1 Sakonɔ 5 - WE NU GALE 1995

Obe zã Rubɛnɛ

^1-3 Rubɛnɛ zi a kuti be 'da Yakɔbɔ. Nɛ nde 'do kɛ a ɔa do mbe kpo sanga owukonɔ 'da baa a ni, nɛ wa fo zi nwa kpasa wi 'da a, nɛ wa hã ma hã Yozɛfu, kɛ a zi 'bɔ a be 'da Yakɔbɔ ni. Nɛ wa zɔ́ 'bɔ a ɔ nɛ kuti be gɔ ni. Gɛnɛ kɔ Yozɛfu ba nwa kpasa wi, nɛ nde Yuda zi a wi ngawi sanga onya a vɛ̃. Nɛ sanga obe zã a kpo hã a dungu zi nwa ngɔ nù Israɛlɛ. Nɛ nde wi wa hã zi nwa kpasa wi kɔ nu fɛlɛ kula hã a, wi a Yozɛfu. Rubɛnɛ kua zi Hanɔkɛ, Palu, Hɛsroni do Karmi.

⁴ Obe zã Yɔɛlɛ ngboo wi a Sɛmaya, Gɔgɛ, Simei,

⁵ Mika, Reaya, Balɛ,

⁶ do Bɛera. Nɛ Bɛera zi a kpasa wi kɔ nu fɛlɛ Rubɛnɛ, kɛ Teglatɛ-Falasarɛ, nwa ngɔ nù Asiri ba zi a, nɛ a la do a kɔlɔ 'duli ni.

⁷ Wa kɔma zi li onya Bɛera, kɛ wa zi a okpasa wi kɔ nu fɛlɛ kula 'da wa ni, dɛ kɔ mbɛti. Wi dati zi a Yeiɛlɛ, Zakaria,

⁸ do Bela, be 'da Azazɛ, kɛ a a be yaa Sema, nɛ a 'bɔ a kaka Yɔɛlɛ ni. Nɛ nu fɛlɛ Rubɛnɛ wa ɔ zi ngɔ nùi ngbala le Arɔɛrɛ si ba gɔtɔ, do kala Nebo do le Bala-Meoni si gbãlã ngɔ.

⁹ Nɛ wa ɔa zi 'bɔ yolo si 'biti gba wese gbaa we hɔ tɛ nu li gba zɔ̃ɛ kɛ ma gɔnɔ sanga nù 'da wa do lì Efratɛ, kɛ mɛ a gba lì ngɔ nù Babilonia ni, we kɛ wa zi do onadalamɔ tɛ ngɔ nù Galadɛ wena.

¹⁰ Nɛ do ngba soe 'da nwa Saulo, nɛ Orubɛnɛ wa bi zi bolo do Ohagri, nɛ wa e zi mbula ngɔ wa. 'Do ki ni, nɛ wa dɛa fala ɔinɔ 'da wa ngɔ nu Galadɛ si 'biti gba wese vɛ̃.

Obe zã Gadɛ

¹¹ Obe zã Gadɛ wa ɔa zi tɛ ngɔ nu Basanɛ, kɛ mɔ yolo ngɔ nù 'da Orubɛnɛ, nɛ nde ma si gbãlã ngɔ, nɛ ma nɛ gbaa we hɔ kɔ le Salka si 'biti gba wese.

¹² Nɛ tɛ ngɔ nùi ni, nu fɛlɛ Yɔɛlɛ kɛ a kuti be ni zi di ni boe, do kɛ 'da Safanɛ, be kɛ bɔa, do kɛ 'da Yanai, do Safatɛ.

¹³ Nɛ ogele nu fɛlɛ kula sambo zi 'bɔ di ni boe. Mɛ zi a nu fɛlɛ: Mikaɛlɛ, Mɛsulamɛ, Seba, Yorai, Yakanɛ, Zia do Ebɛrɛ.

¹⁴ Owi ndo nyanga nu fɛlɛ kulanɔ ni zi a obenɔ 'da Abihailɛ, kɛ oyaa a ngboo zi a Huri, Yaroa, Galadɛ, Mikaɛlɛ, Yɛsisai, Yado do Buzɛ.

¹⁵ Nɛ Ahi, be 'da Abdiɛlɛ, nɛ a 'bɔ a be yaa Guni ni, zi a kpasa wi kɔ nu fɛlɛ kulanɔ ni.

¹⁶ Obe zã Gadɛ wa ɔ zi ngɔ nù Galadɛ do Basanɛ, do ngɔ nùnɔ kɛ ma zi ti mbula 'da wa ni, mba do fala dala do onadalamɛnɔ ngɔ mbɛ nù Saroni gbaa we hɔ ndɔti nɛ.

¹⁷ Nɛ wa kɔma zi li winɔ ni vɛ̃ kɔ mbɛti do ngba soe Yotamɛ zi a nwa ngɔ nù Yuda, nɛ Yeroboamɛ zi a nwa ngɔ nù Israɛlɛ ni.

Osodanɔ kɔ nu kpala winɔ si 'biti gba wese

¹⁸ Onu kpala Rubɛnɛ do Gadɛ do mbee nu kpala Manase, wa wia zi saka osoda koto 'bu wa nalɛ ngɔ wa nalɛ do kama sambo do 'bu wa gazɛlɛ (44.760) kɛ wa ĩ ti bi bolo do ngele, do du kɔya, do nzabele ɔ dia, nɛ wa 'dafa tɛ wa we bi bolo ni.

¹⁹ Owinɔ ni wa bi zi Ohagri, do obe zã Yɛturɛ, Nafisɛ do Nodabɛ.

