1 KORINTƐ 15 - WE NU GALE 1995

Kristo za'da nza kɔ fĩo

¹ Onyae, mi kɔ̃a we gba ta zu nɛ ngɔ Dia Sakoe kɛ mi bia zi hã nɛ ni. Nɛ kɔ̃a zi gɛnɛ nɛ, nɛ nɛ 'bana tɛ kɔ̃ ma gbaa tia do sɔɛ gɛ.

² Hã fala kɛ nɛ 'bana tɛ kɔ̃ gɛnɛ Dia Sakoe vɛ ɔ nɛ kɛ mi bia zi hã nɛ ni, nɛ ma kpasa sɛ nɛ. Kɔ ni gɔ, nɛ nde nɛ kɔ̃a zi yala iko.

³ Sakoe kɛ mi zila zi ma dati, nɛ mi bia ma hã nɛ ni, ma nɛa ngɔ mɛnɔ vɛ. Sakoe ni mɛ a kɛ na, Kristo fia zi we 'dã mɛnɔ 'da lɛ, ɔ nɛ kɛ 'Buki 'da Gale tɔ̃a ni.

⁴ Wa mi zi a, nɛ do talɛ tũi, nɛ a za'da nza kɔ fio ɔ nɛ kɛ 'Buki tɔ̃a ni.

⁵ Nɛ a bia tɛ a hã Petro, nɛ a be 'bɔ tɛ a hã owi nɛ tonɔ 'da a 'bu ngɔ wa bɔa ni.

⁶ 'Do nɛ, nɛ a bia tɛ̃ a hã owinɔ 'da a, wa dɛlɛ zi nɛa ngɔ kama mɔlɔ fala nɛ kpo. Gili ombe sanga winɔ ni, wa 'bana nza, nɛ ombe wa fia.

⁷ Nɛ 'do ki ni 'bɔ, nɛ a be tɛ a hã Zake, nɛ 'do nɛ, nɛ a bia tɛ a hã Owi nɛ tonɔ 'da a vɛ.

⁸ Nɛ do ndɔti nɛ vɛ, nɛ a bia tɛ a hã mi, kɛ mi a nda go'do winɔ, nɛ mi ɔ nɛ be kɛ wa kua a, nɛ nde a sɔ̃̀ gɔ ni.

⁹ Gbãlã we, mi do ti Owi nɛ tonɔ vɛ. Ma wè sɔ na, wa sa li mi na wi nɛ to gɔ. Mba gɔ, mi hã zi ngamɔ hã Eklezia 'da Gale wena.

¹⁰ Nɛ nde Gale bia dia zã 'da a hã mi, gulu nɛ a mi ɔ sɔɛ gɛ na mɛ gɛ. Nɛ dia zã Gale bia hã mi ni, ma là yala iko gɔ, we kɛ mi dɛ to wena, mi dɛa nɛa ngɔ Owi nɛ tonɔ vɛ́. Nɛ nde mi dɛ̀ ma do ngawi 'da mi wele nɛ gɔ, mi dɛa do ngawi 'da Gale, kɛ a hã ma hã mi do dia zã 'da a ni.

¹¹ Kɔ tabi mi a mi bia Dia Sakoe hã nɛ, tabi wi a ogele wi nɛ tonɔ nde, nɛ nde we bina. Mba gɔ, lɛ vɛ, lɛ be kpo a Dia Sakoe kɛ nɛ kɔ̃a zi gɛnɛ nɛ ni.

Ofionɔ wa za'da sɛ nza kɔ fio

¹² Ɔ nɛ kɛ lɛ tɔ̃a na, Kristo za'da nza kɔ fio ni, nɛ gulu kɛ ombe winɔ sanga nɛ ni wa tɔ̃ 'bɔ na, ofionɔ wa zá'dá sɛ gɔ ni we ge nde?

¹³ Ma ɔ do gbãlã we na, ofionɔ wa zá'dá nza kɔ fio gɔ, nɛ nde Kristo zà'dà tɛ mɛ 'bɔ gɔ.

¹⁴ Kɔ fala Kristo zà'dà zi nza kɔ fio gɔ, nɛ nde wenɔ lɛ be ni, ma sɔ do gulu nɛ bina, nɛ kɔ̃a we 'da nɛ sɔ 'bɔ do gulu nɛ bina.

¹⁵ Nɛ lɛ sɔ a wi be we 'da Gale do bɛlɛ, we kɛ lɛ 'bili bɛlɛ dɛ ngɔ a na, a tunu Kristo kɔ fio ni. Ma ɔ do gbãlã we na, ofionɔ wa túnú kɔ fio gɔ, nɛ nde Kristo tùnù tɛ mɛ 'bɔ gɔ.

