1 Sakonɔ 9 - WE NU GALE 1995

Owinɔ kɔ le Yeruzalɛmɛ

¹ Wa kɔma zi li obe Israɛlɛ do 'da nu fɛlɛ kula 'da wa kɔ 'buki li nɛ a “Dɛa tonɔ 'da onwa ngɔ nù Israɛlɛ.” Owi ngɔ nù Yuda, wa la zi kɔlɔ 'duli tɛ ngɔ nù Babilonia i, we duzu kɛ wa bɛ̃a nu Gale.

² Owinɔ kɛ wa kpula zi tɛ wa dɛ kɔ lenɔ 'da wa nga dati ni zi a obe Israɛlɛ, kɛ wa zi a onganga gɔ ni. Nɛ 'do wa ni a onganganɔ, do olevitɛnɔ, do owinɔ kɛ wa dɛ tonɔ tɛ kɔ tɔa Tɛmpɛloe ni.

³ Nɛ ombe winɔ kɔ nu kpala Yuda, Bɛnzamɛ, Efraimɛ, do Manase, wa dɛa zi fala ɔi 'da wa tɛ Yeruzalɛmɛ ni.

⁴ Kɔ nu kpala Yuda, kpasa wi ngɔ nu fɛlɛ Perɛsi zi a Utai, be 'da Amihudɛ, be 'da Omri, kɛ a be yaa Imri, nɛ a 'bɔ a kaka Bani.

⁵ Nɛ kɔ nu fɛlɛ Sela, kpasa wi zi a Asaya, kuti be kɔ nu fɛlɛ kula, mba do obulu benɔ 'da a.

⁶ Nɛ kɔ nu fɛlɛ Zera, kpasa wi zi a Yeuɛlɛ. Oyuda kɛ wa ɔa zi kɔ le Yeruzalɛmɛ vɛ̃ ni, wa zi kama gazɛlɛ do 'bu wa kusi.

^7-8 Nɛ kɔ nu kpala Bɛnzamɛ wi a: Salu, be 'da Mɛsulamɛ, Salu a be yaa Hodavia, nɛ a 'bɔ a kaka Hasɛnua Ibneya, be 'da Yɛroamɛ Ela, be 'da Uzi, nɛ a 'bɔ a be yaa Mikri Mɛsulamɛ, be 'da Sɛfatia, Mɛsulamɛ a be yaa Reuɛlɛ, nɛ a 'bɔ a kaka Ibnia.

⁹ Owinɔ gɛ vɛ̃ zi a okpasa wi kɔ nu fɛlɛ kula 'da wa. Obɛnzamɛ vɛ̃ kɛ wa ɔa zi kɔ le Yeruzalɛmɛ ni, wa zi kama kusi do 'bu wa mɔlɔ ngɔ wa gazɛlɛ.

Onganganɔ kɔ le Yeruzalɛmɛ

^10-12 Onganganɔ wa ɔa zi tɛ Yeruzalɛmɛ i ni wi a: Yɛdaya, Yoyaribɛ, Yakinɛ Azaria, kɛ oyaa a zi a Hilkia, Mɛsulamɛ, Sadɔkɛ, Mɛrayɔtɛ do Ahitubɛ, kɛ a zi a gã wi ngɔ Tɛmpɛloe ni. Adaya, kɛ oyaa a zi a Yɛroamɛ, Pasɛhurɛ do Malkia Masai, kɛ oyaa a zi a Adiɛlɛ, Yazera, Mɛsulamɛ, Mɛsilemitɛ do Imɛrɛ.

¹³ Onganganɔ ni vɛ̃, kɛ wa okpasa wi kɔ nu fɛlɛ kulanɔ 'da wa ni, mba do ogele nganganɔ wa zi vɛ̃ koto kpo do kama sambo do 'bu wa gazɛlɛ. Nɛ wa vɛ̃, wa zi do dĩ, nɛ wa dɛ zi to kɔ Tɛmpɛloe.

