1 KORINTƐ 3 - WE NU GALE 1995

Owi dɛa tonɔ 'da Gale

¹ Nɛ nde onyae, we mi, mi wè zi tɛ tɔ̃ we hã nɛ ɔ nɛ kɛ wa tɔ̃ do we hã owinɔ kɛ wa do Hi Wi 'da Gale boe ni gɔ, nɛ nde mi tɔ̃a zi hã nɛ ɔ nɛ wa tɔ̃ do we hã owinɔ ngɔ nù gɛ, tabi hã Owele kɛ wa 'bana obe kɔ kɔ̃a we 'da wa ni.

² Mi hã zi hã nɛ a lì bele iko, nɛ nde mi hã̀ nga nyɔngɔmɔ gɔ, we kɛ nɛ wè zi tɛ nyɔngɔ ma gɔ. Nɛ tia do sɔɛ gɛ, nɛ tɛ wè 'bɔ do ma gɔ,

³ we duzu kɛ nɛ 'bana tɛ dɛ mɔ tɛ nɛ ɔ kɛ 'da owinɔ ngɔ nù gɛ ni. Mba gɔ, mɔ̃lã kɛ nɛ mɔ̃lɔ̃, do bɔnɛ nɛ dɛ hã ngba nɛ ni, ma be na, nɛ 'bana dɛ mɔ tɛ nɛ ɔ nɛ owinɔ ngɔ nù gɛ.

⁴ 'Da fala kɛ mbe sanga nɛ tɔ̃ na, ɛ a wi 'da Polo, nɛ mbe na, ɛ a wi 'da Apolosi, nɛ nde nɛ si tɛ ɛ do owinɔ ngɔ nù gɛ nde?

⁵ Apolosi ngboo a wio nde? Nɛ Polo a wio nde? Lɛ a Owi dɛa tonɔ 'da Nwa Gale kɛ lɛ gala nɛ na, nɛ kɔ̃ zu li Kristo ni. Nɛ wele kpo kpo sanga lɛ dɛ toe kɛ Gale hã ma hã a ni.

⁶ Ma ɔ nɛ kɛ mi mi kpalɛ, nɛ Apolosi a lì zu nɛ, nɛ Gale dɛa na kpalɛ gã ni.

⁷ Nɛ nde wi mi kpalɛ, do wi a lì zu nɛ, wa a mɔ gɔ. Wele mɛnɔ a mɔ́ Gale zu a kpo, we kɛ a dɛa na, kpalɛ gã.

⁸ Nɛ toe 'da wi mi kpalɛ, do kɛ 'da wi a lì zu nɛ, ma wia kɔ̃. Gale a hã sɛ si olo dɛa toe 'da wele do wele, do tɛlɛ tɛ kɛ a dɛa do toe 'da a ni.

⁹ Mba gɔ, lɛ do Apolosi a wi dɛa to kɔ fɔɛ 'da Gale, nɛ fɔɛ 'da Gale, wi a nɛ. Nɛ nɛ ɔ 'bɔ nɛ tɔa kɛ Gale dɛ ma ni.

¹⁰ Nɛ nde Gale bia dia zã hã mi, nɛ mi ĩ ti dɛ tɔa ngboo. Mi zã kɔ̃, nɛ mi ndua nyanga tɔa, nɛ mbé gele winɔ wa dɛa tɔa dɛ ngɔ nɛ. Nɛ nde ma wia na, wi kɛ a nɛ dɛ tɔa ni, nɛ a dɛ do sɔ̃a li.

¹¹ Mba gɔ, nyanga tɔa ni boe, wi a Yezu Kristo. Nɛ wele kpo wè tɛ ndo 'bɔ mbé gele nyanga tɔa olo Yezu gɔ.

¹² Ombe wa dɛ sɛ tɔa dɛ ngɔ ki ni do mɔ mbali, tabi do fɛa mɔ bolo, tabi do odia ta olo gã gole, nɛ ombe wa dɛ sɛ do te, tabi do gole, tabi do zɔ̃.

¹³ Nɛ nde dɛa to 'da wele do wele ma be sɛ tɛ́ ɛ do ngba soe 'bili ngbangga. Mba gɔ, do ngba soe ni, nɛ we ma nyɛ sɛ, nɛ ma yamba sɛ toe 'da wele do wele we be na, ma a dia nde.

¹⁴ Kɔ wi kɛ tɔa a dɛa ni bɛ̀lɛ̀ gɔ, nɛ a kpa sɛ mɔ olo toe 'da a.

¹⁵ Nɛ nde wi kɛ we bɛlɛ tɔa a dɛa ni, nɛ a kpá sɛ mɔ olo toe 'da a gɔ. Nɛ nde a wele nɛ a kpasa sɛ. Ma ɔ sɛ nɛ kɛ a gbua nza zã nyɛa we, nɛ a yu ni.

¹⁶ Nɛ ĩ de wena na, nɛ a tɔa 'da Gale, nɛ Hi Wi 'da Gale ɔ dɛ kɔ nɛ.

¹⁷ Kɔ fala kɛ wele 'danga tɔa 'da Gale, nɛ Gale a 'danga sɛ tɛ mɛ 'bɔ wi ni. Mba gɔ, tɔa 'da Gale ma santo, nɛ tɔa ni, wi a nɛ.

¹⁸ Kɔ da dɛ kɔ wele ɔ́lɔ́ tɛ ɛ gɔ. Fala kɛ mbe wele kpo sanga nɛ ni lengge na, ɛ do hã zã ɔ nɛ kɛ 'da winɔ ngɔ nù gɛ, nɛ ma wia na, a e tɛ a nɛ́ wi bɔ ni, takɔ a hɔ wi hã zã ngboo.

¹⁹ Mba gɔ, hã zã 'da owinɔ ngɔ nù gɛ mɛ a mɔ bɔ li Gale. Wa kɔma kɔ 'Buki 'da Gale na: “Bili 'da Gale kala Owi hã zãnɔ do wala 'dã hã zã 'da wa wele nɛ.”

²⁰ Nɛ wa kɔma 'bɔ na: “Nwa Gale ĩ ti linggamɔ zu Owi hã zãnɔ, nɛ ma ɔ li a yala iko.”

²¹ Kɔ na mɛ ni, wele wè tɛ dɔnggɔ tɛ́ ɛ do ngbɛ ɛ wele gɔ, we kɛ wele mɛnɔ vɛ a mɔ́ nɛ.

²² Gɛnɛ kɔ wi a Polo, tabi Apolosi, tabi Petro, nɛ nde wa a wi gala nɛ. Kɔ mɛ tabi a nùi, tabi kpasi, tabi fio, tabi mɛnɔ kɛ ma sɔɛ gɛ boe, tabi kɛnɔ ma hɔ sɛ do 'do ni, nɛ nde ma vɛ a mɛnɔ 'da nɛ.

²³ Nɛ nɛ a owinɔ 'da Kristo, nɛ Kristo a wi 'da Gale.