1 KORINTƐ 4 - WE NU GALE 1995

Owi nɛ tonɔ 'da Kristo

¹ Kɔ ma wia na, nɛ zɔ lɛ nɛ́ Owi dɛa tonɔ 'da Kristo, kɛ a la usu wenɔ 'da Gale dɛ kɔ̃ lɛ na, lɛ be gulu nɛ hã winɔ ni.

² Ĩ na, mɛ kɛ Owele wa kɔ̃a we zɔ kɔ̃ owinɔ, kɛ wa ia wa we zɔ mɔ tɛ mɛnɔ 'da wa ni, mɛ a kɛ na, wa dɛ olo nu lo.

³ Kɔ we mi, tabi nɛ 'bili we 'da mi, tabi ogele wele wa 'bili we 'da mi, nɛ nde ma dɛ́ mɔ tɛ mi kpo gɔ. Nɛ mi do tɛ mi, mi 'bílí we 'da mi gɔ.

⁴ We kɛ tɛ zu mi ngɔ 'dã mɛ mi dɛa ni bina. Nɛ nde ma kɔ̃̀ we tɔ̃ na, mi do 'dã mɔ bina ni gɔ. Wi 'bili we 'da mi, wi a Nwa Gale zu a kpo.

⁵ Kɔ we duzu ma, nɛ tɛ 'bìlì we 'da ongba nɛ dati gɔ, nɛ 'bɔ́ 'da ngba soe kɛ Nwa a hɔ sɛ nɛ ni. Kɔ a hɔ, nɛ a be sɛ mɛnɔ kɛ ma usu tɛ ɛ ti tũi ni vɛ dɛ wila fala, nɛ a be sɛ usu linggamɔ kɔ sila winɔ vɛ́ dɛ nza. Na mɛ ni, nɛ wele do wele a kpa sɛ dɔngga wi kɔ̃ Gale, ɔ nɛ kɛ ma wia do a ni.

⁶ Onyae, mi tɔ̃a wenɔ gɛ vɛ dɛ ngɔ mi do Apolosi, takɔ ma be we hã nɛ. Mi kɔ̃a na, we 'da lɛ do Apolosi ma be hã nɛ na, nɛ dɛ́ tati a kɛ mbula tɔ̃a ni, nɛ nɛ tɛ hɔ̀ nza kɔ nɛ gɔ. Ní, nɛ nɛ tɛ dɔ̀nggɔ̀ wele kpo, nɛ nɛ zɔ ngba a yala iko gɔ.

⁷ Mba gɔ, mɔ nɛa ngɔ ongba mɔ we wio nde? Mɛ kɛ mɔ do ma, nɛ nde wi hã hã mɔ wi a Gale gɔ ni, mɛ a ge nde? Kɔ gulu kɛ mɔ dɔnggɔ tɛ mɔ ngɔ nɛ, ɔ nɛ kɛ mɔ kpa do ngawi 'da mɔ wele nɛ ni we ge nde?

⁸ Nɛ lengge na, nɛ kpa mɛnɔ vɛ́, nɛ nɛ hɔa owi kpamɔ ia nde? Lɛ a onwa gɔ, nɛ nɛ lengge na, nɛ hɔa onwa nde? Kɔ mi kɔ̃a sɔ na, nɛ hɔ onwa, takɔ lɛ dungu tɛ mɛ 'bɔ nwa fala nɛ kpo do nɛ!

⁹ Nɛ nde mi zɔ na, Gale ia lɛ, owi nɛ tonɔ 'da Yezu Kristo do ngɔ go'do winɔ vɛ. Lɛ ɔ nɛ owinɔ kɛ wa 'bili we 'da wa na, wa gbɛ wa dɛ wila fala ni. Nɛ lɛ ɔ nɛ mɔ gbɔlɔ mɔmu li winɔ ngɔ nù gɛ, do anzɛnɔ vɛ ni.

