1 Onwanɔ 12 - WE NU GALE 1995

Obe Israɛlɛ wa mba li ngba wa tɛ Sikɛmɛ

¹ Onu kpala Israɛlɛ wanɔ si gbãlã ngɔ, wa mba zi ngba wa tɛ Sikɛmɛ, we e Roboamɛ do nwa. Nɛ Roboamɛ nɛa we nɛ.

² Ki ni nɛ nde Yeroboamɛ, be 'da Nɛbatɛ, a 'bana zi ngɔ nu Ezipeto i, we kɛ a yu zi nwa Salɔmɔ, nɛ a usu tɛ̃ a i mɔ. Kɔ a nɛa we zele we mba li ngba wi tɛ Sikɛmɛ i, nɛ a saka we 'bana dɛ tɛ Ezipeto ni.

³ Nɛ nde wa tombo Owele na, wa sa mɔ hã a na a si. Nɛ a si, nɛ a mba ngba a do onu kpala obe Israɛlɛ kɛ wa si gbãlã ngɔ vɛ̃, nɛ wa nɛ, nɛ wa tɔ̃ hã Roboamɛ na:

⁴ “Baa mɔ dɛ zi lɛ fai ɔ nɛ kɛ lɛ a ongbá ni. Kɔ ngangga ni, fala kɛ mɔ kɔ̃ we fo mbe tɛ dĩ tole zu lɛ, nɛ lɛ dɛ sɛ to hã mɔ.”

⁵ Nɛ Roboamɛ gese hã wa na: “Nɛ sí, kɔ 'do tũ talɛ, nɛ nɛ kpolo tɛ nɛ, sɛ nɛ mi hã sɛ gisa nu nɛ hã nɛ de.” Nɛ wa kulu ngɔ, nɛ wa si.

⁶ Olo wa ni, nɛ nwa Roboamɛ nɛ 'da okpasa winɔ kɛ wa gala zi baa a Salɔmɔ kɔ dɛa to nwa 'da a ni, nɛ a aka wa na: “Nɛ lengge na, mi wia we gese hã wa na ge nde?”

⁷ Nɛ okpasa winɔ wa tɔ̃ hã a na: “Fala kɛ mɔ kɔ̃ we gala owinɔ ni do dia nɛ, nɛ mɔ tɔ̃ lɛnggɛ hã wa na, ma mbɔkɔ zã wa, nɛ wa sɛ a Owi tonɔ 'da mɔ fai.”

⁸ Nɛ nwa Roboamɛ zɔa lɛnggɛ 'da okpasa winɔ li a yala iko. Nɛ a nɛ 'da ongba a zagbãlãnɔ, kɛ wa gã zi do a fala nɛ kpo, nɛ wa a Owi ti nu a ni,

⁹ nɛ a aka wa na: “Owinɔ gɛ wa aka mi na, mi fo mbe tɛ ngamɛnɔ baa mi hã zi hã wa ni. Kɔ nɛ lengge na mi wia we gese hã wa na ge nde?”

¹⁰ Nɛ ongba a zagbãlãnɔ wa gese hã a na: “Ɔ nɛ kɛ winɔ ni wa he tɛ wa na, baa mɔ hã zi ngamɔ hã lo, kɔ wa aka mɔ na, mɔ fo mbe tɛ nɛ ni, mɔ gésé hã wa na: Gɛzɛlɛ kɔ̃ ɛ ma nganda nɛa ngɔ ngawili kɔ̃ baa ɛ!

¹¹ Baa ɛ hã zi ngamɔ hã wa, nɛ nde ɛ gã sɛ 'bɔ 'da ngamɛ ni. Nɛ baa ɛ zɛa zi wa do zufa kpaa, nɛ nde ɛ zɛ sɛ 'bɔ wa nganda nɛ ngɔ ki ni.”

¹² Ma hɔa tɛ tũi kɛ talɛ, nɛ Yeroboamɛ do owinɔ vɛ̃, wa tɛa 'da nwa Roboamɛ, ɔ nɛ kɛ a tɔ̃a zi hã wa ni.

¹³ Nɛ Roboamɛ zɔa lɛnggɛ 'da okpasa winɔ li a yala iko. Nɛ a gese hã winɔ do nga zu, ɔ nɛ kɛ ongba a zagbãlãnɔ wa tɔ̃a hã a ni.

