1 KORINTƐ 14 - WE NU GALE 1995

Mbe gele wenɔ ngɔ ngawinɔ kɛ Hi Wi Santo ha ma

¹ Na mɛ ni, nɛ fá dati na, nɛ kɔ̃ gɛnɛ ngba nɛ. Nɛ nɛ dɛ́ 'bɔ nganda we kpa ngawinɔ kɛ Hi Wi hã ma hã wele we dɛ do to ni. Nɛ fá ngboo a ngawi gba olo nu Gale.

² Wi kɛ a tɔ̃ ogele nu kpi do kpi ni, a wélé we hã owinɔ gɔ, a wele hã Gale, we kɛ fo wi zele gulu we a tɔ̃ ni bina. Wenɔ a tɔ̃ do wala 'da Hi Wi Santo ni, mɛ a usu wenɔ 'da Gale.

³ Nɛ nde wi kɛ a gba olo nu Gale ni, a gba ma hã owele. Nɛ wenɔ a tɔ̃ ni, ma gã 'da kɔ̃a we 'da owinɔ, nɛ ma kpãlã sila wa, nɛ ma mbɔkɔ zã wa.

⁴ Wi tɔ̃ ogele nu gã 'da kɔ̃a we 'da a wele nɛ iko, nɛ nde wi gba olo nu Gale gã 'da kɔ̃a we 'da owi Kristonɔ, kɛ wa mba li ngba wa ni vɛ́.

⁵ Mi kɔ̃a na, nɛ vɛ nɛ kpa ngawi tɔ̃ ogele nu, nɛ nde mi kɔ̃a wena na, nɛ gba olo nu Gale. Mba gɔ, wi gba olo nu Gale nɛa ngɔ wi kɛ a tɔ̃ ogele nu ni, fo tati a wele kɛ a tɔ̃ ogele nunɔ, nɛ a be gulu nɛ, nɛ ma gã 'da kɔ̃a we 'da Owi Kristonɔ vɛ ni.

⁶ Na mɛ ni, onyae, fala kɛ mi nɛ 'da nɛ, kɔ mi tɔ̃ tati a ogele nu kɛ nɛ ĩ̀ ti nɛ gɔ ni, nɛ ma gala sɛ nɛ nde? Ma dia fè na, mi tɔ̃ we mɛ kɛ Gale bia ma hã mi ni hã nɛ, tabi mi dɛ mɔ kɛ ma fĩ hã zã nɛ, tabi mi gba olo nu Gale hã nɛ, tabi mi be we hã nɛ.

⁷ Ma ɔ kpasaa nɛ kundu tabi kembe, kɛ wa zɛ do zuma ni. Fala kɛ wa 'dàfà wala gɛlɛ nɛ de gɔ, nɛ owinɔ wa nɛ dɛ do ĩ ti wala gɛlɛ zuma kɛ wa zɛ ni nɛ nde?

⁸ Tabi fala kɛ wa dàmà mɔtũlũ do li zuma nɛ gɔ, nɛ osodanɔ wa 'dafa sɛ tɛ wa we nɛ bolo nde?

⁹ Ma tɛ mɛ 'bɔ na mɛ ni, fala kɛ nɛ be we hã winɔ do lɛnggɛ kɛ wa zélé gɔ ni, nɛ wa nɛ dɛ fala ĩ gulu nɛ nɛ nde? Ki ni, mɛ a da nu wi zamɔ iko.

¹⁰ Ngɔ gili lɛnggɛ nu winɔ ngɔ nù gɛ dɛlɛ wena, nɛ gulu lɛnggɛ kpo kpo boe.

¹¹ Hã fala kɛ wele wele we hã mi, kɔ mi ĩ̀ ti lɛnggɛ nu wi ni gɔ, nɛ a ɔ sɛ nɛ gele wi ni we mi, nɛ mi ɔ sɛ tɛ mɛ 'bɔ nɛ gele wi ni we a.

¹² Na mɛ ni, nɛ, owinɔ kɛ nɛ do wɔ we kpa ngawi dɛ to kɛ Hi Wi Santo hã ma ni, nɛ fá dati we kpa kɛ ma gã 'da kɔ̃a we 'da Owi Kristonɔ ni.

¹³ We duzu ma, ma wia na, wi kɛ a kpa ngawi wele ogele nu nde, nɛ a aka Gale na, a hã 'bɔ ngawi hã ɛ we tɔ̃ gulu nɛ hã winɔ.

