1 Onwanɔ 13 - WE NU GALE 1995

¹ Nɛ NWA Gale ba nu ɛ hã wi gba olo nu a kpo tɛ ngɔ nu Yuda na, a nɛ tɛ kɔ le Betɛlɛ. Nɛ wi gba olo nu Gale ni nɛa, kɔ a hɔa i mɔ, nɛ a kpa Yeroboamɛ tɛ dɔ sa'de ngɔ gbagala we dɔnggɔ do Gale.

² Nɛ a he mɔ do zu li NWA na: “Mɔ wi mɔ dɛa gbagala gɛ, mɔ zélé we NWA tɔ̃a gɛ! A na: ‘Wa ko sɛ bulu be tɛ nu fɛlɛ Davidi, nɛ wa e sɛ li a na Yoziasi. A gbɛ sɛ onganganɔ kɛ wa dɔa sa'denɔ ni dɛ ngɔ gbagala mɔ dɛa gɛ. Nɛ a dɔ sɛ ogbãlã wele dɛ ngɔ ma!’ ”

³ Nɛ wi gba olo nu Gale tɔ̃ 'bɔ na: “Gbagala gɛ ma gbini sɛ, nɛ bũ kɛndɔ sa'denɔ ngɔ nɛ ni ma ala sɛ nù. Na mɛ ni, nɛ mɔ ĩ sɛ na, NWA do tɛ̃ a hã a tumba mi we tɔ̃ lɛnggɛ gɛ hã mɔ.”

⁴ Nwa Yeroboamɛ nɛa we zele wenɔ kɛ wi gba olo nu Gale tɔ̃a ngɔ gbagala tɛ Betɛlɛ ni, nɛ a ɛfɛ kɔ̃ a dɛ ngɔ gbagala, nɛ a he mɔ na: “Nɛ bá wi ni!” Nɛ nde kɔ̃ a 'bana dɛ ngɔ ni, nɛ ma konggo, do tɛlɛ tɛ kɛ na a wè 'bɔ we gese ma dɛ olo nɛ gɔ.

⁵ Do 'da fala ni, nɛ gbagala gbini, nɛ bũ kɛndɔ sa'denɔ ngɔ nɛ ni, ma ala nù, ɔ nɛ kɛ wi gba olo nu Gale tɔ̃a do zu li a ni.

⁶ Nɛ nwa Yeroboamɛ ala nu a hã wi gba olo nu Gale na: “Mɔ kɔ̃́, nɛ mɔ aka NWA Gale 'da mɔ na, a fo 'dã mɛ 'da mi, hã 'baka mi de dɛ olo nɛ.” Nɛ wi gba olo nu Gale sambala NWA Gale, nɛ kɔ̃ Yeroboamɛ de dɛ olo nɛ.

⁷ Nɛ Yeroboamɛ tɔ̃ hã wi gba olo nu Gale na: “Mɔ tɛ́, kɔ lɛ si do mɔ nu tɔa 'da mi i, hã lɛ nyɔngɔ mɔ, nɛ mi 'dɔlɔ sɛ de mɔ hã mɔ we mɛ mɔ dɛa gɛ.”

⁸ Nɛ nde wi gba olo nu Gale gisa hã a na: “Gɛnɛ kɔ mɔ gɔnɔ sɔ sanga kpamɛnɔ 'da mɔ bɔa, kɔ mɔ hã mbee nɛ hã mi, nɛ nde mi nɛ́ sɔ 'bɔ 'da mɔ i gɔ. Nɛ 'bulu nyɔngɔmɔ mɔ mɔ kpo gbo sɛ nu mi gɔ, nɛ lì nu tɔa 'da mɔ hɔ́ sɔ ngɔ lɛfɛ mi gɔ.

^9-10 We kɛ nwa ba nu ɛ hã mi na, mi nyɔ́ngɔ́ sɛ mɔ kpo gɔ, nɛ mi nɔ́ sɛ mbamba lì gɔ, nɛ mi tɛ sì do kpo wala mi tɛa sɔ nɛ Betɛlɛ nga ni gɔ, kɔ mi si do gele wala.” Na mɛ ni, wi gba olo nu Gale sì do kpo wala sɔ a nɛa nɛ Betɛlɛ i ni gɔ, a ba do gele wala.

