1 KORINTƐ 10 - WE NU GALE 1995

Nɛ tɛ dɔ̀nggɔ̀ okpikimanɔ gɔ

¹ Onyae, mi kɔ̃a na, ta zu nɛ tɛ èlè ngɔ mɛ kɛ ma dɛa zi oyaa lɛ, 'da fala wa nɛ zi 'do Mɔizɛ ni gɔ. Gale tumba zi gba kutu we fɔmɔ wa vɛ, nɛ wa vɛ wa kũ zi gba lì Sala Tɔ̃ do lɔa tɛ wa.

² 'Da fala wa la do kɔ gba kuti, do 'dɔ gba lì Sala Tɔ̃ ni, ma ɔ zi nɛ batisimɔ, kɛ wa kpa ma, takɔ ma mba wa kpo do Mɔizɛ ni.

³ Nyɔngɔmɔ nu wa zi kpo, mɛ a nyɔngɔmɛ kɛ Gale hã ma hã wa ni.

⁴ Nɛ wa vɛ wa nɔ zi lì kpo, mɛ a lì kɛ Gale hã ma hã wa ni. Lì ni zi a lì kɔ ta kɛ Gale hã ma hã wa, nɛ ma kã zi wa falanɔ vɛ ni. Nɛ ta ni ma be Kristo.

⁵ Gɛnɛ kɔ Gale dɛa do wa na mɛ ni, nɛ nde dɛa mɔ tɛ ogba gili mbe sanga wa, ma dè zi tɛ̃ a gɔ, ma kɛ wa fia, nɛ wɔlɔ wa pɛsɛ do li gba zɔ̃ɛ ni.

⁶ Mɛnɔ ni dɛa zi tɛ ɛ we mbese lɛ na, da dɛ kɔ lɛ dɛ́ wɔ tɛ 'dã mɔ, ɔ nɛ kɛ oyaa lɛ wa dɛa zi ni gɔ.

⁷ Ma wè na, nɛ dɔnggɔ okpikimanɔ, ɔ nɛ kɛ ombe sanga wa wa dɔnggɔ zi ni gɔ. Ma ɔ nɛ kɛ wa kɔma kɔ 'Buki 'da Gale na: “Wa dungu nù, nɛ wa nyɔngɔ mɔ, nɛ wa nɔ dɔ̃, nɛ 'do nɛ, nɛ wa kulu ngɔ we dɛ yangga dati kpikima.”

⁸ Nɛ lɛ tɛ yɛ̀nggɛ̀ vĩ zu yali, ɔ nɛ kɛ ombe sanga wa wa yɛnggɛ zi ni gɔ. We duzu vĩ zu yali ni, ma kɛ Gale gbɛa zi ombe sanga wa 'bu koto bɔa ngɔ wa talɛ li wese kpo ni.

⁹ Nɛ lɛ tɛ yàmbà sila Nwa, ɔ nɛ kɛ ombe sanga wa wa yamba zi sila a, nɛ Ogɔ̃nɔ wa gɔmɔ wa, nɛ wa fe ni gɔ.

¹⁰ Nɛ lɛ tɛ lùngù we, ɔ nɛ kɛ ombe sanga wa wa lungu zi, nɛ anzɛ gbɛ wi gbɛa wa ni gɔ.

¹¹ Mɛnɔ ni ma dɛa zi oyaa lɛ, takɔ ma sɔ̃ li lɛ. Nɛ wa kɔma ma kɔ 'buku we gba ta zu lɛ, kɛ lɛ kɔla hɔ ndɔti nùi ia ni.

¹² Kɔ we duzu ma, wi kɛ a lengge na, ɛ yula do nyanga ɛ ni, nɛ li a sɔ̃, dɔ a té gɔ.

¹³ Mɛnɔ ma fa we ɔkɔlɔ sila nɛ gɛ, mɛ a kɛnɔ ma ɔkɔlɔ winɔ vɛ ni. Nɛ nde ta zu Gale élé ngɔ mbuli kɛ a kpua ma ni gɔ, nɛ a hã̀ sɛ wala hã Satana na, a ɔkɔlɔ nɛ, nɛ ma nɛ ngɔ ngawi 'da nɛ gɔ. Kɔ fala kɛ a ɔkɔlɔ nɛ nde, nɛ Gale a kpãlã sɛ sila nɛ na, nɛ bɛ ma, nɛ a dɛ sɛ na, nɛ hɔ nza kɔ nɛ.

¹⁴ We duzu ki ni, oyali ngba mi ngɔ sila mi gɛ, nɛ tɛ dɔnggɔ okpikimanɔ gɔ.

¹⁵ Mi tɔ̃ we gɛ hã nɛ, ɔ nɛ kɛ wa tɔ̃ do we hã Owi hã zã ni, kɔ nɛ do tɛ nɛ, nɛ fa kɔ nɛ.

¹⁶ Nɛ lénggé mbe sɛ! Fala kɛ lɛ hã iɔ̃nae hã Gale we bila dɔ̃ɛ, nɛ lɛ nɔ ma ni, nɛ nde ma mbá li lɛ vɛ kpo do tɔkɔ tɛ Kristo gɔ nde? Nɛ mapa kɛ lɛ gbini sanga nɛ hã ngba lɛ, nɛ lɛ nyɔngɔ ma ni, ma mbá li lɛ vɛ kpo do kili tɛ Kristo gɔ nde?

