1 KORINTƐ 13 - WE NU GALE 1995

Kɔ̃ ngba wi

¹ Ɔ do kɛ mi ĩ sɔ ti tɔ̃ lɛnggɛ nu owinɔ do anzɛnɔ vɛ, kɔ mi sɔ do kɔ̃a zã dɛ 'da ongba mi bina, nɛ nde wenɔ vɛ́ kɛ mi wele ni, ma ɔ nɛ manda, tabi biã kɛ ma wele ngbu ngbu ngbu, nɛ ma kpe zala wele iko ni.

² Ɔ do kɛ mi sɔ do ngawi gba olo nu Gale, hã mi ĩ sɔ ti mɛnɔ vɛ do usu wenɔ 'da Gale vɛ, tabi mi sɔ do kɔ̃a we dɛ 'da Gale wena, kɔ ma gala sɔ mi we ili kalanɔ dɛ gele fala, kɔ mi sɔ do kɔ̃a zã bina, nɛ nde mi sɔ a mɔ yala iko.

³ Ɔ do kɛ mi kɛ̃ sɔ mɛnɔ 'da mi vɛ hã owi sãnɔ, nɛ mi hã tɛ mi na, wa dɔ mi, kɔ mi sɔ do kɔ̃a zã bina, nɛ nde mi kpá sɔ mɔ olo nɛ gɔ.

⁴ Kɔ̃a zã dɛ na, wele ɔ do du sila, nɛ a ɔ wi dɛ na, nɛ a tɛ ɔ̀ do bɔnɛ kɔ sila a gɔ, nɛ a tɛ bà tɛ a dɛ ngɔ gɔ.

⁵ Kɔ̃a zã dɛ na, wele tɛ dɛ̀ mɔ kɛ ma hã sape hã a ni gɔ, nɛ a tɛ lènggè do kili tɛ a wele nɛ iko gɔ. Zã a tɛ nɔ̃̀lɔ̃̀ gɔ, nɛ a tɛ bà mãlã dɛ kɔ sila a gɔ.

⁶ Nɛ ma dɛ 'bɔ na, wele tɛ dɛ̀ yangga bɛlɛ dɛa mɔ gɔ, nɛ nde a dɛ yangga gbãlã we dɛa mɔ.

⁷ Kɔ̃a zã dɛ na, wele kunu sila ɛ kɔ mɛnɔ vɛ́, nɛ a tɛ ɔ̀ do kafi kɔ sila a we ongba a gɔ, nɛ a gbini zã a do wa, nɛ a ɔ do du sila dɛ 'da wa.

⁸ Kɔ̃a zã ma 'bana sɛ fai. Nɛ nde mbe ngba soe kpo, nɛ wele gbá sɛ 'bɔ olo nu Gale gɔ, fo sɛ wi tɔ̃ gele nunɔ bina, nɛ fo sɛ 'bɔ wi ĩ ti mɔ bina.

⁹ Mba gɔ, lɛ ĩ ti mɔ 'bana sanga iko, nɛ lɛ gbá olo nu Gale do olo tɛ nɛ vɛ gɔ.

¹⁰ Nɛ nde ngba soe kɛ mɛnɔ Gale 'dafa, nɛ ma wia ngboo ni, ma hɔ sɛ ni, nɛ kɛnɔ ma wia 'bana sanga ni, ma la sɛ.

¹¹ 'Da fala kɛ mi zi a be ni, mi tɔ̃ zi lɛnggɛ be, nɛ mi lengge zi mɔ ɔ nɛ be ni, nɛ gbãlã zã mi zi a gbãlã zã be. Kɔ mi nɛa we gã nɛ, nɛ mi la fala dɛa mɔ be.

¹² Na mɛ ni, sɔɛ gɛ, lɛ zɔ̀ mɛnɔ de ngboo gɔ, lɛ zɔ ɔ nɛ kɛ ma a li tala ni. Kɔ ngba soe ni, nɛ lɛ zɔ sɛ ma dɛ dati lɛ ngboo. Ngangga ni, mi ĩ̀ ti mɛnɔ ngboo gɔ, nɛ nde do ngba soe ni, nɛ mi ĩ sɛ ti ma ngboo, ɔ nɛ kɛ Gale ĩ do ti mi ni.

¹³ Nɛ nde mɛnɔ talɛ gɛ ma 'bana sɛ fai. Mɛ a kɔ̃a we dɛ 'da Gale, do gbini zã wi do mbuli 'da a, do kɔ̃ ngba wi. Nɛ nde kɔ̃ ngba wi ma nɛa ngɔ tala mɛnɔ ni vɛ.