1 KORINTƐ 5 - WE NU GALE 1995

'Dã mɛ 'da mbe wi Kristo tɛ Korintɛ

¹ Winɔ wa tɔ̃ we 'da nɛ na, mɔ sape dɛa tɛ́ ɛ sanga nɛ. Nɛ mɛ a gã mɔ sape kɛ gɛnɛ kɔ opaganɔ, nɛ nde wa wè tɛ dɛ ma gɔ ni. Mi zila na mbe sanga nɛ ni a ɔ do kɛnɛ baa a.

² Nɛ nɛ dɛ 'bɔ gã zu! Nɛ nde ma wia sɔ na, nɛ dɛ 'bako la li ngele, nɛ nɛ ndaka wi dɛ mɔ sape ni sanga nɛ do'do.

^3-4 Kɛ 'da mi, gɛnɛ kɔ mi sanga nɛ bina, nɛ nde do kɔ sila mi, mi fala nɛ kpo do nɛ. Ma kɛ mi 'bili we 'da wi ni do zu li Nwa 'da lɛ Yezu Kristo, ɔ nɛ kɛ mi sɔ sanga nɛ mɔ boe ni.

⁵ Mi 'bili na, 'da fala nɛ mba li ngba nɛ, nɛ nde sila mi sɛ fala nɛ kpo do nɛ, nɛ ma wia na, do ngawi 'da Nwa 'da lɛ Yezu Kristo, lɛ da kɔ̃ lɛ tɛ wi ni hã Satana, takɔ Satana 'danga kili tɛ a, nɛ hi a kpasa do 'da fala kɛ Nwa a 'bili sɛ do ngbangga ni.

⁶ Fo mɔ kɛ nɛ wia tɛ dɔnggɔ tɛ nɛ we nɛ ni bina. Nɛ ĩ̀ na, be ina hana mapa sĩ iko, ma wia we hana zanga mapa vɛ ni gɔ nde?

⁷ We duzu ma, nɛ fó 'dã mɛ, kɛ ma ɔ nɛ ã ina hana mapa ni sanga nɛ do'do. We kɛ ni gɔ, nɛ ma yɛ'bɛ sɛ sanga nɛ vɛ, ɔ nɛ kɛ ina mapa yɛ'bɛ kɔ zanga mapa, nɛ ma hana ma ni. Ma wia na, nɛ ɔ sa nɛ mbé zanga mapa, kɛ wa à ina hana mapa tɛ nɛ gɔ ni. Gbãlã we, nɛ hɔa sa wi li Gale ia, we duzu Kristo kɛ a fia we nɛ ni. Mba gɔ, we duzu lɛ, Kristo ɔ nɛ bata kɛ wa gbɛ a 'da fala ɛngga Hɔ Nza kɔ Ngbá ni.

⁸ Na mɛ ni, lɛ nɛ dungu ɛngga, nɛ lɛ fó 'dã mɔ do mɔ sape sanga lɛ, ɔ nɛ kɛ wa da do ã ina hana mapa nù ni, nɛ lɛ ɔ́ sa nɛ mapa kɛ wa à ina hana mapa tɛ nɛ gɔ ni, nɛ lɛ dɛ bɔlɔ zu dɛa mɔ.

⁹ Kɔ mbɛti kɛ mi kɔma zi hã nɛ dati ni, mi tɔ̃a zi na, nɛ tɛ yɛ̀nggɛ̀ do owi dɛ mɔ sape gɔ.

¹⁰ Nɛ nde mi sà zi a li paganɔnɔ, kɛ wa dɛ mɔ sape, tabi wa dɛ wɔ tɛ mbili, tabi wa zũ mɔ, tabi wa dɔnggɔ okpikimanɔ ni gɔ. Mi tɔ̃ sɔ ní, nɛ ma wia sɔ na, nɛ fo tɛ nɛ ngɔ nùi gɛ do'do.

¹¹ Nɛ nde mi kɔma mbɛti ni hã nɛ, we duzu wi kɛ a tɔ̃ na, ɛ a wi Kristo, nɛ nde a dɛ mɔ sape, nɛ a dɛ wɔ tɛ mbili, nɛ a dɔnggɔ okpikimanɔ, nɛ a tɔ̃ tɛ ngba a, nɛ a te bá dɔ̃, nɛ a zũ mɔ ni. Mi tɔ̃a hã nɛ na, nɛ tɛ yɛ̀nggɛ̀ do wi ɔ ni gɔ, nɛ nɛ tɛ nyɔ̀ngɔ̀ mɔ do a gɔ.

^12-13 Mba gɔ, mi wè tɛ 'bili we 'da opaganɔ gɔ. Ki ni a toe 'da mi gɔ, Gale a 'bili sɛ we 'da wa. Nɛ nde nɛ wè tɛ 'bili we 'da ongba nɛ wi kɔ̃a wenɔ gɔ nde? Nɛ dé ɔ nɛ kɛ wa kɔma kɔ 'Buki 'da Gale na: “Nɛ ndáká o'dã winɔ sanga nɛ do'do” ni.