1 KORINTƐ 12 - WE NU GALE 1995

Ngawinɔ kɛ Hi Wi Santo hã ma

¹ Onyae, mi kɔ̃a we tɔ̃ mbe we ngɔ ngawi kɛ Hi Wi Santo hã ma hã wele we dɛ do to ni, hã nɛ ĩ gulu nɛ.

² Nɛ ĩ na, 'da fala kɛ nɛ 'bana zi opaganɔ ni, nɛ sila nɛ zi tɛ ɔkɔlɔ nɛ fai we dɔnggɔ okpikimanɔ kɛ wa wélé we gɔ ni, nɛ nɛ wè zi tɛ kunu sila nɛ gɔ.

³ Kɔ mi tɔ̃ hã nɛ na, wi kɛ a wele we do ngawi 'da Hi Wi 'da Gale ni, a wè tɛ tɔ̃ na: “E kɔ Yezu kpa fɔmba” gɔ. Nɛ fala kɛ Hi Wi Santo hã̀ ngawi hã wele gɔ, nɛ nde a wè tɛ tɔ̃ na: “Yezu a Nwa” gɔ.

⁴ Ngɔ gili ngawinɔ kɛ Hi Wi Santo hã ma hã wele we dɛ do to ni, ma dɛlɛ wena, nɛ nde Hi Wi Santo kɛ a hã ma ni, a kpo iko.

⁵ Nɛ ngɔ gili dɛa tonɔ dɛlɛ wena, nɛ nde Nwa Gale kɛ lɛ dɛ toe hã a ni, a kpo iko.

⁶ Wala dɛ do to hã Gale ma dɛlɛ wena, nɛ nde Gale zu a kpo hã a 'dafa tonɔ ni vɛ dɛ kɔ wele do wele na, a dɛ ma.

⁷ Ngawi dɛa toe 'da wele do wele ma be na, Hi Wi Santo kɔ a boe, nɛ toe 'da a gala owinɔ vɛ̃.

⁸ Hi Wi hã ngawi hã ombe winɔ na, wa wele we do hã zã, nɛ a hã ngawi hã ombe na, wa ĩ ti mɔ.

⁹ Nɛ Hi Wi hã 'bɔ ngawi hã ombe na, wa ɔ do kɔ̃a we dɛ 'da Gale wena, nɛ a hã ngawi kpasa owi zɛlɛ hã ombe nɛ.

¹⁰ Nɛ kpo Hi Wi Santo ni hã 'bɔ ngawi dɛ gba sɔ̃ mɔ hã ombe, nɛ a hã ngawi gba olo nu Gale, tabi ngawi ĩ ti gɔnɔ sanga 'dã hi winɔ do ngbongbo Hi Wi 'da Gale hã ombe nɛ. Nɛ ombe wa kpa ngawi tɔ̃ gele nu kpi do kpi, nɛ a hã 'bɔ ngawi tɔ̃ gulu gele nui ni hã ombe nɛ.

¹¹ Nɛ nde mɛnɔ ni vɛ, wi a Hi Wi Santo zu a kpo ni hã a dɛ ma. Nɛ a hã ngawi hã wele do wele si tɛ ɛ, ɔ nɛ kɛ zã a kɔ̃a ni.

Kili tɛ wele kpo nɛ nde mɔ dɛlɛ tɛ̃ a wena

¹² Nɛ ĩ na, Kristo ɔ nɛ kili tɛ wele kpo ni. Kili tɛ wele kpo, nɛ nde mɔ dɛlɛ tɛ nɛ wena. Nɛ gɛnɛ kɔ mɔ dɛlɛ tɛ nɛ wena ni, nɛ nde kili tɛ wele ma 'bana fai kpo iko.

¹³ Mba gɔ, lɛ vɛ, obe Yuda, do ogele winɔ, ongbánɔ, do wele lenɔ, lɛ kpa zi batisimɔ dɛ kɔ Hi Wi Santo kpo, nɛ lɛ hɔa kili tɛ wele kpo, nɛ ngawi 'da Hi Wi ni ma lia lɛ, nɛ ma dunu kɔ lɛ vɛ.

¹⁴ Kili tɛ wele ma do mɔ tɛ nɛ kpo iko gɔ, nɛ nde mɔ dɛlɛ tɛ nɛ wena.

¹⁵ Fala kɛ nyanga wi tɔ̃ sɔ na, ɛ a kɔ̃ wi gɔ, ní a ɛ a mɔ tɛ kili tɛ wi gɔ, nɛ nde a fua tɛ a kɔ kili tɛ wi nde?

