1 Onwanɔ 16 - WE NU GALE 1995

¹ NWA Gale wila we hã wi gba olo nu a Yehu, be 'da Hanani. A tumba a we tɔ̃ toe gɛ hã Basa na:

² “Mɔ zi a nga wi kɔ le iko, nɛ mi ba mɔ dɛ ngɔ, nɛ mi e mɔ do nwa ngɔ Oisraɛlɛ, winɔ 'da mi. Nɛ nde mɔ dɛa mɔ tɛ mɔ dè gɔ, ɔ nɛ kɛ 'da Yeroboamɛ ni. Mɔ tumba Oisraɛlɛ we dɛ 'dã mɔ, nɛ wa nɔ̃lɔ̃ zã mi do 'dã mɛnɔ 'da wa.

³ Gulu nɛ hã mi nɛ mbiti nu fɛlɛ kula 'da mɔ vɛ̃, mi dɛ sɛ do nɛ ɔ nɛ kɛ mi dɛa zi do nu fɛlɛ Yeroboamɛ, be 'da Nɛbatɛ ni.

⁴ Kɔ nu fɛlɛ mɔ vɛ̃, wi kɛ a fe 'da le, nɛ otolo wa nyɔngɔ sɛ wɔlɔ a, nɛ wele kɛ a fe zamɔ, nɛ oganakele wa gɔmɔ sɛ wɔlɔ a.”

⁵ Tala mɛnɔ vɛ̃ kɛ Basa dɛa zi ni, wa kɔma ma kɔ 'buki li nɛ a: “Dɛa tonɔ 'da onwa ngɔ nù Israɛlɛ.” Dɛ kɔ nɛ ni, wa tɔ̃ we mɛnɔ kɛ a dɛa ni, do kpã sila kɛ a zi do ma kɔ to nwa 'da a ni.

⁶ Kɔ a fia, nɛ wa mi a tɛ Tirsa. Nɛ be 'da a Ela dungu nwa olo a.

⁷ NWA tumba zi wi gba olo nu a Yehu, be 'da Hanani do to hã Basa do nu fɛlɛ a. Toe ni ma zi do gulu nɛ bɔa: Kɛ dati, we kɛ Basa do nu fɛlɛ a, wa dɛa zi mɛ kɛ ma dè tɛ NWA gɔ, nɛ wa nɔ̃lɔ̃ zi zã a wena, kpasaa ɔ nɛ kɛ 'da Yeroboamɛ do nu fɛlɛ a ni. Kɛ bɔa, we kɛ Basa gbɛa zi Owi nu fɛlɛ Yeroboamɛ.

Ela hɔa nwa ngɔ nù Israɛlɛ

⁸ Asa ɔa tɛ to nwa 'da a ngɔ nù Yuda 'bu sabɛlɛ bɔa ngɔ nɛ gazɛlɛ, nɛ Ela, be 'da Basa hɔ nwa ngɔ nù Israɛlɛ. A dungu zi nwa tɛ Tirsa 'do sabɛlɛ bɔa.

⁹ Do 'da fala ni, nɛ nde Zimri zi a gã wi ngɔ kpo mbee bɔa 'da osodanɔ kɛ wa bi bole do ngilingilinɔ ni. Nɛ a ba zã zu Ela we fo a tɛ to nwa do'do. Nɛ mbe ngba soe kpo, nɛ nwa Ela nɛa 'da Arsa, mbe gã wi kɔ tɔa 'da nwa dɛ kpo Tirsa ni. A hɔa i mɔ, nɛ wa nɔ dɔ̃, nɛ ma ba wa.

¹⁰ Nɛ Zimri hɔ, nɛ a gbɛ Ela, nɛ a ba to nwa olo a. Do 'da fala ni, nɛ nde Asa dɛa to nwa 'da a ngɔ nù Yuda 'do 'bu sabɛlɛ bɔa ngɔ nɛ sambo.

¹¹ Kɔ Zimri nɛa we ba to nwa, nɛ a dà'bà gɔ, nɛ a gbɛ Owi nu fɛlɛ nwa Basa vɛ̃, a là wele kpo do tunu li a gɔ. A gbɛa obenɔ do okpasa winɔ kɔ nu fɛlɛ a ni do oyali ngba a vɛ̃.

