1 KORINTƐ 11 - WE NU GALE 1995

¹ Kɔ nɛ 'bã́ olo kɔ̃ mi, ɔ nɛ kɛ mi 'bã do olo kɔ̃ Kristo ni.

Ma wia na wuko kpo tulu ngɔ zu a 'da fala dɔnggɔ Gale

² Mi hã iɔ̃nae hã nɛ, we kɛ ta zu nɛ élé ngɔ mi gɔ, nɛ nɛ 'bana tɛ dɛ mɛnɔ kɛ mi bia zi hã nɛ ni.

³ Nɛ nde mi kɔ̃a na, nɛ ĩ do dia nɛ na, Kristo a Nwa ngɔ wi wilinɔ, nɛ wi wili a nwa ngɔ kɛnɛ a, nɛ Gale a Nwa ngɔ Kristo.

⁴ Kɔ fala kɛ wi wili kpo tulu ngɔ zu a, kɔ a ma ngɔ sambala Gale, tabi a gba olo nu Gale 'da fala mba li ngba wi, nɛ nde a hã sape hã Kristo kɛ a a nwa ngɔ a ni.

⁵ Kɔ fala kɛ wuko kpò tulu ngɔ zu a gɔ, kɔ a ma ngɔ sambala Gale, tabi a gba olo nu Gale 'da fala mba li ngba wi, nɛ nde a hã sape hã wili a kɛ a a nwa ngɔ a ni. A kpò tulu ngɔ zu a gɔ, nɛ nde a ɔ nɛ wuko kɛ wa kpula zu a do totoe ni.

⁶ Kɔ fala kɛ wuko kpò tulu ngɔ zu ɛ gɔ, nɛ ma wia na, a kɛlɛ zu a do bɔlɔ mili. Kɔ fala kɛ a dɛ sape kɛlɛ zu a, tabi kpolo zu a nde, nɛ ma wia na, a kpo tulu ngɔ zu a.

⁷ Wi wili wè tɛ kpo tulu ngɔ zu ɛ gɔ, we kɛ Gale dɛa a, nɛ a ɔ nɛ Gale ni, nɛ a be dɔ̃lɔ̃ li 'da Gale. Nɛ nde wuko be dɔ̃lɔ̃ li 'da wi wili.

⁸ Mba gɔ, wi wili yòlò tɛ wuko gɔ, nɛ nde Gale ba gbãlã tɛ wi wili, nɛ a dɛ do wuko.

⁹ Nɛ Gale dɛ̀ wi wili we wuko gɔ, nɛ nde a dɛa wuko we wi wili.

¹⁰ Na mɛ ni, ma wia na, wuko kpo tulu zu ɛ we duzu oanzɛnɔ, do we be hã owinɔ na, ɛ do ti wi wili.

¹¹ Nɛ nde kɔ dungi 'da lɛ do Kristo, lɛ ĩ na, wuko dungu we wili a, nɛ wi wili dungu we kɛnɛ a.

¹² Mba gɔ, ɔ nɛ kɛ wuko yula tɛ wi wili, nɛ wuko ko tɛ mɛ 'bɔ wi wili ni, wa bɔa nɛ, wa yula 'da Gale.

¹³ Kɔ nɛ do tɛ nɛ, nɛ gɔ́nɔ́ sanga we gɛ. Ma dia fɛ̃ na, wuko le kɔ mba li ngba wi we sambala Gale, nɛ a tɛ kpò tulu ngɔ zu a gɔ nde?

¹⁴ Gale dɛa Owele do tɛlɛ tɛ kɛ na, wi wili tɛ dàlà mili zu ɛ gɔ, we kɛ mɛ a sape we a.

¹⁵ Ĩ na, du mili zu wuko, ma hã dɔ̃lɔ̃ li hã a. Mba gɔ, Gale hã zɛ́ du mili hã wuko, takɔ ma gulu zu a vɛ.

¹⁶ Nɛ nde fala kɛ wele fa we ba kafi ngɔ we gɛ nde, nɛ a ĩ́ na, dɛa mɔ tɛ lɛ, mba do Owi kɔ eklezianɔ 'da Gale vɛ, mɛ a ki ni iko.

We ngɔ Nyɔngɔmɔ Santo 'da Nwa

¹⁷ Nɛ nde mi 'bɔ do mbé mbula we tɔ̃ hã nɛ boe, nɛ mi wè tɛ dɔnggɔ nɛ gɔ. Mba gɔ, mi zila na mba li ngba winɔ 'da nɛ ma dɛ́ de mɔ hã nɛ gɔ, nɛ nde ma 'danga nɛ 'danga.

¹⁸ Dati ngboo wa tɔ̃a hã mi na, 'da fala nɛ mba li ngba nɛ, nɛ nu nɛ wé kɔ̃ gɔ, nɛ nɛ gɔnɔ sanga tɛ ngba nɛ wena. Nɛ mi lengge na, mɛ a gbãlã we.

¹⁹ Gɔnɔ sanga tɛ ngba wi kɛ nɛ gɔnɔ ni, ma 'bɔ a dia, we kɛ ma gala lɛ we ĩ ti owinɔ kɛ wa a ngbongbo wi kɔ̃a we ni.

