1 Onwanɔ 10 - WE NU GALE 1995

Wuko nwa ngɔ nù Saba nɛa we zɔ nwa Salɔmɔ

¹ Wuko nwa ngɔ nù Saba zila sako dɔ̃lɔ̃ li 'da nwa Salɔmɔ, nɛ a nɛ we yamba sila a do onganda aka we we zɔ hã zã 'da a.

² Tɛ nɛ mɔ a Yeruzalɛmɛ i, nɛ a kala gba gili wi tonɔ 'da a, do osamo. Nɛ osamonɔ wa kala tolo nɔ yɔmbɔ, do ota olo gã gole, do mɔ mbali dɛlɛ wena. Wa nɛa we hɔ 'da Salɔmɔ i, nɛ a aka a ngɔ lɛnggɛnɔ vɛ̃ kɛ a 'dafa zi we aka do a ni.

³ Nɛ Salɔmɔ gisa nu aka wenɔ, kɛ a aka do a ni vɛ̃, nɛ aka we kpo gànà a gɔ.

⁴ Wuko nwa ngɔ nù Saba zila olɛnggɛ hã zãnɔ 'da Salɔmɔ, nɛ a zɔa tɔa nwa kɛ a dɛa ni, nɛ a ɔngbɔ do ma wena.

⁵ A nɛa 'bɔ we zɔ nyɔngɔmɛnɔ kɛ wa nyɔngɔ kɔ tɔa 'da nwa Salɔmɔ, do tɛlɛ tɛ kɛ wa 'dafa do tɔa ɔinɔ do tulunɔ 'da Owi olo li a, do odia tulunɔ 'da owi tonɔ, kɛ wa kɛ̃ nyɔngɔmɛnɔ do dɔ̃nɔ hã wa ni, nɛ sila a gɔnɔ. Kɔ a nɛa we zɔ wá 'bɔ odɔnggamɛnɔ kɛ Salɔmɔ hã zi hã NWA kɔ Tɛmpɛloe ni, nɛ ma ba we nu a do'do.

^6-7 Nɛ a tɔ̃ hã nwa Salɔmɔ na: “Dati tɛ mɔ mɔ́ i nga, mi zila zi sako dɔ̃lɔ̃ li 'da mɔ, do we hã zã 'da mɔ kɔ le 'da mi i, nɛ mi ba zi kafi nɛ. Kɔ mi tɛa wá, nɛ mi zɔa, nɛ nde wenɔ mi zila zi ni vɛ̃ a gbãlã we. Mɛnɔ kɛ mi zɔa do gbali mi gɛ, ma be na, wenɔ zi mi zila ni, ma 'bana sanga iko. Hã zã 'da mɔ do kpamɛnɔ 'da mɔ, ma la ngɔ kɛnɔ mi zila zi do zala mi ni.

⁸ Owi tonɔ 'da mɔ, do owinɔ kɔ tɔa nwa 'da mɔ vɛ̃, wa do dia 'dɔkɔlɔ! We duzu kɛ wa tɛ dungu do mɔ 'da fala fai, nɛ wa tɛ zele olɛnggɛ hã zãnɔ 'da mɔ.

⁹ E kɔ Owele wa dɔnggɔ NWA Gale 'da mɔ, kɛ a saka mɔ we dungu nwa ngɔ obe Israɛlɛ ni. NWA Gale saka mɔ do nwa ngɔ winɔ gɛ na, mɔ gala wa, takɔ wa dɛ mbulanɔ, nɛ mɔ gɔnɔ wenɔ 'da wa do bɔlɔ nɛ. Tua kɛ a kɔ̃ gɛnɛ wa wena, nɛ kɔ̃a zã ni do ndɔti nɛ bina.”

