1 YOANƐ 2 - WE NU GALE 1995

Kristo a Wi tɔ̃ we ngɔ lɛ dati Gale

¹ Aa benɔ 'daa, mi kɔma mbɛti gɛ hã nɛ na, dɔ nɛ dɛ́ 'bɔ 'dã mɔ gɔ. Kɔ fala kɛ mbe sanga nɛ dɛ 'dã mɔ nde, nɛ nɛ ĩ́ na, lɛ do Wi tɔ̃ we ngɔ lɛ dati Gale Baa lɛ boe. Wi a Yezu Kristo, kɛ a a wi bɔlɔ zu ni.

² A a wi kɛ a hã zi tɛ̃ a nɛ́ dɔnggamɔ we si do ku'da 'dã mɛnɔ zu lɛ. A dɛ̀ ni tati nɛ we lɛ iko gɔ, nɛ nde a dɛa ní we owinɔ ngɔ nù gɛ vɛ́.

³ Fala kɛ lɛ dɛ mbulanɔ 'da Gale, nɛ ma be sɛ na, lɛ ĩ ti a.

⁴ Kɔ wi kɛ a tɔ̃ na, ɛ ĩ ti Gale, nɛ nde a dɛ́ mbulanɔ 'da a gɔ ni, a a wi 'bili bɛlɛ, nɛ fo gbãlã we kɔ sila a bina.

⁵ Nɛ wi kɛ a dɛ mbulanɔ 'da Gale dɛa ni, a kɔ̃a gɛnɛ Gale do sila a vɛ́. Nɛ ki ni ma be na, lɛ a owinɔ 'da Gale ngboo.

⁶ Fala kɛ wele tɔ̃ na, ɛ 'bana dɛ kɔ Gale, nɛ ma wia na, a dɛ mɔ tɛ a ɔ nɛ kɛ Yezu dɛa zi ni.

Mbé mbula

⁷ Aa oyali ngba mi, mbula mi kɔmɔ hã nɛ gɛ, mɛ a mbé mbula gɔ. Mɛ a ã mbula kɛ wa bia zi ma hã nɛ, ndo do kɛ nɛ kɔ̃a zu li Kristo ni.

⁸ Gɛnɛ kɔ ní, nɛ nde mbula kɛ mi kɔma hã nɛ gɛ, mɛ a mbé mbula. Dɛa mɔ tɛ Yezu, do kɛ 'da nɛ, ma be na, mbula ni a gbãlã we. Mba gɔ, tũ fala tɛ la nɛ, nɛ ngbongbo sa fala ma ngɔ sa dɛ do tũ fala ni.

⁹ Wi kɛ a tɔ̃ na, ɛ a kɔ sa fala, nɛ a sɛnɛ nya a ni, a 'bana kɔ tũ fala.

¹⁰ Nɛ wi kɛ a kɔ̃ gɛnɛ nya a ni, a hɔa kɔ sa fala ia. Fo 'dã mɔ kpo kɔ sila a we tombo wele li 'dã wala bina.

¹¹ Nɛ nde wi kɛ a sɛnɛ nya a ni, a 'bana kɔ tũ fala, nɛ a yɛnggɛ kɔ tũ fala. A zɔ́ mɔ dati a gɔ, we duzu kɛ tũi kele li a do'do.

¹² Benɔ 'daa, mi kɔmɔ mbɛti gɛ hã nɛ na, Gale fua ku'da 'dã mɛnɔ zu nɛ ia, we duzu Yezu.

¹³ Kɛ 'da nɛ, obaa mi, mi kɔma hã nɛ na, nɛ ĩ ti wi kɛ a zɛ́ boe fai, yolo do ndo nyanga mɛnɔ ni. Nɛ nɛ, zagbãlãnɔ, mi kɔma ma hã nɛ na, nɛ nɛa ngɔ Satana.

¹⁴ Benɔ 'daa, mi kɔmɔ mbɛti gɛ hã nɛ na, nɛ ĩ ti Baa lɛ Gale ĩ. Nɛ nɛ, obaa mi, mi kɔma ma hã nɛ na, nɛ ĩ ti wi kɛ a zɛ́ boe fai, yolo do ndo nyanga mɛnɔ ni. Nɛ nɛ, zagbãlãnɔ, mi kɔma hã nɛ na, nɛ nganda wena, mba gɔ, nɛ usu we nu Gale dɛ kɔ sila nɛ, nɛ nɛ nɛa ngɔ Satana.

¹⁵ Nɛ tɛ kɔ̃̀ gɛnɛ nùi, do mɛnɔ ngɔ nù gɛ gɔ. Wi kɛ a kɔ̃ gɛnɛ nɛ, nɛ nde a kɔ̃̀ gɛnɛ Baa lɛ Gale gɔ.

¹⁶ Mba gɔ, omɛnɔ nù gɛ vɛ́ kɛ owinɔ wa dɛ wɔ tɛ nɛ, tabi wa zɔ ma, nɛ wa 'bã ma, tabi kpamɛnɔ nù gɛ kɛ wa dɛ wali nɛ ni, mɛnɔ ni vɛ̃ ma yòlò 'da Baa lɛ Gale gɔ, nɛ nde ma yula dɛ ngɔ nù gɛ iko.

