1 YOANƐ 3 - WE NU GALE 1995

Le a benɔ 'da Gale

¹ Baa lɛ Gale do kɔ̃a zã dɛ 'da lɛ la li ngele! A sa li lɛ la na obenɔ 'da a. Nɛ lɛ a obenɔ 'da a gbãlã we. Owi nù wa ĩ̀ na, lɛ a obenɔ 'da Gale gɔ, we duzu kɛ wa ĩ̀ ti Baa lɛ Gale gɔ.

² Aa nɛ, oyali ngba mi, ngangga gɛ lɛ hɔa obenɔ 'da Gale ia. Nɛ nde lɛ ĩ̀ ti tɛlɛ tɛ kɛ lɛ ɔ sɛ nɛ do 'do nza ni gɔ. Nɛ nde lɛ ĩ na, ngba soe kɛ Yezu a hɔ sɛ ni, nɛ lɛ ɔ sɛ nɛ a ni, we kɛ lɛ zɔ sɛ a nɛ́ kɛ a ɔ nɛ ni.

³ Kɔ wi kɛ a gbini zã a do Yezu ni, ma wia na, a 'dafa tɛ̃ a we hɔ sa wi li Gale, ɔ nɛ kɛ Yezu a sa wi li a ni.

⁴ Wi kɛ a dɛ 'dã mɔ ni, a 'danga mbula 'da Gale, we kɛ dɛ 'dã mɔ, mɛ a bɛ̃ mbula 'da a.

⁵ Nɛ nde nɛ ĩ na, Yezu Kristo tɛa zi ngɔ nù gɛ we fo ku'da 'dã mɔ zu winɔ, nɛ nde a ngboo ni, a dɛ̀ 'dã mɔ kpo gɔ.

⁶ Na mɛ ni, wi kɛ a 'bana dɛ kɔ Yezu ni, a dɛ́ 'bɔ 'dã mɔ gɔ. Nɛ wi kɛ a 'bana tɛ dɛ 'dã mɔ fai ni, a zɔ̀ Yezu gɔ, nɛ a ĩ̀ 'bɔ ti a gɔ.

⁷ Benɔ 'daa, nɛ tɛ kɔ̃̀ na, wele ɔlɔ nɛ gɔ. Wi kɛ a dɛ bɔlɔ zu dɛa mɔ ni, a a wi bɔlɔ zu, ɔ nɛ kɛ Yezu a wi bɔlɔ zu ni.

⁸ Nɛ wi kɛ a 'bana tɛ dɛ 'dã mɔ fai ni, a a wi 'da Satana. Mba gɔ, Satana ndua zɛ́ dɛ 'dã mɔ yolo do gulu. Nɛ nde Be 'da Gale tɛa we gbɛ dɛa to 'da Satana.

⁹ Wi kɛ a a be 'da Gale ni, a dɛ́ 'bɔ 'dã mɔ gɔ. Mba gɔ, mbé kpasi kɛ Gale hã hã a ni, ma ɔ dɛ kɔ sila a, nɛ fala do kɛ na, a dɛ 'bɔ 'dã mɔ ni bina, we kɛ a hɔa be 'da Gale ia.

¹⁰ Nɛ zɔ́ mɛ kɛ ma gɔnɔ sanga benɔ 'da Gale, do benɔ 'da Satana ni, ma kɛ: Wi kɛ a dɛ́ bɔlɔ zu dɛa mɔ gɔ, nɛ a kɔ̃̀ 'bɔ gɛnɛ onya a gɔ ni, a a be 'da Gale gɔ.

Le kɔ̃́ gɛnɛ ngba lɛ

¹¹ Nɛ zɔ́, mbula kɛ wa bia zi ma hã nɛ, ndo do kɛ nɛ kɔ̃a zu li Yezu ni, ma kɛ: Ma wia na, lɛ kɔ̃ gɛnɛ ongba lɛ kɔ̃a fai,

¹² nɛ lɛ tɛ ɔ̀ nɛ Kaina, kɛ a zi a be 'da Satana, nɛ a gbɛa hɔ dɛ 'do a ni gɔ. A gbɛa nya a we ge nde? A gbɛa a we kɛ dɛa mɔ tɛ̃ a dè gɔ, nɛ dɛa mɔ tɛ nya a zi a dia.

