1 Onwanɔ 18 - WE NU GALE 1995

Elia mbisa winɔ na, kolo ma tɛ sɛ

¹ Olo nɛ la nyɛlɛ wena, kolo tɛ́ 'bɔ gɔ gbaa, kɔ ma nɛa we hɔ kɔ talɛ sabɛlɛ ngangga ni, nɛ NWA tɔ̃ hã Elia na: “Mɔ nɛ́ tɛ 'da nwa Akabɛ, we kɛ mi nɛ fi kolo dɛ ngɔ nùi gɛ.”

² Nɛ Elia nɛa 'da nwa Akabɛ i. Do 'da fala ni, nɛ nde tɛ Samaria gba wɔ fila kerr,

³ nɛ nwa Akabɛ sa mɔ hã Obadia, gã wi kɔ tɔa nwa 'da a. (Obadia ni zi a ngbongbo wi kɔ̃ NWA Gale ngboo.

⁴ Mbe ngba soe zi kpo, nɛ Yezabɛlɛ, kɛnɛ nwa, a tɛ gbɛ owi gba olo nu NWA Gale, nɛ Obadia kpasa zi ombe kɔ wa kama kpo. A kɛ̃a zi wa 'bu wa mɔlɔ mɔlɔ, nɛ a usu wa kɔ ota tɛ ngɔ kalanɔ. Nɛ a gala wa do nyɔngɔmɔ do lì.)

⁵ Obadia hɔa 'da nwa Akabɛ, nɛ Akabɛ tɔ̃ hã a na: “Mɔ tɛ́ kɔ lɛ yɛnggɛ we zɔ zu lìnɔ, do ofua lìnɔ vɛ̃. Mbe gɔ, nɛ lɛ kpa dia wɔkɔsɔ kɛ ombalatanɔ, do opundanɔ wa wia we nyɔngɔ ma ni. Na mɛ ni, lɛ wé sɛ we gbɛ mbe sanga sa'denɔ ni gɔ.”

⁶ Wa kɛ̃a sanga nùnɔ kɛ na, wele do wele zɔ ma ni. Kɔ wa zila ngba wa do'do, nɛ Akabɛ ba wala 'da a, nɛ Obadia ba tɛ mɛ 'bɔ kɛ 'da a.

⁷ Obadia nɛa we hɔ li wala i, nɛ a kpa ngba a do Elia kpiti. A nɛa we ĩ ti Elia ni, nɛ a bili zu a nu ti a, nɛ a aka a na: “Nwa 'da mi Elia, wi a mɔ nde?”

⁸ Nɛ Elia gese hã a na: “Ĩi, wi a mi! Kɔ mɔ nɛ́, hã mɔ tɔ̃ hã nwa 'da mɔ Akabɛ na, mi a mi tɛ ni.”

⁹ Nɛ Obadia aka a na: “'Dã mɛ mi dɛa, kɔ mɔ kɔ̃a we fi mi kɔ fɛna fie ti kɔ̃ Akabɛ gɛ a ge nde?

¹⁰ Mi tɔ̃ hã mɔ do zu li NWA wele kpasi, kɛ a a Gale 'da mɔ ni na, nwa 'da mi tumba zi Owele tɛ ngɔ nùnɔ vɛ̃ we fa mɔ. Kɔ fala kɛ mbe wi fɔmɔ le kpo tɛ, hã a tɔ̃ na, mɔ 'da lo i bina ni, nɛ nwa Akabɛ tɔ̃ na, wi ni kana tɛ̃ ɛ na, ɛ kpà mɔ gɔ, sɛ nɛ de.

¹¹ Nɛ nde di ngangga gɛ mɔ kɔ̃a na, mi nɛ hã mi tɔ̃ hã a na, mɔ a mɔ tɛ ni nde?

¹² Kɔ fala kɛ mi la di do'do, hã Hi Wi 'da NWA Gale tɛ, hã a ba mɔ la do mɔ dɛ gele fala do olo mi gɛ, nɛ mi dɛ sɛ nɛ nɛ nde? Fala kɛ mi tɔ̃ hã Akabɛ ní, hã a zɔ̀ mɔ gɔ ni, nɛ a gbɛ́ sɛ mi gɔ nde? Mɔ ĩ vɛ̃ na, yolo tɛ gã 'da mi gbaa tia do sɔɛ gɛ, mi a ngbongbo wi dɔnggɔ NWA Gale ngboo.