¹⁷ Nùi gɛ ma la la, nɛ mɛnɔ vɛ̃ kɛ winɔ wa dɛ wɔ tɛ nɛ nɛ ge nde ni, ma la 'bɔ la. Nɛ nde wi kɛ a dɛ mɛ kɛ zã Gale kɔ̃a ni, a 'bana sɛ fai.

Li lɛ sɔ̃ tɛ Owi sɛnɛ Yezu

¹⁸ Aa benɔ 'daa, ngba soe ndɔti nùi kɔla ia. Nɛ zila zi na, Wi sɛnɛ Yezu Kristo a hɔ sɛ. Kɔ lɛ zɔa na ngangga gɛ, ogili wi sɛnɛ Yezu wa hɔa ia. Ma kɛ lɛ ĩ na, ndɔti nùi kɔla ia.

¹⁹ Owinɔ ni wa zi dɛ sanga lɛ gɛ, nɛ nde wa zi a winɔ 'da lɛ ngboo gɔ, ma kɛ wa hɔa nza sanga lɛ ni. Mba gɔ, wa ɔ zi do winɔ 'da lɛ ngboo, nɛ wa 'bana sɔ do lɛ. Kɔ wa hɔa nza we be na, wa a winɔ 'da lɛ gɔ.

²⁰ Kɔ we duzu nɛ, Yezu hã Hi Wi Santo hã nɛ, nɛ nɛ vɛ̃, nɛ ĩ ti gbãlã we 'da Gale.

²¹ Kɔ mi kɔ̀mɔ̀ mbɛti gɛ hã nɛ, we kɛ nɛ yɔa ti gbãlã we yɔa gɔ, nɛ nde mi kɔma ma, we kɛ nɛ ĩ ti gbãlã we de wena. Nɛ nɛ ĩ 'bɔ na, bɛlɛ wè tɛ yolo kɔ gbãlã we fala kpo gɔ.

²² Wi 'bili bɛlɛ a wio nde? Wi a wele kɛ a kafa na, Yezu a Mɛsiya kɛ Gale saka a ni gɔ ni. Wi ni a wi sɛnɛ Yezu. A bɛa gɛnɛ Baa lɛ Gale, nɛ a bɛ̃ 'bɔ gɛnɛ Yezu, Be 'da Gale.

²³ Wi kɛ a bɛ̃ gɛnɛ Be 'da Gale, nɛ nde a bɛa tɛ mɛ 'bɔ gɛnɛ Gale, Baa be ni. Kɔ wele kɛ a tɔ̃ dɛ wila fala na, ɛ kɔ̃a gɛnɛ Be 'da Gale, nɛ nde a kɔ̃a tɛ mɛ 'bɔ gɛnɛ Gale, Baa be ni.

²⁴ Kɔ ma wia na, we nu Gale kɛ nɛ zila zi ndo do kɛ nɛ kɔ̃a zu li Yezu ni, nɛ usu ma dɛ kɔ sila nɛ. Kɔ fala kɛ nɛ usu wenɔ ni dɛ kɔ sila nɛ, nɛ nɛ 'bana sɛ fala nɛ kpo do Be 'da a Yezu, nɛ nɛ 'bana sɛ 'bɔ fala nɛ kpo do Baa lɛ Gale.

²⁵ Mbuli kɛ Yezu kpua zi ma hã lɛ ni, mɛ a kɛ na, lɛ kpa sɛ kpasi kɛ ma é gɔ ni.

²⁶ We kɛ mi kɔ̃a we kɔmɔ ma hã nɛ ngɔ winɔ kɛ wa fa we ɔlɔ nɛ ni, ma hã ni.

²⁷ Nɛ nde kɛ 'da nɛ, Yezu hã zi Hi Wi Santo 'da a hã nɛ. Kɔ nɛ́ kɛ Hi Wi Santo 'bana dɛ kɔ sila nɛ ni, ma wè na, nɛ fa 'bɔ gele wele we be we hã nɛ gɔ. Mba gɔ, wi be mɛnɔ vɛ hã nɛ, wi a Hi Wi Santo. Nɛ mɛnɔ kɛ a be hã nɛ ni, mɛ a gbãlã we ngboo, bɛlɛ kɔ nɛ bina. Nɛ 'báná dɛ kɔ Yezu fai, nɛ́ kɛ Hi Wi Santo bia hã nɛ ni.

²⁸ Aa benɔ 'daa, nɛ 'báná dɛ kɔ Yezu, kɔ ngba soe kɛ a hɔ sɛ nɛ ni, nɛ lɛ sɛ do kili kɔ sila lɛ bina, nɛ sape bá sɛ li lɛ we hɔ dati a gɔ.

²⁹ Ɔ nɛ kɛ nɛ ĩ na, Yezu a bɔlɔ zu wele ni, nɛ wia 'bɔ we ĩ na, wi kɛ a dɛ bɔlɔ zu dɛa mɔ ni, a a be 'da Gale.