1 KORINTƐ 16 - WE NU GALE 1995

Mbili we gala do wi Kristonɔ tɛ Yeruzalɛmɛ

¹ Kɔ we mbili kɛ nɛ da ma, we tombo hã Owi Knstonɔ tɛ Yeruzalɛmɛ i ni, ma wia na, nɛ da do tɛlɛ tɛ kɛ mi tɔ̃a zi hã oeklezianɔ ngɔ nù Galati i ni.

² Li ɛngga kpo kpo, nɛ wele do wele fo mbe nu mbili kɛ a kpa ma ni, nɛ a usu dɛ kɔ tɔa 'da a. Kɔ fala kɛ mi hɔ nde, nɛ nɛ tɛ fà 'bɔ ma fa gɔ.

³ Nɛ nɛ sáká Owele, takɔ 'da fala mi hɔ 'da nɛ i, nɛ mi dɛ mbɛti ngɔ mbili ni, nɛ mi tombo do wa hã owi Kristonɔ tɛ Yeruzalɛmɛ i.

⁴ Kɔ ma we tabi na, mi nɛ 'bɔ nde, nɛ lɛ nɛ sɛ do wa fala nɛ kpo.

Linggamɛ 'da Polo ngɔ yali 'da a

⁵ Mi nɛ sɛ we zɔ nɛ, nɛ nde mi hɔ sɛ do ngɔ nù Masedɔanɛ, sɛ nɛ mi nɛ 'da nɛ i de.

⁶ Nɛ mi lengge na, mi dɛ sɛ dɔa kɔ tũ 'da nɛ mɔ. Mbe gɔ, nɛ mi ɔ sɛ dɛ 'da nɛ ni gbaa na, zɔlɔ gɛ̃ɛ e sɛ nɛ de. Hã 'da fala kɛ mi nɛ la dɛ dati, nɛ nɛ hã sɛ kɔ̃ nɛ hã mi, takɔ ma gala mi li wala gɛnɛ 'da mi.

⁷ Mba gɔ, mi kɔ̃̀ na, mi zɔ nɛ do la ngɔ iko gɔ, nɛ nde mi kɔ̃a na, fala kɛ zã Gale kɔ̃, nɛ mi ɔ mbe do nɛ 'do dɔa kɔ̃ tũ.

⁸ Kɔ ngangga ni, mi kɔ̃a we 'bana dɛ Efɛzɛ gɛ, gbaa we hɔ tɛ ngba soe ɛngga Pantɛkotɛ.

⁹ Mba gɔ, gɛnɛ kɔ owi sɛnɛ mi wa dɛlɛ Efɛzɛ gɛ wena, nɛ nde Gale hũi wala hã mi na, mi dɛ gã to hã a kɔ le gɛ.

¹⁰ Kɔ fala kɛ Timote hɔ 'da nɛ mɔ nde, nɛ nɛ gala a do dia nɛ, takɔ sila a gɛ, nɛ a dungu do yangga, we kɛ a dɛ toe 'da Nwa ɔ nɛ kɛ mi dɛ ni.

¹¹ Kɔ dɔ wele zɔ́ a yala gɔ. Nɛ hã́ kɔ̃ nɛ hã a, takɔ ma gala a na, a kpolo tɛ a dɛ 'da mi nga do dia nɛ. Mba gɔ, lɛ do onya lɛ wi kɔ̃a wenɔ, lɛ 'bɔ 'da a.

¹² Nɛ nde we duzu nya lɛ Apolosi, mi dala zi nu mi hã a na, a mba do mbe onya lɛ, kɔ wa nɛ we zɔ nɛ, nɛ nde a kɔ̃̀ we nɛ da dɔ̃ gɛ gɔ. Kɔ a kpa wala, nɛ a nɛ sɛ.

Ndɔti wenɔ do obalɛnɔ

¹³ Li nɛ sɔ̃́, nɛ nɛ kpã́lã́ sila nɛ kɔ kɔ̃a we 'da nɛ. Nɛ dɛ́ gbãlã we dɛa mɔ, nɛ nɛ ɔ́ do ngawi.

¹⁴ Nɛ dɛ́ toe 'da nɛ vɛ̃ do kɔ̃a zã.

¹⁵ Nɛ ĩ ti Stefanasi do nu fɛlɛ a, nɛ nɛ ĩ na, tɛ ngɔ nù Akai, wa zi a Owi dati we kifi sila wa. Nɛ wa hã zi tɛ wa we dɛ to sanga Owi Kristonɔ. Kɔ onyae, mi aka nɛ na,

¹⁶ nɛ zélé nu owinɔ wa ɔ ní ni, fala nɛ kpo do owinɔ vɛ kɛ wa hã tɛ wa we dɛ toe do wa ni.

¹⁷ Tɛa 'da Stefanasi, do Fortunatusi, do Akaikusi, ma hã yangga hã mi wena. Mi zɔa wa, nɛ ma ɔ nɛ kɛ mi zɔa nɛ vɛ̃ ni.

¹⁸ Nɛ wa gɛa sila mi ɔ nɛ kɛ wa gɛa zi tɛ mɛ 'bɔ do sila nɛ ni. Kɔ ma wia na, nɛ ĩ ti dɔnggɔ Owele kɛ wa ɔ na mɛ ni.

¹⁹ Oeklezianɔ ngɔ nù Azi gɛ wa fana nɛ. Nɛ Akilasi, do Prisilɛ, do Owi Kristonɔ kɛ wa mba li ngba wa dɛ kɔ tɔa 'da wa ni, wa tumba balɛ hã nɛ do zu li Nwa Yezu.

²⁰ Onya lɛ wi kɔ̃a wenɔ i nga gɛ vɛ, wa tumba balɛ hã nɛ. Nɛ fáná ngba nɛ, nɛ nɛ úfú zala ngba nɛ ɔ nɛ kɛ ma wia do winɔ 'da Gale ni.

²¹ Mi kɔma balɛ gɛ hã nɛ do zu kɔ̃ mi Polo wele nɛ ngboo.

²² Fala kɛ wele kɔ̃̀ gɛnɛ Nwa Yezu gɔ nde, nɛ Gale fɔmbɔ a! Marana ta! Gulu nɛ na: Aa Nwa 'da lɛ, mɔ tɛ́!

²³ E kɔ dia zã 'da Nwa Yezu 'báná do nɛ.

²⁴ Mi kɔ̃a gɛnɛ nɛ kɛ lɛ do nɛ vɛ, lɛ dɛ kɔ Yezu Kristo ni.