¹² Na mɛ ni, Zimri kumu nu fɛlɛ Basa vɛ̃ ɔ nɛ kɛ Yehu, wi gba olo nu Gale tɔ̃a zi do zu li NWA Gale ni.

¹³ Mɛnɔ ni vɛ̃ ma dɛa tɛ̃ ɛ, we kɛ Basa do be 'da a Ela, wa dɛa zi 'dã mɔ, nɛ wa tumba 'bɔ Oisraɛlɛ we dɛ 'dã mɔ. Wa nɔ̃lɔ̃ zã NWA Gale 'da obe Israɛlɛ tɛ kɛ wa dɔnggɔ okpikimanɔ ni.

¹⁴ Tala mɛnɔ vɛ̃ kɛ Ela dɛa ni, wa kɔma ma kɔ 'buki li nɛ a: “Dɛa tonɔ 'da onwa ngɔ nù Israɛlɛ.”

Zimri hɔa nwa ngɔ nù Israɛlɛ

¹⁵ Asa ɔa tɛ to nwa 'da a ngɔ nù Yuda 'bu sabɛlɛ bɔa ngɔ nɛ sambo, nɛ Zimri hɔ nwa ngɔ nù Israɛlɛ. Nɛ a dɛa zi to nwa 'da a tɛ Tirsa 'do tũ sambo. 'Da fala ni, nɛ nde osoda Israɛlɛ wa linggi le Gibɛtoni we ba ma. We kɛ le Gibɛtoni ma zi dɛ kɔ̃ Ofilisti.

¹⁶ Nɛ osoda Israɛlɛ wa nɛa we zele na, Zimri ba zã zu we dɛ ngɔ nwa, kɔ a gbɛa a ni, nɛ wa ɔ ngɔ we kpo, nɛ wa yolo tɛ fala wa ɔ do ma ni, nɛ wa saka Omri, gã wi ngɔ wa, do nwa ngɔ nù Israɛlɛ.

¹⁷ Nɛ Omri kulu ngɔ tɛ Gibɛtoni do osodanɔ 'da a vɛ̃, nɛ wa nɛ, nɛ wa linggi le Tirsa we ba ma.

¹⁸ Kɔ nwa Zimri nɛa we zɔ na, wa ba le ia, nɛ a yu, nɛ a usu tɛ̃ a kɔ 'bili tɔa kpo tɛ kɔ tɔa nwa i. Nɛ a fi we tɛ nɛ, nɛ a fe dɛ kɔ nyɛa we ni.

¹⁹ Mɛnɔ ni vɛ̃ ma dɛa tɛ̃ ɛ we kɛ Zimri dɛa zi 'dã mɔ. A dɛa zi mɔ kɛ ma dè tɛ NWA gɔ, nɛ a ba wala olo Yeroboamɛ, kɛ a tumba zi obe Israɛlɛ we dɛ 'dã mɔ ni.

²⁰ Tala mɛnɔ vɛ̃ kɛ Zimri dɛa zi ni, wa kɔma ma kɔ 'buki li nɛ a: “Dɛa tonɔ 'da onwa ngɔ nù Israɛlɛ.” Dɛ kɔ nɛ ni, wa tɔ̃ 'bɔ we kɛ a ba zi zã zu we fo nwa Ela ni.

²¹ 'Do fie 'da Zimri, nɛ Oisraɛlɛ wa kɛ̃a sanga tɛ ngba wa: ombe wa kɔ̃a zi na, Tibni, be 'da Ginatɛ, dungu nwa. Nɛ ombe nɛ wa kɔ̃ gɛnɛ Omri.

²² Ma dɛa ni gbaa, nɛ owanɔ wa kɔ̃a gɛnɛ Omri, wa nɛa ngɔ owanɔ wa kɔ̃a gɛnɛ Tibni ni. Tibni fia, nɛ Omri dungu nwa.

Omri hɔa nwa ngɔ nù Israɛlɛ

²³ Asa ɔa tɛ to nwa 'da a ngɔ nù Yuda 'bu sabɛlɛ talɛ ngɔ nɛ kpo, nɛ Omri hɔ nwa ngɔ nù Israɛlɛ. A dɛa to nwa 'da a sabɛlɛ 'bu ngɔ nɛ bɔa. Dati, a dɛa sabɛlɛ gazɛlɛ tɛ Tirsa.