¹⁴ A na: “Baa mi hã zi ngamɔ hã nɛ, nɛ nde mi nganda sɛ 'bɔ 'da ngamɛ ni dɛ dati. Baa mi zɛa zi nɛ do zufa kpaa, nɛ nde mi zɛ sɛ 'bɔ nɛ nganda nɛ ngɔ ki ni.”

¹⁵ Ki ni, mɛ a tɛlɛ tɛ kɛ NWA Gale a 'dafa mɛnɔ, takɔ a dɛ mbuli a kpua zi hã Yeroboamɛ, be 'da Nɛbatɛ gɛ a ni. A kpua zi mbuli ni hã a do wala 'da wi gba olo nu a Ahia, wi Silo. Gulu kɛ nwa Roboamɛ bɛ̃a zi aka wenɔ 'da owinɔ gɛ a ni.

Obe Israɛlɛ wa kɛ̃a sanga nùi 'da wa bɔa

¹⁶ Nɛ 'da fala kɛ obe Israɛlɛ wanɔ si gbãlã ngɔ, wa nɛa we zɔ na, nwa Roboamɛ bɛ̃a aka wenɔ 'da wa ni, nɛ wa tɔ̃ hã a na: “We mɔ lɛ tɛ nu fɛlɛ Davidi bina! To mɔ́ lɛ zɔ̀ be 'da Yɛse gɔ! Ma wia na lɛ kulu ngɔ, hã lɛ si. Kɔ ngangga ni, mɔ, be yaa Davidi, mɔ dungu wá nwa ngɔ nùi 'da mɔ!” Wa tɔ̃a ni do'do, nɛ wa kulu ngɔ, nɛ wa si.

¹⁷ Yolo dɛ di ni, tati a obe Yuda hã wa kɔ̃a gɛnɛ to nwa 'da Roboamɛ.

¹⁸ Roboamɛ nɛa we zɔ ni, nɛ a tombo Adoramɛ, wi ngɔ Owi dɛ kolofenɔ we dɛ na do obe Israɛlɛ kɛ wa si gbãlã ngɔ ni. A nɛa we hɔ i mɔ, nɛ wa lo a do ta, nɛ wa gbɛ a. Nɛ Roboamɛ kpasa kɛ 'da ɛ, we kɛ a yu, nɛ a kũ ngilingili 'da a, nɛ a kpolo tɛ̃ a dɛ tɛ Yeruzalɛmɛ i.

¹⁹ Yolo dɛ di ni, nɛ nu kpala obe Israɛlɛ wanɔ si gbãlã ngɔ, wa bɛ̃a na, nu fɛlɛ Davidi tɛ dùngù 'bɔ nwa ngɔ lo gɔ. Nɛ ma 'bana ni tia do sɔɛ gɛ.

²⁰ Kɔ obe Israɛlɛ wanɔ si gbãlã ngɔ, wa nɛa we zele na Yeroboamɛ yula tɛ Ezipeto, kɔ a si, nɛ wa tombo hã a na, a tɛ kɔ mba li ngba wi 'da wa. A tɛa, nɛ wa e a do nwa ngɔ nù Israɛlɛ. Na mɛ ni, tati a Owi nu kpala Yuda, hã wa 'bana tɛ kɔ̃ gɛnɛ to nwa 'da nu fɛlɛ Davidi.

²¹ 'Da fala kɛ Roboamɛ nɛa we hɔ tɛ Yeruzalɛmɛ i, nɛ a mba li onga sodanɔ kɔ nu kpala Yuda do Bɛnzamɛ, koto kama do 'bu wa ngbɛ'dɛ'dɛ. Nɛ a ngɛmɛ wa we nɛ we bi Oisraɛlɛ wanɔ si gbãlã ngɔ ni, takɔ a gese 'bɔ wa dɛ ti mbula 'da a.

^22-23 Nɛ nde NWA Gale tumba wila we hã Sɛmaya, wi gba olo nu a. A nɛa, nɛ a tɔ̃ hã nwa Roboamɛ, do Owi nu kpala Yuda do Bɛnzamɛ na:

²⁴ “Nɛ zélé, mi NWA, mi tɔ̃a na, da dɛ kɔ nɛ nɛ́ we bi do kpo kpo onya nɛ, Oisraɛlɛ gɔ. Nɛ vɛ̃ nɛ sí 'do, we kɛ mi a mi 'dafa na, mɛnɔ ma dɛ tɛ̃ ɛ na mɛ ni.” Kɔ wa nɛa we zele ni, nɛ wa dɛa olo nu NWA, nɛ wa si 'do.