¹⁴ Mba gɔ, fala kɛ mi sambala Gale do gele nu, nɛ hi mi dɔnggɔ a kpaa, nɛ nde linggamɔ zu mi dɛ́ mɔ gɔ.

¹⁵ Kɔ ma wia na mi dɛ nɛ nde? Ma dia fè na, hi mi dɔnggɔ Gale, nɛ linggamɔ zu mi dɔnggɔ 'bɔ a. Hi mi ga zuma, nɛ linggamɔ zu mi ga 'bɔ.

¹⁶ Fala kɛ mɔ sambala do hi mɔ, nɛ mɔ tɔ̃ gele nu we hã iɔ̃nae hã Gale, nɛ wi kɛ a zele wenɔ mɔ tɔ̃ ni do zala a iko, nɛ nde a ĩ̀ ti gulu nɛ gɔ ni, a nɛ dɛ fala kɔ̃ nu sambala 'da mɔ na amɛ ni nɛ nde?

¹⁷ Gɛnɛ kɔ mɔ dɔnggɔ Gale de wena, nɛ nde ma gá sɛ 'da kɔ̃a we 'da wi ni gɔ.

¹⁸ Mi hã iɔ̃nae hã Gale, mba gɔ, a hã ngawi tɔ̃ ogele nu hã mi, nɛ mi ĩ ti tɔ̃ ma nɛa ngɔ nɛ vɛ́.

¹⁹ Nɛ nde 'da fala kɛ Owi Kristonɔ wa mba li ngba wa ni, nɛ mi be we hã wa do lɛnggɛnɔ mɔlɔ kɛ wa zele gulu nɛ zila ni, nɛ ki ni dia tɛ mi nɛa ngɔ tɔ̃ gele nu koto do koto, kɛ wa zélé gulu nɛ gɔ ni.

²⁰ Onyae, nɛ tɛ lènggè mɔ ɔ nɛ obe ni gɔ. Ma ɔ do 'dã mɔ, nɛ nɛ dɛ mɔ tɛ nɛ ɔ nɛ obe, kɛ wa tɛ ĩ̀ ti 'dã mɔ gɔ ni. Kɔ nɛ ɔ́ do linggamɔ mɔ́ okpasa wi.

²¹ Wa kɔma kɔ 'Buki 'da Gale na: “Nwa tɔ̃a na: ‘Mi tombo sɛ ogele wi, nɛ wa tɔ̃ toe 'da mi hã owinɔ 'da mi do gele nu. Gɛnɛ kɔ mi dɛ ní, nɛ nde winɔ 'da mi wa kɔ̃́ sɛ gɛnɛ we nu mi gɔ.’ ”

²² Na mɛ ni, ngawi tɔ̃ gele nu, ma be mɔ hã owinɔ kɛ wa kɔ̃̀ zu li Gale gɔ ni, nɛ nde ma bé mɔ hã Owi kɔ̃a wenɔ gɔ. Nɛ ngawi gba olo nu Gale, ma be mɔ hã Owi kɔ̃a wenɔ, nɛ nde ma bé mɔ hã winɔ wa kɔ̃̀ zu li Gale gɔ ni gɔ.

²³ Lɛ ba na, nɛ Owi Kristonɔ vɛ, nɛ mba li ngba nɛ, nɛ nɛ ma ngɔ tɔ̃ gele nu, kɛ fo wi zele gulu nɛ bina ni, nɛ mbe gele wele, tabi wi kɛ a tɛ kɔ̃̀ zu li Gale gɔ ni le, hã a zele we nɛ wele ni, nɛ a lénggé sɛ na, bɔ tia zu nɛ tia gɔ nde?

²⁴ Kɔ fala kɛ wi ni le, hã a kpa nɛ vɛ tɛ gba olo nu Gale, hã a zele bia wenɔ 'da nɛ ni, nɛ ma gba sɛ ta zu a ngɔ 'dã mɛnɔ 'da a. Nɛ wenɔ a zele ni, ma 'bili sɛ ngbangga 'da a.

²⁵ Nɛ usu wenɔ kɔ sila a ni ma be sɛ tɛ ɛ dɛ nza. Kɔ a ĩ ti ma, nɛ a gu sɛ nù dati Gale we dɔnggɔ a, nɛ a tɔ̃ sɛ na: “Gbãlã we, Gale sanga winɔ gɛ boe!”