¹⁶ Mba gɔ, fala kɛ ofionɔ wa túnú kɔ fio gɔ, nɛ nde Kristo tùnù zi tɛ mɛ 'bɔ gɔ.

¹⁷ Kɔ fala Kristo tùnù kɔ fio gɔ, nɛ nde kɔ̃a we 'da nɛ sɔ do gulu nɛ bina, nɛ nɛ 'bana sɔ do 'dã mɛnɔ 'da nɛ fai.

¹⁸ Nɛ ki ni ma be na, Owi kɔ̃a wenɔ vɛ kɛ wa fia ia ni, wa fia fai.

¹⁹ Kɔ fala kɛ lɛ gbini zã lɛ do Yezu we kpa dia mɛnɔ ngɔ nùi gɛ iko nde, nɛ nde lɛ nɛa ngɔ winɔ vɛ̃ do 'bako.

²⁰ Nɛ nde ĩ na, Gale tunu zi Kristo kɔ fio gbãlã we. Kristo a kuti wi kɛ a tunu kɔ fio, nɛ ma be na, owinɔ vɛ wa fia ni, Gale a tunu sɛ wa kɔ fio.

²¹ Mba gɔ, ɔ nɛ kɛ fio lia zɛ́ ngɔ nù gɛ we wele kpo ni, ofionɔ wa tunu sɛ tɛ 'bɔ kɔ fio we wele kpo.

²² Nɛ ɔ nɛ kɛ winɔ vɛ wa fe, we kɛ wa a nu fɛlɛ Adamu ni, ma tɛ mɛ 'bɔ na mɛ ni, winɔ vɛ wa tunu sɛ kɔ fio, we kɛ wa mba kpo do Kristo.

²³ Nɛ nde wele do wele a tunu sɛ do ngba soe 'da a. Kristo a kuti wi kɛ a tunu zi ni, nɛ dɛ 'do a, owinɔ 'da a wa tunu sɛ do ngba soe a tɛ sɛ nɛ ni.

²⁴ Nɛ do 'do mɛnɔ vɛ, nɛ ndɔti nùi ma hɔ sɛ. Do 'da fala ni, nɛ Kristo a 'danga sɛ ngawi, do dɛa to nwanɔ, do dɔ̃lɔ̃ linɔ nyanga nza gɛ vɛ, nɛ a gese sɛ to nwa hã Gale Baa.

²⁵ Mba gɔ, ma wia na, Kristo dungu nwa gbaa na, Gale nɛ ngɔ Owi sɛnɛ a, kɔ a a wa vɛ ti tambala nyanga Kristo sɛ nɛ de.

²⁶ Nɛ ndɔti wi sɛnɛ wi kɛ Gale nɛ kumu sɛ a ni, wi sɛ a fio.

²⁷ Ma ɔ nɛ kɛ 'Buki 'da Gale tɔ̃a na: “Gale a zi mɛnɔ vɛ ti nyanga Kristo” ni. Nɛ nde ĩ na, “mɛnɔ vɛ” kɛ wa sa li nɛ kɔ 'Buki ni, fo Gale kɔ nɛ bina, we kɛ wi a a hã a a sɛ mɛnɔ ni ti nyanga Kristo.

²⁸ Ko 'da fala kɛ Gale a a sɛ mɛnɔ vɛ ti nyanga Kristo ni, nɛ Kristo, Be 'da Gale a e sɛ tɛ a do ti Baa a Gale, kɛ a ia a do nwa ngɔ mɛnɔ vɛ ni. Na mɛ ni, nɛ mɛnɔ vɛ sɛ dɛ ti Gale zu a kpo.

²⁹ Kɔ fala kɛ ma ɔ sɔ do gbãlã we na, ofionɔ wa túnú sɛ kɔ fio gɔ, nɛ gulu kɛ mbe winɔ wa kpa batisimɔ olo li wanɔ wa fia ni we ge nde? Fala kɛ wa túnú gɔ, nɛ batisimɔ ni ma gala sɛ wa nde?

³⁰ Nɛ gulu kɛ lɛ ngboo ni, lɛ hã tɛ lɛ, nɛ lɛ hɔ fɛna fio tũ kpo kpo ni we ge nde?

³¹ Gbãlã we, onyae, tũ kpo kpo, nɛ mi hɔ fɛna fio. Mi tɔ̃ ma hã nɛ, we kɛ mi dɔnggɔ tɛ mi do nɛ, kɛ lɛ mba do nɛ dɛ kɔ Nwa 'da lɛ Yezu Kristo ni.