Yeroboamɛ dɛa 'dã mɔ

²⁵ Nɛ nwa Yeroboamɛ zĩ ngbo dɛ tɛ le Sikɛmɛ tɛ ngɔ kala Efraimɛ, nɛ a ɔ dɛ di ni. 'Do nɛ, nɛ a kulu tɛ Sikɛmɛ do'do, nɛ a nɛ, nɛ a zĩ 'bɔ ngbo dɛ tɛ le Pɛnuɛlɛ.

^26-27 Nɛ a ma ngɔ lengge do kɔ sila a na: “Ɔ nɛ kɛ owinɔ 'da mi wa 'bana nɛ kɔ Tɛmpɛlo tɛ Yeruzalɛmɛ i we hã dɔnggamɛnɔ hã NWA ni, kɔ wa dɛ ni fai, nɛ mbe gɔ, nɛ wa kɔ̃ sɛ 'bɔ mbé gɛnɛ Roboamɛ, nwa ngɔ nù Yuda, nɛ wa gbɛ sɛ mi.”

²⁸ Nɛ a fa ta zu a ni gbaa, nɛ a ba nu a na, wa dolo ohi be wili ngɔmbɔ bɔa do mɔ mbali. Nɛ a tɔ̃ hã owinɔ na: “Aa Oisraɛlɛ, nɛ nɛ zi Yeruzalɛmɛ i fai, kɔ ma wia dɛ tɛ nɛ ia! Nɛ zɔ́, Gale 'da nɛ kɛ a fua zi nɛ ngɔ nù Ezipeto dɛ nza gɛ, a kɛ!”

²⁹ Nɛ Yeroboamɛ ia be ngɔmbɛ mɔ mbali kɛ a dula ni kpo tɛ Betɛlɛ, nɛ a e mbee nɛ tɛ Danɛ.

³⁰ Na mɛ ni, a tumba winɔ dɛ li wala 'dã mɔ. Wa nɛa do mbe kpo ngɔmbɛ mɔ mbali dɛ Danɛ. Nɛ gba gili Owele wa nɛa 'do nɛ.

³¹ Nɛ Yeroboamɛ nɛa tɛ ngɔ okala santonɔ, nɛ a dɛ tɔa dɔnggɔ do kpikimanɔ dɛ di ni. Nɛ a saka onganga, kɛ wa a Owi nu fɛlɛ Levi gɔ ni we dɛ to nɛ.

³² Yeroboamɛ saka kɔ zɛkɛ 'bu ngɔ nɛ mɔlɔ, zɛkɛ 'da ngbɛ'dɛ'dɛ, nɛ a e ma do kɔ̃ tũ ɛngga. Nɛ ɛngga ni ma wia kɔ̃ do kɛ wa dungu zi ma tɛ ngɔ nù Yuda ni. Nɛ a do tɛ̃ a, a dɔa osa'de tɛ ngɔ gbagala tɛ Betɛlɛ we dɔnggɔ do ohi be wili ngɔmbɛnɔ a dula ni. Nɛ a kala 'bɔ mbe nganganɔ, kɛ a saka wa we dɛ to tɛ falanɔ a 'dafa we dɔnggɔ do kpikimanɔ ni, nɛ a e wa tɛ Betɛlɛ.

NWA bɛ̃a gɛnɛ sambala tɛ Betɛlɛ

³³ Ma hɔa kɔ̃ zɛkɛ 'bu ngɔ nɛ mɔlɔ, zɛkɛ 'da ngbɛ'dɛ'dɛ, nɛ Yeroboamɛ kulu ngɔ, nɛ a nɛ tɛ Betɛlɛ. A hɔa i mɔ, nɛ a dɛ gã gbalimɔ we obe Israɛlɛ. Nɛ a 'dafa fala gbalimɛ ni, nɛ a dɔa osa'de tɛ ngɔ gbagala a dɛa ni do tɛ̃ a. Ĩ na a zu a kpo hã a saka tũi ni, nɛ a e ma do tũ ɛngga.