Tɛlɛ tɛ 'dafa mba li ngba wi we dɔnggɔ Gale

²⁶ Kɔ onyae, mi nɛ tɔ̃ hã nɛ na ge nde? 'Da fala nɛ mba li ngba nɛ we dɔnggɔ Gale, nɛ wele do wele dɛ toe 'da ɛ. Mbe ga zuma, nɛ mbe be we, nɛ mbe tɔ̃ we mɛ kɛ Gale bia hã a ni, nɛ mbe sambala Gale do gele nu, nɛ mbe tɔ̃ gulu gele nui ni. Nɛ ma wia na, wa dɛ mɛnɔ ni vɛ, we gã 'da kɔ̃a we 'da Owi Kristonɔ.

²⁷ Kɔ fala kɛ ombe winɔ wa tɔ̃ gele nu do ngawi 'da Hi Wi Santo nde, nɛ ma wia na, wa ɔ bɔa tabi talɛ iko, nɛ wa wele we dɛ 'do ngba wa. Nɛ ma wia 'bɔ na, mbé gele wele tɔ̃ gulu we kɛ winɔ ni wa wele ni.

²⁸ Kɔ fala kɛ fo wi tɔ̃ gulu nɛ bina nde, nɛ ma wia na, wi ni kpe nu ɛ, nɛ a wele we hã Gale do kɔ sila a iko.

²⁹ Nɛ wanɔ wa kpa ngawi gba olo nu Gale ni, ma wia na wele bɔa tabi talɛ wa wele we, nɛ Owi Kristonɔ wa zele, nɛ wa gɔnɔ sanga nɛ, tabi ma yula 'da Gale nde.

³⁰ Kɔ fala kɛ Gale be usu mɔ hã mbe wele kpo kɔ mba li ngba wi ni na, a tɔ̃ ma hã winɔ nde, nɛ ma wia na, wi wele sɔ we dati ni hã fala hã mbé wele ki ni, takɔ a wele we hã winɔ.

³¹ Mba gɔ, nɛ vɛ nɛ wia we gba do nu Gale. Nɛ ma wia na, wele do wele tɔ̃ we do 'da fala wa hã wila we hã a ni, takɔ winɔ wa kpa hã zã, nɛ tɛ wa nganda.

³² Ma wia na, ngawi gba oto nu Gale 'bana ti mbula 'da wi gba oto nu Gale.

³³ Mba gɔ, Gale kɔ̃̀ vĩ zu dɛa mɔ gɔ, nɛ nde a kɔ̃a na, lɛ ɔ do dungu fio. Ɔ nɛ kɛ ma dɛ tɛ ɛ kɔ eklezia 'da Gale tɛ falanɔ vɛ ni,

³⁴ ma wia na, 'da fala mba li ngba wi, nɛ owukonɔ wa dungu fioo. We kɛ wa hã̀ wala hã wa na, wa wélé we gɔ. Nɛ ma wia na, wa ba tɛ wa dɛ nù, ɔ nɛ kɛ mbula 'da Mɔizɛ tɔ̃a nɛ ni.

³⁵ Kɔ wa kɔ̃ we aka we we ĩ gulu nɛ nde, nɛ wa aka wili wa do nu tɔa i. Mba gɔ, wuko wele we kɔ mba li ngba wi 'da eklezia, nɛ nde ma do sape wena.

³⁶ Nɛ lengge na we nu Gale ma yula 'da nɛ nde? Tabi wi zila ma tati a nɛ iko nde?

³⁷ Wi kɛ a lengge na, ɛ a wi gba oto nu Gale, tabi ɛ kpa ngawi 'da Hi Wi ni, nɛ a ĩ́ na, wenɔ mi kɔma hã nɛ gɛ, mɛ a mbula 'da Nwa.

³⁸ Kɔ wi kɛ a kɔ̃̀ gɛnɛ nɛ gɔ, nɛ nɛ tɛ zɔ̀ a ɔ nɛ wi gba oto nu Gale gɔ.

³⁹ Na mɛ ni, onyae, nɛ fá dati na, nɛ kpa ngawi gba oto nu Gale. Nɛ nɛ tɛ kpè wala hã wanɔ kɛ wa kpa ngawi tɔ̃ gele nu ni gɔ.

⁴⁰ Nɛ ma wia na, mɛnɔ vɛ́ dɛ tɛ ɛ do wala oto nɛ, do bɔlɔ nɛ.