¹⁰ Lɛ hɔa owi bɔ we duzu Kristo. Nɛ nde nɛ, nɛ zɔ tɛ nɛ nɛ́ Owi hã zã, we kɛ nɛ mba kpo do Kristo ni! Lɛ mbɔkɔ wena, nɛ nde nɛ nganda wena! Winɔ wa yɔndɔ lɛ yɔnda, nɛ nde wa dɔnggɔ nɛ dɔngga!

¹¹ Gbaa tia do sɔɛ gɛ, lɛ tɛ fe wɔ, do ɔ wɔ lì, nɛ fo tulu tɛ lɛ bina. Wa tɛ zɛ lɛ, nɛ lɛ yɛnggɛ do ngɔ nze nze.

¹² Lɛ kpa ngamɔ dɛ to do kɔ̃ lɛ we kpasa do ma. Kɔ fala kɛ winɔ wa dã lɛ, nɛ lɛ wele nu lɛ tɛ wa. Kɔ wa ma ngɔ zɛlɛ tɛ lɛ, nɛ lɛ kunu sila lɛ iko.

¹³ Fala kɛ wa tɔ̃ 'dã we hã lɛ, nɛ lɛ gese dia we hã wa. Na mɛ ni, gbaa tia do sɔɛ gɛ, owinɔ wa zɔ lɛ nɛ́ nda go'do winɔ vɛ̃, nɛ lɛ ɔ li wa nɛ wɔkɔsɔ ngɔ zubu ni.

¹⁴ Mi kɔ̀mɔ̀ mbɛti gɛ na, ma hã sape hã nɛ gɔ, nɛ nde mi kɔma ma we gbese zu nɛ gbisa, we duzu kɛ nɛ a obenɔ 'da mi ngɔ sila mi.

¹⁵ Gɛnɛ kɔ ogba gili wi be mɛnɔ wa hɔ 'da nɛ we be we 'da Kristo hã nɛ, nɛ nde baa nɛ kpo iko. Nɛ baa nɛ ni, wi a mi. Mba gɔ, mi a mi nɛa zi do Dia Sakoe hã nɛ dati, nɛ nɛ hɔa owinɔ 'da Kristo we duzu mi.

¹⁶ Kɔ mi tɔ̃ hã nɛ na, nɛ dɛ́ ɔ nɛ kɛ mi dɛ ni.

¹⁷ Ma kɛ mi tumba Timote hã nɛ, takɔ a gba sɛ tɛ zu nɛ ngɔ mbula ngɔ dɛa toe 'da Kristo, kɛ mi dɛ ma, nɛ mi be ma hã Owi Kristonɔ falanɔ vɛ́ ni. Timote ni a be kɛ a ngɔ sila mi, nɛ a dɛ mbulanɔ 'da Nwa do wala do nɛ.

¹⁸ Ombe sanga nɛ wa hɔa wi gã zu, we kɛ wa lengge na, mi nɛ́ sɛ we zɔ nɛ gɔ.

¹⁹ Nɛ nde fala kɛ zã Gale kɔ̃, nɛ mi nɛ sɛ 'da nɛ i mɔ ngangga gɛ. Na mɛ ni, nɛ mi zélé sɛ tati a wenɔ kɛ Owi gã zunɔ ni wa tɔ̃ ni iko gɔ, nɛ nde mi zɔ sɛ 'bɔ ngawi 'da wa kɛ wa dɛ do toe ni.

²⁰ Mba gɔ, le nwa 'da Gale, ma zɔ̀ wila we nu wi iko gɔ, nɛ nde ma zɔa dɛa to.

²¹ Nɛ kɔ̃a ngboo a ge nde? Nɛ kɔ̃a na mi ba zufa, kɔ mi nɛ do ma 'da nɛ i, tabi nɛ kɔ̃a na, mi nɛ do mbɔkɔ sila, do kɔ̃a zã nde?