1 Onwanɔ 17 - WE NU GALE 1995

Gale tumba wi gba olo nu a Elia

¹ Mbe wele kpo zi kɔ le Tisbe, tɛ ngɔ nù Galadɛ, li a a Elia. A nɛa 'da nwa Akabɛ, nɛ a tɔ̃ hã a na: “Mi, wi toe 'da NWA wele kpasi, kɛ a a Gale 'da obe Israɛlɛ ni, mi tɔ̃ hã mɔ do zu li a na, kɔ sabɛlɛnɔ tɛ gɛ, mbɔɛ álá sɛ gɔ, nɛ kolo tɛ́ sɛ 'bɔ gɔ gbaa, hã mi aka a we nɛ sɛ nɛ de.”

² Nɛ NWA Gale tɔ̃ hã Elia na:

³ “Mɔ kúlú ngɔ tɛ le Tisbe gɛ, kɔ mɔ nɛ́ si 'biti gba wese, hã mɔ úsú tɛ mɔ dɛ kɛ zã fua lì Kɛritɛ, tɛ kulu Yɔrdanɛ si 'biti gba wese.

⁴ Mɔ kpa sɛ lì nɔ nɔa nu fua lì ni, nɛ mi tombo sɛ oganakele do nyɔngɔmɔ hã mɔ.”

⁵ Elia dɛa olo nu NWA, nɛ a kulu ngɔ, nɛ a la dɛ tɛ nu fua lì Kɛritɛ, nɛ a ɔ dɛ di ni.

⁶ Nɛ tũ kpo kpo oganakele wa tɛa do mapa do sa'de hã a. Wa tɛ do titole, nɛ wa tɛ 'bɔ do gɛ̃a wese. Nɛ a nɔ zi fua lì ni.

Elia hɔa 'da wi fio wili tɛ kɔ le Sarɛpta

⁷ Nɛ nde olo nɛ là wena gɔ, nɛ fua lì ɔ̃sɔ̃, we kɛ kolo tɛ zi 'bɔ ngɔ nùi ni gɔ.

⁸ Nɛ nwa tɔ̃ hã Elia na:

⁹ “Mɔ kúlú ngɔ, kɔ mɔ nɛ́ tɛ kɔ le Sarɛpta, dɔ̃ɔ do Sidoni, nɛ mɔ ɔ́ dɛ di ni. Mi ba nu mi hã mbe wi fio wili di ni kpo na, a hã sɛ nyɔngɔmɔ hã mɔ.”

¹⁰ Nɛ Elia kulu ngɔ, nɛ a nɛ tɛ kɔ le Sarɛpta. Kɔ a nɛa we hɔ tɛ nu ngba le, nɛ a zɔ mbe wi fio wili kpo tɛ fa gua. Nɛ a sa mɔ hã a, nɛ a tɔ̃ hã a na: “Mɔ kɔ, nɛ mɔ so mbe lì, hã mi nɔ.”

¹¹ Kɔ wuke la we so lì ni, nɛ Elia sa 'bɔ mɔ 'do a, nɛ a tɔ̃ hã a na: “Mɔ tɛ́ 'bɔ do mapa hã mi.”

¹² Nɛ wuke gese na: “Mi tɔ̃ do zu li NWA wele kpasi, kɛ a a Gale 'da mɔ ni na, mi do mapa bina. Mi 'bana tati a do be tala fũ farini sĩ dɛ kɔ bila, do be tala nɔ dɛ kɔ kpana. Ma kɛ mi tɛa we fa gbã gua gɛ we gi do ma, takɔ lɛ nyɔngɔ do be 'da mi. Kɔ lɛ nyɔngɔ tala ki ni do'do, nɛ lɛ 'bɔ sɛ 'da fio iko.”

¹³ Nɛ Elia tɔ̃ hã a na: “Mɔ tɛ dɛ kili gɔ! Mɔ nɛ́ hã mɔ dɛ́ kɛ mɔ tɔ̃a ni. Nɛ nde dati, mɔ dɔ be mapa sĩ, nɛ mɔ tɛ nɛ hã mi sɛ, nɛ mɔ ĩ ti dɔ tala ki ni, takɔ nɛ nyɔngɔ do be 'da mɔ de.

¹⁴ Mba gɔ, NWA Gale 'da obe Israɛlɛ tɔ̃a na, fũ farini é sɛ kɔ bila gɔ, nɛ nɔɛ é sɛ kɔ kpana gɔ, gbaa we 'bɔ na, ɛ nwa ɛ fi mbé kolo dɛ ngɔ nùi.”

¹⁵ Wuke ni zila, nɛ a la we dɛ mɛ kɛ Elia tɔ̃a ni. Nɛ kɔ̃ tũnɔ vɛ̃, wi fio wili ni do be 'da a, do wi gba olo nu Gale, wa nyɔngɔ mɔ do dia nɛ iko.

¹⁶ Nɛ fũ farini è kɔ bila gɔ, nɛ nɔɛ è 'bɔ kɔ kpana gɔ, ɔ nɛ kɛ Elia tɔ̃a do zu li nwa ni.

Elia kpasa be 'da wi fio wili

¹⁷ Olo nɛ là wena gɔ, nɛ be 'da wuko wele tɔa ni te do zɛlɛ, nɛ ma nɛ ngɔ a, nɛ a fe.

¹⁸ Naa be nɛa we zɔ ni, nɛ a aka Elia na: “Wi gba olo nu Gale, gulu kɛ mɔ dɛa do mi ni we ge nde? Mɔ tɛa we gba ta zu Gale ngɔ 'dã mɛnɔ 'da mi, takɔ a gbɛ be 'da mi nde?”

¹⁹ Nɛ Elia gese hã a na: “Mɔ bá be hã mi!” A ia be dɛ kɔ̃ a, nɛ a ba a, nɛ a kũ do a dɛ kɔ 'bili tɔa ngɔ i, tɛ fala wa ba hã a na a ɔ nɛ ni, nɛ a fi a dɛ ngɔ mɔ ɔi 'da a.

²⁰ Nɛ a ma ngɔ sambala nwa na: “Aa NWA Gale 'da mi, mɔ hã gã ngamɔ hã wuke gɛ we ge nde? A dɛ mi de wena, kɔ mɔ gbɛa 'bɔ be 'da a we ge nde?”

²¹ Nɛ Elia ɔa dɛ ngɔ be fala talɛ, nɛ a sambala NWA na: “NWA Gale 'daa, mi ala nu mi hã mɔ na, mɔ kɔ̃, nɛ mɔ kpasa be gɛ.”

²² Nɛ NWA zila sambala 'da Elia, nɛ a kpasa be,

²³ nɛ Elia zĩlĩ do a, nɛ a ba a hã naa a, nɛ a tɔ̃ hã a na: “Mɔ zɔ́, be 'da mɔ kpasa ia!”

²⁴ Nɛ wuke tɔ̃ hã a na: “Mi ĩ wá di ngboo na, mɔ a wi gba olo nu Gale, nɛ mɔ wele wenɔ do zu li NWA ngboo.”