1 KORINTƐ 1 - WE NU GALE 1995

¹ Wi a mi Polo, kɛ Gale sa zi mɔ hã mi do kɔ̃a zã 'da a, nɛ a ia mi do wi nɛ toe 'da Yezu Kristo ni. Mi do nya lɛ Sostɛnɛ,

² lɛ kɔma mbɛti gɛ hã nɛ owinɔ kɔ eklezia 'da Gale tɛ Korintɛ. Gale sa mɔ hã nɛ, nɛ nɛ mba li ngba nɛ do Yezu Kristo, nɛ nɛ hɔa winɔ 'da Gale, fala nɛ kpo do wanɔ wa tɛ dɔnggɔ zu li Nwa 'da lɛ Yezu Kristo tɛ falanɔ vɛ ni. Yezu Kristo a Nwa 'da wa, nɛ a tɛ mɛ 'bɔ a Nwa 'da lɛ.

³ E kɔ Baa lɛ Gale, do Nwa 'da lɛ Yezu Kristo, wa be dia zã 'da wa hã nɛ, nɛ wa dɛ na, nɛ ɔ do gɛa sila.

Kristo hã de mɔ hã lɛ

⁴ Mi hã iɔ̃nae hã Gale 'da fala fai we nɛ. Mi dɔnggɔ a we kɛ a bia dia zã 'da a hã nɛ do wala 'da Yezu Kristo ni.

⁵ Mba gɔ, nɛ mba kpo do Kristo, nɛ Gale hã ode mɔ kpi do kpi hã nɛ. A dɛa na, nɛ ĩ ti mɛnɔ vɛ́, nɛ a hã hã zã be we 'da a hã nɛ.

⁶ Nɛ we 'da Yezu kɛ wa bia hã nɛ ni, ma lia nɛ de wena,

⁷ nɛ nɛ zɔ̀lɔ̀ de mɛ kɛ Gale hã ma ni kpo gɔ. Nɛ ngangga ni, nɛ tɛ 'bɔ 'da tɛa 'da Nwa 'da lɛ Yezu Kristo.

⁸ Nɛ Gale a dɛ sɛ na, nɛ yolo nganda gbaa we hɔ tɛ ndɔti nɛ na, dɔ do ngba soe Nwa 'da lɛ Yezu Kristo a tɛ sɛ nɛ ni, nɛ nɛ kpá kɔ'da gɔ.

⁹ Gale, kɛ a dɛ olo nu a fai ni, a sa zi mɔ hã nɛ, nɛ a mba li nɛ do Be 'da a Yezu Kristo, Nwa 'da lɛ, nɛ nɛ hɔa wele kpo.

Owi Kristonɔ wa gɔna sanga tɛ ngba wa

¹⁰ Onyae, mi aka nɛ do zu li Nwa 'da lɛ Yezu Kristo na, we nu nɛ ɔ kpo, nɛ nɛ tɛ gɔ̀nɔ̀ sanga tɛ ngba nɛ gɔ. Nɛ mbá li ngba nɛ, nɛ nɛ ɔ́ do sila nɛ kpo do linggamɔ kpo.

¹¹ Mba gɔ, onyae, mbe owi nu fɛlɛ Kloe wa tɔ̃a hã mi na, nɛ gɔna sanga tɛ ngba nɛ.

¹² Nɛ gulu gɔnɔ sanga tɛ ngba wi ni ma kɛ: Wele do wele tɔ̃ na ɛ a wi 'da Polo, nɛ mbe na, ɛ a wi 'da Apolosi, nɛ mbe na, ɛ a wi 'da Petro, nɛ mbe 'bɔ na, ɛ a wi 'da Kristo.

¹³ Kɔ ní, nɛ nde Kristo kɛa wá sanga tɛ ɛ kɛa nde? Wi fia ngɔ finda te we duzu nɛ wi a Polo nde? Nɛ kpa batisimɔ do zu li Polo nde?

¹⁴ Mi hã iɔ̃nae hã Gale, we duzu kɛ mi hã̀ batisimɔ hã wele kpo sanga nɛ ni gɔ, mi hã tati nɛ hã Krispusi do Gayusi iko.

¹⁵ Na mɛ ni, wele kpo wé sɛ we tɔ̃ na, ɛ kpa zi batisimɔ do zu li mi gɔ.

¹⁶ (A! Ta zu mi gba, mi hã zi 'bɔ batisimɔ hã Owi nu fɛlɛ Stefanasi. Nɛ mi lengge na, mi hã̀ 'bɔ batisimɔ hã mbé gele wele gɔ.)

¹⁷ Mba gɔ, Kristo tòmbò zi mi we hã batisimɔ gɔ, nɛ nde a tumba mi we be Dia Sakoe 'da a. Nɛ mi bè zi ma do lɛnggɛ hã zã mɔ́ Owele gɔ na, dɔ fie 'da Kristo ngɔ finda te, ma ɔ́ li winɔ yala iko gɔ.