¹⁰ 'Do nɛ, nɛ wuko nwa ngɔ nù Saba hã mɔ mbali tɔnɛ talɛ do dɔ nɛ hã Salɔmɔ. Nɛ a hã 'bɔ gba gili nɔ yɔmbɔ do ota olo gã gole hã a. Gili nɔ yɔmbɛ ni dɛlɛ zi la li ngele, nɛ nwa Salɔmɔ zɔ̃ zi mbe kuti nɛ ni dati fala kpo gɔ.

¹¹ Nwa Hiramɛ tumba zi masuanɔ 'da a ngɔ nù Ofirɛ, nɛ ma si do omɔ mbali, do ogba gili te santalɛ, do ota olo gã gole hã nwa Salɔmɔ.

¹² Nɛ Salɔmɔ kala te santalɛnɔ ni, nɛ a dɛ do omɔ kɔ tɔa Tɛmpɛloe 'da NWA Gale do kɛnɔ kɔ tɔa 'da a. Nɛ a dɛ 'bɔ mbe do obe kundu, do ogã kundu hã Owi zɛ Zumanɔ. Nɛ gbaa tia do sɔɛ gɛ, wa zɔ̃ 'bɔ gili te santalɛ ní ngɔ nù Israɛlɛ gɔ.

¹³ Nwa Salɔmɔ hã zi tɛ mɛ 'bɔ odɔnggamɔ hã wuko nwa ngɔ nù Saba do dia sila vɛ̃ ɔ nɛ kɛ nwa 'dɔlɔ do mɔ hã wele ni. Nɛ a hã 'bɔ mɛnɔ kɛ wuko nwa ni kɔ̃a we kpa nɛ ni hã a vɛ̃. 'Do nɛ, nɛ wuko nwa ni do owinɔ 'da a wa si dɛ ngɔ nùi 'da wa.

Kpamɛnɔ 'da nwa Salɔmɔ

¹⁴ Kɔ sabɛlɛ kpo iko, nɛ nwa Salɔmɔ kpa zi mɔ mbali tɔnɛ 'bu nɛ bɔa.

¹⁵ A kpa 'bɔ mbili takoe kɛ Owi be golenɔ wa futa ma ngɔ mɔ golenɔ 'da wa, mba do mbili takoe Owi fɔmɔ lenɔ wa kala zi kɔ̃ ogele nwanɔ ni.

¹⁶ Nwa Salɔmɔ ba zi nu a, nɛ wa dɛ ogã ngele kama bɔa, nɛ wa nãlã mɔ mbali se'de. Wa nãlã mɔ mbali kɛ ma wia do kilo gazɛlɛ ni tɛ gã ngelenɔ ni kpo kpo vɛ̃.

¹⁷ Nɛ wa dɛ 'bɔ obe ngele kama talɛ, nɛ wa nãlã mɔ mbali se'de. Wa nãlã mɔ mbali kɛ ma wia do kilo kpo do dɔ nɛ ni tɛ be ngelenɔ ni kpo kpo vɛ̃. Nɛ nwa Salɔmɔ kala ngelenɔ ni, nɛ a a ma kɔ mbe tɔa 'da a kɛ wa sa li nɛ na “Kɔla Libanɛ” ni.

¹⁸ Nwa Salɔmɔ ba 'bɔ nu a, nɛ wa bɛ̃lɛ̃ gã kpongbo nwa. Nɛ wa gɛzɛ tɛ nɛ do gogo fɔlɔ, nɛ wa nãlã mɔ mbali kɛ 'dɔlɔ nɛ zã nɛ bina ni tɛ nɛ.

¹⁹ Wa ia kpongbo nwa ni do ngɔ, nɛ wa kũ ngɔ 'dinggili nyanga wi gazɛlɛ, sɛ nɛ wa hɔ se'de de. Zu te 'do kpongbe ni 'bua kolo girr, nɛ wa bɛ̃lɛ̃ 'baka nɛ dɛ tɛ nɛ bɔa. Nɛ wa sɛ ogbɔgbɔ bɔa, nɛ wa a wa kɛ zã nɛ, mbe kpo ngɔ ngawili kɔ̃, nɛ mbe kpo ngɔ gale.

