1 KORINTƐ 7 - WE NU GALE 1995

We ngɔ ba ngba wi

¹ Ngangga ni, mi nɛ gese nu wenɔ nɛ aka zi do mi kɔ mbɛti 'da nɛ ni. Ma dia fɛ̃ na, wi wili tɛ bà wuko gɔ.

² Nɛ nde we yu kili vĩ zu yali kɛ ma yɛ'ba nɛ ge nde ni, ma wia na, wi wili kpo kpo a ba wuko kpo, nɛ wuko kpo kpo a ba wili kpo.

³ Nɛ ma wia na, wi wili tɛ bè zu kili tɛ̃ ɛ hã kɛnɛ ɛ gɔ. Nɛ wuke tɛ bè tɛ mɛ 'bɔ zu kili tɛ ɛ hã wili ɛ gɔ.

⁴ Wuko nu tɔa wili, a ngɔ kili tɛ a zu a kpo gɔ, nɛ nde wili a a nwa ngɔ kili tɛ̃ a. Nɛ ma 'bɔ na mɛ ni we wi wili, a ngɔ kili tɛ̃ a zu a kpo gɔ, nɛ nde wuke 'da a a nwa ngɔ kili tɛ a.

⁵ Kɔ we duzu ki ni, nɛ tɛ bè zu kili tɛ nɛ hã ngba nɛ gɔ. Kɔ fala kɛ nɛ bɔa nɛ, nɛ kɔ̃ we gɔnɔ sanga mɔ ɔi we be tũ sĩ, takɔ nɛ hã tɛ nɛ we sambala Gale, nɛ nde ma a dia. Nɛ 'do nɛ, nɛ nɛ mba 'bɔ li ngba nɛ we ɔ fala nɛ kpo. Ní gɔ, nɛ nde nɛ wé sɛ we kunu sila nɛ gɔ, nɛ ma hã sɛ wala hã Satana na a ɔkɔlɔ nɛ.

⁶ Wenɔ kɛ mi tɔ̃a hã nɛ ngɔ ba ngba wi ni, mi ngbɔ́kɔ́ nɛ we dɛ ma gɔ, nɛ nde mi tɔ̃ hã nɛ a mbula iko.

⁷ Mi kɔ̃a sɔ na winɔ vɛ wa dungu anggala ɔ nɛ mi ni. Nɛ nde Gale dɛa winɔ, nɛ wa wè kɔ̃ gɔ. A hã ngawi hã wele do wele we dɛ mɔ kɛ ma si tɛ ɛ do kɛ 'da ngba a ni.

⁸ Nɛ nde mi tɔ̃ hã nɛ oanggalanɔ, do owi fio wilinɔ na, ma wia sɔ na, nɛ 'bana anggala ɔ nɛ mi ni.

⁹ Kɔ fala kɛ nɛ kunu sila nɛ zãa nde, nɛ ma wia na, nɛ ba wili tabi wuko, dɔ wɔ kɔ sila nɛ ngútú nɛ gɔ.

¹⁰ Nɛ nde mi ba nu mi hã owinɔ wa ba ngba wa ba ni, wi a mi gɔ, wi a Nwa hã a ba nu a na, wuko nu tɔa wili, a wè tɛ gɔnɔ sanga tɛ ngba a do wili a gɔ.

¹¹ Kɔ fala kɛ a gɔnɔ sanga tɛ ngba a do wili a nde, nɛ ma wè 'bɔ na, a ba mbé wili gɔ. Tabi a wia we gili tɛ̃ a 'da ã wili a iko. Nɛ wi wili wè 'bɔ tɛ bɛ kɛnɛ ɛ gɔ.

¹² Nɛ nde we owanɔ wa ba ngba wa do winɔ kɛ wa a paganɔ ni, mi do tɛ mi (wi a Nwa gɔ), mi tɔ̃ hã wa na, wi wili kɛ a a wi Kristo, kɔ a ba wuko paganɔ, kɔ wuke ni kɔ̃ we 'bana do a, nɛ ma wè na, wi wili bɛ a gɔ.

¹³ Nɛ ma 'bɔ na mɛ ni we wuko kɛ a a wi Kristo ni, fala kɛ a ba paganɔ, kɔ wi wili ni kɔ̃ we 'bana do a, nɛ ma wè na, wuke bɛ̃ a gɔ.