³² Tɛ Efɛzɛ nga, mi tɛ bi bolo ɔ nɛ kɛ mi bi do osa'de zamɔ ni. Kɔ fala kɛ mi bi sɔ bole ni we lengge do mɛnɔ nù gɛ iko, nɛ mɛ mi nɛ kpa sɔ oto nɛ ni a ge nde? Fala kɛ ofionɔ wa túnú gɔ gbãlã we, nɛ ma wia na, lɛ dɛ mɔ tɛ lɛ ɔ nɛ kɛ winɔ wa tɔ̃ na: “Lɛ nyɔ́ngɔ́ mɔ, nɛ lɛ nɔ́ dɔ̃, we kɛ bindɛ nɛ lɛ fe sɛ” ni.

³³ Kɔ dɔ nɛ ɔ́lɔ́ tɛ nɛ gɔ. Mba gɔ, wa tɔ̃a na: “Mɔ ba 'bia do wi dɛ 'dã mɔ, nɛ mɔ hɔ sɛ a.”

³⁴ Nɛ 'dáfá linggamɛ 'da nɛ dɛ oto nɛ, nɛ nɛ tɛ dɛ̀ 'bɔ 'dã mɔ gɔ. Mba gɔ, ombe sanga nɛ ni wa tɛ ĩ̀ ti Gale gɔ, nɛ mi tɔ̃ we gɛ we hã sape hã nɛ.

Kili tɛ wi kɛ a tunu kɔ fio ni

³⁵ Ombe winɔ wa aka na: “Ofionɔ wa za'da sɛ tɛlɛ tɛ nɛ nɛ nde? Nɛ kili tɛ wa ma ɔ sɛ nɛ nde?”

³⁶ Owinɔ wa aka we ní ni, fo gbãlã zã wa bina. Mɔ ĩ na, wele mi kpalɛ, kɔ gbãlã kpalɛ a mi ni fè ti nù i, kɔ ndɔkɔ nɛ hɔ gɔ, nɛ nde ma wé sɛ tɛ ko mbé kpalɛ gɔ.

³⁷ Nɛ mɛ mɔ mi ni, mɛ a gbãlã kpalɛ iko. Mɔ mi a gbãlã kɔni, tabi gele gbãlã kpalɛ, nɛ nde mɔ mì kili tɛ te kpalɛ, kɛ ma hɔ sɛ ni gɔ.

³⁸ Nɛ Gale dɛ na, kpalɛ ni hɔ, nɛ ma gã. Nɛ kpalɛ kpo kpo do tɛlɛ tɛ̃ ɛ, ɔ nɛ kɛ zã Gale kɔ̃a ni.

³⁹ Tunu li mɛnɔ vɛ wa wè kɔ̃ gɔ, wa tɛ ɛ do tɛ̃ ɛ. Kili tɛ wele wè kɔ̃ do kɛ 'da osa'denɔ, tabi onɔɛnɔ, tabi okɔyɔnɔ gɔ.

⁴⁰ Ombe mɛnɔ ma do li nza i, nɛ ombe nɛ dɛ ngɔ nù gɛ. Tɛlɛ tɛ kɛ mɛnɔ li nza i ndele ni, ma si tɛ̃ ɛ do kɛnɔ nù nga gɛ.

⁴¹ Wese to si tɛ̃ ɛ, nɛ zɛkɛ to si tɛ ɛ, nɛ sɔlanɔ tɛ mɛ 'bɔ wa to si tɛ ɛ. Sɔla kpo to we kɔ̃ do ngbɛ ɛ gɔ.

⁴² We 'da ofionɔ kɛ wa tunu sɛ kɔ fio ni, ma ɔ tɛ mɛ 'bɔ na mɛ ni. Kili tɛ wi kɛ wa mi ma ni, ma ɔ nɛ gbãlã kpalɛ kɛ wa mi, nɛ ma fe ni. Nɛ nde kili tɛ wi kɛ Gale a tunu sɛ ma kɔ fio ni, ma fé sɛ 'bɔ gɔ.

⁴³ Kili tɛ wi kɛ wa mi ma ni, mɛ a 'dã mɔ iko, nɛ ma do ngawi bina. Kɔ ma za'da nza kɔ fio, nɛ ma kifi de mɔ, nɛ ma do ngawi wena.

⁴⁴ Kili tɛ wi kɛ wa mi ma ni, mɛ a nù iko. Kɔ ma za'da nza kɔ fio, nɛ ma kifi kili tɛ wi kɔ le 'da Gale. Kɔ nɛ́ kɛ kili tɛ wi nùi boe ni, ma wia na kili tɛ wi kɔ le 'da Gale ɔ tɛ mɛ 'bɔ boe.