Wi gba olo nu Gale bɛ̃a we nu a, nɛ a fia

¹¹ Ĩ na, do 'da fala ni, mbe wi gba olo nu Gale kpo zi tɛ kɔ le Betɛlɛ, nɛ a dɛ gbɛlɛ wena. Nɛ obulu benɔ 'da a wa tɛa, nɛ wa tɔ̃ we 'da wi gba olo nu Gale kɛ a yula tɛ ngɔ nù Yuda ni hã a. Wa tɔ̃a we mɛnɔ vɛ̃ kɛ wi ni dɛa tɛ Betɛlɛ do kɔ tũi ni, do wenɔ vɛ̃ a tɔ̃a hã nwa ni.

¹² Nɛ baa wa aka wa na: “A si do wala ki nge nde?” Nɛ obulu benɔ 'da a wa nɛa we aka we li wala a ba ni. Nɛ wa kpolo tɛ wa, nɛ wa tɔ̃ gulu nɛ hã baa wa.

¹³ Nɛ a tɔ̃ hã wa na: “Nɛ 'dafa punda 'da mi, kɔ mi nɛ 'do a!” Nɛ obulu benɔ 'da a wa 'dafa punda 'da a, nɛ a kũ ngɔ a, nɛ a la

¹⁴ 'dɔkɔlɔ wi gba olo nu Gale kɛ a yula ngɔ nù Yuda i ni. Nɛ a kpa a, nɛ nde a tɛ ɔmɔ tɛ̃ a ti gɔlɔ mbe gba te kpo. Nɛ a aka a na: “Mɔ a wi gba olo nu Gale kɛ mɔ yula ngɔ nù Yuda i ni nde?” Nɛ wi ni gese na: “Ĩi, wi a mi.”

¹⁵ Nɛ gbɛlɛ ni tɔ̃ hã a na: “Mɔ kpóló tɛ mɔ dɛ 'da mi i, hã mɔ nyɔngɔ mɔ sɛ.”

¹⁶ Nɛ a gese na: “Ɔ̃ ɔ̃, mi kpóló sɛ tɛ mi gɔ. Nɛ mi nyɔngɔ sɛ mɔ gɔ, nɛ mi nɔ́ sɛ mbamba lĩ 'da mɔ i gɔ.

¹⁷ We kɛ NWA ba nu ɛ hã mi na, mi nyɔ́ngɔ́ sɛ mɔ kpo gɔ, nɛ mi nɔ́ sɛ mbamba lì gɔ, nɛ mi tɛ sì do kpo wala mi tɛa sɔ nɛ ni gɔ.”

¹⁸ Nɛ gbɛlɛ ni tɔ̃ hã a na: “Mi tɛ mɛ 'bɔ a wi gba olo nu Gale ɔ nɛ mɔ ni. Nɛ NWA tumba anzɛ kpo we tɔ̃ hã mi na, mi kpa mɔ, kɔ mi kpolo tɛ mi do mɔ, takɔ mɔ nyɔngɔ mɔ, nɛ mɔ nɔ mbe lì sɛ nɛ de.” Ĩ na, a tɔ̃ zi a bɛlɛ iko.

¹⁹ Nɛ wi gba olo nu Gale kɛ a yula ngɔ nù Yuda ni kɔ̃a, nɛ a kpolo tɛ̃ a do gbɛlɛ ni, nɛ a nyɔngɔ mɔ do a, nɛ a nɔ lì.

²⁰ 'Da fala wa tɛ nyɔngɔ mɛ ni, nɛ NWA Gale wila we hã wi gba olo nu a, wele kɛ tɛ kɔ le Betɛlɛ nga ni.

²¹ Nɛ a gba nu nɛ hã ngba a kɛ a yula ngɔ nù Yuda i ni na: “NWA tɔ̃a na, mɔ bɛ̃a we nu ɛ, nɛ mɔ dɛ mbula 'da ɛ gɔ.

²² We kɛ mɔ kpula tɛ mɔ, nɛ mɔ nyɔngɔ mɔ tɛ dɛ. Ĩ na ɛ nwa, ɛ ba zi nu ɛ hã mɔ na, mɔ tɛ nyɔ̀ngò mɔ, nɛ mɔ nɔ́ lì dɛ gɔ. Gulu nɛ hã mɔ fe sɛ, nɛ nde wa mí sɛ mɔ kɔ zuni 'da Owele mɔ gɔ.”