²⁰ Kɔ fala kɛ nɛ mba li ngba nɛ, nɛ nyɔngɔmɛ nɛ nyɔngɔ ni, mɛ 'bɔ a nyɔngɔmɛ 'da Nwa gɔ.

²¹ Mba gɔ, 'da fala nɛ dungu nù we nyɔngɔ mɛ ni, nɛ wele do wele wɛlɛ tɛ̃ ɛ, nɛ a ba nyɔngɔmɛ a tɛa nɛ ni, nɛ a nyɔngɔ. Na mɛ ni, ombe wa 'bana do wɔ, nɛ nde ombe nɛ wa tɛ te bá dɔ̃.

²² Ni a nɛ do tɔa 'da nɛ, takɔ nɛ nyɔngɔ mɔ, nɛ nɛ nɔ dɔ̃ kɔ nɛ bina nde? Tabi nɛ zɔ Eklezia 'da Gale li nɛ yala iko, nɛ nɛ kɔ̃a we hã sape hã owinɔ kɛ wa do kpamɔ bina ni nde? Kɔ mi nɛ tɔ̃ hã nɛ na ge nde? Nɛ kɔ̃a na, mi dɔnggɔ nɛ we ki ni nde? Gɔ, mi wè tɛ dɔnggɔ nɛ we nɛ gɔ.

²³ Wenɔ kɛ mi zila zi ma nu Nwa, nɛ mi bia hã nɛ ni, ma kɛ: Do tũi ni, dati na wa 'dɔlɔ Nwa Yezu, nɛ a ba zi mapa,

²⁴ nɛ a hã iɔ̃nae hã Gale, nɛ a gbini sanga nɛ, nɛ a na: “Kɛ gɛ a kili tɛ mi, kɛ mi 'dɔlɔ ma hã nɛ ni. Kɔ nɛ dɛ́ ni fai we lengge do mi.”

²⁵ Nɛ 'do nyɔngɔmɛ ni, nɛ a ba 'bɔ bila dɔ̃, nɛ a na: “Bila gɛ, mɛ a mbé Gba Tɔkɛ kɛ Gale a gba sɛ ma do tɔkɔ tɛ mi ni. Kɔ 'da falanɔ vɛ kɛ nɛ nɔ sɛ ma ni, nɛ nɛ lénggé do mi.”

²⁶ Ma kɛ 'da falanɔ vɛ̃ kɛ nɛ nyɔngɔ sɛ mapa, nɛ nɛ nɔ bila dɔ̃ɛ gɛ ni, nɛ nde nɛ tɛ tɔ̃ to fie 'da Nwa Yezu. Nɛ dɛ sɛ ni fai gbaa we 'bɔ 'da ngba soe a tɛ sɛ 'bɔ nɛ ni.

²⁷ Kɔ we duzu ma, wi kɛ a nyɔngɔ mapa 'da Nwa, tabi a nɔ dɔ̃ɛ 'da Nwa do wala kɛ ma dè gɔ ni, nɛ nde a dɛa 'dã mɔ, we kɛ a faka kili tɛ Nwa Yezu do tɔkɔ tɛ̃ a.

²⁸ Ma wia na, wele do wele lengge kɔ sila ɛ ngboo, sɛ nɛ a ĩ ti nyɔngɔ mapa, do nɔ dɔ̃ɛ ni de.

²⁹ Mba gɔ, wi kɛ a nyɔngɔ mapa, kɔ a nɔ dɔ̃ɛ ni iko, kɔ a lènggè na, mɛ a kili tɛ Nwa hã ɛ nyɔngɔ, nɛ tɔkɔ tɛ a hã ɛ nɔ ni gɔ, nɛ nde a fi té a wele nɛ ti ngbangga 'da Gale.

³⁰ Gulu kɛ tɛ ombe sanga nɛ tulu wena, nɛ ombe wa do zɛlɛ, nɛ ombe wa fia gɛ a ni.

³¹ Ɔ do kɛ lɛ lengge sɔ kɔ sila lɛ ngboo dati, nɛ nde we 'da Gale té sɔ zu lɛ gɔ.

³² Nɛ nde Nwa 'bili ngbangga 'da lɛ, nɛ a hã etumbu hã lɛ na, dɔ lɛ té li ngbangga do owinɔ nù gɛ fala nɛ kpo gɔ.

³³ Na mɛ ni, onyae, 'da fala nɛ mba li ngba nɛ we nyɔngɔmɛ 'da Nwa, nɛ ma wia na, nɛ 'bɔ 'da ngba nɛ.

³⁴ Kɔ wi kɛ a do wɔ, nɛ a nyɔngɔ mɔ nu tɔa 'da a i dati, da dɛ kɔ ngbangga 'da Gale té ngɔ nɛ 'da fala mba li ngba wi 'da nɛ gɔ. Tala gele wenɔ ma 'bana ni, mi 'dafa sɛ ma 'da fala mi hɔ sɛ 'da nɛ i ni.