1 YOANƐ 1 - WE NU GALE 1995

Yezu a We nu Gale kɛ ma hã kpasi

¹ Lɛ kɔma mbɛti gɛ hã nɛ ngɔ We nu Gale kɛ ma hã kpasi ni. Do kuti kɛ kurr na, Gale dɛ mɛnɔ ngɔ nù gɛ vɛ ni, nɛ nde We nu Gale zɛ́ boe. Nɛ We nu Gale bia tɛ ɛ, nɛ lɛ zila wala gɛlɛ a do zala lɛ, nɛ lɛ zɔ a do gbali lɛ. Lɛ soko zi a ngboo, nɛ lɛ 'be tɛ̃ a do kɔ̃ lɛ.

² We nu Gale ni a wi hã kpasi, nɛ 'da fala kɛ a bia zi tɛ̃ a ni, nɛ lɛ zɔa a. Ma kɛ lɛ tɔ̃ we nɛ hã nɛ ni. Lɛ tɔ̃a na, a a wi hã kpasi kɛ ma é gɔ. A zɛ́ fala nɛ kpo do Baa lɛ Gale tɛ li nza i, nɛ Gale bia a hã lɛ.

³ Lɛ zɔa do gbali lɛ, nɛ lɛ zele do zala lɛ, nɛ lɛ tɔ̃ 'bɔ we nɛ hã nɛ, takɔ nɛ mba do lɛ kpo, ɔ nɛ kɛ lɛ mba do Baa lɛ, do Be 'da a Yezu Kristo kpo ni.

⁴ Lɛ kɔma mbɛti gɛ hã nɛ, takɔ yangga dunu kɔ sila lɛ.

Gale a sa fala

⁵ Toe kɛ lɛ zila dɛ nu Yezu Kristo, nɛ lɛ tɔ̃a hã nɛ ni, ma kɛ: Gale a sa fala, nɛ bi tũ fala sĩ kɔ a bina.

⁶ Fala kɛ lɛ tɔ̃ na, lɛ mba do a kpo, kɔ lɛ 'bana tɛ yɛnggɛ kɔ gba tũ, nɛ nde lɛ a wi 'bili bɛlɛ, nɛ lɛ dɛ́ gbãlã we dɛa mɔ li Gale gɔ.

⁷ Kɔ fala kɛ lɛ yɛnggɛ kɔ sa fala, ɔ nɛ kɛ Gale a sa fala ni, nɛ nde lɛ mba vɛ̃ do ongba lɛ, nɛ lɛ hɔa wele kpo. Nɛ tɔkɔ tɛ Be 'da a Yezu, ma fɔlɔ 'dã mɛnɔ kɔ lɛ vɛ̃.

⁸ Fala kɛ lɛ tɔ̃ na, lɛ do 'dã mɔ bina, nɛ nde lɛ ɔlɔ tɛ lɛ iko, nɛ gbãlã we kɔ sila lɛ bina.

⁹ Kɔ fala kɛ lɛ gbala 'dã mɛnɔ 'da lɛ hã Gale nde, nɛ a fo sɛ ku'da nɛ zu lɛ, nɛ a fɔlɔ sɛ 'dã mɛnɔ kɔ lɛ vɛ. We kɛ a a wi bɔlɔ zu, nɛ a dɛ do nu a dɛa fai.

¹⁰ Kɔ lɛ tɔ̃ na, lɛ dɛ̀ 'dã mɔ gɔ, nɛ nde lɛ ba Gale do wi 'bili bɛlɛ, nɛ we nu a kɔ sila lɛ bina.