¹³ Mɔ zèlè we kɛ Yezabɛlɛ gbɛa zi do Owi gba olo nu NWA Gale, nɛ mi kpasa ombe kɔ wa kama kpo ni gɔ nde? Mi kɛ̃a zi sanga wa 'bu wa mɔlɔ mɔlɔ, nɛ mi usu wa kɔ ota ngɔ kalanɔ, nɛ mi gala wa do nyɔngɔmɔ do lì.

¹⁴ Dɛ do kɛ mɔ ba 'bɔ nu mɔ hã mi na, mi nɛ hã mi tɔ̃ hã nwa Akabɛ na, mɔ a mɔ tɛ ni nɛ nde? A zele ni, nɛ a gbɛ́ sɛ mi gɔ nde?”

¹⁵ Nɛ Elia gese hã a na: “Do zu li NWA ngɔ nyanga nza vɛ̃, kɛ a a Gale wele kpasi, nɛ mi dɛ toe hã a gɛ, mi tɔ̃ hã mɔ na, sɔɛ gɛ, mi hɔ sɛ 'da Akabɛ ni.”

Elia nɛa 'da Akabɛ

¹⁶ Obadia nɛa, nɛ a kpa Akabɛ, nɛ a tɔ̃ we nɛ hã a. Nɛ Akabɛ kulu ngɔ, nɛ a gɔnɔ dati Elia.

¹⁷ Kɔ a nɛa we zɔ a, nɛ a na: “Mɔ wi hã ngamɛ hã obe Israɛlɛ gɛ, mɔ hɔa kpaa nde?”

¹⁸ Nɛ Elia gese na: “Mi a mi hã̀ ngamɛ hã obe Israɛlɛ gɔ. Wi a mɔ do nu fɛlɛ mɔ, tua kɛ nɛ bɛ̃a we dɛ mbulanɔ 'da nwa, nɛ nɛ dɔnggɔ okpikimanɔ 'da gale Bala.

¹⁹ Nɛ nde ngangga ni, mɔ tómbó Owele, hã wa ngɛmɛ li obe Israɛlɛ vɛ̃ dɛ kɛ zã mi tɛ ngɔ kala Karmɛlɛ. Nɛ wa sa 'bɔ mɔ hã owi gba olo nu Bala kama nalɛ do 'bu wa mɔlɔ ni, do owanɔ kama nalɛ kɛ wa gba olo nu gale wuke Asera, nɛ kɛnɛ mɔ Yezabɛlɛ gbaka wa kɔ mɛnɔ vɛ̃ ni, hã wa tɛ.”

Elia do owi gba olo nu gale Bala wa mba ngba wa tɛ Karmɛlɛ

²⁰ Nɛ Akabɛ sa mɔ hã onu kpala obe Israɛlɛ vɛ̃, fala nɛ kpo do owi gba olo nu gale Bala na, wa mba ngba wa tɛ ngɔ kala Karmɛlɛ. Wa mba ngba wa do'do,

²¹ nɛ Elia nɛ, nɛ a yolo dɛ dati winɔ vɛ̃, nɛ a na: “Nɛ nɛ 'do NWA Gale, nɛ nɛ nɛ 'bɔ 'do ogale bɛlɛnɔ, nɛ nɛ dɔnggɔ wa bɔa nɛ. Kɔ nɛ nɛ la fala dɛ ní soe ki nge nde? Tabi nwa a ngbongbo Gale, nɛ ma wia na, nɛ dɔnggɔ a, tabi ngbongbo Gale wi a Bala, nɛ nɛ dɔnggɔ a!” Nɛ wele kpo wèlè we gɔ.

²² Nɛ Elia tɔ̃ 'bɔ hã wa na: “Wi 'bana di do wi gba olo nu NWA Gale, wi a mi zu mi kpo, ĩ na owi gba olo nu gale Bala wa kama nalɛ do 'bu wa mɔlɔ.

²³ Kɔ nɛ tɛ́ do owili ngɔmbɔ bɔa hã lɛ. Nɛ owi gba olo nu gale Bala wa ba sɛ mbe kpo, nɛ wa gbɛ a, nɛ wa gɔmɔ a, nɛ wa a sa'de nɛ dɛ ngɔ guanɔ, nɛ nde wa tɛ fì we tɛ nɛ gɔ. Nɛ mi ba sɛ tɛ mɛ 'bɔ mbee nɛ, nɛ mi dɛ kpasaa na mɛ ni.

