1 KORINTƐ 9 - WE NU GALE 1995

We ngɔ wi nɛ toe 'da Kristo

¹ Mi 'bana ti mbula mɔ́ wele nde? Mi a wi nɛ toe 'da Nwa Yezu Kristo gɔ nde? Nɛ mi zɔ̀ zi a do gbali mi gɔ nde? Nɛ nɛ a wala te do toe kɛ mi dɛa ma we a ni gɔ nde?

² Gɛnɛ kɔ ombe winɔ wa ba kafi na, mi a wi nɛ toe 'da Nwa Yezu gɔ, nɛ nde nɛ wia do ĩ na, mi a wi nɛ toe 'da a. Mba gɔ, nɛ́ kɛ nɛ kɔ̃a zu li Yezu ni, ma be na, mi a wi nɛ toe 'da a.

³ Kɔ nɛ zélé tɛlɛ tɛ gisa nu we kɛ mi gese hã owinɔ wa ba kafi mi ni.

⁴ Mi wè tɛ kpa nyɔngɔmɔ kɔ̃ winɔ do toe 'da mi gɔ nde?

⁵ Mi wè tɛ ba wuko wi Kristo, nɛ a kã mi kɔ toe 'da mi, ɔ nɛ kɛ ogele wi nɛ tonɔ, do onya Nwa, do Petro, wa dɛ ni gɔ nde?

⁶ Ní a tati a lɛ do Barnabasi zu lɛ bɔa, hã lɛ wia we dɛ to do kɔ̃ lɛ, sɛ nɛ lɛ kpasa do ma de nde?

⁷ Nɛ zila mbe na, soda dɛa to, nɛ a futa tɛ̃ a do kpo tɛ̃ a nde? Nɛ wi wa fɔ nyɔ́ngɔ́ mɔ li fɔɛ 'da a gɔ nde? Nɛ wi dala odua nɔ́ mbe lì bele wa gɔ nde?

⁸ Nɛ tɛ lènggè na, wenɔ mi tɔ̃ gɛ, mɛ a kɛ winɔ wa dɛ ni iko gɔ. Mba gɔ, 'buku mbula 'da Mɔizɛ tɔ̃a 'bɔ na mɛ ni.

⁹ Mɔizɛ kɔma kɔ mbula ni na: “Nɛ tɛ ɛnzɛ̀ nu ngɔmbɔ do 'da fala kɛ a ma sanga kpalɛ na, kɔa nɛ fo tɛ ɛ tɛ gbãlã nɛ ni gɔ.” Gale tɔ̃ we ni ngboo we ongɔmbɛnɔ nde?

¹⁰ A tɔ̃̀ ma we lɛ winɔ gɔ nde? A tɔ̃a ma we lɛ gbãlã we. Mba gɔ, ma wia na, wi wa fɔ, do wi 'bɛ̃lɛ̃ kpalɛ, wa dɛ toe 'da wa do linggamɔ na, wa kpa mbe nyɔngɔmɔ li fɔɛ ni.

¹¹ Kɔ nɛ́ kɛ lɛ mi zi kɔ̃a we 'da Gale kɔ nɛ ni, nɛ lɛ wè we kpa mbe mɔ kɔ̃ nɛ, takɔ ma gala lɛ gɔ nde?

¹² Kɔ fala kɛ ombe winɔ wa kpa mɔ kɔ̃ nɛ kpa, ní a ma wè na, lɛ kpa tɛ mɛ 'bɔ mɔ kɔ̃ nɛ nɛ ngɔ kɛ 'da wa ni gɔ nde? Gɛnɛ kɔ na mɛ ni, nɛ nde lɛ kɔ̃̀ zi we gɔ mɔ kɔ̃ nɛ gɔ. Nɛ lɛ kunu sila lɛ ngɔ mɛnɔ vɛ́ na, dɔ lɛ kpé wala ti Dia Sakoe 'da Kristo gɔ.

¹³ Nɛ ĩ vɛ na, winɔ kɛ wa dɛ to kɔ tɔa Tɛmpɛloe ni, wa kpasa do mbe dɔnggamɛnɔ. Nɛ wanɔ wa dɔ sa'denɔ ngɔ gbagala hã Gale ni, wa kpa tɛ mɛ 'bɔ mbe mulu sa'denɔ ni.

¹⁴ Nɛ ma tɛ mɛ 'bɔ na mɛ ni we owinɔ kɛ wa be Dia Sakoe ni, Nwa Yezu hã mbula na, wa kpasa do dɛa toe 'da wa.