Olevitɛnɔ kɔ le Yeruzalɛmɛ

^14-16 Olevitɛnɔ wa ɔa zi tɛ Yeruzalɛmɛ i ni wi a: Sɛmaya, kɛ oyaa a ngboo ni zi a Hasubɛ, Azrikamɛ do Hasabia, wi kɔ nu fɛlɛ Mɛrari Bakbakarɛ, Herɛsi, Galalɛ Matania, kɛ oyaa wa zi a Mika, Zikri do Asafɛ Obadia, kɛ oyaa zi a Sɛmaya, Galalɛ do Yɛdutunɛ Berekia, be 'da Asa, nɛ a 'bɔ a be yaa Ɛlkana, kɛ a ɔ zi tɛ ngɔ nùi 'da Owi kɔ le Nɛtofa ni.

Owi zɔ mɔ nu tɔa Tɛmpɛlo tɛ Yeruzalɛmɛ

¹⁷ Sanga owinɔ kɛ wa zɔ zi mɔ tɛ onu ngbo Tɛmpɛloe ni, wi zi a Salumɛ, kɛ a gã wi ngɔ ongba a ni, do onya a Akubɛ, Talmoni do Ahimanɛ.

¹⁸ Obe zã wa wa 'bana tɛ zɔ mɔ tɛ nu ngboe 'da nwa kɛ si 'biti gba wese ni tia do sɔɛ gɛ. Oyaa wa zi a Owi zɔ mɔ tɛ nu ngboe 'da olevitɛnɔ.

¹⁹ Salumɛ, be 'da Kore, nɛ a a be yaa Abiasafɛ, nɛ a 'bɔ a kaka Kore, mba do mbe owinɔ kɔ nu fɛlɛ kula 'da Kore, wa zi a owi zɔ mɔ tɛ nu ngbo kɛ ma le dɛ kɔ tɔa tande kpa ngba wi do Gale, ɔ nɛ kɛ oyaa wa wa dɛ zi ma tɛ fala ɔi 'da winɔ 'da NWA Gale ni.

²⁰ Pinahasi, be 'da Elazarɛ zi dati a gã wi ngɔ wa, we kɛ NWA zi fala nɛ kpo do a.

²¹ Zakaria, be 'da Mɛselemia zi tɛ mɛ 'bɔ a mbe kpo sanga owi zɔ mɔ tɛ nu ngbo kɛ ma le dɛ kɔ tɔa tande kpa ngba wi do Gale ni.

²² Owinɔ vɛ̃ kɛ wa saka zi wa we zɔ mɔ tɛ nu ongbo Tɛmpɛloe ni, wa zi Owele kama bɔa do 'bu ngɔ wa bɔa. Wa kɔma zi li owinɔ ni vɛ̃ kɔ mbɛti tɛ kɔ lenɔ 'da wa. Wi zi a nwa Davidi do Samuɛlɛ, wi gba olo nu Gale, hã wa hã zi toe kɛ ma do dĩ ni hã oyaa wa.

²³ Nɛ owinɔ ni do obe zã wa, wa dɛa zi to zɔ mɔ nu ongbo Tɛmpɛloe 'da NWA Gale dɛa fai.

²⁴ Owi zɔ mɔ tɛ nu ongbonɔ ni, wa yula zi tɛ falanɔ nalɛ gɛ: si 'biti gba wese, si ba gɔtɔ, si gbãlã ngɔ do si 'biti gɛ̃a wese.

²⁵ Ombe wi zɔ mɔ nu ongbonɔ, wa yolo zi do kɔ lenɔ 'da wa i, nɛ wa tɛ fai we dɛ toe fala nɛ kpo do wa 'do pɔsɔ kpo, sɛ nɛ wa si dɛ olo wa i de.

²⁶ Ĩ na, ogã wi ngɔ owi zɔ mɔ tɛ nu ngbonɔ nalɛ ni wa zi dɛ di ni boe fai. Wi zi a olevitɛnɔ kɛ wa zɔ mɔ tɛ otɔa fɔmɔ do mɔ olo gã golenɔ we dɛ do to kɔ tɔa Tɛmpɛloe ni.

