1 Sakonɔ 29 - WE NU GALE 1995

Omɛnɔ kɛ winɔ wa hã ma we dɛ tɔa Tɛmpɛloe

¹ Nwa Davidi tɔ̃a hã owinɔ kɛ wa mba zi li ngba wa vɛ̃ dɛ di ni na: “Be 'da mi Salɔmɔ kɛ NWA Gale saka a do nwa gɛ, a 'bana be zagbãlã, nɛ li a tɛ ĩ̀ mɔ gɔ. Nɛ nde toe kɛ a nɛ dɛ ma gɛ, ma gã wena. We kɛ tɔa a nɛ dɛ ma ni, mɛ a tɔa mɔ́ wele gɔ. Nɛ nde mɛ a tɔa Tɛmpɛloe 'da NWA Gale.

² Mi ba tɛ mi vɛ̃ we 'dafa omɔ dɛ do tɔa Tɛmpɛloe 'da Gale. Mi ngɛmɛ li omɔ mbali, fɛ̃a mɔ bolo, tũ mɔ bolo, mɔ bolo, ote, do ota olo gã gole, do ombe dia ota gɛzɛ kɔ tɔa kpi do kpi, do ota kɛ wa sa li nɛ na marbrɛ ni.

³ Dɛ ngɔ nɛ, mi hã mɔ mbali, do fɛ̃a mɔ bolo kɔ kpamɛnɔ 'da mi na, ma mba do kɛnɔ mi ngɛmɛ li nɛ ni, we dɛ fala dɔnggɔ do Gale. Mi dɛa na mɛ ni, we kɛ mi do kɔ̃a zã we tɔa Tɛmpɛloe wena.

⁴ Mi hã tɔnɛ mɔ mbali Ofirɛ kama kpo, nɛ tɔnɛ fɛ̃a mɔ bolo kɛ 'dɔlɔ nɛ zã nɛ bina ni kama bɔa do 'bu nɛ nalɛ, takɔ wa nãlã ma tɛ tɔa Tɛmpɛloe.

⁵ Kɔ di dɔ̃ ni, wi sanga nɛ gɛ, kɛ a kɔ̃a we hã mɔ mbali tabi fɛ̃a mɔ bole 'da a hã NWA, takɔ Owi dɛa to kɔ̃ winɔ wa dɛ do mbɔkɔ mɛnɔ, do mɔ mbali do fɛ̃a mɔ bolo kɛ ma wia ni a wio nde?”

⁶ A nɛa we tɔ̃ ni, nɛ ogã wi kɔ nu fɛlɛ kulanɔ, do ogã wi ngɔ nu kpala obe Israɛlɛ, ogã wi ngɔ osoda koto, do ogã wi ngɔ osoda kama kpo do ogã wi ngɔ owi dɛa tonɔ 'da nwa, wa kɔ̃a do kɔ sila wa,

⁷ we hã mɔ dɛa to we tɔa Tɛmpɛlo 'da Gale. Wa hã otɔnɛ mɔ mbali kama do 'bu nɛ sambo, nɛ gbãlã mɔ mbali koto 'bu, do tɔnɛ fɛ̃a mɔ bolo la ngɔ kama talɛ, nɛ tɔnɛ tũ mɔ bolo dɔ̃ɔ do kama gazɛlɛ, nɛ tɔnɛ mɔ bolo la ngɔ koto talɛ.

⁸ Nɛ owinɔ kɛ wa zi do ota olo gã gole kɔ̃ wa boe ni, wa hã ma hã Yehiɛlɛ, wi nu fɛlɛ Gɛrsoni. Yehiɛlɛ zi a wi zɔ mɔ tɛ mɔ olo gã golenɔ tɛ kɔ Tɛmpɛlo 'da NWA.

⁹ Owinɔ ni vɛ̃ wa hã zi mɛnɔ 'da wa hã NWA do dia sila, nɛ wa zi do yangga we nɛ. Nɛ nwa Davidi zi tɛ mɛ 'bɔ do yangga wena.