²⁰ Tɛ li bole ni, nɛ Orubɛnɛ, do Ogadɛ do Omanase wa gbini zã wa do Gale, nɛ wa ala nu wa hã a na, a gbaka lo. Nɛ Gale zila sambala 'da wa, nɛ a gbaka wa. Nɛ wa ia mbula ngɔ Ohagri do owinɔ kɛ wa mba zi do wa we bi bole ni.

²¹ Nɛ wa kala nadalamɛnɔ 'da wa: osamo koto 'bu nɛ mɔlɔ, obata do odua koto kama bɔa do 'bu nɛ mɔlɔ, nɛ opunda koto bɔa. Nɛ wa kala 'bɔ Owi kɔ lenɔ koto kama kpo, nɛ wa si do wa.

²² Nɛ wa gbɛa 'bɔ owi sɛnɛ wa wena. Mɛnɔ ni dɛa zi tɛ̃ ɛ ni, we duzu kɛ Gale kã zi wa kɔ bole. Wa ba le 'da Ohagri, nɛ wa dɛ fala ɔi 'da wa dɛ ngɔ nù 'da wa ni, nɛ wa ɔa dɛ di ni gbaa we hɔ ngba soe kɛ Oasiri wa nɛa ngɔ wa li bolo, nɛ wa tombo wa kɔlɔ 'duli ni.

Obe zã Manase

²³ Mbee nu kpala Manase wa nɛa, nɛ wa dɛ fala ɔi 'da wa ngɔ nùi kɛ ma yula ngbala le Basanɛ si ba gɔtɔ, nɛ ma hɔ tɛ le Bala-Hɛrmoni, do Sɛnirɛ gbaa we Sɔkpɔ tɛ kɔ le Hɛrmoni si gbãlã ngɔ i vɛ̃. Nɛ owinɔ wa kua gbaa, nɛ wa dɛlɛ zi wena.

²⁴ Li okpasa winɔ kɔ nu fɛlɛ Manase ma kɛ: Efɛrɛ, Isei, Eliɛlɛ, Azriɛlɛ, Irmeya, Hodavia do Yadiɛlɛ. Owinɔ ni vɛ̃ zi a onga wi bolo, nɛ owinɔ wa tɔ̃ zi lɛnggɛ ngawi 'da wa tɔ̃a.

^25-26 Onu kpala Rubɛnɛ do Gadɛ do mbee nu kpala Manase, wa dɛ́ zi mɔ ɔ bɔlɔ dɛ 'da Gale 'da oyaa wa gɔ. Wa bɛ̃a zi gɛnɛ Gale, nɛ wa dɔnggɔ ogele galenɔ 'da owinɔ kɛ Gale dɛa zi na, wa kumu 'da fala kɛ owinɔ 'da a wa hɔa ngɔ nùi 'da wa ni. Kɔ Gale zɔa na mɛ ni, nɛ a e dɛ kɔ sila Pulɛ do Teglatɛ-Falasarɛ, onwa ngɔ nù Asiri na, wa bi nùnɔ 'da nu kpala owinɔ talɛ ni, nɛ wa kala wa, nɛ wa tombo wa kɔlɔ 'duli dɛ ngɔ nù Hala, Habɔrɛ do Hara. Nɛ wa tumba zi 'bɔ wa dɔ̃ɔ do nu li Gozanɛ. Nɛ wa 'bana dɛ di ni fai tia sɔɛ gɛ.

Nu fɛlɛ ogã nwa nganganɔ

²⁷ Levi kua Gɛrsoni, Kehatɛ do Mɛrari.

²⁸ Nɛ Kehatɛ ko Amramɛ, Isarɛ, Hebroni do Uziɛlɛ.

²⁹ Nɛ Amramɛ ko obulu be bɔa: Aroni do Mɔizɛ, do boko be kpo, li a a Miriamɛ. Aroni kua Nadabɛ, Abihu, Elazarɛ do Itamarɛ.

³⁰ Elazarɛ kua Pinasi, nɛ Pinasi ko Abisua,

³¹ nɛ Abisua ko Buki, nɛ Buki ko Uzi,

³² nɛ Uzi ko Zeraya, nɛ Zeraya ko Mɛrayɔtɛ,

³³ nɛ Mɛrayɔtɛ ko Amaria, nɛ Amaria ko Ahitubɛ,

³⁴ nɛ Ahitubɛ ko Sadɔkɛ, nɛ Sadɔkɛ ko Ahimasi,

³⁵ nɛ Ahimasi ko Azaria, nɛ Azaria ko Yohananɛ,

³⁶ nɛ Yohananɛ ko Azaria. Azaria zi a nganga kɔ tɔa Tɛmpɛlo kɛ Salɔmɔ dɛa zi ma kɔ le Yeruzalɛmɛ ni.

³⁷ Azaria kua Amaria, nɛ Amaria ko Ahitubɛ,

³⁸ nɛ Ahitubɛ ko Sadɔkɛ, nɛ Sadɔkɛ ko Salumɛ,

³⁹ nɛ Salumɛ ko Hilkia, nɛ Hilkia ko Azaria,

⁴⁰ nɛ Azaria ko Sɛraya, nɛ Sɛraya ko Yosadakɛ.

⁴¹ Nɛ nwa Nabukɔdɔnɔzɔrɛ 'dɔlɔ zi Yosadakɛ, do 'da fala kɛ NWA Gale tumba zi Owi Yeruzalɛmɛ do Owi ngɔ nù Yuda kɔlɔ 'duli ni.