²⁴ Nɛ owi gba olo nu gale Bala wa sambala sɛ gale 'da wa, nɛ mi sambala tɛ mɛ 'bɔ NWA. Nɛ Gale wele kɛ a fi sɛ we tɛ dɔnggamɛ ni, a a ngbongbo Gale.” Nɛ winɔ vɛ̃ wa kɔa.

²⁵ Nɛ Elia tɔ̃ hã owi gba olo nu gale Bala na: “Ɔ nɛ kɛ nɛ dɔ wena ni, nɛ a nɛ ndo dati. Nɛ saka ngɔmbɔ kpo, nɛ nɛ gbɛ a we hã do dɔnggamɔ hã gale 'da nɛ. 'Do nɛ, nɛ nɛ ma ngɔ sambala nɛ, nɛ nde nɛ tɛ fì we tɛ guanɔ gɔ.”

²⁶ Nɛ Owi gba olo nu gale Bala, wa ba ngɔmbɛ kɛ wa tɛa nɛ hã wa ni, nɛ wa gbɛ a we dɔnggɔ do Bala, nɛ yolo do titole gbaa we hɔ midi, wa tɛ ala nu wa hã Bala na: “Aa Bala, mɔ kɔ̃ nu lɛ!” Nɛ wa tɛ yɔ yɔla tɛ zĩ 'do gbagala wa dɛa ni. Nɛ nde Bala gèsè we kpo hã wa gɔ.

²⁷ Kɔ ma kɔlɔ do midi, nɛ Elia ma ngɔ mɔmɔ wa, nɛ a na: “Nɛ hé mɔ nganda! We kɛ a a gale! Mbe gɔ, nɛ nde a tɛ lengge gele linggamɔ, tabi a do gele dɛa to wena. Kɔ ní gɔ, nɛ nde a nɛa gɛnɛ, tabi a ɔa yala, kɔ ma wia na, nɛ tunu a.”

²⁸ Nɛ wa hia mɔ nganda wena. Nɛ wa ma ngɔ 'bili tɛ wa do odu kɔya, do osɛlɛ ɔ nɛ kɛ wa dɛ fai ni, nɛ tɔkɔ tɛ wa fo loee.

²⁹ Kɔ midi la do'do, nɛ wa ma 'bɔ ngɔ sa mɔ hã Bala nganda wena dɛ dati gbaa, nɛ nde Bala gèsè nu we kpo gɔ, nɛ mɔ kpo dɛ̀ tɛ̃ ɛ gɔ.

³⁰ Nɛ Elia tɔ̃ hã winɔ na, wa ngbɔ dɛ 'dɛ ɛ nga. Wa ngbɔa dɛ kɛ zã a, nɛ Elia ma ngɔ 'dafa gbagala 'da NWA, kɛ ma 'danga zi ni.

³¹ A kala ota 'bu ngɔ nɛ bɔa do 'da zu onu kpala obe zã Yakɔbɔ, kɛ NWA tɔ̃a zi hã a na: “Yolo sɔɛ gɛ wa sa sɛ li mɔ na Israɛlɛ” ni.

³² Elia kala otanɔ ni, nɛ a dɛ do gbagala dɔnggɔ do NWA. Nɛ a zã kɔ̃ zĩ do gbagala ni takpa, nɛ kɔ̃ɛ ni wia we le litrɛ lì 'bu nɛ talɛ.

³³ A dã nu guanɔ ni dɛ ngɔ gbagala, nɛ a gbɛ wili ngɔmbɛ, nɛ a gɔmɔ a, nɛ a a sa'de nɛ dɛ ngɔ guanɔ ni.

³⁴ Nɛ a ba nu a hã owinɔ na: “Nɛ tɛ̃ do kpana lì nalɛ, nɛ nɛ a lì ni dɛ ngɔ dɔnggamɛ do guanɔ.” Wa dɛa ni, nɛ Elia na: “Nɛ á 'bɔ mbé nɛ.” Nɛ wa a 'bɔ. Nɛ a ba 'bɔ nu a na, wa a fala talɛ. Nɛ wa a 'bɔ.

³⁵ Nɛ lì hulu dɛ kɛ zã gbagala, nɛ ma dunu kɔ kɔ̃ɛ vɛ̃.