²⁰ Wa sɛa 'bɔ ogbɔgbɔ 'bu ngɔ wa bɔa, nɛ wa a wa do 'da 'dinggilinɔ ni bɔa bɔa, gazɛlɛ ngɔ ngawili kɔ̃, nɛ gazɛlɛ ngɔ gale. Fo mbe kpongbo nwa na mɛ ni zi ngɔ gele nù bina.

²¹ Wa dɛa obilanɔ 'da nwa Salɔmɔ vɛ̃ do mɔ mbali, nɛ osaninɔ vɛ̃ kɔ tɔa “Kɔla Libanɛ” ni, ma zi 'bɔ do mɔ mbali kɛ 'dɔlɔ nɛ 'bànà kɔ nɛ gɔ. Wa dɛ̃ zi mɔ kpo do fɛ̃a mɔ bolo gɔ, we kɛ 'da fala 'da Salɔmɔ, wa zɔ zi fɛ̃a mɔ bolo li wa yala iko.

²² Nwa Salɔmɔ zi do omasua, a tombo zi ma nyɛlɛ wena fala nɛ kpo do kɛnɔ 'da nwa Hiramɛ. Ma la sabɛlɛ talɛ, nɛ masuanɔ ni ma si do omɔ mbali, fɛ̃a mɔ bolo, gogo fɔlɔ, dafa, do onɔɛ hã nwa Salɔmɔ.

²³ Nwa Salɔmɔ nɛa zi ngɔ ogele nwanɔ ngɔ nù gɛ vɛ̃ do kpamɔ, do hã zã.

²⁴ Mba gɔ, Gale hã zi hã zã hã a, nɛ Onwanɔ ngɔ nù gɛ vɛ̃ wa tɛ zi we aka a do we.

²⁵ Nɛ kɔ sabɛlɛ do sabɛlɛ, winɔ ni wa tɛ zi do odɔnggamɔ hã a, ɔ nɛ omɔ kɛ wa dɛa do fɛ̃a mɔ bolo, do mɔ mbali, otulu, omɔ bi bolo, onɔ yɔmbɔ, ombalata do opunda.

²⁶ Salɔmɔ ngɛmɛ zi li ongilingili bolo, do ombalata dɛlɛ wena. A zi do ongilingili koto do kama nalɛ, do ombalata koto 'bu ngɔ nɛ bɔa. Nɛ a a ombe mɛnɔ ni dɛ kɛ zã a tɛ Yeruzalɛmɛ, nɛ a kɛ̃ ombe dɛ kɔ lenɔ kɛ wa 'dafa we a do ma ni.

²⁷ Do 'da fala Salɔmɔ zi a nwa ni, nɛ ofɛ̃a mɔ bolo dɛlɛ zi kɔ le Yeruzalɛmɛ ɔ nɛ ogbãlã ta iko ni. Nɛ oma'baya sɛdrɛ ma dɛlɛ zi 'bɔ ɔ nɛ te sikɔmɔrɛ, kɛ ma hɔ tɛ ngɔ nùi 'da wa wena ni.

²⁸ Ombalatanɔ 'da nwa Salɔmɔ, wa yolo zi ngɔ nù Ezipeto do Silisi. Owi be golenɔ 'da a wa nɛ zi, nɛ wa oso wa i mɔ, nɛ wa si do wa hã a.

²⁹ Gole ngilingili kpo kɛ ma yolo zi tɛ Ezipeto, mɛ zi a mbili fɛ̃a mɔ bolo kama gazɛlɛ. Nɛ mbalata kpo te mbili fɛ̃a mɔ bolo kama do 'bu nɛ mɔlɔ. Kpo kpo owi be golenɔ 'da nwa ni, hã wa be zi 'bɔ gole ongilingilinɔ, do ombalatanɔ hã onwa ngɔ Ohiti, do onwa ngɔ nù Siri.