²⁴ Dɛ 'do nɛ, nɛ a nɛ 'da mbe wele kpo, li a a Semɛrɛ, nɛ a aka a we oso kala Samaria kɔ̃ a. Nɛ a usa ma do mbili fɛ̃a mɔ bolo koto gazɛlɛ. Nɛ a dɛ gã le ngɔ kala ni, nɛ a e li ma na Samaria, we anga li ã gbɛlɛ wele nɛ, Semɛrɛ.

²⁵ Nɛ nde Omri dɛa mɔ kɛ ma dè tɛ NWA gɔ. A dɛa mɔ tɛ̃ a 'danga la ngɔ kɛ 'da ongba a dati a ni vɛ̃.

²⁶ A dɛa mɔ tɛ̃ a dè gɔ ɔ nɛ kɛ 'da Yeroboamɛ, be 'da Nɛbatɛ kɛ a tumba zi Oisraɛlɛ we dɛ 'dã mɔ ni. Nɛ a nɔ̃lɔ̃ zi zã NWA Gale 'da obe Israɛlɛ, we kɛ a dɛa zi na, Oisraɛlɛ wa dɔnggɔ okpikimanɔ.

²⁷ Tala mɛnɔ vɛ̃ kɛ Omri dɛa zi ni, wa kɔma ma kɔ 'buki li nɛ a: “Dɛa tonɔ 'da onwa ngɔ nù Israɛlɛ.” Dɛ kɔ nɛ ni, wa tɔ̃ we mɛnɔ kɛ a dɛa zi ni, do kpã sila kɛ a dɛa zi do to nwa 'da a ni.

²⁸ Kɔ a fia, nɛ wa mi a tɛ Samaria, nɛ be 'da a Akabɛ dungu nwa olo a.

Akabɛ hɔa nwa ngɔ nù Israɛlɛ

²⁹ Asa ɔa tɛ to nwa 'da a ngɔ nù Yuda sabɛlɛ 'bu nɛ talɛ ngɔ nɛ ngbɛ'dɛ'dɛ, nɛ Akabɛ, be 'da Omri hɔ nwa ngɔ nù Israɛlɛ. Nɛ a dungu nwa tɛ Samaria 'do sabɛlɛ 'bu nɛ bɔa ngɔ nɛ bɔa.

³⁰ Nɛ nde a dɛa mɔ kɛ ma dè mbe tɛ NWA sĩ gɔ ni. A dɛa mɔ tɛ̃ a 'danga la ngɔ kɛ 'da ongba a zi dati a ni vɛ̃.

³¹ A dɛa 'bɔ 'dã mɔ nɛa ngɔ kɛ Yeroboamɛ, be 'da Nɛbatɛ dɛa zi ni. Mba gɔ, we kɛ dɛ ngɔ gele 'dã mɛnɔ a dɛa ni, nɛ a ba 'bɔ Yezabɛlɛ, be zɔnga be 'da Ɛtbalɛ, nwa ngɔ Osidoni. Nɛ a gu 'bɔ gba zugolo dati gale Bala we dɔnggɔ a.

³² A dɛa 'bɔ tɔa we dɔnggɔ do Bala tɛ Samaria, nɛ a dɛ 'bɔ gbagala do ta we dɔ do sa'de hã a.

³³ Nɛ a zĩ 'bɔ kpikima Bala dɛ di ni. Mɛnɔ ni vɛ̃, ma nɔ̃lɔ̃ zã NWA Gale 'da obe Israɛlɛ dɛ tɛ̃ a wena, nɛa ngɔ kɛ 'da onwa ngɔ nù Israɛlɛ zi dati a ni vɛ̃.

³⁴ Do 'da fala Akabɛ dungu zi do nwa ni, nɛ Hiɛlɛ, wi kɔ le Betɛlɛ, a zĩ ngbo le Yeriko dɛ olo nɛ. Nɛ wenɔ kɛ Yozue, be 'da Nunɛ tɔ̃a zi do zu li NWA ni, ma dɛa tɛ̃ ɛ. We duzu kɛ, 'da fala wa zi tɛ zĩ ngboe ni, nɛ Abiramɛ, kuti bulu be 'da Hiɛlɛ fe. Nɛ 'da fala wa zi tɛ bɛ̃lɛ̃ omɔ nu ngbonɔ, nɛ Sɛgubɛ, tala bulu be 'da a fe 'bɔ.