³⁶ Ma hɔa 'do midi, do sa kɛ wa hã do dɔnggamɛ hã Gale kɔ Tɛmpɛlo i ni, nɛ Elia nɛa, nɛ a kɔlɔ do gbagala, nɛ a na: “NWA Gale 'da Abrahama, do Izaka, do Yakɔbɔ, mɔ kɔ̃, nɛ mɔ bé sɔɛ gɛ na, mɔ a Gale 'da obe Israɛlɛ, nɛ mi a wi toe 'da mɔ. Mɔ bé 'bɔ na, mi dɛ mɛnɔ gɛ vɛ̃ do olo nu mɔ.

³⁷ Aa NWA, mɔ kɔ̃́ nu mi, sɛ a owinɔ gɛ wa ĩ na mɔ NWA, mɔ a ngbongbo Gale de. Mɔ a mɔ dɛ na, owinɔ gɛ wa kifi sila wa dɛ 'da mɔ, ɔ nɛ kɛ zi dati ni.”

³⁸ Nɛ NWA dɛa na we yolo li nza i, nɛ ma zĩlĩ, nɛ ma bɛlɛ dɔnggamɛ, do guanɔ, do tanɔ, do nùi ti nɛ ni, nɛ ma ɔ̃sɔ̃ lì kɔ kɔ̃ɛ vɛ̃.

³⁹ Kɔ obe Israɛlɛ wa nɛa we zɔ ni, nɛ wa vɛ̃ wa bili zu wa gbaa nɛ ma to nù, nɛ wa ma ngɔ he mɔ na: “NWA a ngbongbo Gale! NWA a ngbongbo Gale!”

⁴⁰ Nɛ Elia tɔ̃ hã wa na: “Nɛ kálá Owi gba olo nu Bala vɛ̃, da dɛ kɔ wele kpo yú gɔ.” Wa nɛa we kala wa vɛ̃, nɛ Elia ba nu ɛ na, wa nɛ do wa tɛ nu fua lì Kisoni, kɔ wa 'bili gɛlɛ wa.

Kole ma ngɔ si nù

⁴¹ Dɛ 'do nɛ, nɛ Elia tɔ̃ hã Akabɛ na: “Mɔ nɛ́, kɔ mɔ nyɔngɔ mɔ, tua kɛ kolo ma ngɔ dĩ nɛ.”

⁴² Akabɛ nɛa we nyɔngɔ mɔ, nɛ Elia kũ dɛ ngɔ kala Karmɛlɛ. A hɔa i mɔ, nɛ a bili zu a gbaa nɛ ma to nù, nɛ a usu bula li a dɛ sala ku a.

⁴³ Nɛ a tɔ̃ hã wi dɛa toe 'da a na: “Mɔ kũ dɛ zu kala i, kɔ mɔ ka mɔ dɛ ngɔ gba lì.” Nɛ wi dɛa toe kũ, nɛ a ka mɔ ngɔ lì, nɛ a tɛ, nɛ a tɔ̃ hã Elia na: “Mɔ kpo bina.” Nɛ Elia tombo wi dɛa toe ni fala sambo.

⁴⁴ Ma hɔa tɛ sambo kɛ, nɛ wi dɛa toe tɛ, nɛ a tɔ̃ hã Elia na: “Mi zɔa be kutu be sĩ ɔ nɛ tambala kɔ̃ wi ni, ma yolo ngɔ gba lì, kɔ ma kũ dɛ ngɔ.” Nɛ Elia ba nu ɛ hã a na: “Mɔ nɛ́ hã mɔ tɔ̃ hã Akabɛ na, a kpo mbalatanɔ 'da a dɛ tɛ ngilingili, kɔ a si, da dɛ kɔ kole gɔ́nɔ́ nu a gɔ.”

⁴⁵ 'Do nɛ nyɛ̀lɛ̀ gɔ, nɛ bũi tɛa do lĩ kolo, nɛ li nza tũ kpirr, nɛ gba kolo ma ngɔ tɛ nganda wena. Nɛ Akabɛ kũ dɛ kɔ ngilingili 'da a we si dɛ Yizreɛlɛ i.

⁴⁶ Ngawi 'da nwa ma lia kɔ Elia, nɛ a kpo kamba 'dɛ tili a, nɛ a ma ngɔ yu do dati ngilingili 'da Akabɛ gbaa we hɔ tɛ nu ngba le Yizreɛlɛ.