¹³ Onyae, fala kɛ winɔ nù gɛ wa sɛnɛ nɛ, nɛ nɛ tɛ ɔ̀ngbɔ̀ do ma gɔ.

¹⁴ Lɛ ĩ na, lɛ hɔa nza kɔ fio, nɛ lɛ do kpasi. Lɛ ĩ ní we kɛ lɛ kɔ̃a gɛnɛ ongba lɛ ni. Kɔ wi kɛ a kɔ̃̀ gɛnɛ ongba a gɔ ni, a 'bana kɔ fio.

¹⁵ Wi kɛ a sɛnɛ ngba a ni, a a wi gbɛ wi. Nɛ nɛ ĩ na, wi gbɛ wi do kpasi kɛ ma é gɔ ni bina.

¹⁶ Yezu bia tɛlɛ tɛ kɛ wele wia we kɔ̃ do gɛnɛ ngba a ni hã lɛ: A hã tɛ̃ a, nɛ a fia we duzu lɛ. Kɔ ní, nɛ lɛ wia we hã tɛ mɛ 'bɔ tɛ lɛ we duzu ongba lɛ.

¹⁷ Kɔ fala kɛ mbe wi kpamɔ zɔ wele kɔ sã, kɔ a gàlà a gɔ, nɛ a nɛ dɛ fala tɔ̃ na, ɛ kɔ̃a gɛnɛ Gale kɔ̃a ni nɛ nde?

¹⁸ Benɔ 'daa, ma wè na, lɛ kɔ̃ gɛnɛ ngba lɛ do nu lɛ iko gɔ. Nɛ nde ma wia na, lɛ kɔ̃ gɛnɛ ngba lɛ do sila lɛ, nɛ ma be tɛ̃ ɛ nza kɔ dɛa mɔ tɛ lɛ.

Lɛ tɛ dɛ̀ kili kɔlɔ do Gale gɔ

¹⁹ Fala kɛ lɛ dɛ na mɛ ni, nɛ lɛ ĩ sɛ na, lɛ a obenɔ 'da Gale, kɛ a a gbãlã we ngboo ni, nɛ lɛ dɛ́ sɛ kili kɔlɔ do a gɔ.

²⁰ Mba gɔ, fala kɛ linggamɔ zu lɛ da lɛ na, lɛ a Owi dɛ 'dã mɔ, nɛ nde we bina. Gale ĩ ti linggamɔ zu lɛ nɛa ngɔ lɛ wele nɛ, tua kɛ a ĩ ti mɛnɔ vɛ.

²¹ Aa nɛ, oyali ngba mi, fala kɛ linggamɔ zu lɛ dà lɛ hã Gale gɔ, nɛ lɛ sɛ do kili dati a bina.

²² Nɛ Gale a hã sɛ mɛnɔ lɛ gɔ kɔ̃ a ni vɛ̃ hã lɛ, we kɛ lɛ dɛ mbula 'da a dɛa, nɛ lɛ dɛ a mɔ kɛ ma hã yangga hã a ni.

²³ Ombulanɔ kɛ Gale hã ma hã lɛ ni, ma kɛ: Lɛ kɔ̃́ zu li Be 'da a Yezu Kristo, nɛ lɛ kɔ̃́ gɛnɛ ngba lɛ, ɔ nɛ kɛ Yezu ba zi do nu a hã lɛ ni.

²⁴ Owinɔ kɛ wa dɛ mbulanɔ 'da Gale dɛa ni, wa a kɔ Gale, nɛ Gale tɛ mɛ 'bɔ kɔ wa boe. Nɛ lɛ ĩ na, a 'bana dɛ kɔ lɛ, we kɛ Hi Wi Santo kɛ a hã a hã lɛ ni, a a tɔ̃ ma hã lɛ.