1 Onwanɔ 11 - WE NU GALE 1995

Salɔmɔ yɔa mbula 'da NWA

¹ Nwa Salɔmɔ kɔ̃a zi gɛnɛ owuko gele nunɔ wena. 'Do be zɔnga be 'da nwa ngɔ nù Ezipeto, nɛ a kala zi 'bɔ owuko Moabɛ, Amoni, Edɔmɛ, Sidoni, do Hiti.

² Ĩ na, NWA Gale tɔ̃a zi hã obe Israɛlɛ na, wa tɛ bà ngba wa do owuko gele nu gɔ, da dɛ kɔ owukonɔ ni wa kpóló linggamɔ zu wa, hã wa dɔnggɔ ogalenɔ 'da wa gɔ. Nɛ nde sila Salɔmɔ gã zi ngɔ wuko gele nunɔ wena.

³ Salɔmɔ kala zi owuko kama sambo, nɛ wa zi a owuko ngu'du nwa. Nɛ a zi 'bɔ do omakango kama talɛ. Nɛ wa 'danga zi linggamɛ 'da a dɛ 'da Gale do'do.

⁴ 'Da fala kɛ Salɔmɔ nɛa we dɛ gbɛlɛ ni, nɛ wukonɔ 'da a wa zĩ do a gbaa, nɛ a da sila a ngɔ NWA Gale 'da a, nɛ a dɔnggɔ ogele galenɔ 'da wa. Nɛ a è 'bɔ sila a ngɔ NWA Gale 'da a, ɔ nɛ kɛ baa a Davidi dɛa zi ni gɔ.

⁵ Nɛ Salɔmɔ ma ngɔ dɔnggɔ Astarte, gale wuke 'da Osidoni, do Milkɔmɛ, gba sɔ̃ gale 'da Oamoni.

⁶ Nɛ Salɔmɔ dɛa mɔ kɛ ma dè li NWA gɔ ni, we kɛ a bɛ̃a we dɛ olo nu a. Ĩ na, baa a Davidi dɛa zi olo nu NWA vɛ̃.

⁷ Salɔmɔ 'dafa zi fala tɛ ngɔ kala dati Yeruzalɛmɛ na, wa dɔnggɔ do Kɛmɔsi, gba sɔ̃ gale 'da Omoabɛ. Nɛ a 'dafa 'bɔ mbee nɛ we dɔnggɔ do Milkɔmɛ, gba sɔ̃ gale 'da Oamoni.

⁸ A dɛa ní we galenɔ 'da owuko gele nunɔ vɛ̃, sɛ a wa wia we dɔ nɔ yɔmbɔ, do osa'de we dɔnggɔ do ogalenɔ 'da wa de.

^9-10 NWA Gale 'da obe Israɛlɛ bia zi tɛ̃ ɛ hã Salɔmɔ fala bɔa, nɛ a ba nu a hã a na, a la fala dɔnggɔ ogele galenɔ do'do. Nɛ nde Salɔmɔ zèlè we nu NWA gɔ, nɛ a siki 'do a hã a. Nɛ NWA zɔa ní, nɛ zã a nɔ̃lɔ̃ dɛ tɛ Salɔmɔ,

¹¹ nɛ a tɔ̃ hã a na: “Nɛ kɛ mɔ dɛa mbuma, nɛ mɔ 'danga gba tɔkɛ sanga tɛ ngba lɛ do mɔ, nɛ mɔ bɛ̃ we nu mi ni, mi ba sɛ to nwa kɔ̃ mɔ, nɛ mi hã ma hã mbe wi olo li mɔ kpo.

¹² Nɛ nde we lengge do baa mɔ Davidi, kɛ mi kɔ̃a zi gɛnɛ a wena ni, mi dɛ́ sɛ ma kpa li mɔ gɔ, mi fo sɛ to nwa kɔ̃ be 'da mɔ.

¹³ Nɛ nde mi fó sɛ ma kɔ̃ a vɛ̃ gɔ, mi la sɛ nu kpala nɛ hã a kpo, we lengge do wi toe 'da mi Davidi, do le Yeruzalɛmɛ, kɛ mi saka ma ni.”

Owi sɛnɛ Salɔmɔ

¹⁴ Nɛ NWA dɛa na Hadadɛ, mbe wi nu fɛlɛ nwa ngɔ nù Edɔmɛ, a sɛnɛ Salɔmɔ.

^15-16 Zi dati belee, 'da fala kɛ Davidi bi zi nù Edɔmɛ, nɛ a ba ma ni, nɛ Yoabɛ, gã wi ngɔ osodanɔ 'da a, a nɛa i mɔ we mi osoda Israɛlɛ kɛ wa fia li bole ni. Nɛ Yoabɛ do osodanɔ 'da a, wa ɔa dɛ Edɔmɛ ni zɛkɛ gazɛlɛ, nɛ do 'da fala ni wa gbɛa Owi wilinɔ di ni ní vɛ̃.

