1 KORINTƐ 6 - WE NU GALE 1995

Nɛ tɛ dà ngba nɛ dati opaganɔnɔ gɔ

¹ 'Da fala kɛ mbe kpo sanga nɛ kpa we do nya a wi Kristo, nɛ gulu kɛ a da we ni 'da Owi 'bili wenɔ, kɛ wa a paganɔ ni we ge nde? Ma wia na, a da ma 'da winɔ 'da Gale.

² Nɛ ĩ̀ na, winɔ 'da Gale wa 'bili sɛ we 'da winɔ ngɔ nù gɛ ni gɔ nde? Hã fala kɛ nɛ 'bili sɛ wenɔ 'da owinɔ nù gɛ, nɛ gulu kɛ nɛ wè tɛ 'bili obi 'bulu wenɔ sanga nɛ ni gɔ we ge nde?

³ Nɛ ĩ̀ na, lɛ 'bili sɛ we 'da oanzɛnɔ ni gɔ nde? Kɔ ní, nɛ lɛ wè tɛ 'bili wenɔ sanga lɛ nù gɛ gɔ nde?

⁴ Kɔ fala kɛ we sanga nɛ boe, nɛ gulu kɛ nɛ nɛ do ma dati owinɔ kɛ wa do dĩ li owi Kristonɔ bina ni we ge nde?

⁵ Sape bá li nɛ gɔ nde? Wi hã zã, kɛ a wia we 'dafa we sanga onya a wi kɔ̃a wenɔ ni sanga nɛ bina nde?

⁶ Kɔ ma wia na, wi Kristo da nya ɛ wi Kristo dati Owi 'bili wenɔ, kɛ wa a paganɔ ni nde?

⁷ Nɛ da ngba nɛ na mɛ ni, nɛ nde nɛ yɔ wena. Nɛ wè tɛ kunu sila nɛ ngɔ 'dã mɛ kɛ onya nɛ wa dɛa do nɛ ni gɔ nde? Nɛ wè tɛ da li nɛ ngɔ mɛnɔ wa kala kɔ̃ nɛ ni gɔ nde?

⁸ Ĩ na, wi a nɛ ngboo a nɛ dɛ yɔa ti dɛa mɛnɔ, nɛ nɛ kala mɛnɔ 'da ongba nɛ. Nɛ nɛ dɛ na mɛ ni do onya nɛ wi Kristonɔ.

⁹ Nɛ ĩ de wena na, o'dã winɔ wa lé sɛ kɔ le nwa 'da Gale gɔ. Kɔ nɛ tɛ ɔ̀lɔ̀ tɛ nɛ gɔ. Owi dɛ mɔ sapenɔ, do Owi dɔnggɔ okpikimanɔ, do owi ɔ do wukonɔ tabi wilinɔ 'da ngba wa, do owinɔ kɛ wa ɔ do kpo kpo ngba wa ni, wa lé sɛ kɔ le nwa 'da Gale gɔ.

¹⁰ Nɛ owi zũnɔ, do owi gã sila, owi bá dɔ̃, owi tɔ̃ tɛ wi, do owi 'dã hã, wa lé sɛ 'bɔ kɔ le nwa 'da Gale gɔ.

¹¹ Nɛ ombe sanga nɛ ni, wa dɛ zi 'dã mɛnɔ ni dɛa. Nɛ nde Gale fua ku'da 'dã mɛnɔ 'da nɛ ia, nɛ a dɛa na, nɛ hɔ owinɔ 'da a, nɛ nɛ hɔ owi bɔlɔ zu li a. A dɛa ni do wala 'da Hi Wi 'da a, do zu li Nwa Yezu Kristo.

Nɛ é tɛ nɛ we hã dɔ̃lɔ̃ li hã Nwa

¹² Ombe sanga nɛ wa tɔ̃ na, lo wia tɛ dɛ mɛnɔ vɛ̃, fo mbula we amba lo bina. Mɛ a gbãlã we, ĩ na, mɛnɔ vɛ̃mɛ a mɔ gala wele gɔ. Kɛ 'da mi, gɛnɛ kɔ mi ĩ na, fo mbula we amba mi kɔ mɛnɔ mi dɛ ni bina, nɛ nde mi kɔ̃̀ na, mi hã tɛ mi we mɔ kpo, kɔ mi ɔ ngbá ti ma gɔ.

¹³ Nɛ tɔ̃a na: “Gale dɛa nyɔngɔmɔ we zã wi, nɛ a dɛ zã wi we nyɔngɔmɔ.” Mɛ a gbãlã we, ĩ na, Nwa Gale a 'danga sɛ mɛnɔ ni bɔa nɛ. Gale dɛ̀ kili tɛ wele, takɔ wele dɛ do mɔ sape gɔ. Nɛ nde a dɛa ma, takɔ wele dɛ do to hã Nwa Yezu. Nɛ wi a a hã a zɔ mɔ tɛ kili tɛ wi.

¹⁴ Ɔ nɛ kɛ Gale tunu zi Nwa Yezu kɔ fio ni, a tunu sɛ tɛ mɛ 'bɔ lɛ kɔ fio do ngawi 'da a.

¹⁵ Nɛ ĩ̀ na, kili tɛ nɛ mɛ a mbe mɔ kɔ kili tɛ Kristo ni gɔ nde? Kɔ mi wia tɛ ba mbe mɔ kɔ kili tɛ Kristo, nɛ mi yɛnggɛ do vĩ zu yali nde? Fala kpo gɔ!

¹⁶ Tabi nɛ ĩ̀ na, wi kɛ a mba ngba a do wuko vĩ zu ni, nɛ nde wa hɔa do a kili tɛ wi kpo ni gɔ nde? Mba gɔ, wa kɔma kɔ 'Buki 'da Gale na: “Wa bɔa nɛ, wa hɔ sɛ kili tɛ wi kpo.”

¹⁷ Nɛ nde wi kɛ a mba ngba a do Nwa Kristo ni, a hɔa do a sila wi kpo.

¹⁸ Nɛ yú vĩ zu yali! Mba gɔ, ogele 'dã mɛnɔ kɛ wele dɛ ni, ma lé kɔ kili tɛ a gɔ. Nɛ nde wi yɛnggɛ vĩ zu yali, a dɛ 'dã mɔ dɛ kili tɛ a ngboo.

¹⁹ Nɛ ĩ̀ na, kili tɛ nɛ a tɔa 'da Hi Wi Santo ni gɔ nde? Gale hã Hi Wi Santo hã nɛ, nɛ a ɔ dɛ kɔ nɛ. Na mɛ ni, wele kili tɛ nɛ a mɔ́ nɛ ngboo gɔ,

²⁰ nɛ nde wele nɛ a mɔ́ Gale. A usa zi nɛ ia, kɔ ma wia na, nɛ é tɛ nɛ we hã dɔ̃lɔ̃ li hã a.