1 YOANƐ 4 - WE NU GALE 1995

Hi Wi 'da Gale do bi wi sɛnɛ Gale wa wè kɔ̃ gɔ

¹ Aa nɛ, oyali ngba mi, nɛ tɛ kɔ̃̀ we 'da winɔ kɛ wa tɔ̃ na, lo do Hi Wi 'da Gale kɔ lo boe ni do ti 1 iko gɔ. Nɛ nde nɛ yámbá wa dati, takɔ nɛ ĩ na, Hi Wi kɛ wa do ma ni, ma yula 'da Gale nde. Mba gɔ, ngangga gɛ owi gba olo nu Gale do bɛlɛ, wa dɛlɛ ngɔ nù gɛ wena.

² Kɔ mɛ kɛ ma be hã lɛ na, wele do Hi Wi 'da Gale kɔ a boe ni, ma kɛ: Wi kɛ a kɔ̃a we 'da Yezu Kristo na, a hɔa wele, nɛ a tɛa ngɔ nù gɛ ni, wi ni do Hi Wi kɛ a yula 'da Gale.

³ Nɛ wi kɛ a kɔ̃̀ ní gɔ ni, a do Hi Wi 'da Gale bina. Nɛ nde hi wi kɔ a ni yula 'da Wi sɛnɛ Yezu Kristo, kɛ nɛ zila na, a tɛ sɛ, nɛ ngangga gɛ a hɔa ngɔ nù gɛ ia ni.

⁴ Kɛ 'da nɛ benɔ 'daa, nɛ a winɔ 'da Gale, nɛ nɛ nɛa ngɔ owinɔ wa gba do nu Gale do bɛlɛ ni. Mba gɔ, Hi Wi Santo kɔ nɛ ni, a nganda nɛa ngɔ hi wi kɔ owi nùnɔ.

⁵ Owi 'bili bɛlɛnɔ wa a owi nù, ma kɛ wa wele we do tɛlɛ tɛ owi nù, nɛ owi nùnɔ wa zele wa ni.

⁶ Kɔ we duzu lɛ, lɛ a owinɔ 'da Gale, nɛ wi kɛ a ĩ ti Gale ni, a zele lɛ zila. Nɛ nde wi kɛ a ĩ̀ ti Gale gɔ ni, a zélé lɛ gɔ. Na mɛ ni, lɛ ĩ ti gɔnɔ sanga Hi Wi 'da Gale, kɛ a be gulu gbãlã we hã winɔ ni, do hi wi ɔlɔ winɔ.

Gale a wele kɔ̃a zã

⁷ Aa nɛ, oyali ngba mi, ma wia na, lɛ kɔ̃ gɛnɛ ngba lɛ, we kɛ wele kɔ̃a zã a mɔ́ Gale. Wi kɛ a kɔ̃ gɛnɛ ngba a ni, a a be 'da Gale, nɛ a ĩ ti Gale.

⁸ Nɛ wi kɛ a kɔ̃̀ gɛnɛ ngba a gɔ ni, a ĩ̀ ti Gale gɔ, we kɛ Gale a wele kɔ̃a zã.

⁹ Nɛ zɔ́ tɛlɛ tɛ kɛ Gale bia do kɔ̃a zã 'da a dɛ 'da lɛ ni, mɛ a kɛ a tumba kpo Be 'da a ngɔ nù nga, takɔ lɛ kpasa do wala 'da a ni.

¹⁰ Nɛ kɔ̃a zã ni, mɛ a kɛ na, lɛ a lɛ kɔ̃̀ zi gɛnɛ Gale dati gɔ, nɛ nde a kɔ̃a gɛnɛ lɛ dati, nɛ a tumba Be 'da a, takɔ a fe we si ku'da 'dã mɛnɔ zu lɛ.

¹¹ Aa nɛ, oyali ngba mi, nɛ́ kɛ Gale kɔ̃a gɛnɛ lɛ ní ni, má wia na, lɛ tɛ mɛ 'bɔ, lɛ kɔ̃ gɛnɛ ngba lɛ.

¹² Wele kpo zɔ̀ Gale gɔ. Kɔ fala kɛ lɛ kɔ̃ gɛnɛ ngba lɛ, nɛ nde Gale kɔ lɛ boe, nɛ kɔ̃a zã 'da a ma be sɛ tɛ̃ ɛ kɔ lɛ dɛ wila fala.

¹³ Lɛ ĩ na, lɛ 'bana dɛ kɔ Gale, nɛ Gale 'bana dɛ kɔ lɛ, we kɛ a hã Hi Wi 'da a hã lɛ ni.

¹⁴ Lɛ zɔa zi do gbali lɛ na, Gale Baa lɛ tumba Be 'da a, takɔ a kpasa winɔ ngɔ nù gɛ, nɛ lɛ a Owi tɔ̃ gulu nɛ hã winɔ.

¹⁵ Kɔ wi kɛ a tɔ̃ na, Yezu a Be 'da Gale ni, Gale kɔ a boe, nɛ a a kɔ Gale.

¹⁶ Nɛ we duzu lɛ, lɛ ĩ na, Gale do kɔ̃a zã dɛ 'da lɛ wena, nɛ lɛ kɔ̃a gɛnɛ nɛ. Gale a wele kɔ̃a zã, nɛ wi kɛ a 'bana tɛ kɔ̃ gɛnɛ ngba a ni, a kɔ Gale, nɛ Gale kɔ a boe.

¹⁷ Fala kɛ kɔ̃a zã 'da lɛ dɛ 'da Gale ma we ngboo, nɛ nde lɛ dɛ́ sɛ kili do ngba soe kɛ a tɛ sɛ we 'bili we 'da winɔ ni gɔ. Mba gɔ, dɛa mɔ tɛ lɛ ngɔ nù gɛ, ma wia kɔ̃ do kɛ 'da Yezu.

¹⁸ Wi kɛ Gale kɔ̃a gɛnɛ a ni, a 'bɔ do kili dati Gale bina. Ngbongbo kɔ̃a zã lɛ kɔ̃a do Gale ni, ma fua kili kɔ sila lɛ vɛ̃ do'do. Wi kɛ a do kili kɔ sila a ni, nɛ kili ɔ we a nɛ etumbu ni. Ki ni ma be na, a tɛ kɔ̃̀ gɛnɛ Gale ngboo gɔ.

¹⁹ Lɛ gɛ, lɛ kɔ̃a gɛnɛ Gale, we duzu kɛ Gale kɔ̃a zɛ́ gɛnɛ lɛ dati.

²⁰ Wi kɛ a tɔ̃ na, ɛ kɔ̃a gɛnɛ Gale, kɔ a sɛnɛ ngba a, nɛ nde a a wi 'bili bɛlɛ. Mba gɔ, a zɔ ngba a zɔa, nɛ a kɔ̃̀ gɛnɛ ngba a ni gɔ, nɛ a nɛ dɛ fala kɔ̃ gɛnɛ Gale, kɛ a zɔ́ a gɔ ni nɛ nde?

²¹ Nɛ zɔ́ mbula kɛ Yezu hã ma hã lɛ ni, ma kɛ: Wi kɛ a kɔ̃ gɛnɛ Gale, nɛ ma wia tɛ mɛ 'bɔ na, a kɔ̃ gɛnɛ ngba a.