Sambala 'da Davidi

¹⁰ Davidi dɔngga NWA dɛ li owinɔ vɛ̃ na: “E kɔ lɛ dɔnggɔ mɔ, NWA Gale 'da yaa lɛ Yakɔbɔ fai.

¹¹ Aa NWA, mɔ a wele ngawi, do gã wi, do dɔ̃lɔ̃ li, nɛ mɔ a gã nwa ngboo. Mɔ a wele mɛnɔ li nza i do nù nga vɛ̃. Mɔ a NWA, nɛ wele mɛnɔ vɛ̃ a mɔ́ mɔ.

¹² Kpamɔ do dɔ̃lɔ̃ li ma yula 'da mɔ, nɛ mɔ nɛa ngɔ mɛnɔ vɛ̃. Nganda, do ngawi ma a kɔ mɔ. Mɔ wia tɛ ba wi dɛ ngɔ, nɛ mɔ wia tɛ hã ngawi hã wi kɛ zã mɔ kɔ̃a a ni.

¹³ Gulu nɛ ma kɛ lɛ ga zuma hã mɔ, nɛ lɛ dɔnggɔ dia zu li mɔ, Gale 'da lɛ ni.

¹⁴ “Lɛ do owinɔ 'da mi, lɛ a Owele yala iko. Nɛ lɛ do ngawi we hã mɛnɔ gɛ hã mɔ tati a lɛ iko bina. Wi hã mɛnɔ vɛ̃ hã lɛ, wi a mɔ. Nɛ lɛ hã hã mɔ a mɛnɔ kɛ mɔ hã ma hã lɛ ni iko.

¹⁵ Aa nwa, mɔ ĩ na, oyaa lɛ wa ɔ zi nɛ kɛ wa a kɔlɔ 'duli, tabi wa a ogele wi ni, nɛ lɛ là ngba lɛ do wa kɔ dungu nza 'da lɛ gɔ. Kɔ tũ dungu nza 'da lɛ ngɔ nùi gɛ ɔ́ fai gɔ. Ma ɔ nɛ gɔ̃lɔ̃ kɛ ma la dɔ̃ dɔ̃, nɛ lɛ wè we e sila lɛ ngɔ ma nyɛlɛ gɔ ni.

¹⁶ Aa NWA Gale 'da lɛ, lɛ ngɛmɛ li omɔ dɛ do tɔa, takɔ lɛ dɛ do tɔa Tɛmpɛloe hã mɔ. Mɛ a fala kɛ lɛ dɔnggɔ sɛ do mɔ, kɛ mɔ a Gale santo ni. Lɛ ĩ na, mɛnɔ vɛ̃ yolo 'da mɔ, nɛ wele nɛ vɛ̃ a mɔ mɔ.

¹⁷ “Aa Gale 'daa, mi ĩ na, mɔ ĩ ti linggamɔ zã Owele kɛ ma usu tɛ̃ ɛ usu ni, nɛ mɔ kɔ̃a gɛnɛ bɔlɔ zu dɛa mɔ. Kɔ mi hã okpamɛnɔ 'da mi gɛ hã mɔ do dia sila. Sɔɛ gɛ, mi zɔa owinɔ 'da mɔ, wa mba li ngba wa do yangga we hã mɔ hã mɔ.

¹⁸ NWA Gale 'da oyaa lɛ Abrahama, Izaka do Yakɔbɔ, mɔ dɛ́ na, owinɔ 'da mɔ wa 'bana do dia linggamɛ gɛ fai, nɛ wa gbini zã wa ngboo do mɔ.

¹⁹ Nɛ mɔ hã́ dia sila hã be 'da mi Salɔmɔ na, a dɛ mbulanɔ 'da mɔ vɛ̃, nɛ a 'dafa fala dɔnggɔ do mɔ, kɛ mi ngɛmɛ li omɔ nɛ vɛ̃ ia ni.”