¹⁷ Nɛ nde 'da fala ni, Hadadɛ 'bana zi do be zagbãlã, nɛ wa kulu ngɔ do ombe wi Edɔmɛ, kɛ wa zi a owi tonɔ 'da baa a ni, nɛ wa yu dɛ ngɔ nù Ezipeto, nɛ wa fè gɔ.

¹⁸ Wa kulu ngɔ tɛ Madianɛ, nɛ wa la dɛ li gba zɔ̃ Paranɛ. Nɛ ombe wi Paranɛ wa mba do wa, nɛ wa kulu dɛ 'da nwa ngɔ nù Ezipeto. Nɛ nwa ni kɔ̃a gɛnɛ Hadadɛ, nɛ a hã tɔa, do nyɔngɔmɔ hã a. Nɛ a e 'bɔ nù hã a.

¹⁹ Nɛ nwa ngɔ nù Ezipeto dɛa 'bɔ Hadadɛ de wena, nɛ a hã solo kɛnɛ a hã a na, a ba a. Wuke a ba a ni zi a boko nya Tapɛnɛsi, wuko 'da nwa ngɔ nù Ezipeto.

²⁰ Nɛ wuke ni kua bulu be hã Hadadɛ, nɛ Hadadɛ e li a na Gɛnubatɛ. Nɛ Tapɛnɛsi mba a do obenɔ 'dɛ ɛ, nɛ a dala wa fala nɛ kpo.

²¹ Hadadɛ ɔa Ezipeto i gbaa, nɛ a zele na, nwa Davidi fia, nɛ Yoabɛ, gã wi ngɔ osodanɔ fia 'bɔ. Nɛ a tɔ̃ hã nwa ngɔ nù Ezipeto na: “Mi kɔ̃a we si dɛ kɔ le 'da mi!”

²² Nɛ nwa aka a na: “Gulu kɛ mɔ kɔ̃a we si dɛ kɔ le 'da mɔ i we ge nde? Mɛ mɔ zɔlɔ i nga ni a ge nde?” Nɛ Hadadɛ gese na: “Mi zɔ̀lɔ̀ mɔ gɔ, nɛ nde ma wia na, mɔ e mi hã mi si kpa!” Nɛ Hadadɛ si, nɛ a hɔ nwa ngɔ nù Edɔmɛ, nɛ a sɛnɛ zi obe Israɛlɛ 'danga wena.

^23-24 Gale dɛa 'bɔ na Rɛzoni, be 'da Eliada sɛnɛ Salɔmɔ. Rɛzoni zi a wi 'da Hadadezɛrɛ, nwa ngɔ nù Soba, nɛ nde a yu zi nwa ngɔ a. A dɛa ní, do 'da fala kɛ Davidi gbɛa zi osodanɔ 'da Hadadezɛrɛ ni. Rɛzoni yu, nɛ a ngɛmɛ li Owele kɛ wa dɛ́ mbula gɔ ni, nɛ a hɔ nwa ngɔ wa. Nɛ a kulu ngɔ do owinɔ ni, nɛ wa la dɛ Damasi, nɛ owinɔ 'da a wa e a do nwa ngɔ nù Siri.

²⁵ Rɛzoni hɔa nwa, nɛ a sɛnɛ zi obe Israɛlɛ 'da fala 'da Salɔmɔ wena.

Yeroboamɛ fa we ba to nwa kɔ̃ Salɔmɔ

^26-27 Mbe wi dɛa to 'da Salɔmɔ kpo, li a a Yeroboamɛ a fa zi 'bɔ we ba to nwa kɔ̃ Salɔmɔ. Yeroboamɛ zi a be 'da Nɛbatɛ, wi Efraimɛ, tɛ kɔ le Sɛreda. Li naa a a Sɛrua, a zi a wi fio wili. Nɛ zélé tɛlɛ tɛ kɛ Yeroboamɛ fa zi we ba do to nwa ni: Do 'da fala zi Salɔmɔ tɛ 'dafa li fanda Milo do Gba Ngbo Nwa 'da Davidi ni,

²⁸ nɛ nde Yeroboamɛ zi a zagbãlã, nɛ a dɛ to nganda wena. Kɔ Salɔmɔ nɛa we zɔ na, a dɛ toe 'dɛ ɛ de wena ni, nɛ a e a ngɔ Owi tonɔ kɔ nu kpala Efraimɛ do Manase.

²⁹ Nɛ mbe ngba soe kpo, nɛ Yeroboamɛ yɛngga, nɛ a hɔ nza kɔ le Yeruzalɛmɛ, nɛ a kpa ngba a do Ahia, wi gba olo nu Gale. Ahia a wi kɔ le Silo. 'Da fala wa kpa ngba wa ni, nɛ nde wa zi zu wa bɔa iko. Nɛ Ahia zi do mbé tulu gɛ̃ɛ dɛ ngɔ 'baka a.