¹⁶ Tabi fala kɛ zala wi tɔ̃ sɔ na, ɛ a gbali wi gɔ, ní a ɛ a mɔ tɛ kili tɛ wi gɔ, nɛ nde a fua tɛ̃ a kɔ kili tɛ wi nde?

¹⁷ Fala kɛ kili tɛ wele sɔ tati a gbali wi iko, nɛ a dɛ sɔ fala zele we nɛ nde? Tabi fala kɛ ma sɔ tati a zala wi iko, nɛ a dɛ sɔ fala unu mɔ nɛ nde?

¹⁸ Ĩ na, Gale a ia mɛnɔ tɛ lɛ gɛ kpo do kpo dɛ fala olo nɛ, ɔ nɛ kɛ zã a kɔ̃a ni.

¹⁹ Kɔ fala kɛ ma ɔ sɔ vɛ a mbe mɔ kɔ kili tɛ wi kpo iko, nɛ kili tɛ wi sɔ a do nde?

²⁰ Ĩ na, mɔ dɛlɛ tɛ wele wena, nɛ nde kili tɛ wi kpo iko.

²¹ Kɔ we duzu ki ni, gbali wi wè tɛ tɔ̃ hã kɔ̃ wi na: “We mɔ́ mi tɛ mɔ bina” gɔ. Nɛ zu wi wè tɛ tɔ̃ hã nyanga wi na: “We mɔ́ mi tɛ mɔ bina” gɔ.

²² Nɛ nde mɛnɔ tɛ kili tɛ lɛ, kɛ lɛ zɔ ma ɔ nɛ ma mbɔkɔ wena ni, ma do gã gulu nɛ boe.

²³ Nɛ mɛnɔ tɛ kili tɛ lɛ, kɛ ma do dĩ ngboo bina ni, lɛ ba ma do dĩ wena. Nɛ mɛnɔ kɛ sape zɔ ma ba li wi ba ni, lɛ 'dafa fala nɛ wena.

²⁴ Nɛ nde kɛnɔ ma li lɛ a dia ni, lɛ 'dáfá fala nɛ ngboo gɔ. Mba gɔ, Gale dɛa kili tɛ wi do tɛlɛ tɛ kɛ na, mɔ tɛ nɛ kɛ ma do dɔ̃lɔ̃ li bina ni, ma kpa dɔ̃lɔ̃ li la li ngele.

²⁵ Na mɛ ni, mɛnɔ kɔ kili tɛ wele ma gɔ́nɔ́ sanga tɛ ngba ɛ gɔ, nɛ nde ma vɛ ma dɛ to hã ngba ɛ dɛa.

²⁶ Kɔ fala kɛ mbe mɔ tɛ wele kpa ngamɔ nde, nɛ tala kɛnɔ ni vɛ, ma kpa sɛ ngamɔ do ma fala nɛ kpo. Kɔ tabi mbe mɔ tɛ wele kpa dɔ̃lɔ̃ li nde, nɛ tala kɛnɔ ni vɛ, ma dɛ sɛ yangga do ma fala nɛ kpo.

²⁷ Nɛ vɛ̃, nɛ a kili tɛ Kristo. Nɛ wele do wele a mbe mɔ kɔ kili tɛ Kristo.

²⁸ Gale kɛa tonɔ kpi do kpi hã owinɔ kɔ Eklezia. A a Owi nɛ tonɔ 'da Yezu Kristo dati, nɛ tɛ bɔa nɛ, wi a owi gba olo nu Gale, nɛ tɛ talɛ nɛ, wi a owi be mɛnɔ. Nɛ 'do nɛ, nɛ wi a owi dɛ gba sɔ̃ mɛnɔ, nɛ 'do wa, wi a owinɔ kɛ wa do ngawi we kpasa Owi zɛlɛ, do wanɔ wa gala Owele, do wanɔ wa dungu nwa ngɔ ngba wa, do wanɔ wa tɔ̃ gele nunɔ kpi do kpi ni.

²⁹ Winɔ vɛ wa a wi nɛ to 'da Yezu Kristo, tabi wi gba olo nu Gale, tabi wi be mɔ gɔ. Ngawi dɛ gba sɔ̃ mɔ ma kpà zu winɔ vɛ gɔ.

³⁰ Nɛ winɔ vɛ wa kpà ngawi we kpasa owi zɛlɛ, tabi we tɔ̃ gele nu kpi do kpi, tabi we tɔ̃ gulu gele nu gɔ.

³¹ Kɔ kɛ 'da nɛ, ma wia na, wele do wele fa ngawi dɛ to kɛ Gale hã ma hã a, nɛ ma nɛa ngɔ ngbɛ ɛ ni. Nɛ nde mi nɛ be mɛ kɛ ma nɛa ngɔ mɛnɔ vɛ ni hã nɛ.