²⁰ 'Do nɛ, nɛ Davidi tɔ̃ 'bɔ hã owinɔ ni na: “Nɛ dɔ́nggɔ́ Gale 'da nɛ!” Nɛ wa vɛ̃ wa hã iɔ̃nae hã NWA Gale 'da oyaa wa, nɛ wa gu nù do zugolo wa we hã dɔ̃lɔ̃ li hã NWA Gale, do nwa Davidi tɛ mɛ 'bɔ.

²¹ Fala sa 'do ki ni, nɛ wa hã dɔnggamɔ kɛ ma be dɛa na ni hã Gale. Nɛ wa dɔa ongɔmbɔ koto kpo, do odua koto kpo, do obata koto kpo, mba do dɔnggamɔ dɔ̃ we dɔnggɔ do Gale. Nɛ dɔnggamɔ dɛa na kɛ wa hã ma ni, ma dɛlɛ zi wia do kɛ na, obe Israɛlɛ vɛ̃ kɛ wa mba li ngba wa di ni ni wa nyɔngɔ, nɛ ma kpa nu wa ni.

²² Nɛ do ngba soe ni, nɛ wa nyɔngɔ mɔ, nɛ wa nɔ dɔ̃, nɛ wa dɛ yangga wena dati NWA Gale. Nɛ 'do ki ni, nɛ wa e 'bɔ Salɔmɔ, be 'da Davidi do nwa. Nɛ wa hã to nwa hã a na, a dɛ do zu li NWA Gale. Nɛ do kpo ngba soe ni, nɛ wa a nɔ zu Sadɔkɛ na, a hɔ gã nwa nganga.

²³ Salɔmɔ dungu ngɔ kpongbo nwa kɛ NWA Gale hã ma hã a ni olo baa a Davidi. Nɛ a dɛa zi to nwa 'da a de wena, nɛ nu kɔnggɔ Israɛlɛ vɛ̃ wa zele zi a, nɛ wa dɛ mbula nu a.

²⁴ Ogã winɔ vɛ̃, do sodanɔ, do tala obenɔ 'da Davidi, wa ĩ zi ti dɔ̃lɔ̃ li to nwa 'da Salɔmɔ.

²⁵ NWA Gale gã zi 'da dɔ̃lɔ̃ li 'da Salɔmɔ, nɛ ma kpa li obe Israɛlɛ vɛ̃. Nɛ dɔ̃lɔ̃ li to nwa 'da a, ma nɛa zi ngɔ owinɔ wa dungu zi nwa ngɔ obe Israɛlɛ dati a ni vɛ̃.

Sɔkpɔ dɛa to nwa 'da Davidi

²⁶ Davidi, be 'da Yɛse dɛa zi to nwa 'da a ngɔ obe Israɛlɛ vɛ̃ 'do 'bu sabɛlɛ nalɛ.

²⁷ A ɔa tɛ Hebroni sabɛlɛ sambo, nɛ a ɔ tɛ Yeruzalɛmɛ sabɛlɛ 'bu nɛ talɛ ngɔ nɛ talɛ.

²⁸ Davidi dɛa zi gbɛlɛ ngboo, nɛ a zi do kpamɔ do dɔ̃lɔ̃ li wena, nɛ a fia dɛ kɔ nɛ. Nɛ be 'da a Salɔmɔ dungu nwa olo a.

²⁹ Wa kɔma lɛnggɛ ngɔ nwa Davidi yolo do kuti nɛ gbaa we hɔ ndɔti nɛ kɔ 'bukunɔ kɛ li ma a: “Dɛa tonɔ 'da Samuɛlɛ, wi zɔ mɔ” do “Dɛa tonɔ 'da Natanɛ, wi gba olo nu Gale” do “Dɛa tonɔ 'da Gadɛ, wi gba olo nu Gale.”

³⁰ Kɔ 'bukunɔ ni, wa tɔ̃a we dɛa to nwa 'da a, do dɛa mɔ ngawinɔ 'da a, mba do mɛnɔ kɛ ma dɛa zi tɛ̃ ɛ kɔ dungu nza 'da a ngboo ni, do kɔ dɛa to nwa 'da a ngɔ obe Israɛlɛ, do ngɔ gele nùnɔ ni.