¹⁴ Na mɛ ni, wi wili kɛ a a paganɔ ni, Gale a kɔ̃ sɛ gɛnɛ a ɔ nɛ wi 'da a ni, we duzu wuke 'da a kɛ a a wi Kristo ni. Ma 'bɔ na mɛ ni we wuko paganɔ, Gale a kɔ̃ sɛ gɛnɛ a ɔ nɛ wi 'da a ni, we duzu wili a kɛ a a wi Kristo ni. Ní gɔ, nɛ benɔ 'da wa, wa ɔ sɔ nɛ obe paganɔ iko ni. Nɛ nde Gale a kɔ̃a gɛnɛ wa ɔ nɛ benɔ 'da a ni.

¹⁵ Kɔ tabi wi kɛ a a paganɔ ni, a kɔ̃ we gɔnɔ sanga tɛ ngba a do wili a, tabi do kɛnɛ a wi Kristo, nɛ wa wia we gɔnɔ sanga tɛ ngba wa. Na mɛ ni, nɛ wuke tabi wi wili kɛ a a wi Kristo ni, a hɔa nza ti mbula ba ngba wi. Mba gɔ, Gale sa mɔ hã lɛ na, lɛ ɔ do dungu fio.

¹⁶ We kɛ mɔ wuko wi Kristo, mɔ nɛ dɛ do ĩ na, mɔ kpasa sɛ wili mɔ ni nɛ nde? Nɛ mɔ wi wili, mɔ nɛ dɛ do ĩ na, mɔ kpasa sɛ kɛnɛ mɔ ni nɛ nde?

Nɛ tɛ kpòlò dungi 'da nɛ gɔ

¹⁷ Nɛ nde 'bangga tɛ ki ni mba, ma wia na, wele do wele 'bana nɛ́ kɛ Gale dɛa zi do a ni, nɛ a dungu nɛ́ kɛ a zi do ma 'da fala Gale sa do mɔ hã a ni. Ki ni a mbula kɛ mi hã ma kɔ eklezianɔ falanɔ vɛ́ gɛ a ni.

¹⁸ Fala kɛ wele zi a gaza 'da fala Gale sa do mɔ hã a ni, nɛ a tɛ fà we usu mbala gaza tɛ̃ a ni gɔ. Nɛ wi kɛ a zi a manda'ba 'da fala Gale sa do mɔ hã a ni, a tɛ fà we nɛ gaza gɔ.

¹⁹ Gaza tabi manda'ba, ma dɛ́ mɔ gɔ. Nɛ nde mɛ ma nɛa ngɔ mɛnɔ vɛ́, mɛ a dɛ mbula 'da Gale.

²⁰ Kɔ ma wia na, wele do wele 'bana dungu nɛ́ kɛ a zi do ma 'da fala Gale sa do mɔ hã a ni.

²¹ Mɔ zi tabi a ngbá 'da fala Gale sa do mɔ hã mɔ ni nde, nɛ we nɛ tɛ zɛ̀lɛ̀ mɔ gɔ. Kɔ tabi wala hũi hã mɔ na, mɔ hɔ nza kɔ ngbá nde, nɛ mɔ hɔ́.

²² Mba gɔ, wi kɛ a zi a ngbá 'da fala Nwa Gale sa do mɔ hã a ni, a 'bànà 'bɔ ngbá gɔ, we kɛ Kristo gɔnɔ zu a, nɛ a hɔa wi 'da a. Ma 'bɔ na mɛ ni, we duzu wi kɛ Gale sa zi mɔ hã a, nɛ nde a zi a ngbá gɔ ni, a hɔa ngbá 'da Kristo.

²³ Nɛ vɛ̃, wele nɛ a mɔ́ Gale, we kɛ a usa zi nɛ ia, kɔ nɛ tɛ hɔ̀ ngbá mɔ́ Owele gɔ.

²⁴ Kɔ onyae, ma wia na, wele do wele 'bana li Gale nɛ́ kɛ a zi do ma 'da fala Gale sa do mɔ hã a ni.

We 'da anggalanɔ do wi fio wilinɔ

²⁵ Nwa hã̀ mbula hã mi we tɔ̃ hã oanggalanɔ gɔ. Kɔ mi kɔ̃a we tɔ̃ linggamɛ 'da mi ngɔ wa hã nɛ. Nɛ nɛ wia we gbini zã nɛ do ma, we kɛ Gale wila nu a tɛ mi wila.

²⁶ Mi lengge na, ɔ nɛ kɛ ngba soe gɛ do ngamɔ wena ni, ma dia fɛ̃ na, wele 'bana tɛ dungu nɛ́ kɛ a nɛ ni.

²⁷ Tabi mɔ ba wuko ba nde, nɛ mɔ tɛ fà we bɛ̃ a gɔ. Kɔ mɔ a anggala, nɛ mɔ tɛ fà we ba wuko gɔ.

