba wa dɛ tɛ ngbɛ ɛ bɔa bɔa. Nɛ Elize dɛ zi toe do tala ngɔ go'do ngɔmbɛnɔ bɔa 'do nga ni. Kɔ Elia ma ngɔ la do kɛ zã Elize ni, nɛ a da tulu gɛ̃ɛ 'da a dɛ ngɔ a we be na, a saka a we dungu olo a.

²⁰ Elize zɔa ni, nɛ a la osa'denɔ 'da a dɛ di ni, nɛ a yu dɛ 'da Elia i, nɛ a tɔ̃ hã a na: “Mɔ kɔ̃, nɛ mi nɛ, hã mi mbese baa mi do naa mi, sɛ nɛ mi la do mɔ de.” Nɛ Elia gese hã a na: “Mi sa li mɔ nde? Mɔ kɔ̃ we si nɛ, nɛ mɔ si iko.”

²¹ Elize kpula tɛ̃ a kɔ fɔ 'da a i, nɛ a kala ongɔmbɔ bɔa, nɛ a gbɛ wa we dɔnggɔ do Gale. A kala te wa kpo tɛ ngɔmbɛnɔ ni, nɛ a gbini sanga nɛ, nɛ a dã do we, nɛ a gi do sa'de ngɔmbɛ, nɛ a hã ma hã owinɔ kɛ wa zi di ni ni, nɛ wa nyɔngɔ. Wa nyɔngɔ do'do, nɛ Elize kulu ngɔ, nɛ a la 'do Elia, nɛ a hɔ wi dɛa toe 'da a.