¹⁷ Nɛ́ kɛ lɛ nyɔngɔ mapa kpo ni, gɛnɛ kɔ lɛ dɛlɛ wena, nɛ nde lɛ vɛ lɛ hɔa kili tɛ wele kpo, we duzu mapa kpo ni.

¹⁸ Nɛ zɔ́ kɛ obe Israɛlɛ wa dɛ ni. 'Da fala wa dɔ sa'de ngɔ gbagala we dɔnggɔ do Gale, nɛ wa nyɔngɔ mbe sa'de ni, nɛ ma mba wa do Gale kɛ wa dɔ sa'de hã a ni.

¹⁹ Mi kɔ̃a we tɔ̃ na ge nde? Mi kɔ̃̀ we tɔ̃ na, kpikima, tabi sa'de kɛ wa dɔ we dɔnggɔ do kpikima ni, ma do gulu nɛ boe ni gɔ.

²⁰ Mi kɔ̃a we tɔ̃ na, osa'denɔ kɛ opaganɔ wa dɔ ni, wa dɔ́ ma we dɔnggɔ do Gale gɔ, nɛ nde wa dɔ ma we dɔnggɔ do o'dã hi wi. Nɛ mi kɔ na, nɛ mba li ngba nɛ do o'dã hi winɔ gɔ.

²¹ Nɛ wè tɛ nɔ dɔ̃ɛ 'da Nwa, nɛ nɛ nɔ 'bɔ kɛ 'da o'dã hi winɔ gɔ. Nɛ wè tɛ nyɔngɔ mɛ 'da Nwa, nɛ nɛ nyɔngɔ 'bɔ kɛ 'da o'dã hi winɔ gɔ.

²² Tabi lɛ kɔ̃a na, Nwa dɛ bɔnɛ nde? Nɛ lengge na, lɛ nganda nɛa ngɔ a nde?

Nɛ dɛ́ tati a mɛnɔ kɛ ma hã dɔ̃lɔ̃ li hã Gale ni

²³ Ombe wa tɔ̃ na: “Lɛ wia tɛ dɛ mɛnɔ vɛ.” Mɛ a gbãlã we, ĩ na, mɛnɔ vɛ mɛ a mɔ gala wele gɔ. Wa tɔ̃ na: “Lɛ wia tɛ dɛ mɛnɔ vɛ̃.” Nɛ nde mɛnɔ vɛ mɛ a mɔ gã 'da kɔ̃a we 'da winɔ gɔ.

²⁴ Ma wia na, wele do wele fa we gala ngba a, nɛ a tɛ fà dia mɛ 'da a wele nɛ gɔ.

²⁵ Nɛ wia tɛ nyɔngɔ sa'denɔ vɛ kɛ nɛ oso ngɔ zandonɔ ni, nɛ nɛ tɛ àkà gulu nɛ aka gɔ, dɔ ma yɛ́kɛ́ linggamɛ 'da nɛ gɔ.

²⁶ Mba gɔ, wa kɔma kɔ 'Buki 'da Gale na: “Nùi do mɛnɔ ngɔ nɛ gɛ vɛ, wele nɛ a mɔ́ Nwa.”

²⁷ Fala kɛ mbe paganɔ sa mɔ hã nɛ we nyɔngɔ mɔ, kɔ nɛ nɛ nde, nɛ nɛ nyɔ́ngɔ́ mɛnɔ vɛ kɛ wa hã sɛ ma hã nɛ ni, nɛ tɛ àkà gulu nɛ aka gɔ, dɔ ma yɛ́kɛ́ linggamɛ 'da nɛ gɔ.

²⁸ Kɔ fala kɛ mbe wele kpo tɔ̃ hã nɛ na: “Sa'de gɛ, wa gbɛa a we dɔnggɔ do okpikimanɔ” nde, nɛ nɛ tɛ nyɔ̀ngɔ̀ ma gɔ. Nɛ bé ma, we lengge do wi kɛ a mbisa nɛ ni, dɔ nɛ 'dángá linggamɛ 'da a gɔ.

²⁹ Mi sá li linggamɛ 'da nɛ gɔ, nɛ nde mi sa li linggamɛ 'da wi tɔ̃a we ni. Tabi wele aka na: “Gulu kɛ linggamɛ 'da gele wele kpe wala ti mi na, mi tɛ dɛ̀ mɛ kɛ zã mi kɔ̃a ni gɔ we ge nde?

³⁰ Gulu kɛ gele wele kɔ'dɔ mi ngɔ nyɔngɔmɔ kɛ mi hã iɔ̃nae hã Gale we nɛ, nɛ mi nyɔngɔ ni we ge nde?”

³¹ Na mɛ ni, fala kɛ nɛ nyɔngɔ mɔ, tabi nɛ nɔ dɔ̃, tabi nɛ dɛ ge nde, nɛ ma wia na, nɛ dɛ mɛnɔ ni vɛ̃ we hã dɔ̃lɔ̃ li hã Gale.

³² Nɛ dɛ́ mɔ tɛ nɛ do tɛlɛ tɛ kɛ na, nɛ tɛ ɔ̀ nɛ zugbulu te kɔ zu nyanga wele, we duzu be Yuda, tabi gele wi, tabi Eklezia 'da Gale gɔ.

³³ Nɛ ibã́ olo kɔ̃ mi! Mi dɛ nganda wena na, mɛnɔ vɛ mi dɛ ma ni, ma hã yangga hã winɔ vɛ. Mi fá dia mɔ we mi wele nɛ gɔ, nɛ nde mi fa ma we winɔ vɛ, takɔ wa kpasa.