1 Onwanɔ 14 - WE NU GALE 1995

Bulu be 'da nwa Yeroboamɛ fia

¹ Do 'da fala ni, nɛ Abia, bulu be 'da Yeroboamɛ te do zɛlɛ.

² Nɛ Yeroboamɛ tɔ̃ hã kɛnɛ a na: “Mɔ kífí tɛ mɔ, nɛ mɔ dɛ na, wa yɔ ti mɔ, dɔ wa ĩ́ na mɔ a wuke 'da mi gɔ. Nɛ mɔ nɛ́ 'da Ahia, wi gba olo nu Gale tɛ kɔ le Silo. We kɛ a zi a a tɔ̃a hã mi na, mi hɔ sɛ nwa ngɔ nu Israɛlɛ.

³ Mɔ kálá mapa 'bu, do ombe mukate, nɛ mɔ ba kpana nɔ gɔ̃lɔ̃ kpo, kɔ mɔ nɛ nɛ hã a. Nɛ mɔ aka a ngɔ mɛ ma nɛ dɛ be 'da lɛ gɛ, nɛ a tɔ̃ sɛ we nɛ hã mɔ.”

⁴ Nɛ wuke 'da a kulu ngɔ, nɛ a nɛ 'da Ahia tɛ Silo i. Ĩ na, Ahia dɛ zi gbɛlɛ wena, nɛ a zɔ́ 'bɔ mɔ gɔ.

⁵ Nɛ nwa mbisa a na, wuke 'da Yeroboamɛ li wala gɛ, a tɛ we aka mɔ ngɔ zɛlɛ mɛ 'da bulu be 'da a. Nɛ nde a kifi tɛ̃ a na, dɔ wa ĩ ti a na, a a kɛnɛ Yeroboamɛ gɔ. Nɛ NWA tɔ́a tɛlɛ tɛ kɛ na, Ahia gese do nu nɛ hã wuke ni.

⁶ Kɔ Ahia nɛa we zele giti nyanga wuke tɛ le dɛ tɔa nga, nɛ a tɔ̃ hã a na: “Kɛnɛ Yeroboamɛ, mɔ lé! Gulu kɛ mɔ kifi tɛ mɔ ɔ nɛ gele wele ni we ge nde? Mɔ ĩ na, mi do 'dã sako we mɔ.

⁷ Mɔ sí, nɛ mɔ to hã Yeroboamɛ na, NWA Gale 'da obe Israɛlɛ tɔ́a hã a na: ‘Mɔ zi a wi kɔ le iko, nɛ mi saka mɔ kɔ owinɔ, nɛ mi e mɔ do nwa ngɔ obe Israɛlɛ, winɔ 'da mi.

⁸ Mi fua to nwa kò nu fɛlɛ Davidi do'do, nɛ mi ba ma hã mɔ. Nɛ nde mɔ hɔ̀ wi toe 'da mi Davidi gɔ. Davidi zele zi mbulanɔ 'da mi, nɛ a dɛ zi to hã mi do sila a vɛ̃, nɛ a dɛ̃ zi mbe mɔ 'danga tɛ mi kpo gɔ.

⁹ Nɛ nde mɔ, mɔ dɛa 'dã mɔ nɛa ngɔ Onwanɔ zi dati mɔ ni vɛ̃. Mɔ siki 'do mɔ hã mi, nɛ mɔ nãlã zã mi, we kɛ mɔ sɛa kpikima ogele galenɔ we dɔnggɔ wa.

¹⁰ Gulu nɛ hã mi nɛ yulu ngamɔ kɔ nu fɛlɛ kula 'da mɔ. Mi kumu sɛ owi wilinɔ kɔ nu fɛlɛ kula 'da mɔ vɛ̃, yolo ngɔ obe we hɔ ngɔ okpasa wi. Mi mili sɛ nu fɛlɛ kula 'da mɔ vɛ̃, ɔ nɛ kɛ wa mili do wɔkɔsɔ ni.

¹¹ Nɛ kɔ nu fɛlɛ mɔ vɛ̃, wi kɛ a fe 'da le, nɛ otolo wa nyɔngɔ sɛ wɔlɔ a, nɛ wele kɛ a fe zamɔ, nɛ oganakele wa nyɔngɔ sɛ wɔlɔ a.’ We NWA tɔ́a gɛ a ni.”

¹² Nɛ wi gba olo nu Gale tɔ̃ 'bɔ hã kɛnɛ Yeroboamɛ na: “Ngangga ni, mɔ sí. Mɔ nɛ sɛ we e nyanga mɔ nu ngba le, nɛ be 'da mɔ fe.

¹³ Nɛ Oisraɛlɛ vɛ̃ wa dɛ sɛ mɔ ngɔ fio a, nɛ wa mi a. Kɔ nu fɛlɛ Yeroboamɛ vɛ̃, wi kɛ wa mi sɛ a kɔ zunu kpo wi a a. Tua kɛ a zu a kpo hã a dia li NWA Gale 'da obe Israɛlɛ.

¹⁴ 'Do nɛ, nɛ NWA a saka sɛ mbé nwa ngɔ nù Israɛlɛ. Nɛ nwa ni a kumu sɛ nu fɛlɛ Yeroboamɛ vɛ̃.

¹⁵ Nɛ NWA a hã sɛ etumbu hã Oisraɛlɛ, nɛ wa tana sɛ kili ɔ nɛ kɛ bũi ma yɛmbɛ do osala tɔ̃nɔ nu lì ni. Nɛ NWA a fo sɛ wa ngɔ dia nùi a ba zi ma hã oyaa wa gɛ do'do, nɛ a pɛsɛ sɛ wa ndũu dɛ kulu gba lì Efratɛ i. We duzu kɛ wa sɛa kpikima gale Asera, nɛ wa nɔ̃lɔ̃ zã NWA Gale.