³⁰ Nɛ a ba tuli ni, nɛ a 'bili sanga nɛ 'bu ngɔ nɛ bɔa,

³¹ nɛ a tɔ̃ hã Yeroboamɛ na: “Mɔ kálá 'bili tuli gɛ 'bu, tua kɛ NWA Gale 'da obe Israɛlɛ tɔ̃a na: ‘Mi 'bili sɛ sanga nùi 'da Salɔmɔ, nɛ mi hã sɛ nu kpala obe Israɛlɛ 'bu hã mɔ.

³² Nɛ nde mi la sɛ nu kpala obe Israɛlɛ kpo hã Salɔmɔ, we lengge do wi toe 'da mi Davidi, do gã le Yeruzalɛmɛ, kɛ mi saka ma ngɔ nù Israɛlɛ vɛ̃ ni.

³³ Mi dɛ sɛ ni, we kɛ Salɔmɔ bɛ̃a gɛnɛ mi do'do, nɛ a ba tɛ̃ a we dɔnggɔ ogele gale. A dɔnggɔ Astarte, gale wuke 'da Osidoni, do Kɛmɔsi, gale 'da Omoabɛ, do Milkɔmɛ, gale 'da Oamoni. Salɔmɔ bɛ̃a we nu mi, nɛ a dɛa 'dã mɔ. A dɛ mbulanɔ 'da mi, do we nu mi, ɔ nɛ kɛ baa Davidi dɛa zi ni gɔ.

³⁴ Gɛnɛ kɔ na mɛ ni, nɛ nde mi kɛ sɛ sanga to nwa 'da Salɔmɔ kɔ dungu nza 'da a gɔ, mi 'bɔ sɛ hã a fe, sɛ nɛ de. Mi dɛ sɛ ni we lengge do wi toe 'da mi Davidi, kɛ mi saka zi a, nɛ a dɛa zi mbulanɔ 'da mi, do we nu mi ni.

³⁵ Kɔ fala kɛ to nwa hɔ kɔ̃ be 'da Salɔmɔ, nɛ mi kɛ̃ sɛ sanga nɛ, nɛ mi hã nu kpala obe Israɛlɛ 'bu hã mɔ, Yeroboamɛ.

³⁶ Nɛ nde mi la sɛ nu kpala obe Israɛlɛ kpo hã be 'da Salɔmɔ. Mi dɛ sɛ ni we lengge do wi toe 'da mi Davidi, do gã le Yeruzalɛmɛ. We kɛ mi kɔ̃a na, dɛa to nwa ngɔ gã le Yeruzalɛmɛ, kɛ mi saka we be do tɛ mi hã nɛ ni, ma 'bana dɛ kɔ̃ obe zã Davidi fai.

³⁷ Nɛ mɔ Yeroboamɛ, mi e sɛ mɔ do nwa ngɔ nù Israɛlɛ, nɛ mɔ dungu sɛ ngɔ nùnɔ vɛ̃ kɛ zã mɔ kɔ̃a ni.

³⁸ Ma wia na, mɔ zele wenɔ vɛ̃ kɛ mi tɔ̃ sɛ hã mɔ ni, nɛ mɔ yɛnggɛ do li wala kɛ mi nɛ be hã mɔ ni. Mɔ dɛ́ mɛnɔ dɛ 'da mi vɛ̃ do bɔlɔ nɛ, nɛ mɔ dɛ́ mbulanɔ 'da mi, ɔ nɛ kɛ wi toe 'da mi Davidi dɛa zi ni. Hã mɔ dɛ ni, nɛ mi sɛ do mɔ boe, nɛ obe zã mɔ wa dungu sɛ nwa fai, ɔ nɛ nu fɛlɛ Davidi ni. Mi hã sɛ nu kpala obe Israɛlɛ 'bu hã mɔ,

³⁹ sɛ a sape ba li Owi nu fɛlɛ Davidi de. Nɛ nde mi hã́ sɛ sape hã wa fai gɔ.’ ”

⁴⁰ We duzu ma, nɛ Salɔmɔ fa we gbɛ Yeroboamɛ. Nɛ Yeroboamɛ yu, nɛ a usu tɛ̃ a tɛ 'da Sisakɛ, nwa ngɔ nù Ezipeto, nɛ a 'bana dɛ di ni gbaa, nɛ Salɔmɔ fe nɛ.

Fie 'da Salɔmɔ

⁴¹ Tala mɛnɔ vɛ̃ kɛ Salɔmɔ dɛa ni, wa kɔma ma kɔ 'buki li nɛ a: “Dɛa Toe 'da Salɔmɔ.” Dɛ kɔ nɛ ni, wa tɔ̃ we mɛnɔ vɛ̃ kɛ a dɛa zi ni, do we hã zã 'da a.

⁴² Salɔmɔ dungu zi nwa tɛ Yeruzalɛmɛ ngɔ obe Israɛlɛ vɛ̃ 'do 'bu sabɛlɛ nalɛ.

⁴³ Kɔ a fia, nɛ wa mi a tɛ kɔ Gba Ngbo nwa 'da baa a Davidi. Nɛ be 'da a Roboamɛ dungu nwa olo a.