⁴⁵ Kɔ we duzu ki ni, 'Buki 'da Gale tɔ̃a na: “Kuti wi kɛ Gale dɛa zɛ́ a ni, wi a Adamu. A dɛa a do kili tɛ wi nù, nɛ a ufu bũ kpasi dɛ kɔ a.” Nɛ nde mbé Adamu, wi a Kristo. A a Hi Wi kɛ a hã kpasi hã Owele.

⁴⁶ Kili tɛ wi kɛ ma do kpasi 'da Hi Wi ni, ma hɔ̀ dati gɔ, nɛ nde mɛ hɔa dati a kili tɛ wi nùi, sɛ a kili tɛ wi kɛ ma do kpasi 'da Hi Wi ni hɔ de.

⁴⁷ Kuti Adamu kɛ Gale dɛa zɛ́ a ni, a dɛa a do nù, nɛ a a wi ngɔ nù gɛ. Nɛ nde bɔa Adamu yula 'da Gale tɛ li nza i.

⁴⁸ Owinɔ ngɔ nù gɛ wa wia kɔ̃ do Adamu kɛ Gale dɛa zi a do nùi ni. Nɛ wanɔ li nza i ni, wa wia kɔ̃ do wele kɛ a yula li nza i ni.

⁴⁹ Kɔ nɛ́ kɛ lɛ wia kɔ̃ do wele kɛ a yula tɛ nùi ni, lɛ we sɛ tɛ mɛ 'bɔ kɔ̃ do wele kɛ a yula li nza i ni.

⁵⁰ Onyae, mi tɔ̃ hã nɛ na, owinɔ nù gɛ wa do kili tɛ wa do tɔkɔ tɛ wa boe, nɛ wa wè tɛ kpa fala kɔ le nwa 'da Gale gɔ. Kili tɛ wi kɛ ma fe fia ni, ma wè tɛ ɔ do kpasi kɛ ma é sɛ gɔ ni gɔ.

⁵¹ Mi nɛ tɔ̃ usu we hã nɛ! Lɛ winɔ lɛ fé sɛ vɛ̃ gɔ, nɛ nde kili tɛ lɛ ma kifi sɛ.

⁵² Ma hɔ ndɔti nùi, nɛ mɔtũlũ ma wele sɛ, nɛ ma dɛ sɛ lɛ ɔ nɛ gbini li ni, nɛ ofionɔ wa za'da sɛ nza kɔ fio do ti. Nɛ kili tɛ wa kɛ ma mbu mbulu ni, ma kifi sɛ kili tɛ wi kɛ ma mbúlú gɔ ni.

⁵³ Mba gɔ, ma wia na kili tɛ wi kɛ ma mbu mbulu ni, ma hɔ kili tɛ wi kɛ ma wè tɛ mbulu nɛ gɔ ni. Nɛ kili tɛ wi kɛ ma fe fia ni, ma hɔ kili tɛ wi kɛ ma wè tɛ fe nɛ gɔ ni.

⁵⁴ 'Da fala mɛnɔ ni dɛ tɛ̃ ɛ, nɛ nde we wa kɔma kɔ 'Buki 'da Gale ni dɛa gbãlã we. 'Buki tɔ̃a na: “Ngawi 'da Gale nɛa ngɔ ngawi 'da fio, nɛ a futu fio.”

⁵⁵ “Aa fio, ngawi kɛ mɔ nɛ do ngɔ winɔ ni 'bɔ a do nde? Aa fio, mɛ mɔ gbɛ do winɔ ni 'bɔ a do nde?”

⁵⁶ Mɛ ma hã ngawi hã fio we gbɛ Owele, mɛ a 'dã mɛ winɔ wa dɛ ni. Nɛ mɛ ma hã ngawi hã 'dã mɔ, mɛ a mbula.

⁵⁷ Nɛ nde lɛ dɔ́nggɔ́ Gale, a dɛa na, lɛ nganda nɛ ngɔ fio do wala 'da Nwa 'da lɛ Yezu Kristo.

⁵⁸ Na mɛ ni, onyae kɛ nɛ ngɔ sila mi ni, nɛ yóló nganda, dɔ kɔ̃a we 'da nɛ yáká gɔ. Nɛ hã́ tɛ nɛ we dɛa toe 'da Nwa Yezu 'da fala fai, we kɛ nɛ ĩ na, dɛa toe kɛ nɛ dɛ do zu li a ni, ma yala iko gɔ.