1 YOANƐ 5 - WE NU GALE 1995

Obenɔ 'da Gale wa nɛa ngɔ 'dã mɛnɔ nù gɛ

¹ Wi kɛ a kɔ̃a na, Yezu a Mɛsiya ni, a a be 'da Gale. Nɛ wi kɛ a kɔ̃ gɛnɛ Gale Baa, nɛ a kɔ̃ sɛ tɛ mɛ 'bɔ gɛnɛ obenɔ 'da Gale.

² Lɛ ĩ na, lɛ kɔ̃a gɛnɛ benɔ 'da Gale, we kɛ lɛ kɔ̃a gɛnɛ Gale, nɛ lɛ dɛ mbulanɔ 'da a ni.

³ Mba gɔ, fala kɛ lɛ kɔ̃ gɛnɛ Gale kɔ̃a, nɛ lɛ dɛ sɛ mbulanɔ 'da a. Nɛ mbulanɔ kɛ a hã hã lɛ ni, ma ngàndà la li gɔ.

⁴ Wi kɛ a a be 'da Gale ni, a wia we nɛ ngɔ 'dã mɛnɔ nù gɛ. Nɛ mɛ ma hã ngawi hã lɛ na, lɛ nɛ ngɔ 'dã mɛnɔ ni, mɛ a kɔ̃a we kɛ lɛ kɔ̃a do zu li Yezu ni.

⁵ Wi kɛ a wia we nɛ ngɔ 'dã mɛnɔ nù gɛ a wio nde? Wi a wele kɛ a kɔ̃a na, Yezu a Be 'da Gale ni.

Mɛnɔ kɛ ma tɔ̃ we ngɔ Yezu Kristo

⁶ Yezu Kristo tɛa zi ngɔ nù gɛ, nɛ a kpa batisimɔ 'dɔ lì, nɛ wa gbɛa a, nɛ tɔkɔ tɛ̃ a a nù. A lia zi 'dɔ lì batisimɔ, nɛ tɔkɔ tɛ a a 'bɔ nù. Nɛ Hi Wi 'da Gale tɔ̃ hã lɛ na, mɛ a gbãlã we. Mba gɔ, Hi Wi ni a be gulu gbãlã we hã winɔ.

⁷ Omɛnɔ kɛ ma tɔ̃ we ngɔ Yezu Kristo na, a a Be 'da Gale ni, mɛ a mɔ talɛ:

⁸ Hi Wi 'da Gale, do lì batisimɔ, do tɔkɔ tɛ Yezu. Nɛ ma talɛ nɛ vɛ̃, ma tɔ̃ we kpo.

⁹ Fala kɛ owele wa tɔ̃ we mɛ kɛ wa zɔa ni hã lɛ, nɛ lɛ kɔ̃ gɛnɛ nɛ. Kɔ fala kɛ Gale tɔ̃ we hã lɛ, nɛ nde we ni nɛ̀ ngɔ kɛ winɔ wa tɔ̃ ni gɔ nde? Nɛ ĩ́ na, Gale do tɛ̃ a a tɔ̃a we ngɔ Be 'da a hã lɛ.

¹⁰ Na mɛ ni, wi kɛ a kɔ̃ zu li Be 'da Gale ni, a ĩ do kɔ sila a na, we kɛ Gale tɔ̃a ni a gbãlã we. Nɛ nde wi kɛ a kɔ̃̀ we nu Gale gɔ ni, a ba Gale do wi 'bili bɛlɛ, we duzu kɛ a kɔ̃̀ we kɛ Gale tɔ̃a ngɔ Be 'da a ni gɔ.

¹¹ We Gale tɔ̃a ngɔ Be 'da a ni, mɛ a kɛ na, ɛ hã kpasi kɛ ma é sɛ gɔ ni hã lɛ, nɛ kpasi ni, ma a kɔ Be 'da ɛ.

¹² Wi kɛ a mba do Be 'da Gale ni, a do kpasi ni boe, nɛ wele kɛ a mbà do Be 'da Gale gɔ ni, a do kpasi ni bina.

Kpasi kɛ ma é sɛ gɔ ni

¹³ Mi kɔma wenɔ gɛ hã nɛ, kɛ nɛ kɔ̃a zu li Yezu Be 'da Gale ni, takɔ nɛ ĩ na, nɛ do kpasi kɛ ma é sɛ gɔ ni boe.

¹⁴ Gulu kɛ lɛ nɛ́ dati Gale do kili kɔ sila lɛ gɔ ni, ma kɛ: Lɛ ĩ ngboo na, fala kɛ lɛ gɔ mɔ kɔ̃ a ɔ nɛ kɛ ma wia li a ni, nɛ a zele sɛ sambala 'da lɛ.

¹⁵ Kɔ nɛ́ kɛ lɛ ĩ na, a zele lɛ zila ni, lɛ ĩ tɛ mɛ 'bɔ na, lɛ gɔ mɔ kɔ̃ a, nɛ a hã sɛ hã lɛ.

¹⁶ Fala kɛ mbe wele zɔ ngba a tɛ dɛ 'dã mɔ, nɛ nde mɛ a 'dã mɔ kɛ ma tombo a dɛ li fio gɔ ni, nɛ ma wia na, a sambala Gale we duzu wi ni, nɛ Gale a kpasa sɛ a. Nɛ nde nɛ sambala Gale tati a we owinɔ kɛ wa dɛa 'dã mɔ kɛ ma tómbó wa dɛ li fio gɔ ni. Mba gɔ, 'dã mɔ kɛ ma tombo wele dɛ li fio ni, ma 'bɔ boe. Nɛ mi tɔ̃̀ na, nɛ sambala Gale we wi kɛ a dɛa tɛlɛ tɛ 'dã mɛ ni gɔ.

¹⁷ Yɔa ti dɛa mɛnɔ kɛ winɔ wa dɛ ma ni vɛ̃, mɛ a 'dã mɔ li Gale. Nɛ nde mbe 'dã mɔ ma tombo wele dɛ li fio, nɛ mbee nɛ ma tómbó wele dɛ li fio gɔ.

¹⁸ Lɛ ĩ na, wi kɛ a a be 'da Gale ni, a dɛ́ 'dã mɔ gɔ, we kɛ Yezu Be 'da Gale tɛ zɔ mɔ tɛ a, nɛ Satana wè tɛ dɛ mɔ kpo do a gɔ.

¹⁹ Lɛ ĩ na, lɛ a benɔ 'da Gale, nɛ tala winɔ nù gɛ vɛ, wa 'bana ti ngawi 'da Satana.

²⁰ Lɛ ĩ 'bɔ na, Yezu Be 'da Gale tɛa zi ngɔ nù gɛ, nɛ a hã hã zã hã lɛ na, lɛ ĩ ti ngbongbo Gale. Nɛ lɛ 'bana dɛ kɔ Gale do wala 'da Be 'da a Yezu Kristo. A a ngbongbo Gale, nɛ a hã kpasi kɛ ma é sɛ gɔ ni hã lɛ.

²¹ Aa benɔ 'daa, li nɛ sɔ̃́ we gale bɛlɛnɔ!