¹⁶ A da sɛ kɔ a tɛ wa, we kɛ Yeroboamɛ dɛa 'dã mɔ, nɛ a tumba Oisraɛlɛ vɛ̃ we dɛ 'dã mɔ.”

¹⁷ Nɛ wuke 'da Yeroboamɛ kulu ngɔ, nɛ a si dɛ Tirsa i. Kɔ a nɛa we hɔ dɛ kpongbo nu tɔa 'da a ni, nɛ be 'da a fe.

¹⁸ Nɛ Oisraɛlɛ vɛ̃ wa dɛa mɔ ngɔ fio a, nɛ wa mi a, ɔ nɛ kɛ NWA tɔ̃a zi do wala 'da Ahia, wi gba olo nu a ni.

¹⁹ Tala mɛnɔ vɛ̃ kɛ Yeroboamɛ dɛa zi ni, wa kɔma ma kɔ 'buki li nɛ a “Dɛa tonɔ 'da onwa ngɔ nù Israɛlɛ.” Dɛ kɔ nɛ ni, wa tɔ́a we bolonɔ kɛ a bi zi ni, do tɛlɛ tɛ kɛ a dɛa zi do to nwa 'da a ni.

²⁰ Yeroboamɛ dungu nwa 'do 'bu sabɛlɛ bɔa ngɔ nɛ bɔa, nɛ a fe, nɛ bulu be 'da a, Nadabɛ dungu nwa olo a.

Roboamɛ hɔa nwa ngɔ nù Yuda

²¹ 'Da fala Roboamɛ, be kɛ Salɔmɔ kua a do Nama, boko Amoni ni nɛa we hɔ nwa ngɔ nù Yuda, nɛ nde a zi do 'bu sabɛlɛ nalɛ ngɔ nɛ kpo. Nɛ a dungu nwa sabɛlɛ 'bu ngɔ nɛ sambo. A dungu nwa tɛ Yeruzalɛmɛ, le kɛ NWA saka zi ma tɛ ngɔ nù Israɛlɛ vɛ̃, takɔ owinɔ wa tɛ we dɔnggɔ a dɛ di ni ni.

²² Nɛ owi ngɔ nù Yuda wa dɛa 'dã mɔ nɛa ngɔ kɛ 'da oyaa wa, nɛ ma dè li nwa gɔ. Nɛ ma nɔ̃lɔ̃ zã a dɛ tɛ wa.

²³ Wa dɛa ofala dɔnggɔ do okpikima, nɛ wa ndɛngɛlɛ ota dɛ ngɔ ngbɛ ɛ, do ote kɛ ma be kpikima Asera ni, we dɔnggɔ ma. Wa zĩ zi mɛnɔ ni vɛ̃ tɛ ngɔ kalanɔ kɛ yɛɛ tenɔ ngɔ nɛ ni.

²⁴ Nɛ dɛ kpo kpo kɔ wa ni, owi wili do owuko wa dɛ zi ndumba tɛ ofalanɔ wa dɔnggɔ do kpikimanɔ ni. Owi ngɔ nù Yuda wa nɛa 'do 'dã mɔ sape 'da ogele winɔ. Ĩ na, we duzu 'dã mɔ sapenɔ ni, ma kɛ NWA ndaka zi ogele winɔ ngɔ nùnɔ 'da wa, we ba ma hã obe Israɛlɛ ni.

²⁵ Kɔ mɔlɔ sabɛlɛ dɛa to nwa 'da Roboamɛ, nɛ Sisakɛ, nwa ngɔ nù Ezipeto bi le Yeruzalɛmɛ.

²⁶ Nɛ a kala kpamɛnɔ kɔ tɔa Tɛmpɛloe 'da NWA Gale, do kɛnɔ kɔ tɔa 'da nwa Roboamɛ vɛ̃. Mɛnɔ a kala zi ngboo mɛ a Ongele mɔ mbalinɔ, kɛ Salɔmɔ dɛa zi ni.

²⁷ Nɛ nwa Roboamɛ dɛa Ongele do tũ mɔ bolo, we a olo kɛ Sisakɛ la zi nɛ ni, nɛ a a ma dɛ kɔ̃ ogã wi ngɔ osodanɔ, kɛ wa zɔ zi mɔ tɛ nu ngbo tɔa nwa ni na, wa fɔmɔ fala nɛ.

²⁸ Na mɛ ni, 'da fala vɛ̃ Roboamɛ kulu ngɔ we nɛ kɔ tɔa Tɛmpɛloe 'da NWA Gale i, nɛ owi zɔ mɔ nu ngbonɔ wa kala ngelenɔ ni dɛ kɔ̃ wa. Kɔ a nɛ si ma, nɛ wa gese ma dɛ kɔ 'bili tɔa wa usu do ma ni.

²⁹ Tala mɛnɔ vɛ̃ kɛ Roboamɛ dɛa zi ni, wa kɔma ma kɔ 'buki li nɛ a: “Dɛa tonɔ 'da onwa ngɔ nù Yuda.”

³⁰ 'Da fala fai nwa Roboamɛ do nwa Yeroboamɛ wa zi tɛ bi ngba wa 'do ngbɛ ɛ do 'do ngbɛ ɛ.

³¹ Kɔ Roboamɛ fia, nɛ wa mi a kɔ zuni 'da nu fɛlɛ wa tɛ kɔ Gba Ngbo nwa 'da Davidi. Naa Roboamɛ zi a boko Amoni, li a a Nama. Roboamɛ fia, nɛ be 'da a Abiamɛ dungu nwa olo a.