²⁷ Wa ɔ zi nù do tũi dɛ kɛ zã tɔa Tɛmpɛloe, we kɛ ma wia zi na, wa zɔ mɔ tɛ ma, nɛ wa fí nu ngbonɔ titole kpo kpo.

²⁸ Ombe wi zɔ mɔ tɛ nu ngbonɔ, wa zɔ zi mɔ tɛ mɛnɔ wa dɛ do sambala ni. Toe 'da wa zi a kala mɛnɔ ni dɛ nza, do tɔlɔ ma 'da fala wa gese ma dɛ olo nɛ ni.

²⁹ Nɛ dɛa toe 'da ombe zi a zɔ mɔ tɛ tala omɛnɔ kɛ nganganɔ wa dɛa do toe, nɛ ma Santo ni, mba do fũ, do dɔ̃, do nɔ, do fũ yɔmbɔ, do nɔ yɔmbɔ.

³⁰ Na mɛ ni, dɛa to zanga fũ yɔmbɛ zi a kɛ 'da onganganɔ.

³¹ Mbe levitɛ kpo, li a a Matitia, kuti be 'da Salumɛ, wi kɔ nu fɛlɛ Kore, zi a wi dɛ mukate we hã do dɔnggamɛ.

³² Nɛ mbe olevitɛnɔ kɔ nu fɛlɛ Kehatɛ ni, wa a wa dɛ zi mapanɔ we dɔnggɔ do Gale do kɔ̃ tũ ɔmɔ tɛ wi kpo kpo.

³³ Okpasa wi kɔ nu fɛlɛ kula 'da olevitɛnɔ, kɛ wa zi a ogã wi ga Zumanɔ ni, wa ɔ zi tɛ kɔ tɔa kɛ zã tɔa Tɛmpɛloe. Nɛ wa dɛ́ zi 'bɔ ogele dɛa to gɔ, we kɛ wa dɛ zi toe 'da wa gba wese do tũ.

³⁴ Ki ni a okpasa winɔ kɔ nu fɛlɛ Levi do oyaa wa kɛ wa ɔ zi tɛ Yeruzalɛmɛ i gɛ hã ni.

Nu fɛlɛ kula 'da nwa Saulo

³⁵ Wi dɛa zi le Gabaoni a Yeiɛlɛ. Nɛ a ɔ zi kɔ le ni fala nɛ kpo do wuke 'da a Maka,

³⁶ do kuti bulu be 'da a Abdoni, do tala obulu benɔ 'da a gɛ: Surɛ, Kisi, Balɛ, Nɛrɛ, Nadabɛ,

³⁷ Gɛdɔrɛ, Ahio, Zakaria do Miklɔtɛ,

³⁸ baa Simamɛ. Tala owinɔ gɛ, wa ɔ zi kɛ 'da wa do Yeruzalɛmɛ fala nɛ kpo do ombe gele winɔ kɔ nu fɛlɛ wa ni.

³⁹ Nɛrɛ kua Kisi, nɛ Kisi ko Saulo, nɛ Saulo ko Yonatanɛ, Malkisua, Abinadabɛ, do Isɛbalɛ.

⁴⁰ Nɛ Yonatanɛ kua Mɛribalɛ, nɛ Mɛribalɛ ko Mika.

⁴¹ Nɛ Mika ko Pitoni, Melɛkɛ, Tarea do Ahazɛ.

⁴² Ahazɛ kua Yara, nɛ Yara ko Alemɛtɛ, Azmavɛtɛ do Zimri, nɛ Zimri ko Mosa.

⁴³ Mosa kua Binea, nɛ Binea ko Rɛfaya, nɛ Rɛfaya ko Elasa, nɛ Elasa ko Asɛlɛ.

⁴⁴ Nɛ Asɛlɛ kua obulu be gazɛlɛ: Azrikamɛ, Bokru, Ismaɛlɛ, Searia, Obadia do Hananɛ.