1 KORINTƐ 8 - WE NU GALE 1995

Sa'de kɛ wa gbɛa a we dɔnggɔ do okpikimanɔ

¹ Lɛ tɔ̃́ mbe lɛnggɛ ngɔ sa'de kɛ wa gbɛa a we dɔnggɔ do okpikimanɔ ni sɛ. Gbãlã we, lɛ vɛ́ lɛ ĩ ti mɔ ĩ, ɔ nɛ kɛ nɛ tɔ̃ ni. Nɛ nde ĩ ti mɛ kɛ nɛ tɔ̃ do we nɛ ni, ma hã gã zu hã wele, nɛ kɔ̃ gɛnɛ ngba wi, ma gã 'da kɔ̃a we 'da wele.

² Fala kɛ wele lengge na, ɛ ĩ ti mɔ wena, nɛ nde wi ni tɛ ĩ̀ ti mɔ ngboo ɔ nɛ kɛ ma wia ni gɔ.

³ Nɛ nde wi kɛ a kɔ̃ gɛnɛ Gale ni, nɛ Gale ĩ ti a.

⁴ Kɔ nɛ aka na, lɛ wia we nyɔngɔ sa'denɔ kɛ wa gbɛa wa we dɔnggɔ do okpikimanɔ ni nde? Lɛ ĩ na, okpikimanɔ ngɔ nù gɛ wa a gbãlã we mɔ gɔ, nɛ Gale zu a kpo iko, fo gele gale bina.

⁵ Ombe winɔ wa lengge na, ogalenɔ wa ngɔ i boe, nɛ wa 'bɔ nù nga boe. Nɛ mɛ a gbãlã we na, tɛlɛ tɛ galenɔ na mɛ ni do Onwanɔ wa boe.

⁶ Nɛ nde we lɛ, lɛ ĩ na Gale kpo, a a Baa lɛ, kɛ mɛnɔ vɛ yula kɔ a, nɛ lɛ dungu we a ni. Nɛ Nwa 'da lɛ kpo, wi a Yezu Kristo, kɛ a dɛa mɛnɔ vɛ do ngawi 'da Gale, nɛ lɛ kpasa we a ni.

⁷ Nɛ nde owinɔ wa tɛ ĩ̀ ti gbãlã we ni kpa zu wa vɛ gɔ. Ombe wi Kristonɔ, wa zi a Owi dɔnggɔ kpikimanɔ ni. Nɛ gbaa tia do sɔɛ gɛ, wa 'bana tɛ lengge na, sa'denɔ wa gbɛ ni, mɛ a kɛ 'da kpikimanɔ. Kɔ fala kɛ wa nyɔngɔ ma, nɛ wa lengge na, lo hɔa wi ndi ia, we kɛ sila wa tɛ ngàndà gɔ.

⁸ Ĩ na, mɛ ma kã lɛ dɛ 'da Gale, mɛ a nyɔngɔmɔ gɔ. Gɛnɛ kɔ lɛ nyɔngɔ, tabi lɛ nyɔ̀ngɔ̀ gɔ, nɛ nde lɛ hɔ́ sɛ wi dati, tabi wi 'do li Gale we duzu ma gɔ.

⁹ Kɔ ɔ nɛ kɛ nɛ ĩ na, nɛ wia we nyɔngɔ mɛnɔ vɛ ni, nɛ dɛ́ zĩ na, dɔ dɛa mɔ tɛ nɛ, ma yúlú owinɔ kɛ kɔ̃a we 'da wa gã gɔ ni kɔ 'dã mɔ gɔ.

¹⁰ Mba gɔ, fala kɛ winɔ kɛ kɔ̃a we 'da wa gã̀ gɔ ni, wa zɔ mɔ, kɛ mɔ ĩ ti gulu we gɛ ĩ ni, tɛ nyɔngɔ mɔ kɔ tɔa dɔnggɔ do kpikimanɔ, nɛ ma tómbó sɛ wa na, wa kpa linggamɔ nyɔngɔ mɛ ni gɔ nde?

¹¹ Na mɛ ni, nɛ ĩ ti mɛ 'da mɔ ma dɛ sɛ na, wi kɛ kɔ̃a we 'da a gã̀ gɔ, nɛ nde Kristo fia we a ni, a yɔ wala.

¹² Kɔ nɛ ĩ́ na, fala kɛ dɛa mɔ tɛ nɛ kã onya nɛ, kɛ sila wa ngàndà gɔ ni dɛ li wala 'dã mɔ, nɛ nde nɛ dɛa 'dã mɔ. Nɛ nɛ dɛ̀ 'dã mɛ ni dɛ tɛ wa iko gɔ, nɛ dɛa 'bɔ ma dɛ 'da Kristo ngboo.

¹³ Kɔ we duzu ma, fala kɛ nyɔngɔmɔ nu mi dɛ na, nya mi te kɔ 'dã mɔ, nɛ mi bɛ̃ sɛ nyɔngɔmɛ ni fai na, dɔ mi fí a kɔ 'dã mɔ gɔ.