¹⁵ Nɛ nde mi dɛ̀ na mɛ ni fala kpo gɔ, nɛ mi kɔ̀mɔ̀ we gɛ na, Owele wa gala mi gɔ. Ma dia fɛ̃ na mi fe, olo li kɛ na, mi gɔ mɔ kɔ̃ wele ni. Mi dɔnggɔ tɛ mi do ki ni, nɛ mi kɔ̃̀ na, wele ba mɛ mi dɔnggɔ tɛ mi do ma ni kɔ̃ mi gɔ!

¹⁶ Mi wè tɛ dɔnggɔ tɛ mi do kɛ na mi be Dia Sakoe gɛ ni gɔ, we kɛ mɛ a toe kɛ Nwa hã ma hã mi. Nɛ 'bako do mi fala kɛ mi bè Dia Sakoe gɔ ni.

¹⁷ Kɔ ɔ do kɛ mi saka zi toe gɛ do tɛ mi, nɛ ma wia sɔ na wa futa mi do nɛ. Nɛ nde mi a mi sàkà ma gɔ, mɛ a toe kɛ Nwa hã hã mi, nɛ ma gɔa na mi dɛ ma iko.

¹⁸ Kɔ mɛ wa nɛ futa sɛ do mi do toe 'da mi ni a ge nde? Mɛ a kɛ na, mi dɛ yangga be Dia Sakoe iko, nɛ mi tɛ fà kpamɔ olo nɛ, ɔ nɛ kɛ mi wia sɔ tɛ kpa nɛ ni gɔ.

¹⁹ Mi ti mbula mɔ́ wele bina. Gɛnɛ kɔ na mɛ ni, nɛ nde mi hã tɛ mi hã winɔ vɛ ɔ nɛ ngbá ni, takɔ mi kpa ogili wele hã Kristo.

²⁰ Kɔ fala kɛ mi dɛ toe sanga Oyudanɔ, nɛ mi dɛ mɔ tɛ mi ɔ nɛ Yuda ni, takɔ mi kpa wa hã Yezu Kristo. Mi 'bɔ ti mbula 'da Mɔizɛ bina, nɛ nde mi dɛ mɔ tɛ mi ɔ nɛ winɔ kɛ wa ti mbula ni, takɔ mi kpa wa hã Kristo.

²¹ Kɔ fala kɛ mi a sanga ogele winɔ, kɛ wa ti mbula 'da Mɔizɛ bina ni, nɛ mi dɛ mɔ tɛ mi ɔ nɛ kɛ mi a wi ti mbula gɔ ni, takɔ mi kpa wa hã Kristo. Nɛ nde ma kɔ̃̀ we tɔ̃ na, mi bɛa gɛnɛ mbula 'da Gale gɔ, we duzu kɛ mi a wi ti mbula 'da Kristo.

²² Kɔ fala kɛ mi hɔ sanga owinɔ kɛ kɔ̃a we 'da wa tɛ gã̀ gɔ ni, nɛ mi dɛ mɔ tɛ mi ɔ nɛ mi a wi bi kɔ̃a we ni, takɔ mi kpa wa hã Kristo. Na mɛ ni, mi ba dɛa to tɛ winɔ vɛ, nɛ mi dɛ do wala vɛ we kpasa ombe sanga wa.

²³ Nɛ mi dɛ mɛnɔ ni vɛ we duzu Dia Sakoe, takɔ mi kpa tɛ mɛ 'bɔ mbe dia mɔ olo nɛ.

²⁴ Nɛ ĩ vɛ na, tɛ li fanda dɛa sanɔ, owinɔ kɛ wa dɛ sa yu ni, wa yu vɛ, nɛ nde wi kpa mɔ olo nɛ, wi tati a wele kɛ a la ongba a ni zu a kpo iko. Kɔ we duzu ki ni, nɛ yú nganda we do kɛ na, nɛ kpa mɔ olo yui ni.

²⁵ Owi dɛ nganda dɛa sanɔ vɛ̃, wa ndo yambala ma, nɛ wa zimi tɛ wa wena. Nɛ wa dɛ na mɛ ni, we kpa ndasa dɔ̃lɔ̃ li kɛ ma 'da 'danga ni. Nɛ nde lɛ fa kɛ 'da lɛ we kpa ndasa dɔ̃lɔ̃ li kɛ ma ɔ fai ni.

²⁶ Kɔ we duzu ma, mi ma ngɔ yu nɛ, nɛ mi kala li mi vɛ dɛ tɛ mɛ mi yu we nɛ ni. Nɛ mi ɔ 'bɔ nɛ wi bi bolo, kɛ a dá kɔ̃ a mba mba iko gɔ, nɛ nde a ha haka, sɛ nɛ a da de ni.

²⁷ Kɔ mi hã ngamɔ hã kili tɛ mi, takɔ ma ɔ nɛ kɛ mi kɔ̃a ni, dɔ do 'do, nɛ Gale bé gɛnɛ mi olo kɛ mi bia we nu a hã owinɔ ni gɔ.