²³ Wa nyɔngɔ mɛ do'do, nɛ wi gba olo nu Gale, wele kɛ tɛ Betɛlɛ a 'dafa punda 'da ngba a, kɛ a yula ngɔ nù Yuda i ni,

²⁴ nɛ a ni a la. Kɔ a hɔa li wala i, nɛ a kpa ngba a do gbɔgbɔ. Nɛ gbɔgbɛ ba a, nɛ a gbɛ a. Nɛ wɔlɔ a 'bana dɛ gbogbo wala ni, nɛ punda 'da a do gbɔgbɛ, wa yolo dɛ kɛ zã nɛ.

²⁵ Nɛ Owi la wala, wa zɔ wɔlɔ a dɛ li wala ni, do gbɔgbɛ dɛ kɛ zã nɛ. Nɛ wa la, nɛ wa tɔ̃ we nɛ kɔ le Betɛlɛ, tɛ fala 'da gbɛlɛ kɛ a a wi gba olo nu Gale ni.

²⁶ Kɔ gbɛlɛ ni nɛa we zele we nɛ, nɛ a na: “Wi ni sɛ a wi gba olo nu Gale kɛ a yula ngɔ nù Yuda i ni. A bɛ̃a we nu NWA, ma kɛ NWA tumba gbɔgbɛ, kɔ a ba a, hã a gbɛa a, ɔ nɛ kɛ NWA tɔ́a zi nɛ hã a ni.” Ĩ na, gbɛlɛ ni zi a ɔkɔlɔ ngba a, kɛ a hɔa zi sanga wala i ia ni na, a kpolo tɛ̃ a tɛ Betɛlɛ.

²⁷ 'Do nɛ, nɛ a tɔ̃ hã benɔ 'da a na: “Nɛ 'dáfá punda 'da mi, hã mi la.” Nɛ wa 'dafa punda, nɛ a la,

²⁸ nɛ a kpa wɔlɔ ngba a dɛ li wala ni, fala nɛ kpo do punda, do gbɔgbɛ dɛ kɛ zã nɛ ni. Nɛ nde gbɔgbɛ nyɔ̀ngɔ̀ wɔlɛ gɔ, nɛ a bà 'bɔ punda gɔ.

²⁹ Nɛ gbɛlɛ ni ba wɔlɔ ngba a, nɛ a e ma ngɔ punda, nɛ a si do ma dɛ Betɛlɛ, we dɛ mɔ ngɔ fio a, nɛ a mi a.

³⁰ A mi a dɛ kɔ zuni 'da a wele nɛ. Nɛ winɔ wa hia kɔ̃a fie na: “Aa nae, nyae, mɔ fia kpaa nde!”

³¹ Gbɛlɛ ni mi a do'do, nɛ a tɔ̃ hã obenɔ 'da a na: “Fala kɛ mi fe, nɛ nɛ mi sɛ mi dɛ kɛ zã a dɛ kpo kpo kɔ zuni gɛ.

³² Tua kɛ wenɔ a tɔ́a zi we gbagala tɛ Betɛlɛ, do ofalanɔ wa dɔnggɔ do okpikimanɔ tɛ kɔ lenɔ ngɔ nù Samaria ni, mɛ a olo nu Gale ngboo. Wenɔ a tɔ̃a zi ni, ma dɛ sɛ tɛ̃ ɛ do ngbongbo nɛ.”

Yeroboamɛ là fala dɛ 'dã mɔ gɔ

³³ Gɛnɛ kɔ kɛ zi wi gba olo nu Gale mbisa nwa Yeroboamɛ ni, nɛ nde a kpòlò 'dã dɛa to tɛ̃ a gɔ. A 'bana zi tɛ mɛ tɛ saka gele winɔ, we e wa do nganganɔ tɛ falanɔ a 'dafa zi we dɔnggɔ do kpikimanɔ ni. Wele kɛ kɔ zi we dɛ to nganga, nɛ a e kɔ a ngɔ a, nɛ wi ni hɔ nganga iko.

³⁴ Dɛa to tɛ Yeroboamɛ bia zi wala dɛ 'dã mɔ hã nu fɛlɛ a, gulu nɛ hã Gale kumu nu fɛlɛ a, nɛ ma mbiti ngɔ nù gɛ vɛ̃.