Yezu Kristo a ngawi, nɛ a a hã zã 'da Gale

¹⁸ Owinɔ wa ngɔ wala fio ni, wa zele sako fie 'da Yezu Kristo ngɔ finda te, nɛ ma ɔ zala wa nɛ wila we bɔ ni. Nɛ nde we lɛ winɔ kɛ lɛ ngɔ wala kpasi ni, lɛ zɔ ma ɔ nɛ ngawi 'da Gale ni.

¹⁹ Mba gɔ, wa kɔma kɔ 'Buki 'da Gale na: “Mi 'danga sɛ hã zã 'da owi hã zãnɔ, nɛ mi bi sɛ gbãlã zã owi ĩ ti mɛnɔ.”

²⁰ Kɔ ma ɔ na mɛ ni, nɛ owi hã zãnɔ, do owi be mbulanɔ, do owi yambala 'du gulu mɛnɔ ngɔ nù gɛ, wa a do nde? Gale bia na, hã zã 'da owinɔ nù gɛ mɛ a mɔ bɔ iko.

²¹ Mba gɔ, hã zã 'da Gale dɛa zi na, owinɔ wa tɛ ĩ̀ ti a do hã zã 'da wa wele nɛ gɔ. Ma kɛ a kɔ̃a zi na, ɛ kpasa owinɔ kɛ wa kɔ̃ zu li Yezu ni, do wala sakoe kɛ lɛ be ma, nɛ ma ɔ li winɔ nɛ wila we bɔɛ iko ni.

²² Oyudanɔ wa fa we zɔ ogba sɔ̃ mɔ, nɛ Ogrɛkɛnɔ wa fa hã zã.

²³ Nɛ nde lɛ, lɛ be kɛ 'da lɛ a sakoe 'da Yezu Kristo, kɛ wa bɛ̃lɛ̃ zi a ngɔ finda te ni. Oyudanɔ wa zele sakoe ni nɛ́ lɛnggɛ sape ni, nɛ ogele winɔ wa zele ma nɛ́ wila we bɔ ni.

²⁴ Nɛ we owinɔ kɛ Gale sa zi mɔ hã wa ni, Oyudanɔ, tabi ogele winɔ, nɛ nde ngawi 'da Gale, do hã zã 'da Gale wi a Yezu Kristo.

²⁵ Mba gɔ, mɛ kɛ ma yolo 'da Gale, nɛ ma ɔ li winɔ nɛ mɔ bɔ ni, ma nɛa ngɔ hã zã mɔ́ Owele. Nɛ mɔ kɛ Gale dɛa ma, nɛ ma a mbɔkɔ li winɔ ni, ma nganda nɛa ngɔ ngawi mɔ́ Owele.

²⁶ Onyae, nɛ lénggé sɛ! 'Da fala kɛ Gale sa zi mɔ hã nɛ ni, nɛ ɔ zi li winɔ nɛ nde? Wa zɔ zi na, Owi hã zã wa dɛ̀lɛ̀ sanga nɛ gɔ, nɛ ogã wi do obe zã wi dĩ wa dɛ̀lɛ̀ 'bɔ sanga nɛ gɔ.

²⁷ Nɛ nde Gale saka mɛ kɛ owinɔ wa zɔ li wa ɔ nɛ yia mɛ ni, takɔ ma hã sape hã owi hã zãnɔ. Nɛ a saka mɛ kɛ winɔ wa zɔ li wa na, ma a mbɔkɔ ni, takɔ ma hã sape hã owi ngawinɔ.

²⁸ Mɛnɔ kɛ owinɔ wa zɔ li wa nɛ́ mɔ yala, tabi yia mɔ kɛ ma do gulu nɛ bina ni, Gale saka ma we 'danga do mɛ kɛ winɔ wa ba ma do dĩ ni.

²⁹ Na mɛ ni, wele kpo ngɔ nù gɛ wè tɛ dɔnggɔ tɛ̃ ɛ dati Gale gɔ.

³⁰ Nɛ nde Gale mba li nɛ vɛ̃ fala nɛ kpo do Kristo, nɛ a bia hã zã 'da a hã lɛ do wala 'da Kristo. Nɛ do kpo wala 'da Kristo ni, Gale gɔnɔ zu lɛ, nɛ lɛ hɔa Owi bɔlɔ zu li a, nɛ lɛ hɔa 'bɔ winɔ 'da a.

³¹ Ma ɔ nɛ kɛ wa kɔma kɔ 'Buki 'da Gale na: “Wi kɛ a kɔ̃ we dɔnggɔ tɛ̃ a, nɛ a dɔnggɔ tɛ a do Nwa.”