²⁸ Mɔ ba wuko, nɛ nde mɔ dɛ̀ 'dã mɔ gɔ. Tabi be zɔnga ba wili, nɛ nde a dɛ̀ 'dã mɔ gɔ. Nɛ nde wanɔ wa ba ngba wa ni, wa sɛ do ngamɔ kɔ dungi 'da wa tũ kpo kpo fai. Nɛ mi kɔ̃̀ sɔ na, ngamɛnɔ ni kpa nɛ gɔ.

²⁹ Onyae, we mi kɔ̃a we tɔ̃ hã nɛ ni ma kɛ: Lɛ 'bànà 'bɔ tũ dɛlɛ gɔ. Kɔ we ma, ma wia na, yolo do sɔɛ gɛ, winɔ kɛ wa ba wuko ba ni, wa dungu nɛ́ kɛ wa bà wuko gɔ ni.

³⁰ Nɛ winɔ kɛ wa do 'bako ni, wa dungu nɛ́ kɛ wa do 'bako bina ni. Nɛ winɔ kɛ wa do yangga ni, wa dungu nɛ́ kɛ wa do yangga bina ni. Nɛ winɔ kɛ wa tɛ oso gole ni, wa dɛ ɔ nɛ kɛ fo mɔ kɔ̃ wa bina ni.

³¹ Nɛ owinɔ kɛ wa kpasa do mɛnɔ nù gɛ ni, wa tɛ à linggamɛnɔ 'da wa vɛ́ dɛ ngɔ nɛ gɔ. Mba gɔ, nùi lɛ zɔ gɛ, ma kɔla la nɛ ia.

³² Ma kɛ mi kɔ̃a sɔ na, nɛ tɛ kpà linggamɔ gɔ. Wi kɛ a bà wuko gɔ ni, a lengge tati a do dɛa toe 'da Nwa, nɛ a fa we hã yangga hã a.

³³ Nɛ wele kɛ a ba wuko ba ni, a lengge wena do mɛnɔ nù gɛ, nɛ a fa we hã yangga hã kɛnɛ a.

³⁴ Nɛ sila a kɛa bɔa. Na mɛ ni, wuko kɛ a bà wili gɔ, tabi be zɔnga, a lengge tati a do dɛa toe 'da Nwa, nɛ a kɔ̃a na, ɛ hã kili tɛ ɛ do sila ɛ vɛ hã Nwa. Nɛ nde wuko kɛ a ba wili ba ni, a lengge wena do mɛnɔ nù gɛ, nɛ a fa we hã yangga hã wili a.

³⁵ Mi tɔ̃̀ ní we kpe wala ti nɛ gɔ, nɛ nde mi kɔ̃a we gala nɛ. Mi kɔ̃a na, nɛ dungu nɛ́ kɛ ma wia ni, nɛ nɛ hã tɛ nɛ vɛ we dɛa toe 'da Nwa.

³⁶ Lɛ lénggé do mbe be zagbãlã kpo, kɛ wuko kɔ̃a a. Nɛ 'do nɛ, nɛ wa 'dafa na, lo tɛ bà ngba lo gɔ. Kɔ fala kɛ be zagbãlã zɔ na, ɛ dɛ̀ be zɔnga de gɔ, kɔ wɔ tɛ wuke ngɔ sila a wena, kɔ a kɔ̃ na lo ba ngba lo nde, nɛ wa wia we ba ngba wa, ɔ nɛ kɛ zã a kɔ̃a ni. Nɛ nde a dɛ̀ 'dã mɔ gɔ.

³⁷ Kɔ fala kɛ be zagbãlã ni kɔ̃ do tɛ̃ na, ɛ bá sɛ wuke gɔ, nɛ a ĩ na, ɛ wia do kunu sila ɛ, nɛ ɛ dɛ linggamɔ zu ɛ, nɛ nde ma 'bɔ a dia, nɛ a tɛ bà wuke gɔ.

³⁸ Na mɛ ni, wi kɛ wuke kɔ̃ a, kɔ a ba a, nɛ nde a dɛa a dia. Nɛ wele kɛ a bà wuke kɔ̃a a ni gɔ ni, a dɛa 'bɔ de wena.

³⁹ Wuko nu tɔa wili a ti mbula 'da wili a fai, gbaa tia do fio. Kɔ 'da fala wili a fe, nɛ nde a 'bɔ ti mbula mɔ́ wi wili bina, nɛ a wia tɛ ba mbé wili, ɔ nɛ kɛ zã a kɔ̃a ni. Nɛ nde ma wia na, a ba wi Kristo.

⁴⁰ Kɔ a bà sɔ 'bɔ mbé wili gɔ, nɛ a sɔ do yangga wena. Ki ni a linggamɛ 'da mi hã ni, nɛ mi lengge na, Hi Wi 'da Gale do mi boe.